அபூ மூஸா (ரழி) அவர்கள் கூறினார்கள்:
நானும், என்னுடன் கப்பலில் வந்திருந்த என் தோழர்களும் ‘பகீஃ புத்ஹான்’ என்னுமிடத்தில் தங்கியிருந்தோம். அப்போது அல்லாஹ்வின் தூதர் (ஸல்) அவர்கள் மதீனாவில் இருந்தார்கள். ஒவ்வொரு இரவும் இஷா தொழுகையின் போது அவர்களில் ஒரு குழுவினர் அல்லாஹ்வின் தூதர் (ஸல்) அவர்களிடம் முறைவைத்துச் செல்வார்கள்.

அபூ மூஸா (ரழி) அவர்கள் கூறினார்கள்:
நானும் என் தோழர்களும் அல்லாஹ்வின் தூதர் (ஸல்) அவர்களைச் சந்தித்தோம். அப்போது அவர்கள் தம் வேலையில் ஈடுபட்டிருந்தார்கள். அதனால் இரவு நன்கு இருட்டும் வரை தொழுகையைத் தாமதப்படுத்தினார்கள். பிறகு அல்லாஹ்வின் தூதர் (ஸல்) அவர்கள் வெளியே வந்து அவர்களுக்குத் தொழுகை நடத்தினார்கள்.

தொழுகையை முடித்ததும் தம்முடன் இருந்தவர்களிடம், “நிதானமாக இருங்கள் (அவசரப்படாதீர்கள்); உங்களுக்கு ஓர் அறிவிப்பையும் நற்செய்தியையும் கூறுகிறேன்; மக்கள் அனைவரிலும் உங்களைத் தவிர வேறு யாரும் இந்நேரத்தில் தொழவில்லை என்பது உங்கள் மீது அல்லாஹ் புரிந்த அருட்கொடையாகும்” என்று கூறினார்கள்.

அல்லது, “உங்களைத் தவிர வேறு யாரும் இந்நேரத்தில் தொழவில்லை” என்று கூறினார்கள்.

(அறிவிப்பாளர் கூறுகிறார்:) “இவ்விரு வார்த்தைகளில் எதை அவர்கள் கூறினார்கள் என்று எங்களுக்குத் தெரியவில்லை.”

அபூ மூஸா (ரழி) அவர்கள் கூறினார்கள்:
அல்லாஹ்வின் தூதர் (ஸல்) அவர்களிடமிருந்து (இதைச்) செவியுற்றதால் நாங்கள் மகிழ்ச்சியுடன் திரும்பினோம்.