606. மய்யித்தை அடக்கம் செய்து முடித்தால், அங்கு நின்று, ``நீங்கள் உங்களின் சகோதரருக்காக பாவமன்னிப்புக் கோருங்கள்! அவருக்கு உறுதியை அளிக்கும்படி அல்லாஹ்விடம் கேளுங்கள்! ஏனெனில், இப்போது அவர் கேள்வி கேட்கப்படுவார்'' என்று இறைத்தூதர்(ஸல்) கூறினார்கள் என உஸ்மான்(ரலி) அறிவித்தார்.
நூல்: அபூ தாவூத்
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

608. மேற்கண்ட ஹதீஸ் போன்று அபூ உமாமா(ரலி) வாயிலாக `மர்ஃபூஃ' எனும் தரத்தில் தாரகுத்னீயில் நீண்டதாகப் பதிவிடப்பட்டுள்ளது.

610. இப்னு மஸ்வூத்(ரலி) வாயிலாக ``இது உலக வாழ்க்கையின் மோகத்தைப் போக்குகிறது'' என இப்னு மாஜாவில் அதிகப்படியாய் உள்ளது.

612. ஒப்பாரி வைத்து அழுபவர்களையும், அதைச் செவியுற்று (தடுக்காமல்) இருப்பவர்களையும் இறைத்தூதர்(ஸல்) சபித்துள்ளார்கள் என அபூ ஸயீத் அல்குத்ரீ(ரலி) அறிவித்தார்கள்.
நூல்: அபூ தாவூத்

614. ``ஒப்பாரி வைப்பதால் கப்ரில் மய்யித் (மண்ணறையில் அடக்கப்பட்டவர்) வேதனை செய்யப்படுகிறார்'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்

616. இறைத்தூதர்(ஸல்) அவர்களின் மகள் (உம்மு குல்ஸூம்) அடக்கம் செய்யப்பட்டபோது நானும் அங்கு இருந்தேன். இறைத்தூதர்(ஸல்) மண்ணறையின் அருகில் அமர்ந்திருந்தார்கள். அப்போது, அவர்களின் இரண்டு கண்களும் கண்ணீர் வடித்ததை நான் பார்த்தேன் என அனஸ்(ரலி) அறிவித்தார்.
நூல்: புகாரீ

618. ஜஅஃபர்(ரலி) மூத்தா போரில் சொல்லப்பட்டு ஷஹீதான செய்தி வந்தபோது ``அவரின் குடும்பத்தாருக்காக நீங்கள் உணவு தயாரியுங்கள். ஏனெனில், அவர்கள் வேறு விஷயங்களில் கவனம் செலுத்த வேண்டியுள்ளது என்று இறைத்தூதர்(ஸல்) கூறினார்கள் என அப்துல்லாஹ் இப்னு ஜஅஃபர்(ரலி) அறிவித்தார்.
நூல்கள்: அஹ்மத், அபூ தாவூத், திர்மிதீ மற்றும் இப்னு மாஜா.

620. ``மண்ணறைவாசிகளே! உங்களுக்கு அமைதி நிலவட்டும்! அல்லாஹ் உங்களையும் எங்களையும் மன்னிக்கட்டும்! நீங்கள் சென்றுவிட்டீர்கள். நாங்கள் பின்னர் வருவோம்'' என்று இறைத்தூதர்(ஸல்) மதீனாவின் கப்ருகளைக் கடந்து செல்லும்போது மண்ணறைகளின் பக்கம் முகத்தைத் திருப்பிய நிலையில் கூறினார்கள் என இப்னு அப்பாஸ்(ரலி) அறிவித்தார்
நூல்: திர்மிதீ
இமாம் திர்மிதீ(ரஹ்) இதனை `ஹஸன்' எனக் குறிப்பிட்டுள்ளார்.

622. முகீரா(ரலி) வாயிலாக 620 வது ஹதீஸ் போன்றே திர்மீதியில் உள்ளது. ஆனால் அதில், ``நீங்கள் (இறந்தவர்களை திட்டுவதால்) உயிருள்ளவர்களை நோவினை செய்வீர்கள்'' எனும் வாசகம் உள்ளது.

