249. ``நீங்கள் தொழும்போது உங்கள் முகத்திற்கு முன்பாக எதையேனும் ஒரு பொருளை (சுத்ரா) தடுப்பாக வைத்துக் கொள்ளுங்கள். அப்படி ஏதும் கிடைக்கவில்லையெனில் ஒரு குச்சியை நட்டுக் கொள்ளுங்கள். அப்படி எதுவும் கிடைக்கவில்லையெனில் ஒரு கோட்டைக் கிழித்துக் கொள்ளுங்கள். பின்னர் தமக்கு முன்னால் நடந்து செல்பவரால் தமக்குத் தீங்கு ஏற்படாது'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: அஹ்மத், இப்னு மாஜா
இமாம் இப்னு ஹிப்பான் இதனை ஆதாரப்பூர்வமானது எனக் குறிப்பிட்டுள்ளார்.. இந்த ஹதீஸில் குளறுபடியுள்ளது எனக் கருதுவோர் சரியாக எதையும் கூறவில்லை. இதன் `ஹஸன்' எனும் தரத்தில் உள்ளதாகும்.

251. ``இடுப்பில் கை வைத்த நிலையில் தொழுவதை இறைத்தூதர்(ஸல்) தடை செய்துள்ளார்கள்'' என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது. இதன் பொருள் இடுப்பில் கையை வைத்துக் கொள்வதாகும்.

253. ``இரவு உணவு முன்னதாகவே கொண்டு வரப்பட்டால், மக்ரிப் தொழுவதற்கு முன்னரே அதனை (உண்ணத்) தொடங்குங்கள்'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்கள்: புகாரீ, முஸ்லிம்

255. முஅய்கிப் (ரலி) வாயிலாக இதே போன்ற ஹதீஸ் உள்ளது. ஆனால், (அல்லாஹ்வின் அருள் உள்ளது) என்ற விளக்கம் அதில் இல்லை.

257. ``உங்களில் ஒருவர் தொழுகையில் நின்றால் அவர் தன் இரட்சகனிடம் உரையாடிக் கொண்டிருக்கிறார். (எனவே, அவர் எச்சில் துப்பும் அவசியம் ஏற்பட்டால்) வலப் பக்கத்திலோ, இடப்பக்கத்திலோ ஒரு போதும் அவர் துப்ப வேண்டாம். மாறாக, தன் இடப் பக்கமாக காலுக்குக் கீழே துப்பி (அதனை மண்ணில் புதைத்து) விடட்டும்'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்கள்: புகாரீ, முஸ்லிம்
மற்றோர் அறிவிப்பில், தம் காலுக்குக் கீழ் துப்பட்டும் என உள்ளது.
குறிப்பு: அதிகச் சளி உடலுக்கு தீங்கிழைக்கும். எனவே, இறைஇல்லத்தில் தொழுது கொண்டிருந்தாலும் சளியைத் துப்பிவிட வேண்டும் என வலியுறுத்தப்படுகிறது. அக்காலத்தில் மஸ் ஜிதுன் னபவீயின் தரை, மண் தரையாய் இருந்தது. எனவே, அதில் துப்பலாம் என்றும், அப்படியே துப்பினாலும் அதை மண்ணில் புதைத்துவிட வேண்டும் என்றும் அனுமதிக்கப்பட்டிருந்தது (காண்க ஹதீஸ் எண் 274). இன்றைய இறைஇல்லங்களின் நவீனத் தளங்களில் இவ்வாறு செய்தல் கூடாது. ஆனால், சளி வெளிப்பட்டால் அதைத் துணி அல்லது பேப்பர்களில் துப்பி வைத்துக் கொண்டு தொழுகைக்குப் பின்னர் அகற்றவேண்டும்.

259. அபூ ஜஹ்ம் அன்பளிப்புச் செய்த, சித்திரங்கள் கொண்ட போர்வை போன்ற அங்கி தொடர்பான நிகழ்ச்சி குறித்து (ஆயிஷா(ரலி) கூறியபோது) ``நிச்சயமாக தொழுகையை விட்டும் என் கவனத்தைத் அது திருப்பிவிட்டது'' என்று இறைத்தூதர்(ஸல்) கூறியதாக அறிவித்தார்.
நூல்கள்: புகாரீ, முஸ்லிம்
குறிப்பு: சித்திரங்கள் வரையப்பட்ட முஸல்லா எனும் தொழுகை விரிப்புகளில் தொழக்கூடாது என்பதை இந்த ஹதீஸ் விளக்குகிறது.

261. ``உணவு முன்னால வைக்கப்பட்டிருக்கும் போதும், இரண்டு துன்பங்கள் (மலம் ஜலம்) நிர்பந்திக்கும்போதும் (அவற்றை முடிக்காமல்) தொழுகை இல்லை'' என்று இறைத்தூதர்(ஸல்) கூறியதை நான் செவியுற்றேன் என ஆயிஷா(ரலி) அறிவித்தார்.
நூல்: முஸ்லிம்

263. ``தெருக்களில் இறைஇல்லங்கள் கட்டுமாறும், அவற்றைத் தூய்மையாக வைத்திருக்குமாறும், அவற்றில் நறுமணம் கமழச் செய்யுமாறும் இறைத்தூதர்(ஸல்) கட்டளையிட்டார்கள்'' என ஆயிஷா(ரலி) அறிவித்தார்.
நூல்கள்: அஹ்மத், அபூ தாவூத் மற்றும் திர்மிதீ.
இது `முர்ஸல்' எனும் தரம் பெற்றது என்பதே சரியானது என இமாம் திர்மிதீ(ரஹ்) குறிப்பிட்டுள்ளார்.

265. மேலும், ``அவர்களில் (யூதர்கள் மற்றும் கிறிஸ்தவர்களில்) நல்ல மனிதர் ஒருவர் இறந்துவிட்டால் அவருடைய அடக்கஸ்தலத்தின் மீது இறைஇல்லங்கள் கட்டிவிடுவார்கள். இவர்களே படைப்புகளில் மிகக் கெட்டவர்கள்'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்.
நூல்கள்: புகாரீ, முஸ்லிம்

267. ஒரு முறை இறைஇல்லத்தில் கவிதை படித்துக் கொண்டிருந்த ஹஸ்ஸான் இப்னு ஸாபித்தை உமர்(ரலி) கடந்து சென்றபோது, அவரை உமர்(ரலி) உற்று நோக்கினர்கள்.
``தங்களைவிடச் சிறந்தவர் (இறைத்தூதர்) இங்கே இருந்த நிலையில் (அவரின் முன்பே), இதே இடத்தில் நான் கவிதை பாடியுள்ளேன்'' என்று (ஹஸ் ஸான்) கூறினார் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்