562. அபூ ஸலமா(ரலி) அவர்களின் மரண தருவாயில் இறைத்தூதர்(ஸல்) அங்கு வந்தார்கள். அவரின் கண் திறந்தவாறு இருந்தன. அவரின் கண்ணை இறைத்தூதர்(ஸல்) மூடிவிட்டார்கள். பின்னர், ``உயிர் கைப்பற்றப்பட்டால் பார்வை அதைப் பின்தொடர்கிறது'' என்று இறைத்தூதர்(ஸல்) கூறினார்கள்.
அப்போது அவரின் குடும்பத்தாரில் சிலர் அழத்தொடங்கினர். அதற்கு, ``உங்கள் உயிர்களுக்கு நல்லதைத் தவிர வேறு எதையும் கேட்காதீர்கள். ஏனெனில், (இப்போது) மலக்குகள் நீங்கள் சொல்வதற்கெல்லாம் ஆமீன் கூறுகிறார்கள்'' என்று இறைத்தூதர்(ஸல்) கூறினார்கள்.
பின்னர், ``யா அல்லாஹ்! அபூ ஸல்மாவை மன்னிப்பாயாக! நேர்வழி பெற்றவர்களில் அவரின் நிலையை உயர்த்தி அருள்வாயாக! அவரின் கப்ரை (மண்ணறையை) அவருக்கு விசாலமாக்கி அருள்வாயாக! மேலும், அதில் வெளிச்சத்தை உண்டாக்கி அருள்வாயாக! அவரின் அடிச்சுவட்டில் (அவரைப் பின்பற்றிப்) பணியாற்றுபவரை நியமிப்பாயாக'' என்று இறைத்தூதர்(ஸல்) கூறினார்கள் என உம்மு ஸலமா(ரலி) அறிவித்தார்.
நூல்: முஸ்லிம்

564. இறைத்தூதர்(ஸல்) இறந்தப் பின்னர் அவர்களை அபூ பக்ர்(ரலி) முத்தமிட்டார்கள் என ஆயிஷா(ரலி) அறிவித்தார்.
நூல்: புகாரீ

566. ``அவரை இலந்தை இலை கலந்த தண்ணீரால் குளிப்பாட்டுங்கள். மேலும், அவரின் (இஹ்ராமின்) இரண்டு துணிகளினால் அவருக்குக் கஃபனிடுங்கள்'' என்று (ஹஜ்ஜின்போது) ஒட்டகத்திலிருந்து விழுந்து இறந்தவர் தொடர்பாக இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்கள்: புகாரீ, முஸ்லிம்

568. இறைத்தூதர்(ஸல்) அவர்களின் (இறந்த) மகளை நாங்கள் குளிப்பாட்டிக் கொண்டிருக்கும் நிலையில் இறைத்தூதர்(ஸல்) வந்தார்கள். இன்னும், ``நீங்கள் அவரை மூன்று அல்லது ஐந்து முறை அல்லது உங்களுக்குச் சரியாகப்படும் வரை அதற்கும் அதிகமான முறை (ஒற்றைப்படை எண்ணிக்கையில்) குளிப்பாட்டுங்கள். இன்னும் இலந்தை இலை கலந்த தண்ணீரால் குளிப்பாட்டுங்கள். இறுதியில் கற்பூரத்தைப் பயன்படுத்துங்கள்'' என்று கூறினார்கள். நாங்கள் (அவரைக் குளிப்பாட்டி) முடித்ததும் இறைத்தூதர்(ஸல்) அவர்களுக்குத் தகவல் கொடுத்தோம். அவர்கள் தம்முடைய கீழங்கியைக் கொடுத்து ``அதை உள்ளாடையாக ஆக்கிக் கொள்ளுங்கள்'' என்று கூறினார்கள்.
நூல்கள்: புகாரீ, முஸ்லிம்
மற்றோர் அறிவிப்பின்படி அவரின் (குளிப்பாட்டுதலை) வலப்புறம் மற்றும் `உளூ'ச் செய்யக் கூடிய பகுதிகளைக் கொண்டு தொடங்குங்கள் எனக் கூறியதாக உள்ளது.
புகாரீயின் மற்றோர் அறிவிப்பின்படி நாங்கள் அவரின் தலைமுடியை மூன்று சடைகளாகப் பிண்ணி அவருக்கு பின்னால் முதுகுப் பகுதியில் போட்டோம் என உள்ளது.

570. (நயவஞ்சகர்களின் தலைவன்) அப்துல்லாஹ் இப்னு உபை இறந்ததும் அவனுடைய மகன் இறைத்தூதர்(ஸல்) அவர்களிடம் வந்து, ``தாங்கள் தங்களின் ஆடையைக் கொடுங்கள். நான் அதில் அவருக்குக் கஃபனிட்டுக் கொள்கிறேன்'' எனக் கேட்டார். இறைத்தூதர்(ஸல்) கொடுத்தார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்

572. ``உங்களில் ஒருவர் தன் (முஃமினான) சகோதரனுக்குக் கஃபனிட்டால், அதனை நல்ல முறையில் செய்யட்டும்'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்: முஸ்லிம்

574. ``கஃபன் துணிகளில் அதிக விலை போடாதீர்கள். ஏனெனில், அது அதிவிரைவில் (மண்ணில் மக்கி) அழிக்கப்படும்'' என்று இறைத்தூதர்(ஸல்) கூறினார்கள் என அலீ(ரலி) அறிவித்தார்.
நூல்: அபூ தாவூத்

576. என்னை அலீ(ரலி) குளிப்பாட்ட வேண்டும் என ஃபாத்திமா(ரலி) வஸிய்யத் (மரண சாசனம்) செய்தார் என அஸ்மா பின்த் உமைஸ்(ரலி) அறிவித்தார்.
நூல்: தாரகுத்னீ

578. நீண்ட ஈட்டியால் குத்தி தற்கொலை செய்துகொண்ட ஒருவரின் ஜனாஸா இறைத்தூதர்(ஸல்) அவர்களிடம் கொண்டு வரப்பட்டது. இறைத்தூதர்(ஸல்) அதற்குத் தொழுகை நடத்தவில்லை என்று ஜாபிர் இப்னு ஸம்ரா(ரலி) அறிவித்தார்.
நூல்: முஸ்லிம்

580. மரணச் செய்தியை விளம்பரம் செய்வதை இறைத்தூதர்(ஸல்) தடைசெய்தார்கள் என ஹுதைஃபா(ரலி) அறிவித்தார்.
நூல்கள்: அஹ்மத், திர்மிதீ
இமாம் திர்மிதீ(ரஹ்) இதனை `ஹஸன்' எனக் குறிப்பிட்டுடள்ளார்.
குறிப்பு: இன்னார் மரணமடைந்துவிட்டார் என அறிவிப்பது தடைசெய்யப்பட்டது அல்ல. மாறாக அறியாமைக் கால வழக்கப்படி ஒப்பாரி வைத்து, மேல தாளங்களுடன் அவரின் பெருமை புகழ் பரம்பரைச் சிறப்புகளை எல்லாம் கூறி தற்காலத்தில் கண்ணீர் அஞ்சலி என்பது போன்று சுவரொட்டிகள், நோட்டீஸ் அச்சிட்டு வெளியிடுதல் போன்ற விளம்பரங்கள் கூடாது.