2:255. அல்லாஹ் - அவனைத் தவிர (வணக்கத்திற்குரிய வேறு) கடவுள் இல்லை: அவன் என்றென்றும் ஜீவித்திருப்பவன்; என்றென்றும் நிலைத்திருப்பவன்; அவனைச் சிறுதூக்கமோ, உறக்கமோ பீடிக்கா; வானங்களிலுள்ளவையும், பூமியிலுள்ளவையும் அவனுக்கே உரியன; அவன் அனுமதியின்றி அவனிடம் யார் பரிந்துரை செய்ய முடியும்? அவர்களுக்கு முன்னுள்ளவற்றையும், அவர்களுக்குப் பின்னுள்ளவற்றையும் அவன் அறிவான்; அவன் ஞானத்திலிருந்து அவன் நாடியதைத் தவிர (வேறு) எதனையும் அவர்கள் அறிந்து கொள்ள முடியாது; அவனுடைய 'குர்ஸிய்யு' வானங்களையும், பூமியையும் விட விசாலமாய் இருக்கின்றது; அவ்விரண்டையும் பாதுகாப்பது அவனுக்குச் சிரமத்தை உண்டாக்குவதில்லை - அவன் மிக உயர்ந்தவன்; மகிமை மிக்கவன்.

9:120. மதீனா வாசிகளுக்கும், அவர்களைச் சுற்றியுள்ள கிராமவாசிகளுக்கும் - அல்லாஹ்வின் தூதரைவிட்டு அவர்கள் பின்தங்குவதும், அவரின் உயிரைவிடத் தம் உயிர்களையே (பெரிதென) ஆசைவைப்பதும் தகுதியானதல்ல; இது ஏனென்றால், அல்லாஹ்வின் பாதையில் இவர்களுக்கு ஏற்படும் தாகம், களைப்பு (துயர்), பசி, நிராகரிப்பவர்களை ஆத்திரமூட்டும்படியான இடத்தில் கால்வைத்து, அதனால் பகைவனிடமிருந்து துன்பத்தையடைதல் ஆகிய இவையாவும் இவர்களுக்கு நற்செயலாகவே பதிவுசெய்யப்படுகின்றன; நிச்சயமாக அல்லாஹ் நன்மை செய்வோரின் கூலியை வீணாக்கமாட்டான்.

35:35. "அவன் தன் அருளிலிருந்து என்றென்றும் நிலையான வீட்டில் எங்களை இருக்கச் செய்தான்: அதில், எந்த விதமான கஷ்டமும் எங்களைத் தீண்டுவதில்லை; அதில் எங்களை எந்தச் சோர்வும் தீண்டுவதில்லை" (என்றும் கூறுவார்கள்).

46:33. வானங்களையும், பூமியையும் படைத்து, இன்னும் அவற்றைப் படைத்ததால் எவ்வித சோர்வுமின்றி இருக்கின்றானே அத்தகைய அல்லாஹ் - அவன் நிச்சயமாக மரணித்தோரை உயிர்ப்பிக்கும் ஆற்றலுடையவன் என்பதை அவர்கள் பார்க்கவில்லையா? ஆம்! நிச்சயமாக அவன் எல்லாப் பொருட்கள் மீதும் பேராற்றலுடையவன்.

50:38. நிச்சயமாக நாம்தாம் வானங்களையும், பூமியையும், அவ்விரண்டிற்குமிடையே உள்ளவற்றையும் ஆறு நாட்களில் படைத்தோம்; (அதனால்) எத்தகைய களைப்பும் நம்மைத் தீண்டவில்லை.