உர்வா பின் அஸ்-ஸுபைர் அவர்கள் கூறியதாவது:
மர்வான் பின் அல்-ஹகம் மற்றும் அல்-மிஸ்வர் பின் மக்ரமா ஆகிய இருவரும் ஹுதைபியா உம்ராவின்போது அல்லாஹ்வின் தூதர் (ஸல்) அவர்களுக்கு நடந்த நிகழ்வுகளில் ஒன்றை விவரித்ததை நான் செவியுற்றேன்.

அவர்கள் எனக்கு விவரித்தவற்றில் ஒன்று:
ஹுதைபியா நாளில் அல்லாஹ்வின் தூதர் (ஸல்) அவர்கள் சுஹைல் பின் அம்ருடன் (சமாதான) ஒப்பந்தத்தின் காலவரையறை குறித்து எழுத்துப்பூர்வமாக உடன்படிக்கை செய்துகொண்டபோது, சுஹைல் பின் அம்ரு விதித்த நிபந்தனைகளில் ஒன்றாக, 'எங்களில் (குரைஷிகளில்) ஒருவர் உமது மார்க்கத்தில் இருந்தபோதிலும் அவர் உம்மிடம் வந்தால், நீர் அவரை எங்களிடமே திருப்பி அனுப்பிவிட வேண்டும்; அவருக்கும் எங்களுக்குமிடையே நீர் குறுக்கிடக் கூடாது' என்று கூறினார். சுஹைல் இந்த நிபந்தனையின் பேரிலன்றி நபி (ஸல்) அவர்களுடன் ஒப்பந்தம் செய்ய மறுத்தார். முஃமின்கள் இதை வெறுத்தார்கள்; (அதனால்) மனவேதனை அடைந்தார்கள்; இது குறித்து (தங்களுக்குள்) பேசினர். சுஹைல் இந்த நிபந்தனையின் பேரிலன்றி நபி (ஸல்) அவர்களுடன் உடன்படிக்கை செய்ய மறுக்கவே, நபி (ஸல்) அவர்கள் அவருடன் ஒப்பந்தம் செய்துகொண்டார்கள்.

எனவே, அந்நாளில் அல்லாஹ்வின் தூதர் (ஸல்) அவர்கள் அபூ ஜந்தல் பின் சுஹைலை அவருடைய தந்தை சுஹைல் பின் அம்ரிடம் திருப்பி அனுப்பினார்கள். அந்தக் காலக்கட்டத்தில் ஆண்களில் எவர் வந்தாலும், அவர் முஸ்லிமாக இருந்தாலும் நபி (ஸல்) அவர்கள் அவரைத் திருப்பி அனுப்பினார்கள்.

இந்நிலையில், இறைநம்பிக்கை கொண்ட பெண்கள் (முஃமினான பெண்கள்) ஹிஜ்ரத் செய்து வந்தார்கள். உக்பா பின் முஐத்தின் மகள் உம்மு குல்தூம் அவ்வாறு அல்லாஹ்வின் தூதர் (ஸல்) அவர்களிடம் வந்தவர்களில் ஒருவராவார். அப்பெண் அப்போது திருமணமாகாத இளம் பெண்ணாக இருந்தார். அப்பெண்ணின் குடும்பத்தார் அவரைத் தங்களிடம் திருப்பி அனுப்புமாறு அல்லாஹ்வின் தூதர் (ஸல்) அவர்களிடம் கோரி வந்தனர். அப்போது அல்லாஹ் முஃமினான பெண்கள் விஷயத்தில் (அவர்களுக்குரிய) வசனத்தை அருளினான்.