552. ``தங்கமும், பட்டும் என் சமுதாயத்தின் பெண்களுக்கு அனுமதிக்கப்பட்டுள்ளன. ஆண்களுக்கு விலக்கப்பட்டுள்ளன'' என்று இறைத்தூதர்(ஸல்) கூறினார்கள் என அபூ மூஸா(ரலி) அறிவித்தார்.
நூல்கள்: அஹ்மத், நஸயீ மற்றும் திர்மிதீ
இமாம் திர்மிதீ(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

554. (எகிப்து மற்றும் சிரியா ஆகிய நாடுகளில் தயாரிக்கப்பட்ட ஒருவகை) பட்டு மற்றும் காவி நிற ஆடையை (அணிவதை) இறைத்தூதர்(ஸல்) தடை செய்தார்கள் என அலீ(ரலி) அறிவித்தார்.
நூல்: முஸ்லிம்

556. (சட்டையிலுள்ள) பை மற்றும் காலரில் பட்டுத் துணியால் இரண்டு ஒட்டுப் போடப்பட்டிருந்த, நபி(ஸல்) அவர்களின் ஜிப்பா ஒன்றை அஸ்மா பின்த்து அபீ பக்ர்(ரலி) எடுத்தார்.
நூல்: அபூ தாவூத்
இதன் மூலம் முஸ்லிமில் உள்ளது.
அது ஆயிஷா(ரலி) அவர்களிடமிருந்தது. அவர் இறந்தபின் நாங்கள் அதைப் பெற்றுக் கொண்டோம். அதனை இறைத்தூதர்(ஸல்) அணிவார்கள். அதனை நாங்கள் நோய் நிவாரணம் தேடுவதற்காகத் தண்ணீரில் அலசுவோம் என்றும் அஸ்மா பின்த்து அபீ பக்ர்(ரலி) வாயிலாகவே முஸ்லிமில் உள்ளது.
``அவர்கள் அதனை வெள்ளிக் கிழமையன்றும், தூதுக் குழுவினர் யாரேனும் வரும் போதும் அணிந்து கொள்வார்கள்'' என இமாம் புகாரீ(ரஹ்) தம்முடைய அல் அதபுல் முஃப்ரத் நூலில் பதிவிட்டுள்ளார்.

558. ``தனக்கேற்படும் தீங்கின் காரணமாக உங்களில் யாரும் மரணத்தை விரும்ப வேண்டாம். அப்படியே ஒருவர் நிர்பந்தத்திற்கு உள்ளானால் ``இறைவா! நான் உயிர் வாழ்வது எதுவiரை எனக்கு நல்லதாய் இருக்குமோ அதுவரை எனக்கு வாழ்க்கையை அளிப்பாயாக! மேலும், எப்போது மரணமே எனக்கு நல்லதாய் இருக்குமோ அப்போது என்னை உலகிலிருந்து எடுத்துக் கொள்வாயாக! எனக் கூறட்டும் (பிரார்த்திக்கட்டும்)'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்கள்: புகாரீ, முஸ்லிம்

560. ``இறக்கும் தருவாயில் இருப்பவனுக்கு `லா இலாஹ இல்லல்லாஹ்' அல்லாஹ்வைத் தவிர வேறு இறைவன் இல்லை'' என்ற உறுதியை ஊட்டுங்கள்'' என்று இறைத்தூதர்(ஸல்) கூறினார்கள் என அபூ ஸயீத் மற்றும் அபூ ஹுரைரா(ரலி) அறிவித்தார்.
நூல்கள்: முஸ்லிம், அபூ தாவூத், நஸயீ, திர்மிதீ மற்றும் இப்னு மாஜா.

