823. இறைத்தூதர்(ஸல்) உர்பான் எனும் வியாபார முறையைத் தடை செய்துள்ளார்கள் என அம்ர் இப்னு ஷுஐபு(ரலி) அறிவித்தார்.
நூல்: மாலிக்
இது எனக்கு அம்ர் இப்னு ஷுஐப் வாயிலாகக் கிடைத்தது என இமாம் மாலிக்(ரஹ்) கூறினார்.
குறிப்பு: உர்பான் வியாபாரம் என்பது, ஒரு பொருளுக்கான விலையில் ஒரு பகுதியை முதலில் கொடுத்துவிட்டு பின்பு வியாபாரம் நிறைவடைந்தப் பின் விலையின் மீதிப் பகுதியைக் கொடுப்பதும், வியாபாரம் பாதியில் முறிந்து போனால் முதலில் கொடுத்த பணத்தை திரும்பப் கொடுக்காமலோ பெறாமலோ இருப்பது உர்பான் எனப்படும்.

825. ``இறைத்தூதர் அவர்களே! நான் பகீயில் ஒட்டகம் விற்கிறேன். அந்த வியாபாரத்தை தீனார்களுக்குப் பதிலாகச் செய்கின்றேன். ஆனால், திர்ஹம் வாங்கி விடுகிறேன். இன்னும், சில நேரங்களில் திர்ஹம்களுக்கு பதிலாக வியாபாரம் செய்கிறேன். ஆனால், தீனார்களை வாங்கிக் கொள்கிறேன். நான் இதிலிருந்து அதனை எடுக்கிறேன். இன்னும், அதிலிருந்து இதனைக் கொடுக்கிறேன்'' என நான் கேட்டேன்.
``அதே நாளின் விலையில் எடுத்துக் கொண்டால், மீதம் ஏதும் வைத்துக் கொள்ளாமல், கொடுக்கல் வாங்கலைச் சரி செய்து பிரிந்துவிட்டால் எவ்விதக் குற்றமும் இல்லை'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

827. முஹாகலா, முஸாபனா, முகாபாரா மற்றும் ஒரு குறிப்பிட்ட பொருளைப் பிரித்து வைப்பதையும் இறைத்தூதர்(ஸல்) தடை செய்தார்கள். விற்கும்போது சிலவற்றை மட்டும் வாங்குபவரிடம் பிரித்தெடுப்பது தெரிவிக்கப்பட்டுவிட்டால் பிரச்னை இல்லை என ஜாபிர்(ரலி) அறிவித்தார்.
நூல்: அஹ்மத், அபூ தாவூத், நஸயீ மற்றும் திர்மிதீ
இமாம் திர்மிதீ(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.
குறிப்பு: தானியங்கள் கதிர்களில் இருக்கும் நிலையில் அவற்றைக் குத்து மதிப்பாக விற்பது முஹாக்கலா எனப்படும்.
மரத்திலுள்ள பேரீத்த கனிகளை உலர்ந்த பேரீத்தம் கனிகளுக்கு முகத்தல் அளவையில் விற்பது, கொடியிலுள்ள திராட்சையை உலர்ந்த திராட்சைக்கு முகத்தல் அளவையில் விற்பது முஸாபனா எனப்படும்.
நிலத்தின் உரிமையாளர் மற்றும் தொழிலாளிக்கு இடையிலான ஒப்பந்த்தில், நிலத்தில் கிடைக்கும் மகசூலில் கால்பங்கு, அரைப்பங்கு அல்லது முக்கால் பங்கு நிலத்தின் உரிமையாளருக்கும், எஞ்சியுள்ளது தொழிலாளிக்கும் என ஒப்பந்தம் செய்தல் முஃகாபரா எனப்படும். இவ்வாறு செய்யப்படும் ஒப்பந்தத்தில் தொழிலாளிக்கு பாதிப்பு அதிகம் என்பதால் இது தடைசெய்யப்பட்டுள்ளது.

829. வியாபாரம் செய்வதற்காக வரும் வணிகக் கூட்டத்தை (சந்தைக்கு வரும் முன்பே இடைமறித்து) சந்திக்க வேண்டாம். இன்னும், நகர்புறத்தார் கிராமவாசியிடம் வியாபாரம் செய்ய வேண்டாம்'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) கூறினார்.
``நகர்புறத்தார், கிராமவாசியிடம் வியாபாரமே செய்யக்கூடாது என்பதுதான் இதன் விளக்கமா?'' என நான் வினவினேன்.
``நகர்புறத்தார் கிராமவாசிக்கு இடைத்தரகராகச் செயல்படக்கூடாது'' என அவர் பதிலளித்தார் என தாவூஸ் அறிவித்தார்.
நூல்கள்: புகாரீ, முஸ்லிம்
இங்கு புகாரீயின் வாசகம் இடம் பெற்றுள்ளது.

