839. ``நன்கு தெரிந்து கொண்டே, அறுவடைக் காலத்தில் திராட்சையைப் பதுக்கி வைத்துப் பின்னர், மது தயாரிக்கும் நபருக்கு அதனை விற்பனை செய்பவர் நரகத்தில் புகுகிறார்'' என்று இறைத்தூதர்(ஸல்) கூறினார்கள் என அப்துல்லாஹ் இப்னு புரைதா(ரலி) அறிவித்தார்.
இதனை இமாம் தப்ரானீ(ரஹ்) தம்முடைய அல் அவ்ஸத் எனும் நூலில், ``ஹஸன்'' எனும் அறிவிப்புத் தொடருடன் பதிவிட்டுள்ளார்.

841. ``குர்பானிக்காக கால்நடை அல்லது ஆடு வாங்குவதற்கு இறைத்தூதர்(ஸல்) என்னிடம் ஒரு தீனார் கொடுத்தார்கள். நான் அதில் இரண்டு ஆடுகள் வாங்கிவிட்டேன். பின்னர், அவற்றில் ஒன்றை ஒரு தீனாருக்கு விற்பனை செய்தேன். பின்னர், இறைத்தூதர்(ஸல்) அவர்களிடம் (மீதமுள்ள) ஓர் ஆட்டையும், தீனாரையும் கொண்டு வந்தேன். அப்போது, என் வியாபாரத்தில் அருள்வளம் கிடைத்திட இறைத்தூதர்(ஸல்) பிரார்த்தித்தார்கள். நான் அதில் மண்ணை வாங்கி இருந்தாலும் இலாபம் கிடைத்திருக்கும்'' என உர்வா அல் பாரிக்கீ(ரலி) அறிவித்தார்.
நூல்கள்: அஹ்மத், அபூ தாவூத், திர்மிதீ மற்றும் இப்னு மாஜா
இமாம் புகாரீ(ரஹ்) பல இடங்களில் இந்த ஹதீஸை குறிப்பிட்டுள்ளார். ஆனால், அதில் முழுமையான வாசகம் இல்லை.

843. கால்நடைகளின் வயிற்றிலுள்ள குட்டியை அது ஈன்றெடுக்காதவரை விலை பேசுவதையும், மடுவிலிருக்கும் பாலை விலை பேசுவதையும், ஓடிவிட்ட அடிமையை விலை பேசுவதையும், பிரித்தளிக்கப்படாத கனீமத் பொருட்களை (போரில் ஈட்டிய பொருட்களை) விலை பேசுவதையும், கைக்குவராத தர்மப் பொருட்களையும், (தண்ணீரில்) மூழ்கி (பொருட்களை) எடுப்பவர் (எடுக்காத பொருளுக்கு) விலை பேசுவதையும் இறைத்தூதர்(ஸல்) தடைசெய்துள்ளார்கள் என ஆபூ ஸயீத் அல் குத்ரீ(ரலி) அறிவித்தார்.
இமாம் இப்னு மாஜா, இமாம் பஸ்ஸார் மற்றும் இமாம் தராகுத்னீ(ரஹ்) இதனை பலவீனமான அறிவிப்புத் தொடருடன் பதிவிட்டுள்ளார்கள்.

845. (சாப்பிடும் அளவுக்கு) நன்றாகப் பழுக்காதவரை பழத்தை விற்பதையும், ரோமத்தை அது (கால்நடையின்) முதுகில் இருக்கும்போது விற்பதையும், மடுவில் இருக்கும் பாலை விற்பதையும் இறைத்தூதர்(ஸல்) தடை செய்துள்ளார்கள் என இப்னு அப்பாஸ்(ரலி) அறிவித்தார்.
இதனை இமாம் தப்ரானீ(ரஹ்) தம்முடைய அல் அவ்ஸத் எனும் நூலிலும், இமாம் தாரகுத்னீ(ரஹ்) அவர்களும் பதிவிட்டுள்ளனர்.
இக்ரிமா(ரலி) வாயிலாக இமாம் அபூ தாவூத்(ரஹ்) தம்முடைய மராஸில் எனும் நூலில் இதனை பதிவிட்டுள்ளார்.
இன்னும் இப்னு அப்பாஸ்(ரலி) வாயிலாக மவ்சுஃப் எனும் தரத்தில் பதிவிடப்பட்டுள்ளது. இதன் அறிவிப்பாளர் தொடர் பலமானது.
இமாம் பைஹகீ(ரஹ்) இதுவே சரியானது எனக் குறிப்பிட்டுள்ளார்.

847. ஒட்டகத்தில் வயிற்றில் இருப்பவற்றையும், ஒட்டகத்தின் முதுகில் இருப்பவற்றையும் விற்பதை இறைத்தூதர்(ஸல்) தடைசெய்தார்கள் என அபூ ஹுரைரா(ரலி) அறிவித்தார்.
நூல்: பஸ் ஸார்
ளயீஃப் எனும் பலவீமான அறிவிப்புத் தொடருடன் உள்ளது.
குறிப்பு: ஒட்டகத்தின் வயிற்றில் இருக்கும் குட்டியை விற்பதை மலாகிஹ் என்பர். ஒட்டகத்தை இனப்பெருக்கம் செய்வதற்காக விலைபேசுவதை மளாமீன் என்பர்.

