2:34. பின்னர், நாம் வானவர்களை நோக்கி, "ஆதமுக்குப் பணி(ந்து ஸுஜூது செய்)யுங்கள்" என்று சொன்னபோது இப்லீஸைத் தவிர மற்ற அனைவரும் பணிந்தனர்; அவன் மறுத்தான்; ஆணவமும் கொண்டான்; இன்னும், அவன் நிராகரிப்போரைச் சார்ந்தவனாகிவிட்டான்.

7:11. நிச்சயமாக நாம் உங்களைப் படைத்தோம்; பின்பு உங்களை வடிவமைத்தோம்; அதன்பின் "ஆதமுக்குப் பணியுங்கள்" என்று வானவர்களிடம் கூறினோம்; இப்லீஸைத் தவிர (மற்ற வானவர்கள்) யாவரும் பணிந்தனர்; அவன் பணிந்தவர்களில் ஒருவனாக இருக்கவில்லை.

7:12. "நான் உனக்குக் கட்டளையிட்டபோது, நீ பணியாதிருக்க உன்னைத் தடுத்தது யாது?" என்று (அல்லாஹ்) கேட்டான்: "நான் அவரை (ஆதமை) விட மேலானவன் - என்னை நீ நெருப்பினால் படைத்தாய்; அவரைக் களிமண்ணால் படைத்தாய்" என்று (இப்லீஸ் பதில்) கூறினான்.

7:13. "இதிலிருந்து நீ இறங்கிவிடு! இங்கே நீ பெருமையடிப்பது தகாது. ஆதலால், (இங்கிருந்து) நீ வெளியேறு - நிச்சயமாக நீ சிறுமை அடைந்தோரில் ஒருவனாகிவிட்டாய்" என்று (அல்லாஹ்) கூறினான்.

7:14. "(இறந்தவர்) எழுப்பப்படும் நாள் வரை எனக்கு அவகாசம் கொடுப்பாயாக" என அவன் (இப்லீஸ்) வேண்டினான்.

7:15. (அதற்கு அல்லாஹ்) "நிச்சயமாக நீ அவகாசம் கொடுக்கப்பட்டவர்களில் ஒருவனாவாய்" என்று கூறினான்.

7:16. "நீ என்னை வழிகெட்டவனாக ஆக்கியதன் காரணத்தால் (ஆதமுடைய சந்ததிகள்) உன்னுடைய நேரான பாதையில் (செல்லாது தடுப்பதற்காக அவ்வழியில்) அவர்களுக்காக திட்டமாக உட்கார்ந்து கொள்வேன்" என்று கூறினான்.

7:17. "பின், நிச்சயமாக நான் அவர்கள் முன்னும், அவர்கள் பின்னும், அவர்கள் வலப்பக்கங்களிலும், அவர்கள் இடப்பக்கங்களிலும் வந்து (அவர்களை வழிகெடுத்துக்) கொண்டிருப்பேன்; ஆதலால், நீ அவர்களில் பெரும்பாலோரை (உனக்கு) நன்றி செலுத்துவோர்களாகக் காணமாட்டாய்" (என்றும் கூறினான்).

7:18. அதற்கு (இறைவன்) "நீ நிந்திக்கப்பட்டவனாகவும், வெருட்டப்பட்டவனாகவும் இங்கிருந்து வெளியேறிவிடு; அவர்களில் உன்னைப் பின்பற்றுவோரையும், உங்கள் யாவரையும் கொண்டு நிச்சயமாக நரகத்தை நிரப்புவேன்" என்று கூறினான்.

15:31. இப்லீஸைத் தவிர: அவன் பணிந்தவர்களுடன் சேர்ந்திட மறுத்துவிட்டான்.

15:32. "இப்லீஸே! பணிந்தவர்களுடனே நீயும் சேராமல் (விலகி) இருந்ததற்குக் காரணம் என்ன?" என்று (இறைவன்) கேட்டான்.

15:33. அதற்கு இப்லீஸ், "ஓசை தரும், மாற்றமடைந்த கறுப்பான களிமண்ணிலிருந்து, நீ படைத்துள்ள (ஒரு) மனிதனுக்கு நான் பணிவதற்கில்லை!" என்று கூறினான்.

