2:40. இஸ்ராயீலின் சந்ததியினரே! நான் உங்களுக்கு அளித்த என்னுடைய அருட்கொடையை நினைவு கூருங்கள்; நீங்கள் என் வாக்குறுதியை நிறைவேற்றுங்கள்; நான் உங்கள் வாக்குறுதியை நிறைவேற்றுவேன்; மேலும், நீங்கள் எனக்கே அஞ்சுவீர்களாக!

2:48. இன்னும், ஓர் ஆத்மா மற்றொரு ஆத்மாவிற்குச் சிறிதும் பயன்பட முடியாத (அந்த) ஒரு நாளை நீங்கள் அஞ்சுவீர்களாக! (அந்த நாளில்) எந்தப் பரிந்துரையும் அதற்காக ஏற்றுக்கொள்ளப்படமாட்டாது; அதற்காக எந்த ஈடும் பெற்றுக்கொள்ளப்படமாட்டாது; அன்றியும், அவர்கள் உதவி செய்யப்படவும் மாட்டார்கள்.

2:83. இன்னும் (நினைவுகூருங்கள்:) நாம் இஸ்ராயீல் மக்களிடத்தில், "அல்லாஹ்வைத் தவிர (வேறு எவரையும் - எதனையும்) நீங்கள் வணங்கக் கூடாது; (உங்கள்) பெற்றோருக்கும், உறவினர்களுக்கும், அநாதைகளுக்கும், ஏழைகளுக்கும் நன்மை செய்யுங்கள்; மனிதர்களிடமும் அழகானதைப் பேசுங்கள்; மேலும், தொழுகையைக் கடைப்பிடியுங்கள்; ஜகாத்தையும் கொடுங்கள்" என்று உறுதிமொழியை வாங்கினோம்; ஆனால், உங்களில் சிலரைத் தவிர (மற்ற யாவரும் உறுதிமொழியை நிறைவேற்றாமல் அதிலிருந்து) புரண்டுவிட்டீர்கள்; இன்னும் நீங்கள் புறக்கணித்தவர்களாகவே இருக்கிறீர்கள்.

2:122. இஸ்ராயீலின் மக்களே! நான் உங்களுக்கு அளித்த என் அருட்கொடையை நினைவு கூருங்கள்; இன்னும், நிச்சயமாக நான் உங்களை உலக மக்கள் எல்லோரையும் விட மேம்பாடுடையோராகச் செய்தேன்.

2:211. (நபியே!) இஸ்ராயீலின் சந்ததிகளிடம் நீர் கேளும்; நாம் எத்தனை தெளிவான அத்தாட்சிகளை அவர்களுக்குக் கொடுத்தோம் என்று; அல்லாஹ்வின் அருட்கொடையை - அது தம்மிடம் வந்த பின்னர், யார் மாற்றுகிறாரோ (அத்தகையோருக்கு) தண்டனை கொடுப்பதில் நிச்சயமாக அல்லாஹ் கடுமையானவன்.

2:246. (நபியே!) மூஸாவுக்குப் பின் இஸ்ராயீல்களின் தலைவர்களை நீர் கவனித்தீரா? அவர்கள் தம் நபியிடம், "நாங்கள் அல்லாஹ்வின் பாதையில் போரிடுவதற்காக ஓர் அரசனை அனுப்புங்கள" என்று கூறியபொழுது அவர், "போர் செய்தல் உங்கள் மீது கடமையாக்கப்பட்டால், நீங்கள் போரிடாமல் இருந்து விடலாம் அல்லவா?" என்று கேட்டார்; அதற்கவர்கள், "எங்கள் மக்களையும், எங்கள் வீடுகளையும் விட்டு நாங்கள் வெளியேற்றப்பட்டபின், அல்லாஹ்வின் பாதையில் நாங்கள் போரிடாமல் இருக்க எங்களுக்கு என்ன வந்தது?" எனக் கூறினார்கள்; பின்னர், அவர்கள் மீது போர் கடமையாக்கப்பட்டபோது அவர்களில் ஒரு சிலரைத் தவிர (மற்றெல்லோரும்), புறமுதுகுக் காட்டி(த் திரும்பி) விட்டனர் - (இவ்வாறு) அக்கிரமம் செய்வோரை அல்லாஹ் நன்கறிவான்.

3:49. இஸ்ராயீலின் சந்ததியினருக்குத் தூதராகவும் (அவரை ஆக்குவான்; இவ்வாறு அவர் ஆகியதும் அவர்களிடம், அவர்:) "நான் உங்கள் இறைவனிடமிருந்து ஓர் அத்தாட்சியுடன் நிச்சயமாக வந்துள்ளேன்; நான் உங்களுக்காக களிமண்ணால் ஒரு பறவையின் உருவத்தைப்போல் உண்டாக்கி நான் அதில் ஊதுவேன்; அது அல்லாஹ்வின் அனுமதியைக்கொண்டு (உயிருடைய) பறவையாகி விடும்; அல்லாஹ்வின் அனுமதியைக்கொண்டு பிறவிக் குருடனையும், வெண் குஷ்டரோகியையும் குணப்படுத்துவேன்; இறந்தோரையும் உயிர்ப்பிப்பேன்; நீங்கள் உண்பவற்றையும், நீங்கள் உங்கள் வீடுகளில் சேமித்துவைப்பவற்றையும் நான் உங்களுக்கு எடுத்துக்கூறுவேன்; நீங்கள் நம்பிக்கையாளர்களாக இருந்தால் நிச்சயமாக இவற்றில் உங்களுக்குத் (திடமான) ஓர் அத்தாட்சி இருக்கிறது" (என்று கூறினார்).