624. அனஸ்(ரலி) அவர்களுக்கு `ஜகாத்' கடமை குறித்து அபூ பக்ர்(ரலி) ஒரு செய்தி எழுதினார்கள். இது முஸ்லிம்கள் மீது இறைத்தூதர்(ஸல்) கடமையாக்கிய `ஜகாத்' தர்மம் ஆகும். இது தன் நபிக்கு அல்லாஹ் இட்ட கட்டளையாகும்.
``இருபத்தி நான்கு ஒட்டகங்களுக்குள் ஒவ்வோர் ஐந்து ஒட்டகங்களுக்கும் ஓர் ஆடு (`ஜகாத்' ஆகும்). ஒட்டகங்களின் எண்ணிக்கை 25 லிருந்து 35 வரை ஆகிவிட்டால், அவற்றில் ஓர் ஆண்டு பூர்த்தியான பெண் ஒட்டகத்தை `ஜகாத்' கொடுக்க வேண்டும். பெண் ஒட்டகம் இல்லையெனில், இரண்டு ஆண்டுகள் முழுமையான ஆண் ஒட்டகத்i `ஜகாத்'தாகக் கொடுக்க வேண்டும். அவற்றின் எண்ணிக்கை 36 லிருந்து 45 வரை ஆகிவிட்டால், இரண்டு ஆண்டுகள் முழுமையான பெண் ஒட்டகத்தை `ஜகாத்'தாகத் தரவேண்டும். அவற்றின் எண்ணிக்கை 46 லிருந்து 60 வரை ஆகிவிட்டால், மூன்று ஆண்டுகள் பூர்த்தியான பெண் பெண் ஒட்டகத்தை `ஜகாத்'தாகக் கொடுக்க வேண்டும். அவற்றின் எண்ணிக்கை 61 லிருந்து 75 வரை ஆகிவிட்டால், அவற்றிற்கு நான்கு ஆண்டுகள் முழுமையான பெண் ஒட்டகங்களை `ஜகாத்'தாகக் கொடுக்க வேண்டும். அவற்றின் எண்ணிக்கை 76 லிருந்து 90 வரை ஆகிவிட்டால், இரண்டு வயதுள்ள இரண்டு பெண் ஒட்டகங்களை `ஜகாத்'தாக் கொடுக்க வேண்டும். அவற்றின் எண்ணிக்கை 91 லிருந்து 120 வரை ஆகிவிட்டால், மூன்று ஆண்டுகள் பருவமடைந்த பெண் ஒட்டகங்கள் இரண்டு `ஜகாத்'தாகக் கொடுக்க வேண்டும். அவற்றின் எண்ணிக்கை 120க்கு மேல் ஆகிவிட்டால் ஒவ்வொரு நாற்பது ஓட்டகங்களுக்கும் இரண்டு ஆண்டுகள் பூர்த்தியான பெண் ஒட்டகம் ஒன்றும் அல்லது ஒவ்வோர் ஐம்பதுக்கும் மூன்று ஆண்டுகள் பூர்த்தியான பெண் ஒட்டகங்களை `ஜகாத்'தாகக் கொடுக்க வேண்டும். நான்கு ஒட்டகங்கள் உள்ள யாருக்கும் `ஜகாத்' இல்லை. ஆனால், அதன் உரிமையாளர் விருப்பப்பட்டு கொடுக்கலாம்.
காடுகளில் மேயும் ஆடுகள் 40 முதல் 120 வரை இருக்குமாயின், அவற்றிற்கு ஒர் ஆடு `ஜகாத்' ஆகும். அவை 120 லிருந்து 200 வரை ஆகிவிட்டால், அவற்றிற்கு இரண்டு ஆடுகள் `ஜகாத்' ஆகும். அவற்றின் எண்ணிக்கை 200 லிருந்து 300 வரையாகிவிட்டால், மூன்று ஆடுகள் `ஜகாத்' ஆகும். அவற்றின் எண்ணிக்கை 300க்கும் அதிகமாகிவிட்டால் ஒவ்வொரு நூறுக்கும் ஓர் ஆடு (என்ற விகிதத்தில்) `ஜகாத்' ஆகும். காடுகளில் மேயக் கூடிய ஆடுகள் நாற்பதுக்கு ஒன்று குறைவாய் இருந்தால், அவற்றிற்கு அதன் உரிமையாளர் விரும்பி கொடுத்தால் தவிர `ஜகாத்' இல்லை.
தனித்தனியாய் இருக்கும் பொருட்களை ஜகாத் கொடுப்பதற்கு அஞ்சி ஒன்றுசேர்க்க வேண்டாம். இன்னும், மொத்தமாக இருக்கும் பொருட்களை `ஜகாத்' கொடுப்பதற்கு அஞ்சி பிரித்துக் கொள்ளுதல் வேண்டாம். எந்தச் சொத்து கூட்டு முறையில் உள்ளதோ, அதனுடைய அளவுப்படி அதற்குரிய `ஜகாத்'தை கொடுக்க வேண்டும்.
`ஜகாத்' பொருட்கள் பல் விழுந்து வயது முதிர்ந்ததாகவோ, குறைபாடு உள்ளதாகவோ, ஆண் பிராணியாகவோ இருக்கக்கூடாது. வாங்குபவர் அதனை விரும்பிக் கேட்டால் தவிர.
வெள்ளியில், 190 திர்ஹமில் அதன் உரிமையாளர் விரும்பினால் தவிர `ஜகாத், கடமை இல்லை.
நான்கு ஆண்டுகள் பூர்த்தியான பெண் ஒட்டகம் `ஜகாத்' கொடுப்பதற்கு இல்லாதவரிடமிருந்து மூன்று ஆண்டுகள் பூர்த்தியான பெண் ஒட்டகங்களைக் பெற்றுக் கொண்டு, அதனுடன் இரண்டு ஆடுகள் அல்லது இருபது திர்ஹம் சேர்த்து வசூலிக்க வேண்டும்.
அதேபோன்று ஒருவருக்கு மூன்று ஆண்டுகள் பூர்த்தியான பெண் ஒட்டகம் `ஜகாத்' கடமையாய் இருக்கும் நிலையில், அது அவரிடம் இல்லையெனில், அவரிடம் நான்கு ஆண்டுகள் பூர்த்தியான பெண் ஒட்டகம் இருப்பின் `ஜகாத்' பெறுபவர் அதன் உரிமையாளரிடம் அதனைப் பெற்றுக் கொண்டு, இரண்டு ஆடுகள் அல்லது இருபது `திர்ஹம்' (ஜகாத் அளித்தவருக்கு) கொடுக்க வேண்டும் என்று அபூ பக்ர்(ரலி) `ஜகாத்' கடமை குறித்து தமக்கு செய்தி எழுதினார்கள் என அனஸ்(ரலி) அறிவித்தார்.