அபூ ஸலமா அவர்கள் அறிவித்தார்கள்:
ஆயிஷா (ரழி) அவர்களின் சகோதரரும் நானும் (அபூ ஸலமா) ஆயிஷா (ரழி) அவர்களிடம் சென்றோம். (ஆயிஷா (ரழி) அவர்களின்) சகோதரர் நபி (ஸல்) அவர்களின் குளியல் (முறை) பற்றிக் கேட்டார்.
அவர்கள் (ஆயிஷா (ரழி)) சுமார் ஒரு ஸாஉ அளவு தண்ணீர் கொண்ட ஒரு பாத்திரத்தைக் கொண்டு வந்து, (நபி (ஸல்) அவர்கள் குளித்த முறையை விளக்கும் விதமாக) குளித்து, (அந்தத் தண்ணீரை) தங்கள் தலையில் ஊற்றிக் கொண்டார்கள். அச்சமயம் எங்களுக்கும் அவர்களுக்கும் இடையே ஒரு திரை இருந்தது.

அபூ ஸலமா பின் அப்துர் ரஹ்மான் அவர்கள் அறிவித்தார்கள்:

நானும் ஆயிஷா (ரழி) அவர்களின் பால்குடிச் சகோதரரும் அவர்களிடம் சென்றோம். அவர் (பால்குடிச் சகோதரர்) அல்லாஹ்வின் தூதர் (ஸல்) அவர்களின் ஜனாபத் (தாம்பத்திய உறவு காரணமான) குளியலைப் பற்றிக் கேட்டார். அவர்கள் ஒரு ’ஸா’ அளவுள்ள (நீர் கொண்ட) பாத்திரத்தைக் கொண்டுவரச் சொன்னார்கள்; அவர்கள் குளித்தார்கள். எங்களுக்கும் அவர்களுக்கும் இடையில் ஒரு திரை இருந்தது. அவர்கள் தமது தலையில் மூன்று முறை தண்ணீர் ஊற்றினார்கள்.

மேலும் அவர் (அபூ ஸலமா) கூறினார்: "அல்லாஹ்வின் தூதர் (ஸல்) அவர்களின் துணைவியர், தங்கள் தலைமுடி காதுகள் வரை இருக்கும் அளவுக்கு அதை(ச் சிறிதாக)க் கத்தரித்துக்கொள்வார்கள்."