இறைநம்பிக்கையாளர்களின் அன்னை ஆயிஷா (ரழி) அவர்கள் அறிவிக்கிறார்கள்:
(அன்சாரிகளில்) ஒரு சிறு குழந்தை இறந்தபோது, நான் "(அந்தக் குழந்தைக்கு) நற்செய்தி உண்டாகட்டும்! (அது) சொர்க்கத்துப் பறவைகளில் ஒரு பறவையாகும்" என்று கூறினேன். அப்போது நபி (ஸல்) அவர்கள், "(ஆயிஷாவே!) அல்லாஹ் சொர்க்கத்தையும் படைத்துள்ளான், நரகத்தையும் படைத்துள்ளான்; மேலும், இதற்கென (சொர்க்கத்திற்கென) சிலரையும், அதற்கென (நரகத்திற்கென) சிலரையும் அவன் (அவர்கள் பிறப்பதற்கு முன்பே) படைத்துள்ளான் என்பது உனக்குத் தெரியாதா?" என்று கேட்டார்கள்.
இறைநம்பிக்கையாளர்களின் அன்னை ஆயிஷா (ரழி) அவர்கள் கூறியதாவது:
அன்சாரிகளைச் சேர்ந்த ஒரு சிறுவன் (இறந்தபோது), அவனுக்காக (ஜனாஸாத்) தொழுகை நடத்துவதற்காக (அவனது உடல்) அல்லாஹ்வின் தூதர் (ஸல்) அவர்களிடம் கொண்டுவரப்பட்டது. அப்போது நான், "அல்லாஹ்வின் தூதரே! (இச்சிறுவன்) சுவர்க்கத்துப் பறவைகளில் (சிட்டுக்குருவிகளில்) ஒரு பறவை (சிட்டுக்குருவி)" என்று கூறினேன்.
அதற்கு அல்லாஹ்வின் தூதர் (ஸல்) அவர்கள், "(ஆயிஷாவே!) அல்லாஹ் சுவர்க்கத்திற்கென்று ஒரு கூட்டத்தாரைப் படைத்துள்ளான்; அவர்கள் தங்களது தந்தையரின் முதுகெலும்புகளில் (விந்தணுவாக) இருக்கும்போதே அவர்களை சுவர்க்கத்திற்கு உரியவர்களாக அவன் ஆக்கிவிட்டான். அதேபோன்று நரகத்திற்கென்றும் ஒரு கூட்டத்தாரைப் படைத்துள்ளான்; அவர்களும் தங்களது தந்தையரின் முதுகெலும்புகளில் (விந்தணுவாக) இருக்கும்போதே அவர்களை நரகத்திற்கு உரியவர்களாக அவன் ஆக்கிவிட்டான் என்பது உனக்குத் தெரியாதா?" என்று கேட்டார்கள்.