1266. ``தன் அடிமையின் மீது அவதூறாகக் குற்றம் சாட்டியவன் சொன்னது போல் (அவன்) இல்லை எனில் மறுமையில் அவனுக்குக் கசையடி கொடுக்கப்படும்'' என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்

1268. மூன்று திர்ஹம்கள் விலையுடைய கேடயத்தைத் திருடியதற்காக ஒருவரின் கையை இறைத்தூதர்(ஸல்) வெட்டினார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்

1270. திருட்டுக் குற்றம் புரிந்த உயர்குலத்துப் பெண்ணுக்கு தண்டனையைத் தளர்த்தும்படி தம்மிடம் பரிந்துரைத்த தம் வளர்ப்புப் பேரன் உஸாமாவை நோக்கி, ``அல்லாஹ் நிர்ணயித்துள்ள தண்டனைகளில் ஒன்றைத் தளர்த்தும்படியா நீ பரிந்துரைக்கிறாய்?'' என்று இறைத்தூதர்(ஸல்) கூறிவிட்டு எழுந்து நின்று உரை நிகழ்த்தினார்கள்.
அதில், ``மக்களே! உங்களுக்கு முன்னிருந்தவர்கள் தங்களிடையே கௌரவமானவன் திருடினால் அவனை விட்டுவிடுவர். தங்களிடையே உள்ள பலவீனன் திருடினால் அவனுக்கு தண்டனை தருவர். அதன் காரணமாகவே அவர்கள் அழிக்கப்பட்டார்கள்'' என்று கூறினார்கள் என ஆயிஷா(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது.
ஆயிஷா(ரலி) அவர்களின் மற்றோர் அறிவிப்பில் ``ஒரு பெண் இரவலாக பாத்திரத்தை வாங்குவாள். அதைத் திரும்பிக் கேட்டால் தர மறுப்பாள். அதனால் அவளின் கையை வெட்டுமாறு இறைத்தூதர்(ஸல்) கட்டளையிட்டார்கள்'' என உள்ளது. இது முஸ்லிமில் பதிவிடப்பட்டுள்ளது.
குறிப்பு: ஏமாற்றும் நோக்கத்துடனேயே இரவல் வாங்கி அதனைத் திரும்பத் தராமலேயே மறுத்து வந்ததால், அச்செயலைத் திருட்டுக்குச் சமமாகக் கருதி இவ்வாறு தண்டிக்கப்பட்டிருக்கலாம்.

1272. ``பழங்கள் மற்றும் பேரீச்சங் குருத்துக்களுக்காகக் கையை வெட்டக் கூடாது'' என்று இறைத்தூதர்(ஸல்) கூற தாம் செவியுற்றேன் என ராஃபிஃ இப்னு கதீஜ்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ திர்மிதீ மற்றும் இப்னு மாஜா
இமாம் திர்மிதீ மற்றும் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.

1274. அபூ ஹுரைரா(ரலி) வாயிலாக ஹாகிமில், ``அவனுக்கு அதன் பொருள் விளக்கப்பட்டது. இவனை அழைத்துச் சென்று (கையை) வெட்டுங்கள். இரத்தத்தை (வெளியேறவிடாமல்) வெட்டிய இடத்தில் சூடு போடுங்கள்'' என்று இறைத்தூதர்(ஸல்) கூறினார்கள் என உள்ளது.
இது பஸ்ஸாரிலும் உள்ளது. இதன் அறிவிப்புத் தொடர் சரியானது.

