268. ``தன் தொலைந்து போன பொருளைப் இறைஇல்லாத்தில் கூச்சலிட்டுத் தேடுபவரை (நோக்கி) `அல்லாஹ் உமக்கு அதைக் கிடைக்காமல் ஆக்குவானாக!'' எனக் கூறவும். ஏனெனில், இறைஇல்லங்கள் இதற்காகக் கட்டப்படவில்லை'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்
குறிப்பு: வெளியில் ஒரு பொருளைத் தொலைத்துவிட்டவர், அதை இல்லத்தில் வந்து அறிவிப்புச் செய்து தேடுதல் தடைசெய்யப்பட்டுள்ளது. இறைஇல்லத்தில் ஒருவரின் பொருள் காணாமல் போனால்கூட, அவர் தன்னிச்சையாகக் கூச்சலிட்டுத் தேடாமல் முறையாக நிர்வாகத்திடம் அறிவிப்புச் செய்யக் கோரலாம். கண்டெடுக்கப்பட்ட ஒரு பொருள் இறைஇல்ல நிர்வாகத்திடம் ஒப்படைக்கப்பட்டால் அதை உரியவரிடம் சேர்ப்பதற்கு இறைஇல்ல நிர்வாகம் அறிவிப்புச் செய்யலாம்.

270. ``இறைஇல்லங்களில் (பெரும்) தண்டனைகள் நிறைவேற்றப்படாது. பழியும் தீர்க்கப்படாது'' என்று இறைத்தூதர்(ஸல்) கூறினார்கள் என ஹகீம் இப்னு ஹிஸாம்(ரலி) அறிவித்தார்.
நூல்கள்: அஹ்மத் மற்றும் அபூ தாவூத்
இதன் அறிவிப்பாளர் தொடர் `ளயீஃப்' எனும் பலவீனமானது.

272. ``இறைஇல்லத்தில் (ஈட்டிகளை எறிந்து) வீரவிளையாட்டுகள் நடத்திக் கொண்டிருந்த அபீசீனியர்களை நான் வேடிக்கை பார்த்துக் கொண்டிருந்தேன். இறைத்தூதர்(ஸல்) என்னை மறைத்துக் கொண்டிருந்த நிலையில் (அக்காட்சிகளைப்) நான் பார்த்தேன்'' என ஆயிஷா(ரலி) அறிவித்தார். (நீண்ட ஹதீஸின் சுருக்கம்)
நூல்கள்: புகாரீ, முஸ்லிம்
குறிப்பு: இந்த ஹதீஸை விரிவாக அறிவதற்கு புகாரீ ஹதீஸ் எண் 454, 455, 950, 988, 2906, 3529, 3931, 5190, 5236 மற்றும் முஸ்லிம் ஹதீஸ் எண் 892 பார்க்க!

274. ``இறைஇல்லங்களில் எச்சில் துப்புவது பாவமாகும். அதனை மண்ணிற்குள் (புதைத்து) மூடுவது (அப்புறப்படுத்துவது) அதற்குப் பரிகாரமாகும்'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்கள்: புகாரீ, முஸ்லிம்
குறிப்பு: சளி அதிகமாகுதல் உடலுக்கு மிகவும் தீங்கிழைத்துவிடும். எனவே, இறைஇல்லத்தில் தொழுது கொண்டிருந்தாலும் சளியைத் துப்பிவிட வேண்டும். அன்று மஸ் ஜிதுன் னபவீ மண் தரையாய் இருந்ததால் இவ்வாறு செய்தல் அனுமதிக்கப்பட்டிருந்தது. இன்று இறைஇல்லங்களில் கலவைக் கற்கள் பதிக்கப்பட்டிருக்கும் நிலையில் இவ்வாறு செய்தல் கூடாது. ஆனால், துணி அல்லது பேப்பர்களில் துப்பி வைத்துக் கொண்டு தொழுகைக்குப் பின்னர் குப்பைத் தொட்டியில் போட்டுவிட வேண்டும்.

