ஆயிஷா (ரழி) அவர்கள் கூறினார்கள்:
"ஹிஜாப் வசனம் அருளப்பட்ட பின்னர், என் தந்தையின் சகோதரரான அஃப்லஹ் அவர்கள் என்னிடம் (வீட்டிற்குள்) நுழைய அனுமதி கேட்டார்கள். ஆனால், நான் அவர்களை உள்ளே அனுமதிக்கவில்லை. நபி (ஸல்) அவர்கள் என்னிடம் வந்தார்கள். நான் அவர்களிடம் (அதுபற்றிக்) கேட்டேன். அதற்கு அவர்கள், 'அவரை உள்ளே அனுமதி. ஏனெனில், அவர் உன் தந்தையின் சகோதரர் ஆவார்' என்று கூறினார்கள். நான், 'அல்லாஹ்வின் தூதரே! எனக்கு அந்தப் பெண் தான் பாலூட்டினார், அந்த ஆண் பாலூட்டவில்லை' என்று கூறினேன். அதற்கு அவர்கள், 'அவரை உள்ளே அனுமதி. உன் கரங்கள் மண்ணில் புரளட்டும். ஏனெனில், அவர் உன் மாமா ஆவார்' என்று கூறினார்கள்."

ஆயிஷா (ரழி) அவர்கள் அறிவித்தார்கள்:

“பால்குடி முறையிலான என் தந்தையின் சகோதரரான அஃப்லஹ் பின் அபீ குஐஸ் (ரழி) அவர்கள், ஹிஜாப் (பர்தா) சட்டம் கடமையாக்கப்பட்ட பிறகு, என்னைப் பார்க்க அனுமதி கேட்டார்கள். நபி (ஸல்) அவர்கள் உள்ளே வரும் வரை நான் அவரை உள்ளே அனுமதிக்க மறுத்துவிட்டேன். நபி (ஸல்) அவர்கள் வந்து, 'அவர் உன்னுடைய தந்தையின் சகோதரர்; அவரை உள்ளே வர அனுமதி' என்று கூறினார்கள். நான், 'ஆனால், எனக்குப் பாலூட்டியது பெண்தானே; ஆண் எனக்குப் பாலூட்டவில்லையே' என்று கூறினேன். அதற்கு அவர்கள், 'உன் கைகள் மண்ணில் புரளட்டும்', அல்லது, 'உன் வலது கை மண்ணில் புரளட்டும்!' என்று கூறினார்கள்.”