1578. ``இறைநம்பிக்கையாளன் இறைநம்பிக்கை கொண்டுள்ள தன் சகோதரனுக்குக் கண்ணாடி ஆவான்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: அபூ தாவூத்
இது `ஹஸன்' எனும் தரத்தில் பதிவிடப்பட்டுள்ளது.

1580. ``என் இரட்சகனே! என்னை அழகாகப் படைத்தது போன்று என் குணநலன்களையும் அழகுபடுத்துவாயாக!'' என்று இறைத்தூதர்(ஸல்) பிராத்தித்து வந்தார்கள் என இப்னு மஸ்வூத்(ரலி) அறிவித்தார்.
நூல்: அஹ்மத்
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1582. ``அல்லாஹ்வை நினைவு கூர்வதைவிட அல்லாஹ்வின் வேதனையிலிருந்து தன்னை அதிகமாகக் காக்கக் கூடிய வெறு எந்த நற்செயலையும் ஆதமின் மகன் செய்வதில்லை'' என்று இறைத்தூதர்(ஸல்) கூறினார்கள் என முஆத் இப்னு ஜபல்(ரலி) அறிவித்தார்.
இப்னு அபீ ஷைபா மற்றும் தப்ரானீயில் இது `ஹஸன்' எனும் தரத்தில் பதிவிடப்பட்டுள்ளது.

1584. ``மக்கள் ஓரிடத்தில் அமர்ந்து அங்கு அல்லாஹ்வை நினைவுகூராமலும், இறைத்தூதர்(ஸல்) மீது ஸலவாத் கூறாமலும் இருப்பார்களாயின், அதுவே மறுமை நாளில் அவர்கள் மீது பேரிழப்பாகவே வந்து முடியும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: திர்மிதீ
இது `ஹஸன்' எனும் தரத்தில் பதிவிடப்பட்டுள்ளது.

1586. ``ஸுப்ஹானல்லாஹி வபிஹம்திஹி'' (அல்லாஹ் தன் புகழைக் கொண்டே தூயவன்)'' என நூறு முறை ஓதுபவரின் பாவம் கடல் நுரையளவு இருப்பினும் மன்னிக்கப்படும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்

1588. 1. லா இலாஹ இல்லல்லாஹ் (அல்லாஹ்வைத் தவிர வேறு கடவுள் இல்லை). 2. சுப்ஹானல்லாஹ் (அல்லாஹ் தூயவன்). 3. அல்லாஹு அக்பர் (அல்லாஹ் மிகப்பெரியவன்). 4. அல் ஹம்து லில்லாஹ் (புகழனைத்தும் அல்லாஹ்விற்கே) 5. லா ஹவ்ல வலா குவ்வத்த இல்லா பில்லாஹ் (தீங்கிலிருந்து விலகிக் கொள்ளவும் நன்மைகள் செய்யவும் அல்லாஹ்வின் உதவியின்றி (வேறு) இல்லை) ஆகிய வாசகங்கள் என்றும் நிலையான நன்மை பயக்கும்'' என்று இறைத்தூதர்(ஸல்) கூறினார்கள் என அபூ ஸயீத் அல் குத்ரீ(ரலி) அறிவித்தார்.
நூல்: நஸயீ
இமாம் இப்னு ஹிப்பான் மற்றும் இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.

1590. ``அப்துல்லாஹ் இப்னு கைஸே! சுவர்க்கத்தின் புதையல்களில் ஒன்றை நான் உனக்கு அறிவிக்கட்டுமா?'' அது `லா ஹவ்லவலா குவ்வத்த இல்லா பில்லாஹ் என்பதாகும்'' என்று இறைத்தூதர்(ஸல்) கூறினார்கள் என அபூ மூஸா அல் அஷ்அரீ(ரலி) அறிவித்தார்.
நூல்கள்: புகாரீ, முஸ்லிம்
``அல்லாஹ்வைத் தவிர வேறு புகலிடம் இல்லை'' என்பதும் நஸயீயில் உள்ளது.

1592. `வணக்கத்தின் கரு பிரார்த்தனையே ஆகும்' எனும் ஹதீஸ் அனஸ்(ரலி) வாயிலாக ``மர்ஃபூஃ'' எனும் தரத்தில் திர்மிதீயில் உள்ளது.

1594. ``பாங்கிற்கும் `இகாமத்'திற்குமிடையில் செய்யப்படும் துஆ (பிரார்த்தனை) ஏற்கப்படாமல் திருப்பி அனுப்பப்படுவதில்லை'' என்று இறைத்தூதர்(ஸல்) கூறினார்கள் என அனஸ்(ரலி) அறவிக்கிறார்.
நூல்: நஸயீ
இமாம் இப்னு ஹிப்பா(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1596. ``இறைத்தூதர்(ஸல்) துஆவிற்காகத் தம் கைகளை உயர்த்தினால், அதனை முகத்தில் தடவிக் கொள்ளாத வரை அகற்ற மாட்டார்கள்'' என்று உமர்(ரலி) அறிவித்தார்.
நூல்: திர்மிதீ
இதற்குச் சான்றாக பல ஹதீஸ்கள் உள்ளன.