636. முஸ்லிமின் மற்றோர் அறிவிப்பில் அபூ சயீத்(ரலி) வாயிலாக, ``ஐந்து `வஸக்' அளவிற்கும் குறைவாக உள்ள பேரீச்சம் பழம் மற்றும் தானியங்களுக்கு `ஜகாத்' இல்லை'' என உள்ளது.

638. ``தானியங்களில் வாற்கோதுமை, கோதுமை, திராட்சை, பேரீச்சை ஆகியவற்றைத் தவிர்த்து வேறு எந்த வேளாண்மைக்கும் `ஜகாத்' வாங்க வேண்டாம்'' என்று இறைத்தூதர்(ஸல்) கூறினார்கள் என அபூ மூஸா அல் அஷ்அரீ(ரலி) மற்றும் முஆத்(ரலி) அறிவித்துள்ளார்கள்.
நூல்கள்: தப்ரானீ, ஹாகிம்
குறிப்பு: கோதுமையில் மட்டும்தான் ஜகாத் கடமை அரிசியில் இல்லை என இதைக் கருதவேண்டாம். தானிய வகைகள் அனைத்திற்கும் அவை `ஜகாத்'தின் அளவை அடைந்துவிட்டால் `ஜகாத்' செலுத்தவேண்டும்.

640. ``நீங்கள் (வேளாண்மைப் பொருட்களில் `ஜகாத்') மதீப்பிடு செய்தால், (அவற்றில்) மூன்றில் ஒரு பகுதியை விட்டுவிட்டு (மற்றவற்றில் `ஜகாத்'தைப்) பெற்றுக் கொள்ளுங்கள். மூன்றில் ஒரு பங்கை விடாவிட்டாலும் நான்கில் ஒரு பங்கையாவது விட்டுவிடுங்கள்'' என்று இறைத்தூதர்(ஸல்) கட்டளையிட்டார்கள் என ஸஹ்ல் இப்னு அபீ ஹஸ்மா(ரலி) அறிவித்தார்.
நூல்கள்: அஹ்மத், அபூ தாவூத், நஸயீ மற்றும் திர்மிதீ
இமாம் இப்னு ஹிப்பான் மற்றும் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளனர்.

642. இறைத்தூதர்(ஸல்) அவர்களிடம் ஒரு பெண்மணி வந்தார். அவரின் கையில் அவரின் மகள் இருந்தாள். அவளின் கையில் இரண்டு தங்க வளையங்கள் இருந்தன.
``இதற்கு நீ `ஜகாத்' கொடுத்துவிட்டாயா?'' என அப்பெண்ணிடம் இறைத்தூதர்(ஸல்) கேட்டார்கள்.
``இல்லை'' என அவர் கூறினார்.
``மறுமையில் அல்லாஹ் இதற்குப் பதிலாக நெருப்பினால் ஆன இரண்டு வளையங்கள் அணிவிப்பதை விரும்புகிறாயா?'' என இறைத்தூதர்(ஸல்) கேட்டார்கள்.
உடனே, அவர் அவற்றை உடனடியாக் கழற்றிக் கொடுத்து விட்டார் என அமீர் இப்னு ஷுஐபு தன் தந்தை மற்றும் பாட்டனார் வாயிலாக அறிவித்தார்.
நூல்கள்: அபூ தாவூத், நஸயீ மற்றும் திர்மிதீ
ஆயிஷா(ரலி) அவர்களின் அறிவிப்பின் மூலம், இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

644. நாங்கள் வியாபாரத்திற்காகச் சேகரித்துள்ள பொருட்களிலிருந்து `ஜகாத்'தைக் கொடுக்குமாறு இறைத்தூதர்(ஸல்) எங்களுக்குக் கட்டளையிட்டார்கள் என ஸமுரா இப்னு ஜுன்துப்(ரலி) அறிவித்தார்.
நூல்: அபூ தாவூத்
இதன் அறிவிப்புத் தொடரில் `லய்யின்' எனும் பலவீனம் உள்ளது.

646. பாழடைந்த ஓர் இடத்திலிருந்து ஒருவருக்குக் கிடைத்த புதையல் குறித்து இறைத்தூதர்(ஸல்) கூறுகையில், ``அதை நீ மக்கள் வசிக்கும் பகுதியிலிருந்து பெற்றிருந்தால் (அது யாருக்குரியது எனக் கேட்டு) அதனை அறிவிப்புச் செய்! மக்கள் வசிக்காத பகுதியிலிருந்து அதைப் பெற்றிருந்தால் அதன் ஐந்தில் ஒரு பங்கு (20 விழுக்காடு) `ஜகாத்' ஆகும்'' என்று கூறினார்கள் என அம்ர் இப்னு ஷுஐபு தம் தந்தை மற்றும் பாட்டனார் வாயிலாக அறிவித்தார்.
இமாம் இப்னு மாஜா(ரஹ்) இதனை `ஹஸன்' எனும் தரத்தில் பதிவிட்டுள்ளார்.

