458. இறைத்தூதர்(ஸல்) மூன்று மைல் அல்லது மூன்று ஃபர்ஸக்குகள் பயணம் மேற்கொண்டால் இரண்டு ரக்அத்துக்கள் தொழுவார்கள் என அனஸ்(ரலி) அறிவித்தார்.
நூல்: முஸ்லிம்
குறிப்பு: ஃபர்ஸக் எனும் வார்த்தை அரபுகள் மற்றும் பாரசீகர்களால் தூர அளவைக் குறிப்பதற்குப் பயன்படுத்தப்படும் வார்த்தையாகும். இந்தத் தூர அளவு அரபுகளிடமும் பாரசீகர்களிடமும் வித்தியாசமான அளவைக் கொண்டுள்ளது. அரபுகளிலும் ஹிஜாஸ் மற்றும் எகிப்தில் தூர அளவு வித்தியாசமாகவே உள்ளது. நபி(ஸல்) அவர்களின் கால அரபுகள் ஃபர்ஸக் எனும் தூர அளவை 3 மைல்கள் என்றும் 4.83 கிலோ மீட்டர் தூர அளவு என்றும் கணக்கிட்டு வந்தனர். எகிப்தியர் 2.25 கிலோ மீட்டர் என தற்போது கணக்கிடுகின்றனர். இவ்வாறு எத்தியோபியா, இராக் என பல நாடுகளும் பல்வேறாகக் கணக்கிடுகின்றனர்.
நபி(ஸல்) அவர்களின் கால அரபுகள் ஃபர்ஸக் எனும் தூர அளவை 3 மைல்கள் எனக் கணக்கிட்டுள்ளதால் அதன்படி, ஒரு ஃபர்ஸக் என்பது 4.83 கிலோ மீட்டர் தூரம் என்றே கணக்கிட வேண்டும். இதன்படி பயண தூரம் 14.49 கிலோ மீட்டர் (சுமார் 15 கி.மீ) இருந்தால் அதில் கஸர் செய்து கொள்ள வேண்டும் என்பதே சரியாகும். 19 மற்றும் 20 ஆம் நூற்றாண்டிற்குப் பின்னர் இந்த அளவுகளில் இன்னும் சில மாறுதல்கள் செய்யப்பட்டுள்ளன என்பதும் குறிப்பிடத் தக்கது. ஆனால், அவற்றை ஷரீஅத்தின் படி அமல்கள் செய்வதற்கு ஏற்கலாகாது என்பதையும் கவனத்தில் கொள்ளவேண்டும்.

460. ஓர் அறிவிப்பில் இறைத்தூதர்(ஸல்) பத்தொன்பது நாள்கள் தங்கினார்கள். (அந்நாள்களில் நான்கு ரக்அத் தொழுகைகளை இரண்டு ரக்அத்தாக) கஸர் செய்தார்கள் என உள்ளது. மற்றோர் அறிவிப்பில் ``மக்காவில் பத்தொன்பது நாள்கள்'' என்றும் இப்னு அப்பாஸ்(ரலி) வாயிலாக உள்ளது.
நூல்: புகாரீ
அபூ தாவூதின் ஓர் அறிவிப்பின்படி ``பதினேழு நாள்கள்'' என்றும், மற்றோர் அறிவிப்பில் ``பதினைந்து நாள்கள்'' என்றும் உள்ளது.
குறிப்பு: இந்த ஹதீஸில், மக்கா பயணத்தில் 15, 17 மற்றும் 19 நாள்கள் எனப் பதிவாகியுள்ளது. மக்காவில் தங்கி இருந்த நாள்கள் மற்றும் பயணம் செய்த நாள்கள் ஆகிவற்றை சிலர் கணக்கிட்டும், மக்காவில் தங்கி இருந்த நாள்களை மட்டும் சிலர் கணக்கிட்டும் அறிவித்ததால் இவ்வாறு வேறுபாடுகள் காணப்படுகின்றன. எனவே, இதில் எந்த முரணுமில்லை.

462. இறைத்தூதர்(ஸல்) தபூக்கில் இருபது நாள்கள் தங்கினார்கள். அப்போது, (நான்கு ரக்அத் தொழுகைகளை) கஸர் செய்தார்கள் என ஜாபிர்(ரலி) வாயிலாக அபூ தாவூதில் உள்ளது.
இதன் அறிவிப்பாளர்கள் பலமானவர்கள். இருப்பினும், இதன் அறிவிப்பாளர் தொடரில் கருத்து வேறுபாடு உள்ளது.

464. நாங்கள் நபி(ஸல்) அவர்களுடன் தபூக் போருக்குச் சென்றோம். அப்போது, இறைத்தூதர்(ஸல்) ளுஹரையும், அஸரையும் இன்னும் மக்ரிபையும், இஷாவையும் சேர்த்துத் தொழுதார்கள் என முஆத்(ரலி) அறிவித்தார்.
நூல்: முஸ்லிம்

466. ``பாவம் செய்தால் பாவமன்னிப்புத் தேடுபவர்களும், பயணம் செய்தால் (தொழுகையை) கஸர் செய்து, நோன்பை விட்டுவிடுபவர்களும் என் உம்மத்தில் சிறந்தவர்கள்'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
இமாம் தபரானீ(ரஹ்) தம்முடைய அல் அவ்ஸத் எனும் நூலில் `ளயீஃப்' எனும் தரத்தில் பதிவிட்டுள்ளார். ஸயீத் இப்னு முஸய்யப் `முர்ஸல்' எனும் நூலில் இமாம் பைஹகீ(ரஹ்) சுருக்கமாகவும் பதிவிட்டுள்ளார்.

