735. ஜுஹைனா கோத்திரத்திலிருந்து ஒரு பெண்மணி இறைத்தூதர்(ஸல்) அவர்களிடம் வந்து, ``(இறைத்தூதர் அவர்களே!) என் தாய் ஹஜ் செய்வதாக நேர்ச்சை செய்திருந்தார். ஆனால், ஹஜ் செய்யாமலேயே இறந்துவிட்டார். அவருக்காக நான் ஹஜ் செய்யலாமா?'' எனக் கேட்டார்.
``ஆமாம் நீ அவருக்காக ஹஜ் செய்! உன் தாய் மீது கடனிருந்தால், அதனை நீ நிறைவேற்றுவாயல்லவா? அல்லாஹ்வின் கடனை நிறைவேற்றுங்கள். கடன்கள் நிறைவேற்றப்படுவதற்கு அல்லாஹ்வே மிகவும் உரிமை கொண்டவன் என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்: புகாரீ

737. ``எந்த ஒரு பெண்ணுடனும் அவளை மணக்கத் தடைசெய்யப்பட்டவர் இல்லாமல் அவளுடன் வேறு யாரும் தனித்திருக்க வேண்டாம். இன்னும், எந்த பெண்ணும் திருமண பந்தம் தடை செய்யப்படாத ஓர் ஆணுடன் தனித்துப் பயணம் செய்ய வேண்டாம்'' என்று இறைத்தூதர்(ஸல்) உரை நிகழ்த்த நான் செவியுற்றுள்ளேன்.
அப்போது ஒருவர் எழுந்து, ``இறைத்தூதர் அவர்களே! என் மனைவி தனியாக ஹஜ் செய்யச் சென்றுள்ளார். நானோ இன்ன இன்ன போர்களில் ஈடுபடுத்தப்பட்டுள்ளேன்'' எனக் கூறினார்.
``நீ சென்று உன் மனைவியுடன் ஹஜ்ஜை மேற்கொள்!'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது.

739. இறைத்தூதர்(ஸல்) ஒருமுறை) எங்களுக்கு உரை நிகழ்த்திக் கொண்டிருந்தபோது, ``அல்லாஹ் உங்கள் மீது ஹஜ்ஜை விதியாக்கியுள்ளான்'' எனக் கூறினார்கள்.
அப்போது, அக்ரவு இப்னு ஹாபிஸ்(ரலி) எழுந்து, ``இறைத்தூதர் அவர்களே! இது ஒவ்வோர் ஆண்டுமா?'' என வினவினார்.
``நான் அப்படிச் சொன்னால் அது கடமையாகிவிடும். ஹஜ் என்பது ஒருமுறைதான். அதற்கு மேல் செய்வது உபரியாகும்'' என்று இறைத்தூதர்(ஸல்) பதிலளித்தார்கள் என இப்னு அப்பாஸ்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ மற்றும் இப்னு மாஜா

741. மதீனா வாசிகளுக்கு துல்ஹுலைஃபா எனும் இடத்தையும், சிரியா வாசிகளுக்கு ஜுஹ்ஃபா எனும் இடத்தையும், நஜ்த் வாசிகளுக்கு கர்ன் அல்மனாஸில் எனும் இடத்தையும் இன்னும் யமன் வாசிகளுக்கு யலம்லம் எனும் இடத்தையும் இஹ்ராம் கட்டும் இடமாக இறைத்தூதர்(ஸல்) ஆக்கினார்கள். இவை அவர்களுக்கும் இவற்றின் வழியாக ஹஜ் மற்றும் உம்ராவிற்கு வருபவர்களுக்கும் அங்கு இஹ்ராம் கட்டும் இடங்கள் ஆகும். இந்த எல்லைகளுக்குள் இருப்போர் தாம் வசிக்கும் இடங்களில் எங்கேனும் இஹ்ராம் அணியலாம். மக்காவாசிகள் இஹ்ராம் கட்டுமிடம் மக்காவே ஆகும் என இஹ்ராம் கட்டும் இடத்தை இறைத்தூதர்(ஸல்) நிர்ணயித்தார்கள் என இப்னு அப்பாஸ் (ரலி) அறிவித்தார்.
நூல்கள்: புகாரீ, முஸ்லிம்

743. ஹதீஸ் 742 வது ஹதீஸின் மூலம் ஜாபிர்(ரலி) வாயிலாக முஸ்லிமில் உள்ளது. அதன் அறிவிப்பாளர் இது ``மர்ஃபூஃ'' எனும் தரத்தில் உள்ளதா என சந்தேகிக்கிறார்.

