1449. ஒரு சத்தியம் மற்றும் ஒரு சாட்சியைக் கொண்டு இறைத்தூதர்(ஸல்) தீர்ப்பளித்தார்கள் என இப்னு அப்பாஸ்(ரலி) அறிவித்தார்.
நூல்கள்: முஸ்லிம், அபூ தாவூத் மற்றும் நஸயீ
இதன் அறிவிப்புத் தொடர் சரியானது என இமாம் நஸயீ(ரஹ்) குறிப்பிட்டுள்ளார்.
குறிப்பு: வாதியிடமிருந்து சாட்சியத்தையும், பிரதிவாதியிடமிருந்து சத்தியத்தையும் பெற்று அதன்படி தீர்ப்பளித்தார்கள்.

1451. ``மக்களுக்கு, அவர்களின் வாதத்தை அடிப்படையாகக் கொண்டு அவர்கள் கோருவதை எல்லாம் (பிரதிவாதியை விசாரிக்காமல்) கொடுத்தோம் என்றால் மக்கள், பலரின் உயிருக்கும் உடமைக்கும் உரிமை கொண்டாடத் தொடங்கிவிடுவார்கள். எனினும், பிரதிவாதியின் மீது (தன் மீது சுமத்தப்பட்ட குற்றத்தை மறுப்பதற்கு) சத்தியம் செய்யும் கடமை உள்ளது'' என இப்னு அப்பாஸ்(ரலி) அறிவித்தார்.
நூல்கள்: புகாரீ, முஸ்லிம்

1453. ஒரு கூட்டத்தை இறைத்தூதர்(ஸல்) சத்தியம் செய்யுமாறும் கட்டளையிட்டார்கள். அவர்கள் சத்தியம் செய்வதில் விரைவதைக் கண்ட இறைத்தூதர்(ஸல்), ``யார் சத்தியம் செய்வது?'' என்பதைக் குலுக்கல் போடுமாறு கட்டளையிட்டார்கள் என அபூ ஹுரைரா(ரலி) அறிவித்தார்.
நூல்: புகாரீ

1455. ``ஒரு சத்தியம் செய்து, அதன் காரணமாக ஒரு முஸ்லிமின் சொத்தைப் பறித்தவன், அதில் பொய்யனாய் இருந்தால், மறுமையில் அல்லாஹ்வை தன் மீது கோபம் சொண்ட நிலையில் சந்திப்பான்'' என்று இறைத்தூதர்(ஸல்) கூறினார்கள் என அஷ்அஸ் இப்னு கைஸ்(ரலி) அறிவித்தார்.
நூல்கள்: புகாரீ, முஸ்லிம்

1457. ``என்னுடைய மிம்பருக்கு அருகே (அல்லது மிம்பரில் நின்று) பாவமான (பொய்) சத்தியம் செய்பவர் தன் இருப்பிடத்தை நரகத்தில் அமைத்துக் கொள்ளட்டும்'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்கள்: அஹ்மத், அபூ தாவூத் மற்றும் நஸயீ
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1459. ஓர் ஒட்டகம் தொடர்பாக இருவர் சண்டையிட்டுக் கொண்டனர். அவர்களில் ஒவ்வொருவரும் இந்த ஒட்டகம் என்னிடமே பிறந்தது என்றனர். தம் வாதத்திற்கான சான்றுகளைச் சமர்ப்பித்தனர். அந்த ஒட்டகம் யாரிடமிருந்தோ, அவருக்கே (அது உரியது) என்று இறைத்தூதர்(ஸல்) தீர்ப்பளித்தார்கள் என ஜாபிர்(ரலி) அறிவித்தார்.
நூல்: தாரகுத்னீ