468. இறைத்தூதர்(ஸல்) ஒரு நோயாளியை நலம் விசாரிக்கச் சென்றார்கள். அந்த நோயாளி தலையணையில் ஸஜ்தாச் செய்து கொண்டிருப்பதைக் கண்டார்கள். அதைத் தூக்கி எறிந்தார்கள். பின்னர், ``முடிந்தால் பூமியில் தொழு! இல்லையென்றால், சமிக்ஞை மூலம் தொழுது கொள்! ருகூஃவைவிட ஸஜ்தாவிற்கு தலையைச் சற்றுத் தாழ்த்திக் கொள்!'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்: பைஹகீ
இது `மவ்கூஃப்' என்பதே சரி என இமாம் அபூ ஹாதிம்(ரஹ்) குறிப்பிட்டுள்ளார்.

470. ``மக்கள் (தங்களின்) ஜுமுஆத் தொழுகைகளை விட்டுவிடுவதைத் தவிர்க்க வேண்டும். இல்லையெனில், அல்லாஹ் அவர்களின் இதயங்களில் முத்திரை பதித்து விடுவான். அவர்கள் (பாவத்தில் மூழ்கி) மதி மறந்தவர்களாய் ஆகிவிடுவார்கள்'' என இறைத்தூதர்(ஸல்) மிம்பரின் மீது (நின்று) கூற நாங்கள் செவியுற்றோம் என அப்துல்லாஹ் இப்னு உமர்(ரலி) மற்றும் அபூ ஹுரைரா(ரலி) அறிவித்தார்.
நூல்: முஸ்லிம்

472. ``நாங்கள் ஜுமுஆ தொழுகைக்குப் பிறகுதான் மதிய ஓய்வு எடுப்போம்; (அதன் பின்னரே) மதிய உணவு அருந்துவோம்'' என ஸஹ்ல் இப்னு ஸஅத்(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது. இன்னும் மற்றோர் அறிவிப்பில், ``நபி(ஸல்) அவர்களின் காலத்தில்/ (மேற்கண்டவாறு நடந்து கொள்வோம்)'' என்றும் உள்ளது.

474. ``ஜுமுஆ தொழுகையிலோ அல்லது மற்ற தொழுகையிலோ ஒரு ரக்அத்தை அடைந்தவர் மீதமுள்ளதை முழுமையாக்கட்டும். அவரின் தொழுகை முழுமையாகிவிடும்'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்கள்: நஸயீ, இப்னு மாஜா மற்றும் தாரகுத்னீ
இங்கு தாரகுத்னீயின் வாசகம் இடம் பெற்றுள்ளது. மேலும், இது `ஸஹீஹ்' எனும் தரத்தில் பதிவிடப்பட்டுள்ளது. ஆனால், இமாம் அபூ ஹாதிம்(ரஹ்) இதனை `முர்ஸல்' என உறுதியாகக் கூறுகிறார்.

476. இறைத்தூதர்(ஸல்) உரை நிகழ்த்தும்போது, அவர்களின் கண்கள் சிவந்துவிடும். சத்தம் உயர்ந்து விடும். கோபம் அதிகரித்துவிடும். காலையிலோ, மாலையிலோ தாக்குதல் நடத்த வரும் பகைவர்களைப் பற்றி ஒரு படை குறித்து எச்சரிப்பவரைப்போல உரையாற்றுவார்கள். பின்னர், ``வேதத்தில் சிறந்தது அல்லாஹ்வின் வேதமாகும். வழிகளில் சிறந்தது முஹம்மத்(ஸல்) அவர்களின் வழியாகும். (மார்க்கத்தில்) புதிதாகத் தோற்றுவிக்கப்படும் ஒவ்வொரு செயலும் பித்அத் ஆகும். ஒவ்வொரு பித்அத்தும் வழி கேடாகும்'' என்று கூறுவார்கள் என ஜாபிர்(ரலி) அறிவித்தார்.
நூல்: முஸ்லிம்
முஸ்லிமின் மற்றோர் அறிவிப்பில், வெள்ளிக்கிழமை உரையில், இறைத்தூதர்(ஸல்) அல்லாஹ்வைப் புகழ்ந்து பாராட்டி, அதற்குப் பின்னர் உரத்த குரலில் உரையாற்றுவார்கள் என உள்ளது.
முஸ்லிமின் மற்றோர் அறிவிப்பில், ``யாரை அல்லாஹ் நேர்வழிப்படுத்தியவரை வழிகெடுப்பவர் யாரும் இல்லை. இன்னும், அல்லாஹ் வழிகெடுத்தவரை நேர்வழிப்படுத்துபவர் யாரும் இல்லை'' என உள்ளது.
நஸயீயில் ``ஒவ்வொரு வழிகேடும் நரகத்தையே சேரும்'' என உள்ளது.