429. நான் நபி(ஸல்) அவர்களுடன் ஃபஜ்ர் தொழுதேன். இறைத்தூதர்(ஸல்) தொழுகையை முடித்தபோது, தொழாமல் இரண்டு மனிதர்கள் நின்றிருந்தார்கள். அவர்கள் இருவரையும் இறைத்தூதர்(ஸல்) அழைத்து வரச் சொன்னார்கள். அவர்கள் இருவரும் இதயம் படபடத்தவர்களாக (பயந்த நிலையில்) வந்தார்கள். அவர்கள் இருவரிடமும், ``எங்களுடன் தொழுவதிலிருந்து உங்களைத் தடுத்தது எது?'' என்று இறைத்தூதர்(ஸல்) கேட்டார்கள்.
``நாங்கள் எங்கள் இல்லத்தில் தொழுதுவிட்டோம்'' என அவ்விருவரும் கூறினர்.
``நீங்கள் இருவரும் இவ்வாறு செய்யாதீர்கள். நீங்கள் இருவரும் உங்களின் இல்லங்களில் தொழுதுவிட்டு வந்தப் பின்பு இமாம் தொழுவதைக் காண்பீர்களாயின், அவருடனும் தொழுது கொள்ளுங்கள். அது உங்கள் இருவருக்கும் உபரியானதாகி (நஃபிலாகி) விடும்'' என்று இறைத்தூதர்(ஸல்) கூறினார்கள் என யஸீத் இப்னு அல் அஸ்வத்(ரலி) அறிவித்தார்.
நூல்கள்: அஹ்மத் அபூ தாவூத், நஸயீ மற்றும் திர்மிதீ
இமாம் இப்னு ஹிப்பான்(ரஹ்) மற்றும் திர்மிதீ(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள். இங்கு அஹமதின் வாசகம் இடம் பெற்றுள்ளது.

431. தம் தோழர்கள் (தொழுகையில் முன் வரிசைக்கு வராமல்) பின்னால் நின்றிருப்பதைக் கண்ட நபி(ஸல்), ``முன்னால் வாருங்கள், என்னைப் பின்பற்றுங்கள்; உங்களுக்குப் பின்னால் (நின்று) இருப்பவர்கள் உங்களைப் பின்பற்றட்டும்'' என்று கூறினார்கள் என அபூ ஸயீத் அல் குத்ரீ(ரலி) அறிவித்தார்.
நூல்: முஸ்லிம்
குறிப்பு: பின்னால் நிற்பவர்களுக்கும் முன்னால் நிற்பவர்களுக்கும் இமாம் ஒருவர்தான். இமாமைப் பின்பற்றுவதில் அவரைக் காணமுடியாத அல்லது அவரின் சப்தத்தை செவியுற முடியாத நிலையில் பின்னால் நிற்பவர்கள் தமக்கு முன்வரிசையில் இருப்பவர்கள் செய்வதைப் பார்த்து அவ்வாறே செய்து கொள்ள வேண்டும் என்பதே இதன் கருத்தாகும்.

433. முஆத்(ரலி) தம் தோழர்களுக்கு இஷாத் தொழுகை நடத்திவந்தபோது நீண்டநேரம் தொழவைத்தார். (அதைக் கண்ட நபி(ஸல்), ``முஆதே! நீர் குழப்பத்தை உண்டாக்குபவராய் இருப்பதை விரும்புகிறீரா? நீர் மக்களுக்கு இமாமாக நின்று தொழுகை நடத்தினால் வஷ்ஷம்ஸி வளுஹா (அத்தியாயம் 91), ஸப்பி ஹிஸ்மரப்பிக்க அஃலா(அத்தியாயம் 87) இக்ரஃ பிஸ்மி ரப்பிக்க(அத்தியாயம் 96), வல்லைலி இதாயக்ஷா (அத்தியாயம் 92) (போன்ற சூராக்களை) ஓதுவீராக!'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது.