15:34. "நீ இங்கிருந்து வெளியேறிவிடு; நிச்சயமாக நீ விரட்டப்பட்டவனாக இருக்கிறாய்" என்று அவன் கூறினான்.

15:35. மேலும், "நிச்சயமாக (நியாயத்) தீர்ப்பு நாள் வரை உன் மீது சாபம் உண்டாவதாக!" (என்றும் கூறினான்).

15:36. "என்னுடைய இறைவனே! (இறந்தவர்களான) அவர்கள் எழுப்பப்படும் நாள் வரை எனக்கு அவகாசம் கொடுப்பாயாக!" என்று (இப்லீஸ்) கூறினான்.

15:37. "நிச்சயமாக நீ அவகாசம் அளிக்கப்பட்டோரில் ஒருவனாவாய்" என்று கூறினான்.

15:38. குறிப்பிட்ட நேரத்தின் நாள் வரும் வரையில்" (என்றும் கூறினான்).

15:39. "என் இறைவனே! என்னை நீ வழிகேட்டில் விட்டுவிட்டதால், நான் பூமியில் (வழிகேட்டைத் தரும் அனைத்தையும்) அவர்களுக்கு அழகாகக் காண்பித்து, (அதன் மூலமாக) அவர்கள் அனைவரையும் வழிகெடுத்தும் விடுவேன்" என்று கூறினான்.

15:40. "அவர்களில் தேர்ந்தெடுக்கப்பட்ட உன் அடியார்களைத் தவிர" (என்றும் கூறினான்).

15:41. "இதுதான் என்னிடம் (வருவதற்குரிய) நேரான வழியாகும்" என்று (அல்லாஹ்) கூறினான்.

15:42. நிச்சயமாக என் அடியார்கள்மீது உனக்கு எவ்வித அதிகாரமுமில்லை; வழிகெட்டவர்களிலிருந்து உன்னைப் பின்பற்றியவர்களைத் தவிர" (என்று கூறினான்).

15:43. நிச்சயமாக (உன்னைப் பின்பற்றும்) அனைவருக்கும் நரகம் வாக்களிக்கப்பட்ட இடமாகும்.

15:44. அதற்கு ஏழு வாசல்கள் உண்டு; ஒவ்வொரு வாசலுக்கும் அவர்களிலிருந்து பங்கிடப்பட்ட ஒரு தொகையினர் உள்ளனர்.

17:61. இன்னும், (நினைவுகூர்வீராக!) நாம் மலக்குகளிடம், "ஆதமுக்கு நீங்கள் ஸுஜூது செய்யுங்கள்" என்று கூறியபோது, இப்லீஸைத் தவிர அவர்கள் ஸுஜூது செய்தார்கள்; அவனோ, "களிமண்ணால் நீ படைத்தவருக்கா நான் ஸுஜூது செய்ய வேண்டும்?" என்று கூறினான்.

17:62. "எனக்கு மேலாக கண்ணியப்படுத்திய இவரைப் பார்த்தாயா? நீ எனக்கு மறுமை நாள் வரை அவகாசம் கொடுத்தால், நான் இவருடைய சந்ததிகளில் சிலரைத் தவிர, (மற்றவர்களை) நிச்சயமாக வழிகெடுத்துவிடுவேன்" என்று அவன் (இப்லீஸ்) கூறினான்.

17:63. "நீ போய்விடு! அவர்களில் உன்னை எவர் பின்பற்றுகிறாரோ - நிச்சயமாக நரகம்தான் உங்கள் கூலியில் நிரம்பமான கூலியாக இருக்கும்" என்று (இறைவன்) கூறினான்.

