440. ``ஆண்களின் சிறந்த வரிசை மறுமைப் பலன் அதிகமாகக் கிடைக்கும் வரிசை (ஸஃப்) முதலில் உள்ளதாகும். இன்னும் அதில் சிறப்பற்றது மறுமைப் பலன் குறைவாகக் கிடைக்கும் வரிசை இறுதியில் உள்ளதாகும். பெண்களின் சிறந்த வரிசை (ஸஃப்) இறுதியில் உள்ளதாகும். அதில் சிறப்பற்றது முதலில் உள்ளதாகும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்

442. நபி(ஸல்) அவர்களுடன் தொழுதபோது அவர்களுக்குப் பின்னால் நானும் ஓர் அனாதையும் நின்றோம். எங்களுக்குப் பின்னால் (என் தாய்) உம்மு ஸுலைம் நின்றார் என அனஸ்(ரலி) அறிவித்தார்.
நூல்கள்: புகாரீ, முஸ்லிம்
இங்கு புகாரீயின் வாசகம் இடம் பெற்றுள்ளது.

444. ஸஃப்பிற்குப் பின்னால் தனியாகத் தொழுது கொண்டிருந்த ஒருவரைக் கண்ட இறைத்தூதர்(ஸல்) அவரைத் திரும்பத் தொழுமாறு கட்டளையிட்டாகள் என வாயிலாக இப்னு மஅபத்(ரலி) அறிவித்தார்.
நூல்கள்: அஹ்மத், அபூ தாவூத் மற்றும் திர்மிதீ
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

446. ``தொழுகைக்கான `இகாமத்'தை நீங்கள் செவியுற்றால் அத்தொழுகையின் பக்கம் செல்லுங்கள். இன்னும், அமைதியைக் கடைபிடியுங்கள். மேலும், விரைந்து (ஓடி) வராதீர்கள். மேலும், தொழுகையில் நீங்கள் அடைந்த அளவு தொழுங்கள்! (இமாம் தொழுகையை முடித்த) பின்னர், அதனை (விடுபட்ட ரக்அத்துக்களை எழுந்து) முழுமையாக்குங்கள்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
இங்கு புகாரீயின் வாசகம் இடம் பெற்றுள்ளது.

448. என் வீட்டாருக்கு இமாமத் செய்யுமாறு என்னை இறைத்தூதர்(ஸல்) பணித்தார்கள் என உம்மு வரகா(ரலி) அறிவித்தார்.
நூல்: அபூ தாவூத்
இமாம் இப்னு குஸைமா(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.
குறிப்பு: பெண்கள் ஆண்களுக்கு இமாமத் செய்தல் கூடாது. வீட்டிலிருக்கும் பெண்களுக்கும் சிறுவர்களுக்கும் பெண் இமாமத் செய்யலாம் என்பதையே இங்கு நபி(ஸல்) கூறினார்கள்.

450. 449வது ஹதீஸ் போன்றே ஆயிஷா(ரலி) வாயிலாக இப்னு ஹிப்பானில் பதிவிடப்பட்டுள்ளது.

452. ``உங்களில் ஒருவர் தொழுகைக்கு வந்தால் இமாம் எந்நிலையில் (எவ்வாறு செய்து கொண்டு) இருக்கிறாரோ அவரும் அவ்வாறே செய்யட்டும்'' என்று இறைத்தூதர்(ஸல்) கூறினார்கள் என அலீ இப்னு அபீ தாலிப்(ரலி) அறிவித்தார்.
நூல்: திர்மிதீ
இதன் அறிவிப்பாளர் தொடர் பலவீனமாது என இமாம் திர்மிதீ(ரஹ்) குறிப்பிட்டுள்ளார்.

454. பின்னர், ஹிஜ்ரத் செய்த (புலம் பெயர்ந்த) உடன் நான்கு ரக்அத்துக்கள் கடமையாகின. மேலும், பயணிகளுக்கு முதல் அளவு தொழுகையே (கடமையாக) இருந்தது என புகாரீயில் உள்ளது.