276. ``இறைஇல்லங்களை உயரமாகக் கட்டி அலங்கரிக்குமாறு எனக்குக் கட்டளையிடப்படவில்லை'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்: அபூ தாவூத்
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

278. ``உங்களில் ஒருவர் இறைஇல்லத்தினுள் நுழைந்தால் இரண்டு ரக்அத்கள் தொழாமல் (அங்கு) அமர வேண்டாம்'' என்று இறைத்தூதர்(ஸல்) கூறினார்கள் என அபூ கதாதா(ரலி) அறிவித்தார்.
நூல்கள்: புகாரீ, முஸ்லிம்

280. ரிஃபாஆ இப்னு ராஃபிஃ இப்னி மாலிக் வாயிலாக மேற்கண்டவாறே அஹ்மத் மற்றும் இப்னு ஹிப்பானில் நிதானமாக நின்றுகொள் எனப் பதிவிடப்பட்டுள்ளது.

282. ``அல்லாஹ் உங்களுக்கு கட்டளையிட்டபடி நன்றாக `உளூ'ச் செய்து, பின்னர் அல்லாஹு அக்பர் (அல்லாஹ் பெரியவன்) என (தக்பீர்) கூறி, அவனைப் புகழ்ந்து போற்றாத வரை உங்கள் தொழுகை முழுமையடையாது'' என்று இறைத்தூதர்(ஸல்) கூறினார்கள் என்று ரிஃபாஆ இப்னு ராஃபிவு வாயிலாக நஸயீ மற்றும் அபூ தாவூதில் பதிவிடப்பட்டுள்ளது.
மேலும், அவ்விரண்டு நூல்களிலும், ``உன்னுடன் குர்ஆன் இருந்தால் அதனை ஓதிக் கொள்! (இல்லையெனில்) ``அல்ஹம்து லில்லாஹ்'' `அல்லாஹு அக்பர்' மற்றும் ``லா இலாஹ இல்லல்லாஹ்'' எனக் கூறிக்கொள்!'' என்றும் உள்ளது.
குறிப்பு: 282 வதாக இடம் பெற்றுள்ள இந்த ஹதீஸை அடிப்படையாக வைத்து குர்ஆன் வசனங்களை ஓதாமல் இவ்வாறே தொடர்ந்து ``அல்ஹம்து லில்லாஹ்'' `அல்லாஹு அக்பர்' மற்றும் ``லா இலாஹ இல்லல்லாஹ்'' ஓதிவந்தால் போதுமானது எனக் கருதக் கூடாது. குர்ஆனைக் கற்றுக் கொள்ள மனனம் செய்ய விரைந்து செயல்பட்டு பின்னர் குர்ஆன் வசனங்களை ஓத ஆரம்பிக்க வேண்டும்.

284. ``பின்னர், நீ விரும்பியதை (ஓதிக்கொள்!)'' என்று இப்னு ஹிப்பானில் பதிவிடப்பட்டுள்ளது.

286. தொழுகைக்காக இறைத்தூதர்(ஸல்) நின்றால், ``வானங்களையும், பூமியையும் படைத்தவனை நோக்கி, சத்திய மார்க்கத்தை விரும்பியவனாக, என் முகத்தைத் திருப்பிவிட்டேன். மேலும், நான் முஸ்லிம்களில் ஒருவன். ``அல்லாஹ்வே! நீயே அரசன்! உன்னைத் தவிர வேறு இறைவன் இல்லை. நீயே என் இரட்சகன்! நான் உன் அடிமை என்று இறுதி வரை ஓதுவார்கள் என அலீ இப்னு அபீ தாலிப்(ரலி) அறிவித்தார்.
நூல்: முஸ்லிம்
முஸ்லிமின் மற்றோர் அறிவிப்பில் இது இரவுத் தொழுகையில் என உள்ளது.
குறிப்பு: என் தொழுகையும், என் இதர வணக்கங்களும், என் வாழ்வும், என் மரணமும் அகில உலகையும் படைத்துப் பரிபாலிக்கும் அல்லாஹ் ஒருவனுக்கே உரியன. அவனுக்கு நிராக யாரும் இல்லை. இவ்வாறே நான் கட்டளையிடப்பட்டுள்ளேன்.
எனக்கு நானே அநீதம் இழைத்துக் கொண்டேன்; என்னுடைய பாவங்களை நான் ஒப்புக் கொண்டேன். என்னுடைய பாவங்கள் அனைத்தையும் மன்னிதருள்வாயாக! ஏனெனில், உன்னைத் தவிர பாவங்களை மன்னிப்பவன் வேறு யாரும் இல்லை. நற்குணங்களின் பக்கம் எனக்கு வழிகாட்டுவாயாக! நற்குணங்களின் வழிகாட்டுபவன் உன்னைத் தவிர வேறு யாருமில்லை.