832. தாய்க்கும், பிள்ளைக்கும் இடையில் (இந்த உலகில்) பிரிவினையை ஏற்படுத்துபவருக்கும், அவருக்குப் பிரியமானவர்களுக்கும் இடையில் அல்லாஹ் மறுமை நாளில் பிரிவினையை ஏற்படுத்துவான் என்று இறைத்தூதர்(ஸல்) கூறினார்கள் என அபூ அய்யூப் அல் அன்ஸாரி(ரலி) அறிவித்தார்.
நூல்: அஹ்மத்
இமாம் திர்மிதீ மற்றும் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள். எனினும், இதன் அறிவிப்பாளர் தொடரில், சில பிரச்னைகள் உள்ளன. அதற்கு ஆதாரமும் உள்ளது.

834. இறைத்தூதர்(ஸல்) அவர்களின் காலத்தில் பொருட்களின் விலைவாசி உயர்ந்துவிட்டது. எனவே, மக்கள் இறைத்தூதர்(ஸல்) அவர்களிடம், ``இறைத்தூதர் அவர்களே! விலைவாசிகள் உயர்ந்துவிட்டன. எனவே, மக்களுக்காக விலை நிர்ணயம் செய்யுங்கள்'' எனக் கேட்டுக் கொண்டனர்.
``விலைவாசிகளை உயர்த்துவதும், குறைப்பதும், (உணவில்) நெருக்கடி ஏற்படுத்துவதும், விசாலமாக்குவதும், தேவையானதைக் கொடுத்து உணவளிப்பதும் அல்லாஹ்தான். இன்னும், அல்லாஹ்வை நான் சந்திக்கும்போது, பிறர் என்னிடம் தங்களின் இரத்தம் மற்றும் சொத்துக்களின் உரிமையைத் தேடுவதை நான் விரும்பவில்லை'' என்று இறைத்தூதர்(ஸல்) கூறினார்கள் என அனஸ் இப்னு மாலிக்(ரலி) அறிவித்தார்.
நூல்கள்: அஹ்மத், அபூ தாவூத், திர்மிதீ மற்றும் இப்னு மாஜா
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

836. ஒட்டகம் மற்றும் ஆடு (போன்ற) கால் நடைகளில் விற்பதற்காக அதன் பாலை (கறக்காது) தடுத்து நிறுத்தி (அவற்றின் மடுயை கனக்கச் செய்து அதிகமாக பால் தருவது போன்று) காண்பிக்காதீர்கள்! இவ்வாறுள்ள கால்நடைகளை வாங்கியவர் (பாலைக் கறந்து) நன்கு ஆய்வு செய்த பின்பு, அவர் விரும்பியதைச் செய்யும் உரிமை பெறுகிறார். அதாவது, அவர் விரும்பினால் அதனை வைத்துக் கொள்ளலாம். அல்லது ஒரு ஸாவு பேரீச்சம் பழத்துடன் அதைத் திருப்பிக் கொடுத்துவிடலாம்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
``அந்த உரிமை அவருக்கு மூன்று நாள்கள் வரை (மட்டுமே) உள்ளது'' என முஸ்லிமில் உள்ளது.
``ஒரு ஸாவு உணவுப் பொருளுடன் அதைத் திரும்பத் தரவேண்டும். (விளையாத) வெள்ளைக் கோதுமையாக அது இருக்கக் கூடாது'' என புகாரீயின் மற்றோர் அறிவிப்பில் முஅல்லக் எனும் தரத்தில் உள்ளது.
``அறிவிப்புகளில் பேரீச்சம்பழம்தான் அதிகமாக சொல்லப்பட்டுள்ளது'' என இமாம் புகாரீ(ரஹ்) குறிப்பிட்டுள்ளார்.

838. இறைத்தூதர்(ஸல்) ஓர் உணவுக் குவியலைக் கடந்து சென்றார்கள். அப்போது, அதனுள் தம் கையை நுழைத்தார்கள். அவர்களின் கையில் ஈரம் தட்டுப்பட்டதால், ``உணவுக்காரரே! இது என்ன?'' எனக் கேட்டார்கள்.
``இறைத்தூதர் அவர்களே! மழை பொழிந்துவிட்டது'' என அவர் கூறினார்.
``மக்கள் பார்க்கும் விதமாக அதனை நீ மேலே போட்டிருக்க வேண்டமா? (எனக் கூறி) ``ஏமாற்றுபவர் நம்மைச் சார்ந்தவர் அல்லர்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்

