81:1. சூரியன் (ஒளியில்லாததாகச்) சுருட்டப்படும் போது-

81:1. (உலக முடிவுக்காகச்) சூரியனின் பிரகாசம் மங்க வைக்கப்படும்போது,

81:1. சூரியன் சுருட்டப்பட்டுவிடும்போது,

81:1. சூரியன் (ஒளி நீக்கப்பட்டுச்) சுருட்டப்பட்டுவிடும்போது-

81:2. நட்சத்திரங்கள் (ஒளியிழந்து) உதிர்ந்து விழும்போது-

81:2. நட்சத்திரங்கள் உதிர்ந்துவிடும்போது,

81:2. மேலும், தாரகைகள் உதிர்ந்து விடும்போது,

81:2. நட்சத்திரங்களும் (ஒளியிழந்து) உதிர்ந்துவிடும்போது-

81:3. மலைகள் பெயர்க்கப்படும் போது-

81:3. மலைகள் அதனிடங்களில் இருந்து அகற்றப்படும் போது,

81:3. மேலும், மலைகள் நடத்திச் செல்லப்படும்போது,

81:3. மலைகளும் (பூமியிலிருந்து) பெயர்க்கப்பட்டு விடும்போது-

81:4. சூல் நிறைந்த ஒட்டகைகள் (கவனிப்பாரற்று) விடப்படும் போது-

81:4. (இந்த அமளிகளால் பத்துமாத) கர்ப்பமடைந்த ஒட்டகங்கள் (கவனிப்பின்றி) விடப்படும்போது.

81:4. மேலும், பத்து மாத நிறைகர்ப்ப ஒட்டகங்கள் அப்படியே விட்டு விடப்படும்போது,

81:4. பத்துமாத நிறை கர்ப்பமுடைய ஒட்டகங்களும் கவனிப்பாரற்று (அலைய)விடப்படும்போது-

81:5. காட்டு மிருகங்கள் (மனிதர்களுடனும், இதர பிராணிகளுடனும்) ஒன்று சேர்க்கப்படும்போது-

81:5. காட்டு மிருகங்கள் (பயந்து ஊர்களில் வந்து) ஒன்றுகூடும்போது.

81:5. மேலும், வன விலங்குகள் ஒன்று திரட்டப்படும்போது,

81:5. வனவிலங்குகளும் (ஊர்களுக்குள் வந்து) ஒன்று திரட்டப்படும்போது-

81:6. கடல்கள் தீ மூட்டப்படும்போது-

81:6. கடல் நீர் நெருப்பாக மாற்றப்படும்போது. (இவ்வாறு உலகம் முடிவுபெற்று, விசாரணைக் காலம் ஏற்படும்.)

81:6. மேலும், கடல்கள் கொளுத்தப்படும்போது,

81:6. கடல்களும் தீ மூட்டப்படும்போது-

81:7. உயிர்கள் ஒன்றிணைக்கப்படும் போது-

81:7. அப்போது உயிர்கள் உடலுடன் (மீண்டும்) சேர்க்கப்படும்.

81:7. மேலும், உயிர்கள் (உடல்களுடன்) ஒன்றிணைக்கப்படும்போது,

81:7. உயிர்களும் ஒன்று சேர்க்கப்படும்போது-

81:8. உயிருடன் புதைக்கப்பட்ட பெண் (குழந்தை) வினவப்படும் போது-

81:8. அப்போது (உயிருடன்) புதைக்கப்பட்ட பெண் குழந்தைகளை நோக்கி கேட்கப்படும்,

81:8. மேலும், உயிருடன் புதைக்கப்பட்ட சிறுமியிடம் கேட்கப்படும்போது,

81:8. உயிருடன் புதைக்கப்ப்டட (பெண் குழந்தையான)வளும் வினவப்படும்போது-

81:9. “எந்தக் குற்றத்திற்காக அது கொல்லப்பட்டது?” என்று-

81:9. ‘‘எந்த குற்றத்திற்காக நீங்கள் (உயிருடன் புதைக்கப்பட்டுக்) கொலை செய்யப்பட்டீர்கள்?'' என்று.

