809. ``நெய்யில் எலி விழுந்துவிட்டால், அது உறைந்ததாக இருந்தால் அதையும் அதைச் சுற்றி உள்ளதையும் (எடுத்து) எறிந்துவிடுங்கள். (மீதத்தைப் பயன்படுத்திக் கொள்ளுங்கள்) அது உறையாததாக இருப்பின் அதனை நெருங்காதீர்கள்`` என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: அஹ்மத், அபூ தாவூத்
இமாம் புகாரீ மற்றும் இமாம் அபூ ஹாதிம்(ரஹ்) இதனை வஹ்ம் எனக் சட்டம் கூறியுள்ளார்கள்.

811. பரீரா என்னிடம் வந்து, ``நான் என் எஜமானனிடம் ஒன்பது ஊக்கியாவின் பேரில் விடுதலைப் பத்திரம் எழுதிக் கொடுத்துதுள்ளேன். ஆண்டு ஒன்றுக்கு ஒரு ஊக்கியோ வீதம் நான் செலுத்த வேண்டும். எனவே, எனக்கு உதவுங்கள்'' எனக் கூறினார்.
``உன் எஜமானன் விரும்பினால், ஒன்பது ஊக்கியாவையும் ஒட்டு மொத்தமாக நான் செலுத்துகிறேன். ஆனால், உன் `வலா' (ஏனைய உரிமைகள்) எனக்குரியதாய் இருக்க வேண்டும். (அப்படியானால்) ``நான் (விடுதலை) செய்கிறேன்'' என நான் கூறினேன்.
பரீரா தன் எஜமானர்களிடம் சென்று இதனைக் கூறினார். ஆனால், அவர்கள் அதனை ஏற்க மறுத்தார்கள். அவர்களிடமிருந்து (பரீரா) என்னிடம் (மீண்டும்) வந்தார். அப்போது, என்னுடன் நபி(ஸல்) அவர்களும் அமர்ந்திருந்தார்கள்.
``இதனை நான் அவர்களிடம் கூறியதற்கு அவர்கள் ஏற்றுக் கொள்ளவில்லை. `வலா' அவர்களுக்கே உரியது என்று கூறுகின்றனர்'' என அவர் (பரீரா) கூறினார்.
அப்போது, இறைத்தூதர்(ஸல்) அதைச் செவியுற்றார்கள். ஆயிஷா(ரலி) அவர்களும் நபி(ஸல்) அவர்களிடம் செய்தியைக் கூறினார்கள்.
``அவரைப் பெற்றுக் கொண்டு, `வலா' உனக்கே உரியது என நிபந்தனையிடு. ஏனெனில், அடிமையை விடுதலை செய்தவருக்கே `வலா' உரியதாகும்'' என இறைத்தூதர்(ஸல்) கூறினார்கள்.
ஆயிஷா(ரலி) அவ்வாறே செய்தார்கள். பின்னர், இறைத்தூதர்(ஸல்) மக்களுக்கு உரை நிகழ்த்த எழுந்தார்கள். அல்லாஹ்வைப் புகழ்ந்துவிட்டு, ``மக்களுக்கு என்னவாகிவிட்டதோ? அவர்கள் அல்லாஹ்வின் சட்டத்தில் இல்லாதவற்றை எல்லாம் நிபந்தனைகளாக முன் வைக்கின்றனர். அல்லாஹ்வின் சட்டத்தில் இல்லாத நிபந்தனைகள் செல்லாதவையே. அவை நூறு நிபந்தனைகளாய் இருப்பினும் சரியே! அல்லாஹ்வின் தீர்ப்பே ஏற்கத் தகுந்ததாகும். இன்னும், அல்லாஹ்வின் நிபந்தனையே உறுதி மிக்கதாகும். இன்னும் `வலா' (அடிமைகளை) விடுதலை செய்பவருக்கே உரியது'' என்று கூறினார்கள்.
நூல்கள்: புகாரீ, முஸ்லிம்
இங்கு புகாரீயின் வாசகம் இடம் பெற்றுள்ளது.
``அவரை வாங்கிக் கொள்! விடுதலை செய்துவிடு! இன்னும், `வலா' உனக்கே உரியது என அவர்களிடம் நிபந்தனையிடு!'' என்று (இறைத்தூதர்(ஸல்) கூறினார்கள் என) முஸ்லிமில் உள்ளது.

