1459. ஓர் ஒட்டகம் தொடர்பாக இருவர் சண்டையிட்டுக் கொண்டனர். அவர்களில் ஒவ்வொருவரும் இந்த ஒட்டகம் என்னிடமே பிறந்தது என்றனர். தம் வாதத்திற்கான சான்றுகளைச் சமர்ப்பித்தனர். அந்த ஒட்டகம் யாரிடமிருந்தோ, அவருக்கே (அது உரியது) என்று இறைத்தூதர்(ஸல்) தீர்ப்பளித்தார்கள் என ஜாபிர்(ரலி) அறிவித்தார்.
நூல்: தாரகுத்னீ

1461. ஒருமுறை இறைத்தூதர்(ஸல்) தம் முகத்தில் மகிழ்ச்சி ரேகைகள் மின்ன என்னிடம் வந்தார்கள். ``(ஆயிஷாவே!) முஜஸ்ஸிஸ் அல் முத்லிஜியை நீ பார்க்கவில்லையா? அவர் ஸைது இப்னு ஹாரிஸா மற்றும் உஸாமா இப்னு ஸைதைப் பார்த்து, இந்தக் கால்கள் ஒன்றோடு ஒன்று தொடர்புடையது எனக் கூறினார்'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்.
நூல்கள்: புகாரீ, முஸ்லிம்
குறிப்பு: நபி (ஸல்) அவர்களின் அடிமையும், வளர்ப்பு மகனுமான ஸைத் இப்னு ஹாரிஸா(ரலி) அவர்களும், அவர்களின் மனைவி உம்மு அய்மன்(ரலி) அவர்களும் கறுப்பு நிறமுடையவர்களாய் இருந்தனர். அவர்களின் மகன் உஸாமாவோ வெள்ளை நிறமுடையவராய் இருந்தார். அதனால், இணைவைப்பவர்கள் அவரின் பிறப்பைப் பற்றித் தவறாகப் பேசினார்கள்.
அப்போதுதான் முஜஸ்ஸிஸ் என்பவர் அங்க அடையாளங்களை வைத்து - இரத்த உறவுகளை இனங்கண்டு சொல்லும் திறன் கொண்டவர், ஸைத்(ரலி) அவர்களும், உஸாமா(ரலி) அவர்களும் போர்வையால் முகத்தையும், உடலையும் மூடிக் கொண்டு, கால்கள் வெளியில் தெரியும்படி படுத்திருந்தபோது அதனைப் பார்த்துவிட்டு, ``இவை ஒன்றுக்கொன்று இரத்த உறவுடையவை'' என்று சொன்னார். எனவே, நபி(ஸல்) இணைவைப்பாளர்களின் குற்றச்சாட்டு பொய்யென நிரூபிக்கப்பட்டு விட்டதாக மகிழ்ந்தார்கள். காண்க: புகாரீ ஹதீஸ் எண் 3555, 3733

1463. ``(அடிமைகளான) இரண்டு முஸ்லிம் பெண்களை விடுதலை செய்த ஒரு முஸ்லிம் நரகத்திலிருந்து விடுதலை பெறுவதற்கு, அவ்விரு முஸ்லிம் பெண்களே காரணமாவர்'' என அபூ உமாமா(ரலி) வாயிலாக திர்மிதீயில் `ஸஹீஹ்' எனும் தரத்தில் பதிவிடப்பட்டுள்ளது.

1465. ``எந்தச் செயல் சிறந்தது'' என நான் இறைத்தூதர்(ஸல்) அவர்களிடம் கேட்டேன்.
``அல்லாஹ்வின் மீது நம்பிக்கை வைப்பதும், அவனுடைய வழியில் போராடுவதும்'' என இறைத்தூதர்(ஸல்) கூறினார்கள்.
``எப்படிப்பட்டோரை விடுதலை செய்வது சிறந்தது?'' என நான் கேட்டேன்.
``எஜமானனிடம் இருக்கக் கூடிய அடிமைகளிலேயே அவர்களுக்கு மிகவும் விருப்பமான விலை உயர்ந்த அடிமையை விடுதலை செய்வது'' என்று இறைத்தூதர்(ஸல்) கூறினார்கள் என அபூ தர்(ரலி) அறிவித்தார்.
நூல்கள்: புகாரீ, முஸ்லிம்

1467. புகாரீ, முஸ்லிம் அறிவித்துள்ள (மற்றொரு) ஹதீஸில் ``இல்லையெனில் அந்த அடிமையின் (நியாயமான) விலையை மதிப்பிட்டு (மீதி பங்குகளின் விலையை தருவதற்காக) உழைத்து சம்பாதித்துக் கொள்ள அனுமதிக்கப்பட வேண்டும். அதிக சிரமத்தை தரக் கூடாது'' என அபூ ஹுரைரா(ரலி) வாயிலாக உள்ளது.