849. ``விற்பவரும் வாங்குபவரும் ஒருவர் மற்றவரை விட்டுப் பிரிந்து செல்லாதவரை வியாபாரத்தை முறித்துக் கொள்ளும் உரிமையை இருவரும் பெற்றுள்ளனர், முறித்துக் கொள்ள உரிமை வழங்கப்பட்ட ஒப்பந்தமாய் இருந்தாலே தவிர! எங்கே ஒப்பந்தத்தை ரத்து செய்து விடுவாரோ என்று (அவசர அவசரமாகப்) பிரிந்து செல்வது அனுமதிக்கப்பட்டதல்ல'' என்று இறைத்தூதர்(ஸல்) கூறினார்கள் என அம்ரு பின் ஷுஐப்(ரலி) அறிவித்தார்.
நூல்கள்: அஹ்மத், அபூ தாவூத், திர்மிதீ, நஸயீ, தாரகுத்னீ, இப்னு குஸைமா மற்றும் இப்னுல் ஜாரூத்
மற்றோர் அறிவிப்பில், அவ்விருவரும் தங்களின் இடத்திலிருந்து பிரிந்து செல்லாத வரை வியாபாரத்தை முறித்துக் கொள்ளும் உரிமையை இருவரும் பெற்றுள்ளனர் என உள்ளது.

851. வட்டியை உண்பவரையும், அதனை உண்ணக் கொடுப்பவரையும், அதற்காக எழுதுபவரையும், அதற்கு சாட்சி சொல்பவர்களையும் இறைத்தூதர்(ஸல்) சபித்து, ``அவர்கள் (குற்றத்தில்) சமமானவர்கள்'' என்று கூறினார்கள் என ஜாபிர்(ரலி) அறிவித்தார்.
நூல்: முஸ்லிம்

853. வட்டிக்கு 73 வாசல்கள் உள்ளன. அதில் இலேசானது (கடைசித் தரம்) தன் தாயையே திருமணம் செய்து கொள்வதைப் போன்றதாகும். ஒரு முஸ்லிமின் மானம் மரியாதையில் (அவனைப் பற்றிப் புறம்பேசி, கோள்சொல் , அவதூறு கூறி) தலையிடுவதே வட்டியில் பெரும் வட்டியாகும்.'' என்று இறைத்தூதர்(ஸல்) கூறினார்கள் என அப்துல்லாஹ் இப்னு மஸ்வூத்(ரலி) அறிவித்தார்.
நூல்: இப்னு மாஜா
இது ஹாகிமில் முழுவதுமாக அறிவிக்கப்பட்டு, ஆதாரப்பூர்வமானது எனக் குறிப்பிடப்பட்டுள்ளது.

855. ``தங்கத்திற்குத் தங்கம், வெள்ளிக்கு வெள்ளி, மணிக் கோதுமைக்கு மணிக் கோதுமை, வாற்கோதுமைக்கு வாற்கோதுமை, பேரீச்சம் பழத்திற்குப் பேரீச்சம் பழம், உப்புக்கு உப்பு ஒரே தரத்தில், சம அளவில் (உடனுக்குடன் விற்பது குற்றமில்லை. இந்த இனங்கள் மாறுபடும்போது உடனுக்குடன் என்றால்) நீங்கள் விரும்பியவாறு விற்றுக்கொள்ளுங்கள்'' என்று இறைத்தூதர்(ஸல்) கூறினார்கள் என உபாதா இப்னு ஸாமித்(ரலி) அறிவித்தார்.
நூல்: முஸ்லிம்

857. இறைத்தூதர்(ஸல்) ஒரு நபரைப் பணியளராக நியமித்து கைபருக்கு அனுப்பினார்கள். அவர் (கைபரின்) உயர்தரமான பேரீச்சம் பழங்களைக் கொண்டு வந்தார்.
``கைபரின் எல்லாப் பேரீச்சம் பழங்களும் இவ்வாறுதான் உள்ளனவா?'' என இறைத்தூதர்(ஸல்) கேட்டார்கள்.
``இல்லை! இறைத்தூதர் அவர்களே! அல்லாஹ்வின் மீது ஆணையாக நாங்கள் இரண்டு ஸாவுக்கு பதிலாக இந்த ஒரு ஸாவுவை வாங்குகிறோம். இன்னும், (சில நேரங்களில்) மூன்று ஸாவுக்குப் பதிலாக இரண்டு ஸாவு வாங்குகிறோம்'' எனக் கூறினார்.
``இவ்வாறு செய்யாதீர்கள். பலதரப்பட்ட பேரீச்சம் பழங்களையும் சில திர்ஹம்களுக்குப் பதிலாக விற்பனை செய்யுங்கள்; பின்னர், சில திர்ஹம்களுக்குப் பதிலாக உயர்தரமான பேரீச்சம் பழங்களை விலைக்கு வாங்குங்கள்'' என்று இறைத்தூதர்(ஸல்) கூறினார்கள் என அபூ ஸயீத் அல் குத்ரீ(ரலி) அறிவித்தார். இன்னும், (தராசு) நிறுவையிலும் இது போன்றே என்றும் அறிவிப்பாளர் கூறினார்
நூல்கள்: புகாரீ, முஸ்லிம்
``நிறுத்தல் அளவையிலும் இவ்வாறே'' எனும் வாசகம் முஸ்லிமில் உள்ளது.