745. கீழை நாட்டவர்களின் இஹ்ராம் கட்டுமிடமாக `அகீக்' எனும் இடத்தை இறைத்தூதர்(ஸல்) ஆக்கினார்கள் என இப்னு அப்பாஸ்(ரலி) வாயிலாக அஹ்மத், அஹ்மத், திர்மிதீயில் உள்ளது.

747. துல்ஹுலைஃபா இடத்திலுள்ள மஸ்ஜிதைத் தவிர்த்து, இறைத்தூதர்(ஸல்) வேறு எங்கும் இஹ்ராம் கட்டியதில்லை என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்

749. இறைத்தூதர்(ஸல்) இஹ்ராம் கட்டியபோது தம்முடைய ஆடைகளைக் களைந்து குளித்தார்கள் என ஜைத் இப்னு ஸாபித்(ரலி) அறிவித்தார்.
நூல்: திர்மிதீ
இமாம் திர்மிதீ(ரஹ்) இதனை `ஹஸன்' எனக் குறிப்பிட்டுள்ளார்.

751. இறைத்தூதர்(ஸல்) இஹ்ராம் நுழைவதற்காக அவர்கள் இஹ்ராம் கட்டுவதற்கு முன்பும், (துல்ஹஜ் பத்தாம் நாள்) இஹ்ராமைக் களைந்தபோதும், கஅபத்துல்லாஹ்வை வலம் வருவதற்கு முன்பும் நான் அவர்களுக்கு நறுமணம் பூசினேன் என ஆயிஷா(ரலி) அறிவித்தார்.
நூல்கள்: புகாரீ, முஸ்லிம்
குறிப்பு: இஹ்ராம் கட்டுவதற்கு முன்பு நறுமணம் பூசுதல் சுன்னா (நபிவழி) ஆகும். இஹ்ராம் நிலையில் நறுமணம் பூசுதல் தடைசெய்யப்பட்டதாகும். இங்கு கஅபத்துல்லாஹ்வை வலம் வருவதற்கு முன்பு நபி(ஸல்) அவர்களுக்கு நறுமணம் பூசியதாக அன்னை ஆயிஷா(ரலி) குறிப்பிடுகிறார். இது, துல்ஹஜ் மாதம் பத்தாம் நாளன்று ஜம்ராவிற்குக் கல்லெறிந்து, குர்பானீ கொடுத்து, தலையை மழித்தப் பின்பு நபி(ஸல்) கபஅத்துல்லாஹ்வை வலம் வருவதற்குச் செல்லும் முன்பு நறுமணம் பூசியதைக் குறிக்கிறது. துல்ஹஜ் மாதம் பத்தாம் நாளன்று மேற்குறிப்பிட்டுள்ள காரியங்களைச் செய்து முடித்தப் பின்பு ஹாஜிகள் இஹ்ராமிலிருந்து விடுபடுவர். ஆனால், மனைவியுடன் உறவு கொள்ளுதல் மட்டும் கூடாது.

753. தான் இஹ்ராம் கட்டாத நிலையில் இருக்கும்போது காட்டுக் கழுதையை வேட்டையாடிய சம்பவம் குறித்து அபூ கதாதா அல் அன்ஸாரி(ரலி) அறிவித்தார்.
இஹ்ராம் கட்டிய தம் தோழர்களைப் நோக்கி, உங்களில் யாரேனும் (இதற்காக) கட்டளையிட்டாரா? அல்லது சமிக்ஞை செய்தாரா? என இறைத்தூதர்(ஸல்) வினவினார்கள்.
``இல்லை'' என அவர்கள் கூறினார்கள்.
(அதன் பின்னரே) ``எஞ்சி இருக்கும் அதன் கறியை உண்ணுங்கள்'' என இறைத்தூதர்(ஸல்) கூறினார்கள்.
நூல்கள்: புகாரீ, முஸ்லிம்