அபூ ஹுரைரா (ரழி) அவர்கள் அல்லாஹ்வின் தூதர் (ஸல்) அவர்களிடமிருந்து பல ஹதீஸ்களை அறிவித்தார்கள். அவற்றில் ஒன்று இதுவாகும்: அல்லாஹ்வின் தூதர் (ஸல்) அவர்கள் கூறினார்கள்:

(எஜமானர்களாகிய) உங்களில் எவரும் (தன் அடிமையிடம்), 'உன் ரப்புக்கு (எஜமானருக்கு) அருந்தக் கொடு', 'உன் ரப்புக்கு (எஜமானருக்கு) உணவளி', 'உன் ரப்புக்கு (எஜமானருக்கு) அங்கசுத்தி செய்ய உதவு' என்று கூற வேண்டாம்; மேலும், (அடிமைகளாகிய) உங்களில் எவரும் (தன் எஜமானரை) 'என் ரப்' (என் எஜமானன்) என்று கூற வேண்டாம். மாறாக, அவர் (அடிமையானவர்) 'என் தலைவர் (ஸய்யிதீ)', 'என் புரவலர் (மவ்லாய)' என்றே கூற வேண்டும். மேலும், (எஜமானர்களாகிய) உங்களில் எவரும் (தன் அடிமையை) 'என் அடிமை (அப்தீ)', 'என் அடிமைப் பெண் (அமத்தீ)' என்று கூற வேண்டாம்; மாறாக, அவர் (எஜமானர்) 'என் பையன் (ஃபதாய)', 'என் பெண் (ஃபதாதீ)', 'என் பணியாள் (ஃகுலாமீ)' என்றே கூற வேண்டும்.