831. நகர்புறத்தார், கிராமவாசியிடம் வியாபாரம் செய்வதையும், பொருளை வாங்காமல் விலையை மட்டும் அதிகமாக்கி விடுவதையும், ஒரு முஸ்லிம் சகோதரன், செய்யும் வியாபாரத்தை வேண்டுமென்றே முறித்து, தான் வியாபாரம் செய்வதையும், முஸ்லிம் சகோதரனின் திருமண ஒப்பந்தத்தில் குறுக்கிடுவதையும், பாத்திரத்தில் உள்ளதைக் கொட்டி வீணடிப்பது போன்று தன் சகோதரிக்கு (சக்களத்திக்கு) ஒரு பெண் தலாக் கோருவதையும் இறைத்தூதர்(ஸல்) தடை செய்துள்ளார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
முஸ்லிமில் ``ஒரு முஸ்லிம் மற்றொரு முஸ்லிமுக்குப் போட்டியாக விலைபேச வேண்டாம்'' என்பதும் உள்ளது.

833. சகோதரர்களாய் இருந்த இரண்டு அடிமைகளை விற்றுவிடுமாறு இறைத்தூதர்(ஸல்) எனக்குக் கட்டளையிட்டார்கள். நான் அவர்களை விற்பனை செய்தேன். அவர்களுக்கு இடையில் பிரிவை ஏற்படுத்தியும்விட்டேன். பின்னர், அது குறித்து இறைத்தூதர்(ஸல்) அவர்களிடம் கூறினேன்.
``திரும்பச் சென்று, அவர்கள் இருவரையும் திரும்பப் பெற்றுக் கொள்! இருவரையும் இணைத்து அல்லாது விற்பனை செய்ய வேண்டாம்'' என்று இறைத்தூதர்(ஸல்) கூறினார்கள் என அலீ(ரலி) அறிவித்தார்.
நூல்: அஹ்மத்
இதன் அறிவிப்பாளர்கள் பலமானவர்கள்.
இமாம் இப்னு குஸைமா, இப்னுல் ஜாரூத், இப்னு ஹிப்பான், ஹாகிம், தபரானீ மற்றும் இப்னுல் கத்தான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.

835. ``குற்றம் இழைப்பவனைத் தவிர வேறு யாரும் உணவுப் பொருட்களைப் பதுக்க மாட்டான்'' என்று இறைத்தூதர்(ஸல்) கூறினார்கள் என மஃமர் இப்னு அப்தில்லாஹ்(ரலி) அறிவித்தார்.
நூல்: முஸ்லிம்

837. ``பால் தரும் ஆட்டை விலைக்கு வாங்கியப் பின்னர் அதைத் திரும்பக் கொடுப்பவர், அதனுடன் ஒரு ஸாவு (உணவுப் பொருளையும் சேர்த்து) கொடுக்கட்டும்'' என இப்னு மஸ்வூத்(ரலி) கூறினார்.
நூல்: புகாரீ
இஸ்மாயீலிய்யீ எனும் நூலில் ``(ஒரு ஸாவு) பேரீச்சம் பழம்'' என்பதை அதிகப்படியாக அறிவித்துள்ளார்.

839. ``நன்கு தெரிந்து கொண்டே, அறுவடைக் காலத்தில் திராட்சையைப் பதுக்கி வைத்துப் பின்னர், மது தயாரிக்கும் நபருக்கு அதனை விற்பனை செய்பவர் நரகத்தில் புகுகிறார்'' என்று இறைத்தூதர்(ஸல்) கூறினார்கள் என அப்துல்லாஹ் இப்னு புரைதா(ரலி) அறிவித்தார்.
இதனை இமாம் தப்ரானீ(ரஹ்) தம்முடைய அல் அவ்ஸத் எனும் நூலில், ``ஹஸன்'' எனும் அறிவிப்புத் தொடருடன் பதிவிட்டுள்ளார்.

841. ``குர்பானிக்காக கால்நடை அல்லது ஆடு வாங்குவதற்கு இறைத்தூதர்(ஸல்) என்னிடம் ஒரு தீனார் கொடுத்தார்கள். நான் அதில் இரண்டு ஆடுகள் வாங்கிவிட்டேன். பின்னர், அவற்றில் ஒன்றை ஒரு தீனாருக்கு விற்பனை செய்தேன். பின்னர், இறைத்தூதர்(ஸல்) அவர்களிடம் (மீதமுள்ள) ஓர் ஆட்டையும், தீனாரையும் கொண்டு வந்தேன். அப்போது, என் வியாபாரத்தில் அருள்வளம் கிடைத்திட இறைத்தூதர்(ஸல்) பிரார்த்தித்தார்கள். நான் அதில் மண்ணை வாங்கி இருந்தாலும் இலாபம் கிடைத்திருக்கும்'' என உர்வா அல் பாரிக்கீ(ரலி) அறிவித்தார்.
நூல்கள்: அஹ்மத், அபூ தாவூத், திர்மிதீ மற்றும் இப்னு மாஜா
இமாம் புகாரீ(ரஹ்) பல இடங்களில் இந்த ஹதீஸை குறிப்பிட்டுள்ளார். ஆனால், அதில் முழுமையான வாசகம் இல்லை.