ஸாதான் (ரஹ்) அவர்கள் கூறியதாவது:

நான் இப்னு உமர் (ரழி) அவர்களிடம், "பானங்கள் (தயாரிப்பதில்) நபி (ஸல்) அவர்கள் எதைத் தடுத்தார்களோ அதைத் தங்கள் மொழியில் எனக்கு அறிவியுங்கள்; பிறகு அதை என் மொழியில் எனக்கு விளக்குங்கள். ஏனெனில், உங்கள் மொழி (நடை) எங்கள் மொழியிலிருந்து வேறுபட்டது" என்று கூறினேன்.

அதற்கு அவர்கள் கூறினார்கள்: "அல்லாஹ்வின் தூதர் (ஸல்) அவர்கள் 'ஹன்தம்' என்பதைத் தடுத்தார்கள் - அது (ஒருவகை) மண்குடமாகும். 'துப்பா' என்பதைத் தடுத்தார்கள் - அது சுரைக்காய்க் குடுவையாகும். 'முஸப்பத்' என்பதைத் தடுத்தார்கள் - அது கீல் பூசப்பட்ட பாத்திரமாகும். 'நகீர்' என்பதைத் தடுத்தார்கள் - அது பேரீச்ச மரத்தின் அடிப்பகுதியைச் செதுக்கி, குடைந்து செய்யப்படும் பாத்திரமாகும். மேலும், தோல் பைகளில் (நபீத்) தயாரிக்குமாறு கட்டளையிட்டார்கள்."