அப்துல்லாஹ் இப்னு மாலிக் இப்னு புஹைனா (ரலி) அவர்கள் அறிவிக்கிறார்கள்:

சுப்ஹுத் தொழுகைக்கு இகாமத் சொல்லப்பட்டுவிட்ட நிலையில், (சுன்னத்) தொழுதுகொண்டிருந்த ஒரு மனிதரைக் கடந்து அல்லாஹ்வின் தூதர் (ஸல்) அவர்கள் சென்றார்கள். அப்போது அவரிடம் ஏதோ பேசினார்கள்; அது என்னவென்று எங்களுக்குத் தெரியவில்லை. நாங்கள் (ஃபர்ளு தொழுகையை முடித்துத்) திரும்பியதும், அவரைச் சூழ்ந்துகொண்டு, ”அல்லாஹ்வின் தூதர் (ஸல்) அவர்கள் உன்னிடம் என்ன சொன்னார்கள்?” என்று கேட்டோம்.

அதற்கு அவர், ”(இகாமத் சொல்லப்பட்ட பின்பும் (சுன்னத்) தொழுவதன் மூலம்) ’உங்களில் ஒருவர் சுப்ஹுத் தொழுகையை நான்கு (ரக்அத்களாகத்) தொழுவாரோ?’ என்று (நபி (ஸல்) அவர்கள்) என்னிடம் கேட்டார்கள்” என்று பதிலளித்தார்.

கஃனபி (ரஹ்) அவர்கள், (இந்த ஹதீஸின் அறிவிப்பாளர் தொடரில்) அப்துல்லாஹ் இப்னு மாலிக் இப்னு புஹைனா (ரலி) அவர்கள் தம் தந்தையிடமிருந்து அறிவித்ததாகக் கூறினார்கள்.

(இமாம்) அபுல் ஹுஸைன் முஸ்லிம் (ரஹ்) அவர்கள் கூறினார்கள்: இந்த ஹதீஸில் ‘தம் தந்தையிடமிருந்து’ என்பது தவறாகும்.