860. நான் கைபர் நாளன்று பன்னிரண்டு தீனாருக்கு ஒரு மாலையை விலைக்கு வாங்கினேன். அதில் தங்கம் மற்றும் கோர்க்கப்பட்ட கற்கள் இருந்தன. நான் அவற்றை(த் தனித்தனியாகப்) பிரித்தேன். அப்போது, அதில் பன்னிரண்டு திர்ஹமைவிட அதிகத் தங்கத்தை நான் பெற்றேன். பின்னர், அது குறித்து இறைத்தூதர்(ஸல்) அவர்களிடம் நான் கூறினேன்.
``அதைப் பிரித்தெடுக்காத வரை விற்பகாதே!'' என்று அவர்கள் கூறினார்கள் என ஃபுளாலா இப்னு உபைதில்லாஹ்(ரலி) அறிவித்தார்.
நூல்: முஸ்லிம்

862. ``நீங்கள் அதிக விலைக்கு விற்ற அதே பொருளை, குறைந்து விலைக்கு வாங்கும்படியான ஒப்பந்தங்களைச் செய்து, மாடுகளின் வால்களைப் பிடித்துக் கொண்டு விவசாயத்தில் மூழ்கி ஜிஹாதை விட்டுவிட்டால் நீங்கள் உங்களின் மார்க்கத்தின் பக்கம் திரும்பும் வரை அல்லாஹ் உங்கள் மீது இழிவைத் திணித்து விடுவான்; அது வரை அதனை நீக்கவே மாட்டான்'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்: அபூ தாவூத்
நாஃபிவு வாயிலாக அப்துல்லாஹ் இப்னு உமர்(ரலி) அவர்களிடமிருந்து அபூ தாவூதில் பதிவிடப்பட்டுள்ளது.
இதன் அறிவிப்புத் தொடரில் ஆட்சேபனை உள்ளது. இது போன்று அதாவு வாயிலாக அஹ்மதிலும் உள்ளது. அதன் அறிவிப்பாளர்கள் பலமானவர்கள். இமாம் இப்னு கத்தான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

864. ``இலஞ்சம் வாங்குபவரையும் இலஞ்சம் கொடுப்பவரையும் இறைத்தூதர்(ஸல்) சபித்தார்கள்'' என அப்துல்லாஹ் இப்னு அமர் (ரலி) அறிவித்தார்.
நூல்: அபூ தாவூத்
இமாம் திர்மிதீ(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

866. முஸாபனா (எனும் வியாபார) முறையை இறைத்தூதர்(ஸல்) தடுத்தார்கள். அதாவது பேரீச்சம் பழம் மரத்தில் இருக்கும் போதே அளக்கப்பட்ட பேரீச்சம பழத்திற்குப் பதிலாக அதனை விற்பது, இன்னும் திராட்சை கொடியில் இருக்கும் போதே அளக்கப்பட்ட கிஸ்மிஸ் பழத்திற்குப் பதிலாக அதனை விற்பது, இன்னும் நிலத்திலுள்ள பயிறுக்குப் பதிலாக (ஏனைய) அளக்கப்பட்ட உணவுப் பொருள்களை விற்பனை செய்தல் ஆகிய அனைத்தையும் இறைத்தூதர்(ஸல்) தடைசெய்தார்கள் என இப்னு உமர்(ரலி) அறிவித்தார்.
நூல்கள்: புகாரீ முஸ்லிம்

868. (கடனைக் கொடுக்காத) தாமதக்காரைக் கொண்டு (அதே போன்ற) தாமதக்காரர் செய்யும் வியாபாரத்தை, அதாவது கடனுக்குப் பதிலாக கடனைக் கொண்டு வியாபாரம் செய்வதை இறைத்தூதர்(ஸல்) தடைசெய்தார்கள் என இப்னு உமர்(ரலி) அறிவித்தார்.
இஸ் ஹாக், பஸ்ஸார் ஆகிய நூல்களில் `ளயீஃப்' எனும் பலவீனத் தரத்தில் இது பதிவிடப்பட்டுள்ளது.

