அபூ தர்தா (ரலி) அவர்கள் அறிவித்தார்கள்; அல்லாஹ்வின் தூதர் (ஸல்) அவர்கள் கூறினார்கள்:

"எந்தவொரு முஸ்லிமான அடியாரும் தம் சகோதரருக்காக அவர் இல்லாதபோது (மறைவில்) பிரார்த்தித்தால், வானவர் 'உமக்கும் அவ்வாறே உண்டாகட்டும்' என்று கூறாமல் இருப்பதில்லை."

ஸஃப்வான் பின் அப்தில்லாஹ் பின் ஸஃப்வான் (ரஹ்) அவர்கள் அறிவிக்கிறார்கள்:
(இவர்கள் அபூதர்தா (ரலி) அவர்களின் மகளான தர்தா என்பவரை மணந்திருந்தார்கள்).

நான் ஷாம் (சிரியா) தேசத்திற்குச் சென்றிருந்தேன். அங்கு அபூ தர்தா (ரலி) அவர்களின் வீட்டிற்குச் சென்றேன். அவரை (அங்கு) காணவில்லை; ஆனால் உம்மு தர்தா (ரலி) அவர்களைக் கண்டேன்.

அவர் என்னிடம், "இந்த ஆண்டு நீங்கள் ஹஜ் செய்ய நாடுகிறீர்களா?" என்று கேட்டார்.

நான் "ஆம்" என்றேன்.

அவர் கூறினார்: "எங்களுக்காகவும் அல்லாஹ்விடம் நன்மை வேண்டிப் பிரார்த்தியுங்கள். ஏனெனில், நபி (ஸல்) அவர்கள் கூறுவார்கள்:

'ஒரு முஸ்லிம், தன் சகோதரனுக்காக அவர் இல்லாதபோது (அவர் அறியாமல்) செய்யும் பிரார்த்தனை ஏற்கப்படக்கூடியதாகும். (பிரார்த்தனை செய்யும்) அவர் தலைக்கு அருகில் நியமிக்கப்பட்ட வானவர் ஒருவர் இருப்பார். அவர் தன் சகோதரனுக்காக நன்மை வேண்டிப் பிரார்த்திக்கும் போதெல்லாம், அந்த வானவர், "ஆமீன் (அவ்வாறே ஆகுக), உமக்கும் அதுபோன்றே கிடைக்கட்டும்" என்று கூறுவார்.'"

(ஸஃப்வான் கூறினார்:) பிறகு நான் கடைவீதிக்குச் சென்றேன். அங்கு அபூ தர்தா (ரலி) அவர்களைச் சந்தித்தேன். அவரும் நபி (ஸல்) அவர்களிடமிருந்து இது போன்றே எனக்கு அறிவித்தார்.

அபுத் தர்தா (ரழி) அவர்கள் கூறினார்கள்: நான் அல்லாஹ்வின் தூதர் (ஸல்) அவர்கள் கூறக் கேட்டேன்: "ஒரு மனிதர், தன் சகோதரர் இல்லாத நேரத்தில் (அவர் அறியாதவாறு) அவருக்காகப் பிரார்த்திக்கும்போது, வானவர்கள் 'ஆமீன், உமக்கும் அதுபோன்றே கிடைக்கட்டும்' என்று கூறுகிறார்கள்."