1055. ``ஒருவன் தன் மனைவியை படுக்கைக்கு அழைத்து அவள் மறுத்துவிட (அவளின்) கணவன் கோபமான நிலையில் இரவைக் கழித்தால், விடியும் வரை வானவர்கள் அவளைச் சபிக்கிறார்கள்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
இங்கு புகாரீயில் வாசகம் இடம் பெற்றுள்ளது.
முஸ்லிமில், ``அவளின் கணவன் அவள் குறித்து மகிழ்ச்சியடையும் வரை வானத்தில் இருப்பவன் (அல்லாஹ்) அவள் மீது கோபமாய் இருக்கிறான்'' உள்ளது.

1057. இறைத்தூதர்(ஸல்) மக்கள் சிலரிடையே இருந்தபோது, நான் அவர்களிடம் சென்றபோது,
``கீலா செய்வதை தடுத்துவிட நான் எண்ணினேன். ஆனால், ரோமர்களையும், பாரசீகர்களையும் பார்க்கும்போது `கீலா' செய்வதால் அவர்களின் பிள்ளைகளுக்கு எவ்வித தீங்கும் ஏற்படவில்லை'' என இறைத்தூதர்(ஸல்) கூறினார்கள்.
பின்னர், அஸ்ல் செய்வது குறித்து இறைத்தூதர்(ஸல்) அவர்களிடம் மக்கள் வினவினர்.
``அது குழந்தையை மறைமுகமாக உயிருடன் புதைப்பதாகும்' என்று இறைத்தூதர்(ஸல்) கூறினார்கள் என ஜுதாமா பின்த் வஹப்(ரலி) அறிவித்தார்.
நூல்: முஸ்லிம்
குறிப்பு: குழந்தைக்குப் பாலூட்டும் காலகட்டத்தில் ஒருவர் தன் மனைவியுடன் பாலுறவு கொள்வது கீலா எனப்படும். பாலுறவில் உச்சகட்டத்தின்போது, அதாவது விந்து வெளிப்படும்போது தன் ஆண்குறியை வெளியில் எடுத்து விந்தை வெளியில் விடுதல் அஸ் ல் எனப்படும்.

1059. நபி(ஸல்) அவர்களின் காலத்தில் குர்ஆன் இறக்கப்பட்டுக் கொண்டிருந்த சூழ்நிலையில் நாங்கள் `அஸ்ல்' செய்திருக்கிறோம். இது தடைசெய்யப்பட வேண்டியதாய் இருந்திருப்பின் அதைச் செய்யக் கூடாது என்று குர்ஆன் எங்களுக்குத் தடை விதித்திருக்கும் என ஜாபிர்(ரலி) கூறினார்.
நூல்கள்: புகாரீ, முஸ்லிம்
முஸ்லிமின் மற்றோர் அறிவிப்பின்படி இச்செய்தி நபி(ஸல்) அவர்களுக்கு எட்டியும், அவர்கள் இதனைத் தடைசெய்யவில்லை என உள்ளது.
குறிப்பு: ஹதீஸ் எண் 1054 ஹதீஸ் மற்றும் அதைத் தொடர்ந்து வரக்கூடிய இரண்டு ஹதீஸ் களுக்கும் இடையில் முரண்பாடு இருப்பதாகக் கருதலாம். ஆனால், இங்கு மனிதனின் எண்ணத்தின் அடிப்படையில்தான் இது ஹராம் அல்லது ஹலால் ஆக அமையும். அதாவது குழந்தையே பெற்றுக் கொள்ளக்கூடாது என்ற எண்ணத்தில் அஸ் ல் செய்து கொண்டே இருந்தால் அது ஹராம் ஆகும். ஆனால், குழந்தை மற்றும் மனைவியின் உடல்நிலையைக் கவனத்தில் கொண்டு அஸ் ல் செய்தல் ஹராம் ஆகாது; அனுமதிக்கப்பட்டதாகும் என்பதைப் புரிந்து கொள்ள வேண்டும்.

1061. ஸஃபியா(ரலி) அவர்களை அடிமைத் தனத்திலிருந்து இறைத்தூதர்(ஸல்) விடுவித்தார்கள். அந்த விடுதலையையே அவருக்கு மஹராகவும் அறிவித்தார்கள் என அனஸ்(ரலி) அறிவித்தார்.
நூல்கள்: புகாரீ, முஸ்லிம்

