1275. ``திருடனுக்குரிய தண்டனை நிறைவேற்றப்பட்டப் பின்பு அவன் மீது அபாரதம் விதிக்கக் கூடாது'' என்று இறைத்தூதர்(ஸல்) கூறினார்கள் என அப்துர் ரஹ்மான் இப்னு அவ்ஃப்(ரலி) அறிவித்தார்.
நூல்: நஸயீ
இதன் அறிவிப்பாளர் தொடர் துண்டிக்கப்பட்டுள்ளது என இமாம் நஸயீ(ரஹ்) கூறுகிறார். இமாம் அபூ ஹாதிம்(ரஹ்) இக்கருத்து மறுக்கத் தக்கது எனக் கூறியுள்ளார்.

1277. என்னுடைய போர்வையைத் திருடிய ஒருவனின் கையை வெட்டுமாறு இறைத்தூதர்(ஸல்) கட்டளையிட்டபோது, அவனை விட்டுவிடும்படி நான் அவனுக்காகப் பரிந்துரைத்தேன்.
``என்னிடம் கொண்டு வருமுன் இவர் மீது உனக்கு ஏன் இரக்கம் ஏற்படவில்லை?'' என்று இறைத்தூதர்(ஸல்) வினவினார்கள் என ஸஃப்வான் இப்னு உமய்யா(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா.
இமாம் இப்னுல் ஜாரூத் மற்றும் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.

1279. ஹாரிஸ் இப்னு ஹாதிப் அவர்களின் இதே போன்ற அறிவிப்பு ஒன்றை இமாம் நஸயீ(ரஹ்) பதிவிட்டுள்ளார். ``ஐந்தாவது முறை திருடும்போது கொல்லச் சொன்ன ஹதீஸின் சட்டம் மன்ஸுக் மாற்றப்பட்டுவிட்டது'' என இமாம் ஷாபியீ(ரஹ்) கூறியுள்ளார்.

1281. முஸ்லிமில் வலீத் இப்னு உக்பாவின் சம்பவத்தில், அலீ(ரலி) அவர்களின் அறிவிப்பு ஒன்று இடம் பெற்றுள்ளது. அதில், ``இறைத்தூதர்(ஸல்) மது அருந்தியவனுக்கு நாற்பது கசையடி கொடுத்தார்கள். அபூ பக்ர்(ரலி) அவர்களும் நாற்பது கசையடி அடித்தார்கள். உமர்(ரலி) எண்பது கசையடி கொடுத்தார்கள். இவை ஒவ்வொன்றும் சுன்னத்தாகும். எண்பது கசையடிகளே எனக்கு மிகவும் பிடித்தமானதாகும்'' என உள்ளது.
(மது அருந்தியதால்) அவர் வாந்தி எடுத்ததை, தான் பார்த்ததாக ஒருவர் சாட்சி கூறினார். அதற்கு ``அவர் மது அருந்தும் வரை வாந்தி எடுக்கவில்லை அல்லவா?'' என்று உஸ்மான்(ரலி) கேட்டார்கள் என்றும் அந்த ஹதீஸில் உள்ளது.
குறிப்பு: நபி(ஸல்) அவர்கள் கொடுத்த நாற்பது கசையடிகளைவிட உமர்(ரலி) கொடுத்த எண்பது கசையடிகளே எனக்குப் பிடித்தமானவை என அலீ(ரலி) கூறியதற்குக் காரணம், இறைத்தூதர்(ஸல்) அவர்களின் வழிமுறையைப் பிடிக்காமல் அல்ல; துணிச்சலாக மது அருந்துபவனின் நிலையை மாற்றுவதற்கு அதிகத் தண்டனையே உகந்தது எனக் அலீ(ரலி) கருதியதால்தான் என்பதை அறிக! மேலும், நபி(ஸல்) மது அருந்துபவனுக்குத் தண்டனை இவ்வளவுதான் என நிர்ணயம் செய்யவில்லை.

1283. ``நீங்கள் யாரையேனும் அடிக்க நேர்ந்தால், முகத்தில் அடிப்பதைத் தவிர்த்துக் கொள்ளுங்கள்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்

1285. மதுவைத் தடை செய்யும் சட்டத்தை அல்லாஹ் அருளியபோது மதீனாவில் பேரீச்சம்பழத்தால் செய்யப்பட்டதைத் தவிர வேறு எந்த மதுவும் இருக்கவில்லை என அனஸ்(ரலி) அறிவித்தார்.
நூல்: முஸ்லிம்

1287. ``போதை தரக்கூடிய ஒவ்வொன்றும் மதுவாகும் போதை தரக்கூடிய ஒவ்வொன்றும் தடைசெய்யப்பட்டதாகும்'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்: முஸ்லிம்

1289. நபி(ஸல்), உலர்ந்த திராட்சையால் நபீத் எனும் பானத்தைத் தயாரித்து முதல் நாள், அதற்கடுத்த நாள் மற்றும் மூன்றாம் நாள் மாலை வரை அதைக் குடிப்பார்கள். பிறருக்குக் குடிக்கக் கொடுப்பார்கள். அதற்குப் பின்பு அதில் ஏதாவது மிச்சம் இருந்தால், அதைக் கீழே கொட்டிவிடுவார்கள் என இப்னு அப்பாஸ்(ரலி) அறிவித்தார்.
நூல்: முஸ்லிம்

1291. மருந்துக்காகத் தயாரிக்கும் மது குறித்து இறைத்தூதர்(ஸல்) அவர்களிடம் தாரிக் இப்னு ஸுவைத்(ரலி) வினவினார்.
``நிச்சயமாக அது மருந்தல்ல; மாறாக அது நோயாகும்'' என்று இறைத்தூதர்(ஸல்) கூறினார்கள் என வாயில் இப்னு ஹள்ரமீ(ரலி) அறிவித்தார்.
நூல்கள்: முஸ்லிம் மற்றும் அபூ தாவூத்

1293. ``இறைத் தண்டனைக்குரிய குற்றங்களைத் தவிர கண்ணியமானவர்கள் செய்யும் பிற தவறுகளுக்காக அவர்களை (தண்டிக்காமல்) மன்னித்துவிடுங்கள்'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்.
நூல்கள்: அஹ்மத், அபூ தாவூத், நஸயீ மற்றும் பைஹகீ