1495. ``நீங்கள் சாப்பிடும்போது வலக்கையால் சாப்பிடுங்கள். பருகும்போது வலக் கையால் பருகுங்கள். ஏனெனில், நிச்சயமாக ஷைத்தான் தன் இடக் கையால் சாப்பிடுகிறான். மேலும், தன் இடக் கையால் குடிக்கிறான்'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்: முஸ்லிம்

1497. ``தன் வாழ்வாதாரத்தில் அபிவிருத்தியையும், நீண்ட ஆயுளையும் விரும்புபவர் தன் உறவினர்களுடன் உறவை வலுப்படுத்தட்டும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: புகாரீ

1499. ``தாய்மாரைத் துன்புறுத்துவதையும், பெண் பிள்ளைகளை உயிருடன் புதைப்பதையும், (பிறரின் உரிமையை) நிறைவேற்றாமல் இருப்பதையும், (பிறர் செல்வத்தை) அபகரிப்பதையும் அல்லாஹ் தடை செய்துள்ளான். வீண்பேச்சுக்களையும், அதிகமாகக் கேள்வி கேட்பதையும், செல்வத்தை வீணடிப்பதையும், அல்லாஹ் உங்கள் மீது ஹராமாக்கி (விலக்கி) விட்டான்'' என்று இறைத்தூதர்(ஸல்) கூறினார்கள் என முகீரா இப்னு ஷுஃபா(ரலி) அறிவித்தார்.
நூல்கள்: புகாரீ, முஸ்லிம்

1501. ``என் உயிரைத் தன் கையில் கொண்டவன் மீது ஆணையாக, ஒருவர் தனக்கு விரும்புவதையே தன் அண்டைவீட்டாருக்கு விரும்பாதவரை இறைநம்பிக்கை கொண்டவராக மாட்டார்'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்கள்: புகாரீ, முஸ்லிம்

1503. தன் பெற்றோரைத் திட்டுவது பெரும் பாவங்களில் உள்ளதாகும்'' என்று இறைத்தூதர்(ஸல்) கூறியபோது,
``மனிதன் தன் பெற்றோரைத் திட்டுவானா?'' என இறைத்தூதர்(ஸல்) அவர்களிடம் கேட்கப்பட்டது.
``ஆம்! ஒருவன் மற்றொருவரின் தந்தையைத் திட்டுகிறான்; அவன்(பதிலுக்கு) இவனுடைய தந்தையைத் திட்டுகிறான். மேலும், அவன் அவனுடைய தாயைத் திட்டுகிறான்; பதிலுக்கு அவன் இவனுடைய தாயைத் திட்டுகிறான்'' என்று இறைத்தூதர்(ஸல்) கூறினார்கள் என அப்துல்லாஹ் இப்னு அம்ர் இப்னு ஆஸ்(ரலி) அறிவித்தார்.
நூல்கள்: புகாரீ, முஸ்லிம்

1505. ``ஒவ்வொரு நல்ல காரியமும் தர்மமாகும்'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்: புகாரீ

1507. ``நீ (நல்ல) குழம்பு வைத்தால் அதில் தண்ணீரை அதிகமாக்கி உன் அண்டை வீட்டாருக்கும் கொடு!'' என்று இறைத்தூதர்(ஸல்) கூறினார்கள் என அபூ தர்(ரலி) அறிவித்தார்.
நூல்: முஸ்லிம்

1509. ``நன்மை செய்பவருக்குக் கொடுக்கப்படும் பிரதிபலனைப் போன்றே, அவருக்கு நன்மைக்கான வழியைக் காட்டியவருக்கும் (பிரதிபலன்) கொடுக்கப்படும்'' என்று இறைத்தூதர்(ஸல்) கூறினார்கள் என இப்னு மஸ்வூத்(ரலி) அறிவித்தார்.
நூல்: முஸ்லிம்

1511. ``நிச்சயமாக ஹலால் (அனுமதிக்கப்பட்டது) தெளிவாக்கப்பட்டுள்ளது'' ஹராம் (விலக்கப்பட்டது) தெளிவாக்கப்பட்டுள்ளது. இவை இரண்டிற்கும் இடையில் ஐயமானவை பல உள்ளன. மக்களில் பெரும்பாலோர் இது குறித்து அறியா மாட்டார். ஐயத்திற்கிடமானதை விட்டுவிலகியவர் தன் மார்க்கத்தையும், தன் மானத்தையும் காத்துக் கொண்டார். ஐயத்திற்கிடமானதில் வீழ்ந்தவர் ஹராமில் வீழ்ந்துவிடுகிறார். எப்படி என்றால் மேய்ப்பாளன் (தன்னுடைய ஆடுகளை) வேலி வேயப்பட்ட வயல்களை சுற்றி மேய்க்கிறான். அப்போது, (அந்த ஆடுகள் வேலியைத் தாண்டி வயலில்) இறங்கிவிடக் கூடும். அறிந்து கொள்ளுங்கள்! ஒவ்வோர் அரசனுக்கும் ஒரு வேலி உள்ளது. அறிந்து கொள்ளுங்கள்! அல்லாஹ்வினால் வேலி வேயப்பட்ட வயல்கள் அவனால் தடை செய்யப்பட்ட ஹராமான காரியங்களாகும். அறிந்து கொள்ளுங்கள்! உடலில் ஒரு சதைத்துண்டு உள்ளது. உடல் முழுவதும் சரியாய் இருக்கும். அது கெட்டுவிட்டால் உடல் முழுவதும் கெட்டுவிடும். அறிந்து கொள்ளுங்கள்! அது இதயமாகும்'' என்று இறைத்தூதர்(ஸல்) கூற நான் செவியுற்றுள்ளேன் என நுஃமான் இப்னு பஷீர்(ரலி) அறிவித்தார்.
நுஃமான் இதனைக் கூறியபோது தம் இரண்டு விரல்களையும் தம் இரண்டு காதுகளின்பால் சுட்டிக் காண்பித்து உணர்த்தினார்.
நூல்கள்: புகாரீ, முஸ்லிம்

1513. இறைத்தூதர்(ஸல்) என் தோளைப் பிடித்தார்கள். அப்போது, ``நீ உலகில் ஓர் அந்நியன் அல்லது வழிப்போக்கன் போன்றோ இருந்து கொள்'' என்று கூறினார்கள் என இப்னு உமர் அறிவித்தார்.
மேலும் இப்னு உமர், ``நீ மாலையையடைந்hல், காலைப்பொழுதை எதிர் பார்க்காதே! காலையை அடைந்து விட்டால் மாலையை எதிர் பார்க்காதே! ஆரோக்கியமாய் இருக்கும் போதே நோய்க் காலத்திற்காக எதையாவது தேடிக் கொள்! இன்னும் நீ உயிர் வாழ்ந்து கொண்டிருக்கும் போதே (உன் மரணத்திற்குப் பிந்தைய வாழ்க்கைக்காக) எதையாவது தேடிக்கொள்!'' எனக் கூறுபவராய் இருந்தார்.
நூல்: புகாரீ