1276. (மரத்தில்) தொங்கிக் கொண்டிருக்கும் பேரீச்சம் பழம் குறித்து இறைத்தூதர்(ஸல்) அவர்களிடம் வினவப்பட்டது.
``தன் மடியில் அள்ளி எடுத்துக் கொள்ளாமல் வயிற்றுத் தேவைக்காக உண்பவனுக்குத் தண்டனை இல்லை. இன்னும், அதில் சிறிதளவு வெளியில் எடுத்துச் செல்பவன் மீது அபாரதம், தண்டனை இரண்டும் உள்ளது. அதைக் களஞ்சியத்தில் சேமித்த பின்பு அதில் சிறிதளவு வெளியில் எடுத்துச் செல்பவனின் கையை (அந்தப்பழம்) ஒரு கேடயத்தின் விலைக்கு சமமானதாய் இருந்தால் வெட்டிவிட வேண்டும்'' என்று இறைத்தூதர்(ஸல்) கூறினார்கள் என அப்துல்லாஹ் இப்னு அம்ர் இப்னு ஆஸ்(ரலி) அறிவித்தார்.
நூல்கள்: அஹ்மத், நஸயீ
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1278. நபி(ஸல்) அவர்களிடம் ஒரு திருடன் கொண்டு வரப்பட்டான்.
``அவனைக் கொன்று விடுங்கள்'' என இறைத்தூதர்(ஸல்) கூறினார்கள்.
``இறைத்தூதர் அவர்களே! இவர் திருடத்தான் செய்தார்'' என மக்கள் கூறினார்கள்.
``அவன் கையை வெட்டுங்கள்'' என்று இறைத்தூதர்(ஸல்) உத்தரவிட்டார்கள். அவனுடைய கை வெட்டப்பட்டது. பின்னர் மறுபடியும் அவன் கொண்டு வரப்பட்டான்.
(அப்போதும்), ``அவனைக் கொன்று விடுங்கள்'' என இறைத்தூதர்(ஸல்) கூறினார்கள்.
முன்பு சொன்னதையே மக்கள் கூறினார்கள். முன்பு போன்றே (கை வெட்டும்படி) உத்தரவிட்டார்கள். பின்னர் அவன் மூன்றாவது முறையும் கொண்டு வரப்பட்டான். பின்னர் அவன் மூன்றாவது முறையும் கொண்டு வரப்பட்டான். முன்பு போன்றே சொன்னார்கள். பின்னர் நான்காவது முறையும் அவ்வாறே அவன் கொண்டு வரப்பட்டான். முன்பு போன்றே சொன்னார்கள். பின்னர் அவன் ஐந்தாவது முறை கொண்டு வரப்பட்டான். அப்போது, ``அவனைக் கொன்று விடுங்கள்'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்கள்: அபூ தாவூத், நஸயீ
இமாம் நஸாயீ(ரஹ்) இதனை `முன்கர்' எனக் குறிப்பிட்டுள்ளார்.

1280. மது அருந்தியிருந்த ஒருவர் இறைத்தூதர்(ஸல்) அவர்களிடம் கொண்டு வரப்பட்டார். இறைத்தூதர்(ஸல்) இரண்டு பேரீச்சங்கம்புகளால் நாற்பது அடிகள் அவருக்குக் கொடுத்தார்கள். இவ்வாறே அபூ பக்ர்(ரலி) அவர்களும் செய்தார்கள். உமர்(ரலி) அவர்களின் காலத்தில் மக்களிடம் ஆலோசனை கேட்கப்பட்டது. அப்போது, ``(எண்பது அடி கொடுங்கள்) (இதற்கான) தண்டனைகளில் எண்பதுதான் குறைந்தது'' என்று அவ்ஃப்(ரலி) கூறினார். உமர்(ரலி) அவர்களும் அவ்வாறே கட்டளையிட்டார்கள்'' என அனஸ்(ரலி) அறிவித்தார்.
நூல்கள்: புகாரீ, முஸ்லிம்

1282. மது அருந்துபவனுக்குரிய தண்டனை பற்றிக் குறிப்பிட்டபோது, ``அவன் மது குடித்தால் கசையடி கொடுங்கள். மீண்டும் அவன் மது குடித்தால் கசையடி அடியுங்கள். அவன் மூன்றாம் முறையும் மது குடித்தால் அப்போதும் அவனுக்குக் கசையடி கொடுங்கள். அவன் பின்னர், நான்காவது முறையும் மது குடித்தால் அவனுடைய கழுத்தை வெட்டிவிடுங்கள் (தலையைக் கொய்துவிடுங்கள்)'' என்று இறைத்தூதர்(ஸல்) கூறினார்கள் என முஆவியா(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா.
இங்கு அஹ்மதின் வாசகம் இடம் பெற்றுள்ளது.
``நான்காவது முறையாகக் குடித்துவிட்டு வந்தால் அவனைக் கழுத்தை வெட்டிக் கொன்றுவிடுங்கள்'' என்று சொல்லும் இந்த ஹதீஸின் சட்டம் மற்றோர் அறிவிப்பின் வாயிலாக மாற்றப்பட்டுவிட்டது என இமாம் திர்மிதீ(ரஹ்) கூறியுள்ளார். வெளிப்படையான அந்த அறிவிப்பை ஸுஹ்ரீ(ரஹ்) வாயிலாக இமாம் அபூ தாவூத்(ரஹ்) தம்முடைய நூலில் பதிவிட்டுள்ளார்.

1284. ``இறைஇல்லத்தில் தண்டனைகள் நிறைவேற்றப்படக் கூடாது'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்கள்: திர்மிதீ, ஹாகிம்