562. அபூ ஸலமா(ரலி) அவர்களின் மரண தருவாயில் இறைத்தூதர்(ஸல்) அங்கு வந்தார்கள். அவரின் கண் திறந்தவாறு இருந்தன. அவரின் கண்ணை இறைத்தூதர்(ஸல்) மூடிவிட்டார்கள். பின்னர், ``உயிர் கைப்பற்றப்பட்டால் பார்வை அதைப் பின்தொடர்கிறது'' என்று இறைத்தூதர்(ஸல்) கூறினார்கள்.
அப்போது அவரின் குடும்பத்தாரில் சிலர் அழத்தொடங்கினர். அதற்கு, ``உங்கள் உயிர்களுக்கு நல்லதைத் தவிர வேறு எதையும் கேட்காதீர்கள். ஏனெனில், (இப்போது) மலக்குகள் நீங்கள் சொல்வதற்கெல்லாம் ஆமீன் கூறுகிறார்கள்'' என்று இறைத்தூதர்(ஸல்) கூறினார்கள்.
பின்னர், ``யா அல்லாஹ்! அபூ ஸல்மாவை மன்னிப்பாயாக! நேர்வழி பெற்றவர்களில் அவரின் நிலையை உயர்த்தி அருள்வாயாக! அவரின் கப்ரை (மண்ணறையை) அவருக்கு விசாலமாக்கி அருள்வாயாக! மேலும், அதில் வெளிச்சத்தை உண்டாக்கி அருள்வாயாக! அவரின் அடிச்சுவட்டில் (அவரைப் பின்பற்றிப்) பணியாற்றுபவரை நியமிப்பாயாக'' என்று இறைத்தூதர்(ஸல்) கூறினார்கள் என உம்மு ஸலமா(ரலி) அறிவித்தார்.
நூல்: முஸ்லிம்

564. இறைத்தூதர்(ஸல்) இறந்தப் பின்னர் அவர்களை அபூ பக்ர்(ரலி) முத்தமிட்டார்கள் என ஆயிஷா(ரலி) அறிவித்தார்.
நூல்: புகாரீ

566. ``அவரை இலந்தை இலை கலந்த தண்ணீரால் குளிப்பாட்டுங்கள். மேலும், அவரின் (இஹ்ராமின்) இரண்டு துணிகளினால் அவருக்குக் கஃபனிடுங்கள்'' என்று (ஹஜ்ஜின்போது) ஒட்டகத்திலிருந்து விழுந்து இறந்தவர் தொடர்பாக இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்கள்: புகாரீ, முஸ்லிம்

568. இறைத்தூதர்(ஸல்) அவர்களின் (இறந்த) மகளை நாங்கள் குளிப்பாட்டிக் கொண்டிருக்கும் நிலையில் இறைத்தூதர்(ஸல்) வந்தார்கள். இன்னும், ``நீங்கள் அவரை மூன்று அல்லது ஐந்து முறை அல்லது உங்களுக்குச் சரியாகப்படும் வரை அதற்கும் அதிகமான முறை (ஒற்றைப்படை எண்ணிக்கையில்) குளிப்பாட்டுங்கள். இன்னும் இலந்தை இலை கலந்த தண்ணீரால் குளிப்பாட்டுங்கள். இறுதியில் கற்பூரத்தைப் பயன்படுத்துங்கள்'' என்று கூறினார்கள். நாங்கள் (அவரைக் குளிப்பாட்டி) முடித்ததும் இறைத்தூதர்(ஸல்) அவர்களுக்குத் தகவல் கொடுத்தோம். அவர்கள் தம்முடைய கீழங்கியைக் கொடுத்து ``அதை உள்ளாடையாக ஆக்கிக் கொள்ளுங்கள்'' என்று கூறினார்கள்.
நூல்கள்: புகாரீ, முஸ்லிம்
மற்றோர் அறிவிப்பின்படி அவரின் (குளிப்பாட்டுதலை) வலப்புறம் மற்றும் `உளூ'ச் செய்யக் கூடிய பகுதிகளைக் கொண்டு தொடங்குங்கள் எனக் கூறியதாக உள்ளது.
புகாரீயின் மற்றோர் அறிவிப்பின்படி நாங்கள் அவரின் தலைமுடியை மூன்று சடைகளாகப் பிண்ணி அவருக்கு பின்னால் முதுகுப் பகுதியில் போட்டோம் என உள்ளது.

570. (நயவஞ்சகர்களின் தலைவன்) அப்துல்லாஹ் இப்னு உபை இறந்ததும் அவனுடைய மகன் இறைத்தூதர்(ஸல்) அவர்களிடம் வந்து, ``தாங்கள் தங்களின் ஆடையைக் கொடுங்கள். நான் அதில் அவருக்குக் கஃபனிட்டுக் கொள்கிறேன்'' எனக் கேட்டார். இறைத்தூதர்(ஸல்) கொடுத்தார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்