902. கடனாளியாக உள்ள யாருடைய ஜனாஸாவேனும் இறைத்தூதர்(ஸல்) அவர்களிடம் கொண்டு வரப்பட்டால், ``இவர் தன் கடனைப் பூர்த்தி செய்ய ஏதேனும் விட்டுச்சென்றிருக்கிறாரா?'' எனக் கேட்பார்கள். அவர் விட்டுச் சென்றுள்ளார் எனக் கூறப்பட்டால் அவருக்குத் தொழுகை நடத்துவார்கள். இல்லை என்றால், ``உங்கள் நண்பருக்கு நீங்கள் தொழுகை நடத்திக் கொள்ளுங்கள்'' எனக் கூறிவிடுவார்கள்.
பின்னர் இறைத்தூதர்(ஸல்) அவர்களுக்கு அல்லாஹ் பல வெற்றிகளைக் கொடுத்த பின்னர், ``நான் முஸ்லிம்களின் உயிர்கள் மீது அதிக உரிமை பெற்றவன். யாரேனும் இறந்துவிட்டு அவருக்குக் கடன் இருந்தால் அதைத் தீர்ப்பது என் பொறுப்பாகும்'' என்று கூறினார்கள். என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
புகாரீயின் மற்றோர் அறிவிப்பில், ``இறந்தவர் தன் கடனை அடைக்க எதுவும் விட்டுச் செல்லவில்லையோ (அவருக்கு நான் பொறுப்பேற்கிறேன்)'' என உள்ளது.

904. ``இரண்டு பங்குதாரர்களில் ஒருவருக்கொருவர் மோசடி செய்யாமல் இருக்கும் காலம் வரை அவர்களுக்கிடையே நான் மூன்றாம் பங்குதாரராய் இருக்கிறேன். அவர்களில் யாரேனும் ஒருவர் மோசடி செய்தால், அவர்களிடமிருந்து நான் விலகிக் கொள்வேன்'' என அல்லாஹ் கூறுகிறான் என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: அபூ தாவூத்
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

906. ``நானும், அம்மார் மற்றும் ஸஅத் ஆகியோரும் பத்ரு நாளன்று கிடைத்த (கனீமத்)தில் கூட்டாய் இருந்தோம்'' என அப்துல்லாஹ் இப்னு மஸ்வூத்(ரலி) அறிவித்தார். (ஹதீஸ் சுருக்கம்)
நூல்: நஸயீ
குறிப்பு: கனீமத் என்பது இறைமறுப்பாளர்களுக்கும் இறைநம்பிக்கையாளர்களுக்கும் இடையில் நடக்கும் போரில், இறைநம்பிக்கையாளர்களுக்குக் கிடைக்கும் பொருட்களைக் குறிக்கிறது.

908. தமக்காக ஒரு தீனாருக்கு குர்பானிப் பிராணி வாங்கி வருமாறு என்னை இறைத்தூதர்(ஸல்) அனுப்பினார்கள் என உர்வா அல் பாரிக்கீ(ரலி) அறிவித்தார். (ஹதீஸ் சுருக்கம்)
நூல்: புகாரீ
குறிப்பு: ஹதீஸ் முழுவதையும் அறிவதற்கு இந்நூலின் 840 ஆம் ஹதீஸைக் காண்க!

910. இறைத்தூதர்(ஸல்) அறுபத்து மூன்று ஒட்டகங்களை அறுத்துவிட்டு மீதத்தை அறுக்கும்படி அலீ(ரலி) அவர்களுக்குக் கட்டளையிட்டார்கள் என ஜாபிர்(ரலி) அறிவித்தார். (ஹதீஸ் சுருக்கம்)
நூல்: புகாரீ
குறிப்பு: ஹதீஸ் முழுவதையும் அறிவதற்கு இந்நூலின் 760 ஆம் ஹதீஸைக் காண்க!

912. ``கசப்பாய் இருப்பினும், நீர் உண்மையையே பேசும்!'' என்று என்னிடம் இறைத்தூதர்(ஸல்) கூறினார்கள் என அபூ தர்(ரலி) அறிவித்தார்.
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

914. `` உங்களை நம்பி ஒப்படைக்கப்பட்ட பொருளை உங்களிடம் ஒப்படைத்தவரிடமே கொடுத்துவிடுங்கள். உங்களுக்கு மோசடி செய்தவருக்குக்கூட நீங்கள் மோசடி செய்யாதீர்கள்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: திர்மிதீ
இமாம் அபூ தாவூத்(ரஹ்) இதனை ``ஹஸன்'' எனக் குறிப்பிட்டுள்ளார். இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார். இமாம் அபூ ஹாதம் இதனை `முன்கர்' எனக் குறிப்பிட்டுள்ளார்.
இது இரவல் தரும் பொருட்கள் அனைத்திற்கும் பொருந்தும் என ஹதீஸ் கலை வல்லுநர்கள் கூறியுள்ளார்கள்.

916. ஹுனைன் போரின்போது இறைத்தூதர்(ஸல்) சில கேடயங்களைத் தம்மிடம் இரவல் வாங்கியபோது, ``முஹம்மதே! இது (போரின்) கொள்ளைப் பொருளா? அல்லது இரவலா?'' என நான் கேட்டேன்.
``இல்லை! (திரும்பக் கொடுத்துவிடுவதாகப்) பொறுப்பேற்றுக் கொண்ட இரவல்'' என்று இறைத்தூதர்(ஸல்) தன்னிடம் கூறினார்கள் என ஸஃப்வான் இப்னு உமையா(ரலி) அறிவித்தார்.
நூல்கள்: அபூ தாவூத், அஹ்மத் மற்றும் நஸயீ
இம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

918. ``அநியாயமாக (பிறரின்) பூமியில் ஓர் அங்குலத்தை எடுப்பவனின் கழுத்தில், ஏழு பூமிகளை மாலையாக மறுமையில் அல்லாஹ் போட்டுவிடுவான்'' என்று இறைத்தூதர்(ஸல்) கூறினார்கள் என ஸயீத் இப்னு ஸைத்(ரலி) அறிவித்தார்.
நூல்கள்: புகாரீ, முஸ்லிம்

920. ``பிறரின் பூமியில் (நிலத்தில்) அவரின் அனுமதி இன்றிப் பயிரிடுபவருக்கு அதிலிருந்து எதுவும் கொடுக்கப்படாது. அவர் செலவிட்டுள்ள அளவு மட்டுமே கொடுக்கப்படும்'' என்று இறைத்தூதர்(ஸல்) கூறினார்கள் என ராஃபிவு இப்னு கதீக்(ரலி) அறிவித்தார்.
நூல்கள்: அஹ்மத், அபூ தாவூத், திர்மிதீ மற்றும் இப்னு மாஜா
இமாம் திர்மிதீ(ரஹ்) இதனை ``ஹஸன்'' எனக் குறிப்பிட்டுள்ளார். இமாம் புகாரீ(ரஹ்) இதனை `ளயீஃப்' எனக் குறிப்பிட்டுள்ளார் எனக் கூறப்படுகிறது.