ரிஃபாஆ பின் ராஃபி (ரலி) அவர்கள் அறிவிக்கிறார்கள்:

“அல்லாஹ்வின் தூதர் (ஸல்) அவர்கள் அமர்ந்திருந்தபோது நாங்கள் அவர்களைச் சுற்றி இருந்தோம். அப்போது ஒரு மனிதர் உள்ளே வந்து, கிப்லாவை முன்னோக்கித் தொழுதார். அவர் தமது தொழுகையை முடித்ததும் வந்து, அல்லாஹ்வின் தூதர் (ஸல்) அவர்களுக்கும் மக்களுக்கும் ஸலாம் கூறினார்.

அல்லாஹ்வின் தூதர் (ஸல்) அவர்கள் அவரிடம், ‘வ அலைக்க (உம்மீதும் சாந்தி உண்டாகட்டும்). நீர் சென்று தொழுவீராக! ஏனெனில், நீர் தொழவில்லை’ என்று கூறினார்கள். எனவே அவர் சென்று (மீண்டும்) தொழுதார். நபி (ஸல்) அவர்கள் அவரது தொழுகையை உற்றுநோக்கலானார்கள். ஆனால் அந்த மனிதருக்கோ தமது தொழுகையில் என்ன குறை உள்ளது என்று தெரியவில்லை.

அவர் தொழுகையை முடித்ததும் வந்து, அல்லாஹ்வின் தூதர் (ஸல்) அவர்களுக்கும் மக்களுக்கும் ஸலாம் கூறினார். அல்லாஹ்வின் தூதர் (ஸல்) அவர்கள் அவரிடம், ‘வ அலைக்க. நீர் சென்று தொழுவீராக! ஏனெனில், நீர் தொழவில்லை’ என்று கூறினார்கள். இவ்வாறு இரண்டு அல்லது மூன்று முறை நடைபெற்றது.

பிறகு அந்த மனிதர், ‘அல்லாஹ்வின் தூதரே! எனது தொழுகையில் என்ன குறையைக் கண்டீர்கள்?’ என்று கேட்டார்.

அதற்கு அல்லாஹ்வின் தூதர் (ஸல்) அவர்கள் கூறினார்கள்:
‘கண்ணியமும் மகத்துவமும் மிக்க அல்லாஹ் கட்டளையிட்டபடி, உங்களில் ஒருவர் வுளூவை முழுமையாகச் செய்யாத வரை அவரது தொழுகை முழுமையடையாது. அதாவது, அவர் தமது முகத்தையும், முழங்கைகள் வரை இரு கைகளையும் கழுவ வேண்டும். தமது தலையைத் (தண்ணீரால்) தடவ வேண்டும். கணுக்கால்கள் வரை இரு கால்களையும் (கழுவ) வேண்டும். பிறகு கண்ணியமும் மகத்துவமும் மிக்க அல்லாஹ்வைப் பெருமைப்படுத்தி (தக்பீர் கூறி), அவனைப் புகழ்ந்து, அவனைத் துதிக்க வேண்டும்.’

(அறிவிப்பாளர் ஹம்மாம் கூறுகிறார்: “அவர், ‘அல்லாஹ்வைப் புகழ்ந்து, அவனைத் துதித்து, அவனைப் பெருமைப்படுத்த வேண்டும்’ என்று சொல்வதையும் நான் கேட்டேன்.” மேலும் ஹம்மாம், “அந்த இரண்டு விதமாகவும் அவர் சொல்வதை நான் செவியுற்றேன்” என்றும் கூறினார்).

நபி (ஸல்) அவர்கள் தொடர்ந்து கூறினார்கள்:
“பிறகு அல்லாஹ் அவருக்குக் கற்றுக் கொடுத்து அனுமதித்தவற்றிலிருந்து, குர்ஆனில் அவருக்கு இலகுவானதை ஓத வேண்டும். பிறகு தக்பீர் கூறி, மூட்டுகள் நிதானமடைந்து அவயவங்கள் தளர்வடையும் வரை ருகூஃ செய்ய வேண்டும். பிறகு ‘ஸமிஅல்லாஹு லிமன் ஹமிதஹ்’ (தன்னைப் புகழ்பவரை அல்லாஹ் கேட்கிறான்) என்று கூறி, முதுகுத்தண்டு நேராகும் வரை நிமிர்ந்து நிற்க வேண்டும். பிறகு தக்பீர் கூறி, முகம் (தரையில்) நன்கு பதியுமாறு ஸஜ்தாச் செய்ய வேண்டும்.”

(ஹம்மாம் கூறுகிறார்: “நபி (ஸல்) அவர்கள், ‘நெற்றியை (பதிய வைக்க வேண்டும்); மூட்டுகள் நிதானமடைந்து அவயவங்கள் தளர்வடையும் வரை (ஸஜ்தாச் செய்ய வேண்டும்)’ என்று கூறியதை நான் கேட்டேன். மேலும் அவர், ‘தக்பீர் கூறி, நிமிர்ந்து தம் இருப்பின் மீது (சரியாக) அமர்ந்து, முதுகுத்தண்டு நேராகும் வரை உட்கார வேண்டும். பிறகு தக்பீர் கூறி, முகம் (தரையில்) நன்கு பதிந்து (உடல்) தளர்வடையும் வரை (மீண்டும்) ஸஜ்தாச் செய்ய வேண்டும்’ என்று கூறினார்கள். இவ்வாறு செய்யாவிட்டால் அவரது தொழுகை முழுமையடையாது” (என்றும் கூறினார்கள்)).