17:64. இன்னும், "அவர்களிலிருந்து நீ எவரை (வழிசறுக்கச்செய்ய) சக்திபெற்றிருக்கிறாயோ, அவர்களை உன் கூப்பாட்டைக்கொண்டு வழி சறுக்கச்செய்; உன்னுடைய குதிரைப் படையையும் காலாட் படையையும் கொண்டு அவர்களுக்கு எதிராக முழக்கமிடச்செய் - அவர்களுடைய செல்வங்களிலும், குழந்தைகளிலும் நீ கூட்டாக இருந்துகொள்; அவர்களுக்கு(ப் பொய்யான) வாக்குறுதிகளையும் கொடு!" (என்றும் அல்லாஹ் கூறினான்); ஆகவே, ஷைத்தான் அவர்களுக்கு வாக்களிப்பதெல்லாம் வெறும் ஏமாற்றமேயன்றி வேறில்லை.

17:65. "நிச்சயமாக என்னுடைய அடியார்கள்மீது உனக்கு எந்த அதிகாரமுமில்லை" (என்றும் அல்லாஹ் கூறினான்; நபியே! அந்த என் நல்லடியார்களைக்) காத்துக்கொள்ள உம்முடைய இறைவன் போதுமானவன்.

18:50. அன்றியும், 'ஆதமுக்கு ஸுஜூது செய்யுங்கள்' என்று நாம் வானவர்களிடத்தில் கூறியதை (நபியே!) நினைவுகூர்வீராக! அப்போது இப்லீஸைத் தவிர, அவர்கள் ஸுஜூது செய்தார்கள்: அவன் (இப்லீஸ்) ஜின் வர்க்கத்தைச் சேர்ந்தவனாக இருந்தான்: அவன் தன் இறைவனுடைய கட்டளையை மீறிவிட்டான்: ஆகவே, நீங்கள் என்னையன்றி அவனையும் அவன் சந்ததியரையும் (உங்களைப்) பாதுகாப்பவர்களாக எடுத்துக்கொள்கிறீர்களா? அவர்களோ உங்களுக்குப் பகைவர்களாக இருக்கிறார்கள்; அக்கிரமக்காரர்கள் (இவ்வாறு) மாற்றிக்கொண்டது மிகவும் கெட்டதாகும்.

20:116. "நீங்கள் ஆதமுக்கு ஸுஜூது செய்யுங்கள்" என்று நாம் வானவர்களிடம் கூறியபோது, இப்லீஸைத் தவிர, அவர்கள் ஸுஜூது செய்தார்கள்; அவன் (அவ்வாறு செய்யாது) விலகிக் கொண்டான்.

20:117. அப்பொழுது, "ஆதமே! நிச்சயமாக இவன் உமக்கும், உம்முடைய மனைவிக்கும் பகைவனாவான்; ஆதலால், உங்களிருவரையும் இச்சுவர்க்கத்திலிருந்து திட்டமாக அவன் வெளியேற்றிவிட (இடமளிக்க) வேண்டாம்; இல்லையேல், நீர் பெரும் இன்னலுக்குள்ளாவீர்" என்று நாம் கூறினோம்.

20:118. "நிச்சயமாக நீர் இச்சுவர்க்கத்தில் பசியாகவோ, நிர்வாணமாகவோ இருக்கமாட்டீர்."

20:119. "இன்னும், இதில் நீர் தாகிக்கவும், வெயிலில் (கஷ்டப்)படவும் மாட்டீர்" (என்று கூறினோம்).

20:120. ஆனால், ஷைத்தான் அவருக்கு ஊசலாட்டத்தை உண்டாக்கி, "ஆதமே! நித்திய வாழ்வளிக்கும் மரத்தையும், அழிவில்லாத அரசாங்கத்தையும் உமக்கு நான் அறிவித்துத் தரவா?" என்று கேட்டான்.

26:95. இப்லீஸின் சேனைகள் எல்லோரும் (அவ்வாறு தள்ளப்படுவார்கள்).

34:20. அன்றியும், (தன் வழிக்கு வருவார்கள் என்று அவர்களைப் பற்றி இப்லீஸ் எண்ணிய எண்ணத்தை) நிச்சயமாக அவன் உண்மையாக்கினான்; ஆகவே, நம்பிக்கையாளர்களிலுள்ள ஒரு கூட்டத்தார் தவிர, (மற்றவர்கள்) அவனையே பின்பற்றினார்கள்.