840. ``வாங்கிய பொருளைப் பயன்படுத்தி, அதன் மூலம் பெற்ற பலன் பொறுப்பாளரையே (பொருளை வாங்கியவரையே) சாரும்'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா
இமாம் புகாரீ மற்றும் இமாம் அபூ தாவூத்(ரஹ்) இதனை பலவீனமானது எனக் குறிப்பிட்டுள்ளார்கள்.
இமாம் திர்மிதீ, இமாம் இப்னு குஸைமா, இமாம் இப்னுல் ஜாரூத், இமாம் இப்னு ஹிப்பான், இமாம் ஹாகிம் மற்றும் இமாம் இப்னுல் கத்தா(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.
குறிப்பு: விற்பனையாளரால் உத்திரவாதம் அளிக்கப்பட்டு விற்கப்பட்ட பொருள், உத்திரவாதம் அளிக்கப்பட்ட காலத்திற்குள் கெட்டுவிடுமாயின், அந்த இடைப்பட்ட காலங்களில் பயன்படுத்தி பெறப்பட்ட பலன் பொருளை வாங்கியவருக்கே உரியது. இந்தப் பலனில் விற்றவருக்கு எவ்விதப் பங்கும் இல்லை. உத்திரவாதம் என்பது ழுரயசயவேநந மற்றும் றுயசசயவேல ஆகியவற்றைக் குறிக்கிறது.

842. மேற்கண்ட ஹதீஸிற்குச் சான்றாக ஹகீம் இப்னு ஹிஸாம் அவர்களின் ஒரு ஹதீஸ் திர்மிதீயில் பதிவிடப்பட்டுள்ளது.

844. ``தண்ணீரில் இருக்கும் மீனை விலை பேசாதீர்கள்'' ஏனெனில், அது ஏமாற்றுவதாகும்'' என்று இறைத்தூதர்(ஸல்) கூறினார்கள் என இப்னு மஸ்வூத்(ரலி) அறிவித்தார்.
நூல்: அஹ்மத்
இதனை, ``மவ்கூஃப்'' எனும் தரம் என்றும் இமாம் அஹ்மத்(ரஹ்) சுட்டியுள்ளார்.

846. ``ஒரு முஸ்லிமுடன், தான் செய்துகொண்ட வியாபாரத்தை `இகாலா' செய்பவர் (செய்து முடிக்கப்பட்ட வியாபார ஒப்பந்தத்திற்குப் பின்பு விற்பவரோ அல்லது வாங்குபவரோ ஏதேனும் சிக்கலின் காரணமாக அவ்வொப்பந்தத்தைத் திரும்பப் பெறும்படி கோருதலாகும்) இவ்வாறு கோரியதால், அதனைத் திரும்பப் பெறுகிறவரின் சிக்கலை அல்லாஹ் (மறுமையில்) நீக்குகிறான்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: அபூ தாவூத், இப்னு மாஜா
இமாம் இப்னு ஹிப்பான் மற்றும் இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.

848. இரண்டு பேர் வியாபாரக் கொடுக்கல் வாங்கலில் ஈடுபட்டால், ஒருவரைவிட்டு ஒருவர் பிரிந்து செல்லாமல், ஒன்றாய் இருக்கும் வரை அவர்களில் ஒவ்வொருவருக்கும் வியாபாரத்தை முறித்துக் கொள்ளும் உரிமை இருக்கிறது. வாங்குபவர் மற்றும் விற்பவர் ஆகிய இருவரில் ஒருவர் மற்றவருக்கு வியாபாரத்தை முறித்துக் கொள்ளும் உரிமை வழங்கி, அதைப் பயன்படுத்தாமல் இருவரும் வியாபார ஒப்பந்தம் செய்து கொண்டால், வியாபாரம் உறுதியாகிவிடும்; இருவரும் ஒப்பந்தம் செய்துகொண்டு, இருவரில் யாருமே ஒப்பந்தத்தை முறிக்காமல் பிரிந்து சென்றுவிட்டால், அப்போதும் வியாபாரம் உறுதியாகிவிடும் என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது.

850. தம் வியாபாரத்தில் ஏமாற்றம் ஏற்படுகிறது என இறைத்தூதர்(ஸல்) அவர்களிடம் ஒருவர் கூறியபோது, ``நீ (என்னுடன்) வியாபாரம் செய்தால் நான் ஏமாற்ற மாட்டேன். (எனவே, நீயும் என்னை ஏமாற்றாதே!) எனக் கூறிவிடு'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்