813. இறைத்தூதர்(ஸல்) உயிருடன் இருந்தத காலத்தில் எங்கள் அடிமைப் பெண்களை அவர்கள் குழந்தை பெற்றெடுத்திருக்கும் நிலையில் நாங்கள் விற்பனை செய்துள்ளோம். அதனை அவர்கள் குற்றமாகக் கருதவில்லை என ஜாபிர்(ரலி) அறிவித்தார்.
நூல்கள்: நஸயீ, இப்னு மாஜா, தாரகுத்னீ
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

815. (கால் நடைகளைச் சினைக்குவிடும்போது) ஆண்வர்க்கத்திற்குக் கிரயம் பெறுவதை இறைத்தூதர்(ஸல்) தடைசெய்துள்ளார்கள் என இப்னு உமர்(ரலி) அறிவித்தார்.
நூல்: புகாரீ

817. `வலா' உரிமையை விற்பதையும் அதனை அன்பளிப்புச் செய்வதையும் இறைத்தூதர்(ஸல்) தடை செய்துள்ளார்கள் என இப்னு உமர்(ரலி) அறிவித்தார்.
நூல்கள்: புகாரீ முஸ்லிம்

819. ``உங்களில் உணவுப் பொருளை வாங்குவோர், அதனை அளக்காத வரையில் விற்க வேண்டாம்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்

821. ``ஒரு வியாபாரத்தில் இரண்டு வியாபாரங்களைச் செய்பவர் இரண்டிலும் குறை செய்ய நேரிடும்; அது வட்டியாகும்'' என்று இறைத்தூதர்(ஸல்) கூறினார்கள் என அபூ தாவூதில் உள்ளது.

823. இறைத்தூதர்(ஸல்) உர்பான் எனும் வியாபார முறையைத் தடை செய்துள்ளார்கள் என அம்ர் இப்னு ஷுஐபு(ரலி) அறிவித்தார்.
நூல்: மாலிக்
இது எனக்கு அம்ர் இப்னு ஷுஐப் வாயிலாகக் கிடைத்தது என இமாம் மாலிக்(ரஹ்) கூறினார்.
குறிப்பு: உர்பான் வியாபாரம் என்பது, ஒரு பொருளுக்கான விலையில் ஒரு பகுதியை முதலில் கொடுத்துவிட்டு பின்பு வியாபாரம் நிறைவடைந்தப் பின் விலையின் மீதிப் பகுதியைக் கொடுப்பதும், வியாபாரம் பாதியில் முறிந்து போனால் முதலில் கொடுத்த பணத்தை திரும்பப் கொடுக்காமலோ பெறாமலோ இருப்பது உர்பான் எனப்படும்.

825. ``இறைத்தூதர் அவர்களே! நான் பகீயில் ஒட்டகம் விற்கிறேன். அந்த வியாபாரத்தை தீனார்களுக்குப் பதிலாகச் செய்கின்றேன். ஆனால், திர்ஹம் வாங்கி விடுகிறேன். இன்னும், சில நேரங்களில் திர்ஹம்களுக்கு பதிலாக வியாபாரம் செய்கிறேன். ஆனால், தீனார்களை வாங்கிக் கொள்கிறேன். நான் இதிலிருந்து அதனை எடுக்கிறேன். இன்னும், அதிலிருந்து இதனைக் கொடுக்கிறேன்'' என நான் கேட்டேன்.
``அதே நாளின் விலையில் எடுத்துக் கொண்டால், மீதம் ஏதும் வைத்துக் கொள்ளாமல், கொடுக்கல் வாங்கலைச் சரி செய்து பிரிந்துவிட்டால் எவ்விதக் குற்றமும் இல்லை'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

827. முஹாகலா, முஸாபனா, முகாபாரா மற்றும் ஒரு குறிப்பிட்ட பொருளைப் பிரித்து வைப்பதையும் இறைத்தூதர்(ஸல்) தடை செய்தார்கள். விற்கும்போது சிலவற்றை மட்டும் வாங்குபவரிடம் பிரித்தெடுப்பது தெரிவிக்கப்பட்டுவிட்டால் பிரச்னை இல்லை என ஜாபிர்(ரலி) அறிவித்தார்.
நூல்: அஹ்மத், அபூ தாவூத், நஸயீ மற்றும் திர்மிதீ
இமாம் திர்மிதீ(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.
குறிப்பு: தானியங்கள் கதிர்களில் இருக்கும் நிலையில் அவற்றைக் குத்து மதிப்பாக விற்பது முஹாக்கலா எனப்படும்.
மரத்திலுள்ள பேரீத்த கனிகளை உலர்ந்த பேரீத்தம் கனிகளுக்கு முகத்தல் அளவையில் விற்பது, கொடியிலுள்ள திராட்சையை உலர்ந்த திராட்சைக்கு முகத்தல் அளவையில் விற்பது முஸாபனா எனப்படும்.
நிலத்தின் உரிமையாளர் மற்றும் தொழிலாளிக்கு இடையிலான ஒப்பந்த்தில், நிலத்தில் கிடைக்கும் மகசூலில் கால்பங்கு, அரைப்பங்கு அல்லது முக்கால் பங்கு நிலத்தின் உரிமையாளருக்கும், எஞ்சியுள்ளது தொழிலாளிக்கும் என ஒப்பந்தம் செய்தல் முஃகாபரா எனப்படும். இவ்வாறு செய்யப்படும் ஒப்பந்தத்தில் தொழிலாளிக்கு பாதிப்பு அதிகம் என்பதால் இது தடைசெய்யப்பட்டுள்ளது.