1063. ஃபாத்திமா(ரலி) அவர்களை அலீ(ரலி) திருமணம் செய்தபோது, ``அவளுக்கு (மஹராக) ஏதேனும் கொடு!'' என இறைத்தூதர்(ஸல்) கூறினார்கள்.
``என்னிடம் எதுவுமில்லை'' என அலீ கூறினார்.
``ஹுதமிய்யாவால் தயாரிக்கப்பட்ட உன்னுடைய கேடயம் எங்கே?'' என்று இறைத்தூதர்(ஸல்) வினவினார்கள் என இப்னு அப்பாஸ்(ரலி) அறிவித்தார்.
நூல்கள்: அபூ தாவூத், நஸயீ
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1065. ஒரு பெண்ணை மணமுடித்து அவளுக்கென மஹர் நிர்ணயம் செய்யாமலேயே இறந்துபோன ஒருவர் குறித்து இப்னு மஸ்வூத்(ரலி) அவர்களிடம் வினவப்பட்டது.
``மற்ற பெண்களுக்குரியது போன்ற மஹர் அவளுக்கு உண்டு. அது குறைவாகவோ, கூடுதலாகவோ இல்லை. மேலும், அவள் மீது (இத்தா) கடமையாகும். இன்னும் அவளுக்குச் சொத்துரிமையும் உண்டு'' எனக் கூறினார்கள்.
அப்போது மஅகல் இப்னு ஸினான் அல் அஷ்ஜயீ(ரலி) எழுந்து, ``எங்கள் குலத்தைச் சேர்ந்த பர்வஃ பின்த் வாஷிக் எனும் பெண்ணிற்கு இறைத்தூதர்(ஸல்) தீர்ப்பளித்து போன்றே தாங்கள் தீர்ப்பளித்துள்ளீர்கள்'' எனக் கூறினார்.
(இதனைச் செவியுற்ற) இப்னு மஸ்வூத்(ரலி) மகிழ்வுற்றார் என அல் கமா(ரஹ்) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா.
இமாம் திர்மிதீ(ரஹ்)(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.
மற்றொரு குழுவினர் இதனை `ஹஸன்' எனக் குறிப்பிட்டுள்ளனர்.

1067. காலணிகளுக்குப் பதிலாக ஒரு பெண்ணைத் திருமணம் செய்து கொள்ள இறைத்தூதர்(ஸல்) அனுமதி அளித்தார்கள் என அப்துல்லாஹ் இப்னு ஆமிர் இப்னு ரபீஆ தம் தந்தையிடமிருந்து அறிவித்தார்.
நூல்: திர்மிதீ
இமாம் திர்மிதீ(ரஹ்) இதனை ஆதாரப்பூர்வமானது எனக் குறிப்பிட்டுள்ளார். இதில் கருத்து வேறுபாடுகளும் உள்ளன.

1069. ``பத்து திர்ஹமிற்குக் குறைவாக மஹர் இருக்கக்கூடாது'' என அலீ(ரலி) கூறினார்.
இது தாரகுத்னீ(ரஹ்) இதனை ``மவ்கூஃப்'' எனும் தரத்தில் பதிவிட்டுள்ளார். இதன் அறிவிப்பாளர் தொடரில் பிரச்னை உள்ளது.

1071. அம்ரா பின்த் ஜவ்ன் இறைத்தூதர்(ஸல்) அவர்களிடம் பாதுகாப்புத் தேடினார். அவர் இறைத்தூதர்(ஸல்) அவர்களிடம் கொண்டுவரப்பட்டபோது, அதாவது, இறைத்தூதர்(ஸல்) அவர்களை அவர் திருமணம் செய்தபோது, ``நீ சரியான இடத்தில் பாதுகாப்புத் தேடிக் கொண்டாய்'' என்று இறைத்தூதர்(ஸல்) கூறினார்கள். பின்னர், அவரை தலாக் (மணவிலக்கு) செய்து மூன்று துணிகளை அவருக்கு உதவிப் பொருளாகக் கொடுக்குமாறு உஸாமாவிடம் கட்டளையிட்டார்கள் என ஆயிஷா(ரலி) அறிவித்தார்.
நூல்: இப்னு மாஜா
இதன் அறிவிப்புத் தொடரில் ஒருவர் விடுபட்டுள்ளார்.

1073. அப்துர் ரஹ்மான் இப்னு அவ்ஃப்(ரலி) மீது மஞ்சள் நிறத்தைக் கண்ட இறைத்தூதர்(ஸல்), ``இது என்ன?'' எனக் கேட்டார்கள்.
``இறைத்தூதர் அவர்களே! ஒரு (பேரீச்சம்பழக்) கொட்டை அளவு தங்கத்திற்குப் பகரமாக நான் ஒரு பெண்ணைத் திருமணம் செய்துகொண்டேன்'' எனக் கூறினார்.
``அல்லாஹ் உனக்கு அருள்வளம் அளிப்பானாக! நீ ஓர் ஆட்டையேனும் வலீமா (திருமண) விருந்தாகக் கொடு! என்று இறைத்தூதர்(ஸல்) கூறினார்கள் என அனஸ் இப்னு மாலிக்(ரலி) அறிவித்தார்.
நூல்கள்: புகாரீ, முஸ்லீம்
இங்கு முஸ்லிமின் வாசகம் இடம் பெற்றுள்ளது.