1461. ஒருமுறை இறைத்தூதர்(ஸல்) தம் முகத்தில் மகிழ்ச்சி ரேகைகள் மின்ன என்னிடம் வந்தார்கள். ``(ஆயிஷாவே!) முஜஸ்ஸிஸ் அல் முத்லிஜியை நீ பார்க்கவில்லையா? அவர் ஸைது இப்னு ஹாரிஸா மற்றும் உஸாமா இப்னு ஸைதைப் பார்த்து, இந்தக் கால்கள் ஒன்றோடு ஒன்று தொடர்புடையது எனக் கூறினார்'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்.
நூல்கள்: புகாரீ, முஸ்லிம்
குறிப்பு: நபி (ஸல்) அவர்களின் அடிமையும், வளர்ப்பு மகனுமான ஸைத் இப்னு ஹாரிஸா(ரலி) அவர்களும், அவர்களின் மனைவி உம்மு அய்மன்(ரலி) அவர்களும் கறுப்பு நிறமுடையவர்களாய் இருந்தனர். அவர்களின் மகன் உஸாமாவோ வெள்ளை நிறமுடையவராய் இருந்தார். அதனால், இணைவைப்பவர்கள் அவரின் பிறப்பைப் பற்றித் தவறாகப் பேசினார்கள்.
அப்போதுதான் முஜஸ்ஸிஸ் என்பவர் அங்க அடையாளங்களை வைத்து - இரத்த உறவுகளை இனங்கண்டு சொல்லும் திறன் கொண்டவர், ஸைத்(ரலி) அவர்களும், உஸாமா(ரலி) அவர்களும் போர்வையால் முகத்தையும், உடலையும் மூடிக் கொண்டு, கால்கள் வெளியில் தெரியும்படி படுத்திருந்தபோது அதனைப் பார்த்துவிட்டு, ``இவை ஒன்றுக்கொன்று இரத்த உறவுடையவை'' என்று சொன்னார். எனவே, நபி(ஸல்) இணைவைப்பாளர்களின் குற்றச்சாட்டு பொய்யென நிரூபிக்கப்பட்டு விட்டதாக மகிழ்ந்தார்கள். காண்க: புகாரீ ஹதீஸ் எண் 3555, 3733

1463. ``(அடிமைகளான) இரண்டு முஸ்லிம் பெண்களை விடுதலை செய்த ஒரு முஸ்லிம் நரகத்திலிருந்து விடுதலை பெறுவதற்கு, அவ்விரு முஸ்லிம் பெண்களே காரணமாவர்'' என அபூ உமாமா(ரலி) வாயிலாக திர்மிதீயில் `ஸஹீஹ்' எனும் தரத்தில் பதிவிடப்பட்டுள்ளது.

1465. ``எந்தச் செயல் சிறந்தது'' என நான் இறைத்தூதர்(ஸல்) அவர்களிடம் கேட்டேன்.
``அல்லாஹ்வின் மீது நம்பிக்கை வைப்பதும், அவனுடைய வழியில் போராடுவதும்'' என இறைத்தூதர்(ஸல்) கூறினார்கள்.
``எப்படிப்பட்டோரை விடுதலை செய்வது சிறந்தது?'' என நான் கேட்டேன்.
``எஜமானனிடம் இருக்கக் கூடிய அடிமைகளிலேயே அவர்களுக்கு மிகவும் விருப்பமான விலை உயர்ந்த அடிமையை விடுதலை செய்வது'' என்று இறைத்தூதர்(ஸல்) கூறினார்கள் என அபூ தர்(ரலி) அறிவித்தார்.
நூல்கள்: புகாரீ, முஸ்லிம்

1467. புகாரீ, முஸ்லிம் அறிவித்துள்ள (மற்றொரு) ஹதீஸில் ``இல்லையெனில் அந்த அடிமையின் (நியாயமான) விலையை மதிப்பிட்டு (மீதி பங்குகளின் விலையை தருவதற்காக) உழைத்து சம்பாதித்துக் கொள்ள அனுமதிக்கப்பட வேண்டும். அதிக சிரமத்தை தரக் கூடாது'' என அபூ ஹுரைரா(ரலி) வாயிலாக உள்ளது.