435. ``உங்களில் ஒருவர் மக்களுக்கு இமாமத் செய்தால் தொழுகையை (நீண்ட நேரமாக்காமல்) இலேசாக்கிக் கொள்ளட்டும். ஏனெனில், அவர்களில் சிறியவர்களும், வயோதிகர்களும், பலவீனர்களும், தேவையுடையோரும் இருக்கிறார்கள். நீங்கள் தனித்து தொழும்போது விரும்பியவாறு தொழுது கொள்ளுங்கள்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்

437. குர்ஆனை அதிகம் கற்றுள்ளவர் இமாமத் செய்யட்டும். அதில் எல்லோரும் சமமாய் இருந்தால், அவர்களில் சுன்னாவை அதிகம் அறிந்தவரும், அதிலும் எல்லோரும் சமமாய் இருந்தால் அவர்களில் ஹிஜ்ரத்தில் (புலம்பெயர்ந்ததில்) முந்தியவரும், அதிலும் எல்லோரும் சமமாய் இருந்தால், அவர்களில் இஸ்லாமை முதலில் தழுவியவர் (இமாமத் செய்யட்டும்) என்று இறைத்தூதர்(ஸல்) கூறினார்கள் என இப்னு மஸ்வூத்(ரலி) அறிவித்தார்.
மற்றோர் அறிவிப்பின்படி (அவர்களில் வயது கூடியவர்) என்றும், அதிகாரம் பெற்றவர் இருக்கும் நிலையில் மற்றவர் இமாமத் செய்ய வேண்டாம் என்றும் ஒருவரின் இல்லத்தில் அவருக்கே உரிய படுக்கையில் அவரின் அனுமதி இன்றி அமரவேண்டாம் என்றும் இறைத்தூதர்(ஸல்) கூறினார்கள் என இப்னு மஸ்வூத்(ரலி) அறிவித்தார்.
நூல்: முஸ்லிம்

439. ``உங்கள் வரிசைகளை (ஜமாஅத்தாக தொழும்போது) சேர்த்துக் கொள்ளுங்கள். இன்னும், அவற்றுக்கிடையில் நெருக்கத்தை ஏற்படுத்துங்கள். இன்னும், தோள்புஜங்களை ஒன்றுக்கொன்று நேராக வைத்துக் கொள்ளுங்கள்' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்கள்: அபூ தாவூத், நஸயீ
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

441. நபி(ஸல்) அவர்களுடன் ஓர் இரவில் தொழுதபோது நான் அவர்களுக்கு இடப்பக்கமாக நின்றேன். எனவே, இறைத்தூதர்(ஸல்) என் தலையை பின்பக்கமாகப் பிடித்து என்னை அவர்களுக்கு வலப்பக்கமாக ஆக்கினார்கள் என இப்னு அப்பாஸ்(ரலி) அறிவித்தார்.
நூல்கள்: புகாரீ, முஸ்லிம்

443. தொழுகையில் இறைத்தூதர்(ஸல்) ருகூஃவில் இருந்தபோது, வரிசையை (ஸஃப்பை) அடைவதற்கு முன்னரே நான் ருகூஃ செய்ததால், ``அல்லாஹ் உம் ஆர்வத்தை அதிகப்படுத்தட்டும். இனிமேல் இவ்வாறு செய்யாதீர்'' என்று இறைத்தூதர்(ஸல்) கூறினார்கள் என அபூ பக்ரா(ரலி) அறிவித்தார்.
நூல்: புகாரீ
``ஸஃப்பீல் சேராமலேயே ருகூஃ செய்து, பின்னர் (குனிந்தவாறு) நடந்து (ஓடிச்) சென்று ஸஃப்பில் சேர்ந்தேன்'' என்ற செய்தி அபூ தாவூதில் அதிகப்படியாக உள்ளது.

445. ``ஸஃப்பிற்குப் பின்னால் தனித்து நிற்பவருக்குத் தொழுகை இல்லை'' என்று தல்க் இப்னு அலீ(ரலி) அறிவித்தார்.
இன்னும் வாபிஸா(ரலி) வாயிலாக, ``நீ ஏன் அவர்களுடன் (ஸஃப்பில்) சேரவில்லை?'' அல்லது (வரிசையிலிருந்து) ஏன் ஒருவரை (பின்னால் உன்னுடன்) இழுத்துக் கொள்ளவில்லை'' என்று கூறினார் என தபரானீயில் அதிகமாக உள்ளது.

447. ``ஒருவர் தனித்துத் தொழுவதைவிட மற்றொருவருடன் இணைந்து தொழுதல் அதிக நன்மையைப் பெற்றுத் தருகிறது. மேலும், ஒருவர் மற்றொரு மனிதருடன் தொழுவதைவிட இரண்டு மனிதர்களுடன் இணைந்து தொழுதல் இன்னும் அதிக நன்மையைப் பெற்றுத் தருகிறது. இவ்வாறே எவ்வளவு அதிகமாகிறார்களோ அந்த அளவு அல்லாஹ்விடம் விருப்பத்திற்குரியதாகும்'' என்று இறைத்தூதர்(ஸல்) கூறினார்கள் என உபய் இப்னு கஅப்(ரலி) அறிவித்தார்.
நூல்கள்: அபூ தாவூத், நஸயீ
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.