870. `அராயா' பேரீச்சம் பழங்களைக் குத்துமதிப்பாகக் கணக்கிட்டு அது ஐந்து வஸக்குகள் அல்லது அதற்கும் குறைவாக இருக்கும் பட்சத்தில், அதனைக் காய்ந்த பேரீச்சம் பழங்களுக்குப் பகரமாக விற்பதற்கு இறைத்தூதர்(ஸல்) சலுகை அளித்தார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
குறிப்பு: பேரீச்சை மரத்தின் சொந்தக்காரர்கள், ஏழை எளிய மக்களுக்கு உதவும் முகமாக அவர்களிடம் மரங்களை ஒப்படைத்து, அவற்றின் விளைச்சலை மட்டும் எடுத்துக் கொண்டு, மரங்களைத் தங்களிடமே திரும்பத் தந்துவிடுமாறு ஒப்பந்தம் செய்து கொள்ளுதல் `அராயா' எனப்படும். விளைச்சலை அன்பளிப்பாகத் தருவதால் இப்பெயர் சூட்டப்பட்டுள்ளது. `அராயா' என்பது அன்பளிப்பைக் குறிக்கிறது.
மரங்களை இரவலாகவும், விளைச்சலை அன்பளிப்பாகவும் கொடுத்த மரத்தின் உரிமையாளர், விளைச்சலை அன்பளிப்பாகப் பெற்றவரிடம், தான் இரவலாக வழங்கிய அந்த மரத்திலுள்ள செங்கனிகளை குத்து மதிப்பாகக் கணக்கிட்டு அவற்றைப் பெற்றுக்கொண்டு, அதே அளவிற்கு காய்ந்த பேரீச்சம் பழங்களைக் கொடுப்பதற்கு நபி(ஸல்) அளித்த அனுமதியை `அராயா'வில் தரப்பட்டுள்ள சலுகை என்கிறோம்.
விளைச்சல் காலம் முடிந்து அறுவடைக் காலம் வரும் வரை காத்திருக்காமல், ஏழைகள் விரைந்து பலன் பெறட்டும் என்பதற்காக இச்சலுகை அளிக்கப்பட்டுள்ளது. இதையே 868 மற்றும் 869 ஆம் ஹதீஸ்கள் குறிக்கின்றன.

872. பழங்கள் நன்றாக பழுக்காதவரை விற்பதை இறைத்தூதர்(ஸல்) தடை செய்தார்கள். நன்றாகப் பழுத்தல் என்பது எதைக் குறிக்கிறது? என ஒருவர் வினவினார்.
``சிவப்பாகவும், மஞ்சளாகவும் (உண்பதற்கு ஏற்றவாறு) ஆவதைக் குறிக்கும்'' என்று இறைத்தூதர்(ஸல்) பதிலளித்தார்கள் என அனஸ்(ரலி) அறிவித்தார்.
நூல்கள்: புகாரீ, முஸ்லிம்
இங்கு புகாரீயின் வாசகம் இடம்பெற்றுள்ளது.

874. நீ உன் சகோதரனுக்குப் பழங்களை விற்று, அதில் ஏதாவது கேடு ஏற்பட்டுவிட்டால், அச்சகோதரனிடமிருந்து எதுவும் வாங்குவது அனுமதிக்கப்பட்டதல்ல. ஏனெனில், தன் சகோதரனின் பொருளை எதற்குப் பதிலாக அவர் வாங்குவார்?'' என்று இறைத்தூதர்(ஸல்) கேட்டார்கள் என ஜாபிர் இப்னு அப்தில்லாஹ்(ரலி) அறிவித்தார்.
நூல்: முஸ்லிம்
முஸ்லிமின் மற்றோர் அறிவிப்பில் ``நஷ்டத்தை ஈடுகட்ட வேண்டும் எனக் கட்டளையிட்டார்கள்'' என உள்ளது.

876. இறைத்தூதர்(ஸல்) மதீனா வந்தபோது அங்குள்ளவர்கள் பழங்களுக்காக ஓர் ஆண்டு, ஈராண்டு முன் பணம் (ஸலஃப்) பெற்றுக் கொண்டிருந்தனர். அப்போது, ``பழங்களுக்காக முன்பணம் பெறுபவர் குறிப்பிட்ட அளவையில், குறிப்பிட்ட நிலுவையில் குறிப்பிட்ட தவணைக்கு பெற்றுக்கொள்ளட்டும்'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்கள்: புகாரீ, முஸ்லிம்
புகாரீயில், ``யாரேனும் ஒரு பொருளுக்கு முன் தொகை செலுத்தினால் என உள்ளது.

878. ``மக்களின் பொருளை அவர்களிடம் திரும்பச் செலுத்தும் எண்ணத்துடன் வாங்குபவருக்காக அல்லாஹ் அதைச் செலுத்துகிறான். அதனை அழிக்கும் எண்ணத்துடன் வாங்குபவருக்கு, அல்லாஹ் அதனை அழித்துவிடுகிறான்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: புகாரீ
குறிப்பு: திரும்பச் செலுத்தும் எண்ணத்துடன் வாங்குபவருக்கு, அதனைத் திரும்பச் செலுத்துவதற்கான வசதி வாய்ப்பை அல்லாஹ் ஏற்படுத்துகிறான். திரும்பத் தராமல் ஏமாற்ற வேண்டும் என்ற எண்ணத்துடன் வாங்குபவருக்கு அப்பொருளால் கிடைக்க வேண்டிய பலனைக் கிடைக்கவிடால் செய்கிறான். அதனால் அதைத் திரும்பத் தரும் வாய்ப்பை அவர் இழக்கிறார். கொடுத்தவருக்கு அல்லாஹ் வேறு வழிகளில் அவற்றை ஈடுகட்டுவான்.