81:9. எக்குற்றத்திற்காக கொல்லப்பட்டாள் என்று

81:9. எக்குற்றத்திற்காக அவள் கொல்லப்பட்டாள் (என்று வினவப்படும்போது)-

81:10. பட்டோலைகள் விரிக்கப்படும் போது-

81:10. அப்போது (விசாரணைக்காக மனிதர்களுடைய) ஏடுகள் விரிக்கப்படும்.

81:10. மேலும், வினைச் சுவடிகள் விரிக்கப்படும்போது,

81:10. (விசாரணைக்காக மனிதர்களுடைய) பதிவுப் புத்தகங்களும் விரிக்கப்படும்போது-

81:11. வானம் அகற்றப்படும் போது-

81:11. அப்போது வானம் (பிளந்து) அகற்றப்பட்டுவிடும்.

81:11. மேலும், வானத் திரை அகற்றப்படும்போது,

81:11. வானமும் (பிளந்து) அகற்றப்படும்போது-

81:12. நரகம் கொழுந்துவிட்டு எரியுமாறு செய்யப்படும் போது-

81:12. அப்போது நரகம் எரிக்கப்படும்.

81:12. மேலும், நரகம் எரிக்கப்படும்போது

81:12. நரகமும் கடுமையாக எரிக்கப்படும்போது-

81:13. சுவர்க்கம் சமீபமாக கொண்டு வரப்படும்போது-

81:13. அப்போது சொர்க்கம் சமீபமாகக் கொண்டு வரப்படும்.

81:13. மேலும், சுவனம் அருகே கொண்டு வரப்படும்போது,

81:13. சுவனமும் (பயபக்தியுடையோருக்காக அலங்கரிக்கப்பட்டு,) சமீபமாகக் கொண்டு வரப்படும்போது-

81:14. ஒவ்வோர் ஆத்மாவும், தான் கொண்டு வந்ததை அறிந்து கொள்ளும்.

81:14. (அந்நாளில்) ஒவ்வோர் ஆத்மாவும் (நன்மையோ தீமையோ) தான் செய்து கொண்டு வந்திருப்பதை நன்கறிந்து கொள்ளும்.

81:14. அந்நேரத்தில் ஒவ்வொரு மனிதனும் எதனைக் கொண்டு வந்துள்ளான் என்பதை அறிந்து கொள்வான்.

81:14. ஓவ்வோர் ஆத்மாவும் தான் (உலகில் செய்து) கொண்டு வந்ததை நன்கறிந்து கொள்ளும்.

81:15. எனவே, பின்னே விலகிச் செல்பவை (கிரகங்களின்) மீது சத்தியமாக-

81:15. (மனிதர்களே!) சென்றவழியே மேலும் செல்லும் நட்சத்திரங்கள் மீது சத்தியமாக!

81:15. அவ்வாறில்லை! மீண்டும் மீண்டும் திரும்பி வரக்கூடிய தாரகைகள்மீதும்,

81:15. (மனிதர்களே! நட்சத்திரங்களில்) பின் சென்று விலகக்கூடியவற்றைக் கொண்டு நான் சத்தியம் செய்கிறேன்.

81:16. முன் சென்று கொண்டிருப்பவை மறைபவை (மீதும்),

81:16. தோன்றி மறையும் (வால்) நட்சத்திரங்கள் மீது சத்தியமாக!

81:16. மறையக்கூடிய தாரகைகள் மீதும்,

81:16. (அவை) செல்கின்றவை, மறையக்கூடியவை.

81:17. பின்வாங்கிச் செல்லும் இரவின் மீதும்,

81:17. செல்கின்ற இரவின் மீதும் சத்தியமாக!

