அஸ்மா பின்த் அபீ பக்ர் (ரழி) அவர்கள் அறிவித்தார்கள்:
நபி (ஸல்) அவர்கள் கிரகணத் தொழுகையைத் தொழுதார்கள். அவர்கள் (முதலில்) நின்றார்கள்; நீண்ட நேரம் நின்றார்கள். பிறகு ருகூஃ செய்தார்கள்; நீண்ட நேரம் ருகூஃ செய்தார்கள். பிறகு (ருகூவிலிருந்து தலையை) உயர்த்தி நீண்ட நேரம் நின்றார்கள். பிறகு (மீண்டும்) ருகூஃ செய்தார்கள்; நீண்ட நேரம் ருகூஃ செய்தார்கள். பிறகு (ருகூவிலிருந்து தலையை) உயர்த்தி, பின்னர் சஜ்தாச் செய்தார்கள்; நீண்ட நேரம் சஜ்தாச் செய்தார்கள். பிறகு (சஜ்தாவிலிருந்து தலையை) உயர்த்தி, பின்னர் சஜ்தாச் செய்தார்கள்; நீண்ட நேரம் சஜ்தாச் செய்தார்கள்.

பிறகு (இரண்டாம் ரக்அத்துக்காக) எழுந்து, நீண்ட நேரம் நின்றார்கள். பிறகு ருகூஃ செய்தார்கள்; நீண்ட நேரம் ருகூஃ செய்தார்கள். பிறகு (ருகூவிலிருந்து தலையை) உயர்த்தி, நீண்ட நேரம் நின்றார்கள். பிறகு (மீண்டும்) ருகூஃ செய்தார்கள்; நீண்ட நேரம் ருகூஃ செய்தார்கள். பிறகு (ருகூவிலிருந்து தலையை) உயர்த்தி, சஜ்தாச் செய்தார்கள்; நீண்ட நேரம் சஜ்தாச் செய்தார்கள். பிறகு (சஜ்தாவிலிருந்து தலையை) உயர்த்தி, பின்னர் சஜ்தாச் செய்தார்கள்; நீண்ட நேரம் சஜ்தாச் செய்தார்கள்.

பிறகு (தொழுகையை) முடித்தார்கள். அப்போது கூறினார்கள்: "சொர்க்கம் எனக்கு மிக அருகில் வந்தது; எந்த அளவிற்கென்றால், நான் துணிந்திருந்தால் அதிலிருந்து ஒரு குலையை உங்களுக்காகக் கொண்டுவந்திருப்பேன். நரகம் எனக்கு மிக அருகில் வந்தது; எந்த அளவிற்கென்றால், 'இறைவா! நானும் அவர்களுடன் (சேர்க்கப்பட்டு) விடுவேனோ?' என்று நான் கேட்டேன். அப்போது அங்கே ஒரு பெண்ணைக் கண்டேன். - (அறிவிப்பாளர் கூறுகிறார்:) 'ஒரு பூனை அவளைப் பிறாண்டிக் கொண்டிருந்தது' என்று நபி (ஸல்) அவர்கள் கூறினார்கள் என நான் கருதுகிறேன். - (நான்), 'இவளுக்கு என்ன நேர்ந்தது?' என்று கேட்டேன். அதற்கு, 'இவள் அப்பூனையை அது பசியால் சாகும்வரை அடைத்து வைத்திருந்தாள். அதற்கு அவள் உணவளிக்கவும் இல்லை; பூமியின் பூச்சிகளைத் தின்பதற்காக அதை (அவிழ்த்து) விடவும் இல்லை' என்று கூறப்பட்டது."

நாஃபிஉ (ரஹ்) அவர்கள், (நபி (ஸல்) அவர்கள்) 'பூமியின் பூச்சிகளை' அல்லது 'புழுக்களை' (என்ற வார்த்தையைப் பயன்படுத்தியதாக) நான் கருதுகிறேன்" என்று கூறினார்கள்.