456. இறைத்தூதர்(ஸல்) பயணத்தில் (நான்கு ரக்அத் தொழுகைகளை) கஸராகவும், முழுமையாகவும் தொழுவார்கள். நோன்பு நோற்றும், நோற்காமலும் இருப்பார்கள் என ஆயிஷா(ரலி) அறிவித்தார்.
நூல்: தாரகுத்னீ
இதன் அறிவிப்பாளர்கள் பலமானவர்கள். ஆயினும், இது மஃலூல் எனும் குறைபாடு உள்ளது.
ஆயிஷா(ரலி) வாயிலாகவே பைஹகீயில், ``எனக்கு அது கஷ்டமானதாய் இல்லை'' எனப் பதிவிடப்பட்டுள்ளது.
குறிப்பு: ஆயிஷா(ரலி) சில பயணங்களில் நான்கு ரக்அத்துத் தொழுகைகளைக் குறைத்தும், சில பயணங்களில் குறைக்காமல் முழுமையாகவும் தொழுதுள்ளார்கள். அவ்வாறே சில பயணங்களில் நோன்பு நோற்றும், சில பயணங்களில் நோன்பு நோற்காமலும் இருந்துள்ளார்கள். எனவே, பைஹகீயில் இடம்பெற்றுள்ள வாசகம் நபி(ஸல்) கூறிய வாசகம் அல்ல; ஆயிஷா(ரலி) அவர்களின் வாசகம் என்பதைப் புரிந்து கொள்ள வேண்டும்.

458. இறைத்தூதர்(ஸல்) மூன்று மைல் அல்லது மூன்று ஃபர்ஸக்குகள் பயணம் மேற்கொண்டால் இரண்டு ரக்அத்துக்கள் தொழுவார்கள் என அனஸ்(ரலி) அறிவித்தார்.
நூல்: முஸ்லிம்
குறிப்பு: ஃபர்ஸக் எனும் வார்த்தை அரபுகள் மற்றும் பாரசீகர்களால் தூர அளவைக் குறிப்பதற்குப் பயன்படுத்தப்படும் வார்த்தையாகும். இந்தத் தூர அளவு அரபுகளிடமும் பாரசீகர்களிடமும் வித்தியாசமான அளவைக் கொண்டுள்ளது. அரபுகளிலும் ஹிஜாஸ் மற்றும் எகிப்தில் தூர அளவு வித்தியாசமாகவே உள்ளது. நபி(ஸல்) அவர்களின் கால அரபுகள் ஃபர்ஸக் எனும் தூர அளவை 3 மைல்கள் என்றும் 4.83 கிலோ மீட்டர் தூர அளவு என்றும் கணக்கிட்டு வந்தனர். எகிப்தியர் 2.25 கிலோ மீட்டர் என தற்போது கணக்கிடுகின்றனர். இவ்வாறு எத்தியோபியா, இராக் என பல நாடுகளும் பல்வேறாகக் கணக்கிடுகின்றனர்.
நபி(ஸல்) அவர்களின் கால அரபுகள் ஃபர்ஸக் எனும் தூர அளவை 3 மைல்கள் எனக் கணக்கிட்டுள்ளதால் அதன்படி, ஒரு ஃபர்ஸக் என்பது 4.83 கிலோ மீட்டர் தூரம் என்றே கணக்கிட வேண்டும். இதன்படி பயண தூரம் 14.49 கிலோ மீட்டர் (சுமார் 15 கி.மீ) இருந்தால் அதில் கஸர் செய்து கொள்ள வேண்டும் என்பதே சரியாகும். 19 மற்றும் 20 ஆம் நூற்றாண்டிற்குப் பின்னர் இந்த அளவுகளில் இன்னும் சில மாறுதல்கள் செய்யப்பட்டுள்ளன என்பதும் குறிப்பிடத் தக்கது. ஆனால், அவற்றை ஷரீஅத்தின் படி அமல்கள் செய்வதற்கு ஏற்கலாகாது என்பதையும் கவனத்தில் கொள்ளவேண்டும்.