81:17. விடை பெற்றுச் செல்லும் இரவின் மீதும்,

81:17. இரவின் மீதும் சத்தியமாக அது பின்னோக்கிச் சென்றுவிடும்போது-

81:18. மூச்சுவிட்டுக் கொண்டெழும் வைகறையின் மீதும் சத்தியமாக.

81:18. உதயமாகும் காலையின் மீதும் சத்தியமாக!

81:18. புலரும் வைகறையின் மீதும் நான் சத்தியம் செய்கின்றேன்.

81:18. காலையின் மீதும் சத்தியமாக! அது (வெளிப்பட்டு, அதன் ஒளி) தெளிவாகிவிடும்போது-

81:19. நிச்சயமாக (இக்குர்ஆன்) மிகவும் கண்ணியமிக்க ஒரு தூதுவர் (ஜிப்ரீல் மூலம் வந்த) சொல்லாகும்.

81:19. நிச்சயமாக (திரு குர்ஆன் என்னும்) இது மிக்க கண்ணியமுள்ள (ஜிப்ரயீல் என்னும்) ஒரு (வானவத்) தூதர் மூலம் கூறப்பட்டதாகும்.

81:19. உண்மையில், இது கண்ணியமிக்க தூதர் ஒருவரின் வாக்காகும்.

81:19. நிச்சயமாக (குர் ஆன் என்னும்) இது மிக்க கண்ணியமுள்ள (ஜிப்ரீல் என்னும்) ஒரு தூதரின் (மூலம் அனுப்பப்பட்ட) கூற்றாகும்.

81:20. (அவர்) சக்திமிக்கவர்; அர்ஷுக்குடையவனிடம் பெரும் பதவியுடையவர்.

81:20. அவர் மிக்க பலவான். அவருக்கு அர்ஷுடையவனிடத்தில் பெரும் பதவியுண்டு.

81:20. அவர் வலிமையுடையவர்; அர்ஷுக்குரியவனிடம் உயர் மதிப்பு பெற்றவர்.

81:20. அவர் மிக்க சக்தியுடையவர்; அர்ஷுக்குரியவனிடம் பெரும் பதவியுடையவர்

81:21. (வானவர் தம்) தலைவர்; அன்றியும் நம்பிக்கைக்குரியவர்.

81:21. (அவர் அவ்விடத்திலுள்ள வானவர்களின்) தலைவர்; மிக்க நம்பிக்கையுடையவர்.

81:21. அங்கு அவருடைய கட்டளை ஏற்றுக் கொள்ளப்படுகின்றது. அவர் நம்பிக்கைக்குரியவராயும் இருக்கின்றார்.

81:21. (வானுலகமான) அங்கு (மலக்குகளால்) கீழ்ப்படியப்படுபவர்; மிக்க நம்பிக்கைக்குரியவர்.

81:22. மேலும் உங்கள் தோழர் பைத்தியக்காரர் அல்லர்.

81:22. (மக்காவாசிகளே! நம் தூதராகிய) உங்கள் தோழர் பைத்தியக்காரரல்ல.

81:22. மேலும், (மக்காவாசிகளே!) உங்கள் நண்பர் பைத்தியக்காரர் அல்லர்.

81:22. (மக்காவாசிகளே! நம்முடைய தூதராகிய) உங்களுடைய தோழர் பைத்தியக்காரருமல்லர்.

81:23. அவர் திட்டமாக அவரை (ஜிப்ரீலை) தெளிவான அடிவானத்தில் கண்டார்.

81:23. நிச்சயமாக அவர் (ஜிப்ரயீலை) தெளிவான வானத்தின் கோடியில் மெய்யாகவே கண்டார்.

81:23. திண்ணமாக, அவர் அந்தத் தூதரை தெளிவான அடிவானத்தில் கண்டார்.

