(ஈராக்கிலுள்ள) தக்கூகா என்னும் இடத்தில் முஸ்லிமான ஒருவருக்கு மரண வேளை நெருங்கியபோது, அவரது மரண சாசனத்திற்கு (வஸிய்யத்திற்கு) சாட்சியாக இருப்பதற்கு எந்தவொரு முஸ்லிமையும் அவர் காணவில்லை. எனவே, அவர் (யூத அல்லது கிறித்தவ) வேதக்காரர்களில் (அஹ்லுல் கிதாப்) இருவரைத் தமது சாட்சிகளாக்கினார். பின்னர், அவர்கள் இருவரும் கூஃபா நகருக்கு வந்து (அப்பகுதியின் ஆளுநராக இருந்த) அபூமூஸா அல்அஷ்அரீ (ரழி) அவர்களைச் சந்தித்து (அது குறித்துத்) தெரிவித்தனர். மேலும், மரணமடைந்தவர் விட்டுச்சென்ற சொத்துகளையும் (தரிக்கா) அவரது மரண சாசனத்தையும் அவர்கள் கொண்டு வந்திருந்தனர்.
அப்போது அபூமூஸா அல்அஷ்அரீ (ரழி) அவர்கள், "(திருக்குர்ஆனின் 5:106 வசனம் அருளப்பட்டபோது) அல்லாஹ்வின் தூதர் (ஸல்) அவர்களின் காலத்தில் நிகழ்ந்ததைத் தவிர, அதற்குப் பிறகு இதுபோன்றதொரு நிகழ்வு இதுவரை நடக்கவில்லை" என்று கூறினார்கள்.
பின்னர் (சத்தியம் செய்வதற்கு மிகவும் வலியுறுத்தப்பட்ட நேரமான) அஸ்ர் தொழுகைக்குப் பிறகு, அவர்கள் 'எந்த மோசடியும் செய்யவில்லை, பொய் சொல்லவில்லை, (சாசனத்தில்) எந்த மாற்றமும் செய்யவில்லை, எதையும் மறைக்கவில்லை, திரித்துக்கூறவில்லை' என்றும், 'நிச்சயமாக இதுதான் அந்த மனிதரின் மரண சாசனமும் அவர் விட்டுச்சென்ற சொத்துகளுமாகும்' என்றும் அல்லாஹ்வின் மீது சத்தியம் செய்யும்படி அவர்களைப் பணித்தார்கள். (அவ்வாறே அவர்கள் சத்தியம் செய்த) அதன்பிறகு அவர்களின் சாட்சியத்தை அபூமூஸா (ரழி) அவர்கள் ஏற்றுச் செயல்படுத்தினார்கள்.