34:21. எனினும், அவர்கள்மீது அவனுக்கு யாதோர் அதிகாரமும் இருக்கவில்லை - ஆயினும், மறுமையை நம்புகிறவரை, எவர் (மறுமையை நம்பாது) அ(து வருவ)தைப்பற்றி சந்தேகத்திலிருக்கிறாரோ அவரைவிட்டும் நாம் (பிரித்து) அறி(வித்து விடு)வதற்காகவே (இது நடந்தது); மேலும், உம்முடைய இறைவன் அனைத்துப் பொருட்களையும் பாதுகாப்போனாக இருக்கின்றான்.

38:71. (நபியே! நினைவு கூர்வீராக!) "நிச்சயமாக நான் களிமண்ணிலிருந்து மனிதனைப் படைக்க இருக்கிறேன்" என்று உம்முடைய இறைவன் வானவர்களிடம் கூறியதை.

38:72. நான் அவரைச் செவ்வைப்படுத்தி, என் புறத்திலிருந்து ரூஹை (ஆன்மாவை) அவருக்குள் ஊதிய பொழுது, அவருக்கு நீங்கள் ஸுஜூது செய்தவர்களாக விழுங்கள்.

38:73. அது சமயம் மலக்கு (வானவர்) கள் யாவரும் ஸுஜூது செய்தார்கள்.

38:74. இப்லீஸைத் தவிர; அவன் பெருமை அடித்தவனாக (நம் கட்டளையை மறுத்த) நிராகரிப்போரில் (ஒருவனாக) ஆகிவிட்டான்.

38:75. "இப்லீஸே! நான் என்னுடைய கைகளால் படைத்தவருக்கு ஸுஜூது செய்வதை விட்டும் உன்னைத் தடுத்தது எது? பெருமையடிக்கிறாயா? அல்லது, நீ உயர்ந்தவர்களில் (ஒருவனாக) ஆகிவிட்டாயா?" என்று (அல்லாஹ்) கேட்டான்.

38:76. "நானே அவரைவிட மேலானவன்; (ஏனெனில்) என்னை நீ நெருப்பிலிருந்து படைத்தாய்; ஆனால், அவரையோ நீ களிமண்ணிலிருந்து படைத்தாய்" என்று (இப்லீஸ்) கூறினான்.

38:77. (அப்போது இறைவன்) "இதிலிருந்து நீ வெளியேறு! ஏனெனில், நிச்சயமாக நீ விரட்டப்பட்டவனாகி விட்டாய்" எனக் கூறினான்.

38:78. "இன்னும், நிச்சயமாக நியாயத் தீர்ப்பு நாள் வரை உன் மீது என் சாபம் இருக்கும்" (எனவும் இறைவன் கூறினான்).

38:79. "இறைவனே! அவர்கள் (இறந்து) எழுப்பப்படும் நாள் வரை எனக்கு நீ அவகாசம் கொடுப்பாயாக!" என்று அவன் கேட்டான்.

38:80. "நிச்சயமாக நீ அவகாசம் கொடுக்கப்பட்டவர்களில் உள்ளவனே" என (அல்லாஹ்) கூறினான்.

38:81. "குறிப்பிட்ட காலத்தின் நாள் வரையில்" (உனக்கு அவகாசம் உண்டு எனவும் கூறினான்).

38:82. அப்பொழுது, "உன் கண்ணியத்தின் மீது சத்தியமாக! நிச்சயமாக நான் அவர்கள் யாவரையும் வழி கெடுப்பேன்" என்று (இப்லீஸ்) கூறினான்.

38:83. (எனினும்,) "அவர்களில் தேர்ந்தெடுக்கப்பட்ட உன் அடியார்களைத் தவிர" (என்றான்).

38:84. (அதற்கு இறைவன்:) "அது உண்மை; உண்மையையே நான் கூறுகிறேன்" என்று கூறினான்.

38:85. "நிச்சயமாக, உன்னைக் கொண்டும், அவர்களில் உன்னைப் பின்பற்றியவர்கள் அனைவரைக் கொண்டும் நரகத்தை நிரப்புவேன்" (என்றான்).