81:23. மேலும், திட்டமாக (ஜிப்ரீலாகிய) அவரைத் தெளிவான அடிவானத்தில் அவர் கண்டார்.

81:24. மேலும், அவர் மறைவான செய்திகளை கூறுவதில் உலோபித்தனம் செய்பவரல்லர்.

81:24. (அச்சமயம் அவர் கண்ட) மறைவானவற்றை (அறிவிப்பதில்) கஞ்சத்தனம் செய்பவரல்ல.

81:24. மேலும், அவர் மறைவான உண்மைகள் (எனும் இந்த அறிவை மக்களிடம் எடுத்துக்கூறும்) விஷயத்தில் கஞ்சர் அல்லர்.

81:24. அவர், (அவருக்கு வானிலிருந்து அறிவிக்கப்படும்) மறைவானவற்றின் மீது உலோபத்தனம் செய்பவருமல்லர்.

81:25. அன்றியும், இது விரட்டப்பட்ட ஷைத்தானின் வாக்கல்ல.

81:25. இன்னும், இது வெருட்டப்பட்ட ஷைத்தானின் சொல்லுமல்ல.

81:25. மேலும், இது விரட்டியடிக்கப்பட்ட ஷைத்தானின் சொல்லும் அன்று.

81:25. இது விரட்டப்பட்ட ஷைத்தானின் சொல்லும் அல்ல.

81:26. எனவே, (நேர்வழியை விட்டும்) நீங்கள் எங்கே செல்கின்றீர்கள்?

81:26. ஆகவே, (இதைவிட்டு) நீங்கள் எங்கு செல்லுகிறீர்கள்?

81:26. பின்னர், நீங்கள் எங்கு சென்று கொண்டிருக்கின்றீர்கள்?

81:26. ஆகவே, (இதனை ஒதுக்கிவிட்டு) நீங்கள் எங்கு செல்கிறீர்கள்?

81:27. இது, அகிலத்தாருக்கெல்லாம் உபதேசமாகும்.

81:27. இது உலகத்தார் அனைவருக்கும் ஒரு நல்லுபதேசமே தவிர வேறில்லை.

81:27. இதுவோ அனைத்துலக மக்களுக்கும் உரிய ஓர் அறிவுரையாகும்;

81:27. இது அகிலத்தார்க்கெல்லாம் உபதேசமேயன்றி வேறில்லை.

81:28. உங்களில் நின்றும் யார் நேர்வழியை விரும்புகிறாரோ, அவருக்கு (நல்லுபதேசமாகும்).

81:28. உங்களில் எவர் நேரான பாதையில் செல்ல விரும்புகிறாரோ அவருக்கு (இது பயனளிக்கும்).

81:28. உங்களில், நேர்வழியில் நடந்திட விரும்பும் ஒவ்வொருவருக்கும் உரியது.

81:28. உங்களில் (நேர் வழியில்) நிலைத்திருக்க நாடுகிறவருக்கு (இது ஒரு அறிவுரையாகும்.)

81:29. ஆயினும், அகிலங்களுக்கெல்லாம் இறைவனாகிய அல்லாஹ் நாடினாலன்றி நீங்கள் (நல்லுபதேசம் பெற) நாடமாட்டீர்கள்.

81:29. எனினும், உலகத்தாரின் இறைவனாகிய அல்லாஹ் நாடினால் தவிர, நீங்கள் (நல்லுணர்ச்சி பெற) விரும்பமாட்டீர்கள்.

81:29. மேலும், நீங்கள் நாடுவதால் எதுவும் நடந்துவிடப்போவதில்லை, பிரபஞ்சம் அனைத்திற்கும் அதிபதியான அல்லாஹ் நாடாத வரையில்!

81:29. இன்னும் அகிலத்தாரின் இரட்சகனாகிய அல்லாஹ் நாடினாலன்றி, நீங்கள் (நல்லறிவு பெற) நாடமாட்டீர்கள்.