648. முஸ்லிம்களிலுள்ள அடிமை, சுதந்திரமானவர், ஆண், பெண், சிறியவர், பெரியவர் ஆகிய அனைவர் மீதும் தலா ஒரு `ஸாவு' பேரீத்தம் பழத்தை அல்லது ஒரு `ஸாவு' வாற்கோதுமையை `ஜகாத்துல் ஃபித்ர்' (பெருநாள் தர்மம்) கொடுக்க வேண்டும் என இறைத்தூதர்(ஸல்) கடமையாக்கினார்கள். மேலும், மக்கள் தொழுகைக்கு வெளியேறும் முன்பே அதைக் கொடுக்குமாறு கட்டளையிட்டார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்
குறிப்பு: `முத்' என்பது ஒருவர் தம் இரண்டு கைகளையும் இணைத்து அள்ளும் ஓர் அளவைக் குறிக்கும். நான் `முத்'களை ஒன்றிணைத்தல் ஒரு `ஸாவு' எனப்படும்.

650. இறைத்தூதர்(ஸல்) அவர்களின் காலத்தில், பெருநாள் தர்மமாக, உணவு பொருட்களில், ஒரு `ஸாவு' அல்லது பேரீத்தம் பழத்தில் ஒரு `ஸாவு' அல்லது வாற்கோதுமையில் ஒரு `ஸாவு' அல்லது காய்ந்த திராட்சையில் ஒரு `ஸாவு' என நாங்கள் கொடுத்துக் கொண்டிருந்தோம் என அபூ ஸயீத் அல் குத்ரீ(ரலி) அறிவித்தார்.
நூல்கள்: புகாரீ, முஸ்லிம்
மற்றோர் அறிவிப்பின்படி அல்லது ஒரு `ஸாவு' பால் கட்டி என உள்ளது.
``இறைத்தூதர்(ஸல்) காலத்தில் நான் எதைக் கொடுத்துக் கொண்டிருந்தேனோ, அதையே கொடுத்து கொண்டிருப்பேன்'' என அபூ ஸயீத் கூறினார்.
அபூ தாவூதின் அறிவிப்பில் நான் ஒருபோதும் ஒரு ஸாவுவைத் தவிர (அதிகமாக) கொடுக்க மாட்டேன் என உள்ளது.

652. ``இறைவனின் நிழலைத் தவிர வேறு நிழலே இல்லாத அந்த (மறுமை) நாளில், அல்லாஹ் தன் நிழலில் ஏழு நபர்களுக்கு இடம் அளிப்பான். (ஹதீஸ் முழுவதும் சொல்லப்பட்டது) அவர்களில் ஒருவர் தன் வலக் கை செய்யும் தர்மத்தை தன் இடக் கை அறியாதவாறு இரகசியமாக தர்மம் செய்தவர்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
குறிப்பு: மேற்கண்ட ஹதீஸை முழுவதுமாக அறிந்திட, ஸஹீஹ் அல் புகாரீ ஹதீஸ் எண் 1423 காண்க!

654. ``ஆடை இல்லாதிருக்கும் தன் முஸ்லிம் சகோதரனுக்கு ஆடை அணியச் செய்யும் முஸ்லிமிற்குச் சுவர்க்கத்தின் பச்சை நிற ஆடையை அல்லாஹ் அணிவிப்பான். பசியில் இருக்கும் தன் முஸ்லிம் சகோதரனுக்கு உணவளிக்கும் முஸ்லிமிற்கு சுவர்க்கத்தின் பழவகைகளை அல்லாஹ் உண்ணச் செய்வான். தாகத்தில் இருக்கும் தன் முஸ்லிம் சகோதரனுக்கு நீர் புகட்டுபவருக்கு `அர்ரஹீக்குல் மக்தூம்' எனும் பானத்தை சுவர்க்கத்தில் அல்லாஹ் புகட்டுவான்'' என்று இறைத்தூதர்(ஸல்) கூறினார்கள் என அபூ ஸயீத் அல் குத்ரீ(ரலி) அறிவித்தார்.
இமாம் அபூ தாவூத்(ரஹ்) இதனை பலவீனமான அறிவிப்பாளர் தொடருடன் பதிவிட்டுள்ளார்.