1469. ``(தான் மணப்பதற்கு) விலக்கப்பட்ட நெருங்கிய உறவினருக்கு ஒருவர் எஜமானனாகிவிட்டால் அந்த உறவினர் (தானாகவே) சுதந்திரம் பெற்றுவிடுகிறார்'' என்று இறைத்தூதர்(ஸல்) கூறினார்கள் என ஸமுரா இப்னு ஜுன்துப்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா

1471. ``இறைத்தூதர்(ஸல்) அவர்களுக்கு நீ வாழ்நாள் முழுவதும் ஊழியராய் இருக்க வேண்டும்'' என்ற நிபந்தனையின் பேரில் உம்மு ஸலமா(ரலி) என்னை அடிமைத் தனத்திலிருந்து விடுதலை செய்தார் என ஸஃபீனா(ரலி) அறிவித்தார்.
நூல்கள்: அஹ்மத், அபூ தாவூத், நஸயீ மற்றும் ஹாகிம்

1473. ``வலா எனும் உறவு இரத்த உறவைப் போன்றதாகும். அதனை விற்கவோ அன்பளிப்புச் செய்யவோ கூடாது'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்: அஷ்ஷாஃபியீ
இமாம் இப்னு ஹிப்பான் மற்றும் இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள். இதன் மூலம், புகாரீ மற்றும் முஸ்லிமில் வேறு வார்த்தைகளில் உள்ளது.
குறிப்பு: முதப்பர்: ஒருவர் தமக்குச் சொந்தமான அடிமையை தம் மரணத்திற்குப் பின் விடுதலையாகிவிடுவார் எனக் கூறுவது.
முகாதப்: விடுதலைப் பத்திரம் எழுதிக் கொடுக்கப்பட்ட அடிமை, குறிப்பிட்ட தொகையோ அல்லது குறிப்பிட்ட வேலையையோ நீ செய்து முடித்துவிட்டால் என்ற நிபந்தனையுடன் எஜமானனிடம் சுதந்திரப் பத்திரம் எழுதிக் கொண்ட அடிமைக்கு முகாதப் என்று கூறுவர்.
உம்முல் வலத்: ஓர் அடிமைப் பெண்ணுடன் எஜமானன் உடலுறவு கொண்டு, அவள் அவனுக்குக் குழந்தை பெற்றால், அவள் உம்முல் வலத் (குழந்தையின் தாய்) எனப்படுகிறாள். இத்தகைய அடிமைப் பெண்ணை விற்பனை செய்வது கூடாது. மேலும் இவள் தன் எஜமானனின் மரணத்திற்குப் பின் விடுதலைப் பெற்றுவிடுவாள்.

1475. ``விடுதலைப் பத்திரம் (சுதந்திரம் அடைவதற்கு) எழுதிக் கொடுத்த அடிமை, ஒரு திர்ஹம் மீதம் வைத்திருக்கும் வரையிலும் அடிமையாகவே இருப்பான்'' என்று இறைத்தூதர்(ஸல்) கூறினார்கள் என அம்ர் இப்னு ஷுஐபு தம் தந்தை மற்றும் பாட்டனார் வாயிலாக அறிவித்தார்.
இது அபூ தாவூதில் `ஹஸன்' எனும் தரத்தில் பதிவிடப்பட்டுள்ளது. இதன் மூலம் அஹ்மத், அபூ தாவூத், திர்மிதீ மற்றும் நஸயீயில் உள்ளது.
இமாம் ஹாகி(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1477. ``விடுதலைப்பத்திரம் எழுதிக் கொடுக்கப்பட்ட அடிமை கொல்லப்பட்டுவிட்டால், அவன் எந்த அளவிற்கு (ஒப்பந்தப் பணத்தைச்ச செலுத்தி) சுதந்திரமானவனாகி உள்ளானோ அந்த அளவிற்கு சுதந்திரமானவனுக்குரிய இரத்த ஈட்டுத் தொகை (அவனுடைய வாரிசுகளுக்கு வழங்கப்பட வேண்டும். எந்த அளவிற்கு தொகை செலுத்தப்படாமல் இன்னும், (விடுவிக்கப்படாமல்) அடிமையாய் இருக்கிறானோ, அந்த அளவிற்கு அடிமைக்குரிய இரத்த ஈட்டுத் தொகை (அவனுடைய வாரிசுகளுக்கு) வழங்கப்பட வேண்டும்'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறவித்தார்.
நூல்கள்: அஹ்மத், அபூ தாவூத் மற்றும் நஸயீ