3:93. தவ்ராத் அருளப்படுவதற்கு முன்னால் இஸ்ராயீல் (என்ற தூதர் யஃகூப்) தன் மீது தடை செய்துகொண்டதைத் தவிர, இஸ்ராயீலின் மக்களுக்கு எல்லாவகையான உணவும் அனுமதிக்கப்பட்டிருந்தது; (நபியே!) நீர் கூறும்: "நீங்கள் உண்மையாளர்களாக இருந்தால் தவ்ராத்தைக் கொண்டு வந்து அதை ஓதிக் காண்பியுங்கள்" என்று.

5:32. இதன் காரணமாகவே, "நிச்சயமாக எவரொருவர் கொலைக்குப் பதிலாகவோ, அல்லது பூமியில் ஏற்படும் குழப்பத்தைத் (தடுப்பதற்காகவோ) அன்றி, மற்றொருவரைக் கொலை செய்கிறாரோ அவர் மனிதர்கள் யாவரையும் கொலை செய்தவர் போலாவார்; மேலும், எவரொருவர் அதனை (ஓர் ஆத்மாவை) வாழவைக்கிறாரோ அவர் மக்கள் யாவரையும் வாழவைத்தோரைப் போலாவார்" என்று இஸ்ராயீலின் சந்ததியினருக்கு நாம் விதித்தோம்; மேலும், நிச்சயமாக நம் தூதர்கள் அவர்களிடம் தெளிவான அத்தாட்சிகளைக் கொண்டுவந்தார்கள்; இதன் பின்னரும், அவர்களில் பெரும்பாலோர் பூமியில் வரம்புமீறியவர்களாகவே இருக்கின்றனர்.

5:70. திட்டமாக நாம் இஸ்ராயீலின் சந்ததியினரிடம் உறுதிமொழி வாங்கினோம்; அவர்களிடம் தூதர்களையும் அனுப்பிவைத்தோம்; எனினும், அவர்கள் மனம் விரும்பாதவற்றை (கட்டளைகளை நம்) தூதர் அவர்களிடம் கொண்டுவந்தபோதெல்லாம், (தூதர்களில்) ஒரு பிரிவினரைப் பொய்ப்பித்தும் இன்னும், ஒரு பிரிவினரைக் கொலை செய்தும் வந்தார்கள்.

5:72. "நிச்சயமாக மர்யமுடைய மகனாகிய மஸீஹ் (ஈஸா)தான் அல்லாஹ்" என்று கூறுகிறவர்கள் திட்டமாக நிராகரித்துவிட்டனர்; ஆனால், மஸீஹ் கூறினார்: "இஸ்ராயீலின் சந்ததியினரே! என்னுடைய இறைவனும், உங்களுடைய இறைவனுமாகிய அல்லாஹ்வை வணங்குங்கள்!" என்று; எனவே, எவனொருவன் அல்லாஹ்வுக்கு இணைகற்பிப்பானோ, அவனுக்கு அல்லாஹ் சுவனபதியை நிச்சயமாகத் தடுத்துவிட்டான்; மேலும், அவன் ஒதுங்குமிடம் நரகமேயாகும்; அக்கிரமக்காரர்களுக்கு உதவிபுரிபவர் எவருமில்லை.

5:110. "மர்யமுடைய மகன் ஈஸாவே! உம்மீதும் உம் தாயார் மீதும் (நான் அருளிய) அருட்கொடையை நினைவு கூரும்! பரிசுத்த ஆன்மாவைக் கொண்டு உம்மை பலப்படுத்தியபோது நீர் தொட்டிலிலும், வாலிபப் பருவத்திலும் மனிதர்களிடம் பேசியதையும், இன்னும் நான் உமக்கு வேதத்தையும், ஞானத்தையும், தவ்ராத்தையும், இன்ஜீலையும் கற்றுக் கொடுத்ததையும் (நினைத்துப் பாரும்)! இன்னும், நீர் களிமண்ணினால் என் உத்தரவைக் கொண்டு பறவை வடிவத்தைப் போல் உண்டாக்கி அதில் நீர் ஊதியபோது, அது என் உத்தரவைக் கொண்டு பறவையாகியதை; இன்னும், என் உத்தரவைக் கொண்டு பிறவிக் குருடனையும், வெண்குஷ்டக்காரனையும் சுகப்படுத்தியதையும், (நினைத்துப் பாரும்!); இறந்தோரை என் உத்தரவுக் கொண்டு (உயிர்ப்பித்து) வெளிப்படுத்தியதையும், (நினைத்துப் பாரும்!); அன்றியும், (இஸ்ராயீலின் சந்ததியினராகிய) அவர்களிடம் நீர் தெளிவான அத்தாட்சிகளைக் கொண்டு வந்தபோது, அவர்களில் நிராகரித்தவர்கள், 'இது தெளிவான சூனியத்தைத் தவிர வேறு இல்லை!' என்று கூறியபோது (அந்த) இஸ்ராயீலின் மக்க(ளின் தீங்குக)ளை உம்மைவிட்டும் நான் தடுத்துவிட்டதையும் நினைத்துப் பாரும்!" என்று (ஈஸாவை அழைத்து) அல்லாஹ் கூறியதை (நபியே! நீர் நினைவு கூர்வீராக)!"

7:105. "அல்லாஹ்வின் மீது உண்மையைத் தவிர (வேறெதுவும்) கூறாமலிருப்பது என் மீது கடமையாகும்; உங்களுடைய இறைவனிடமிருந்து உங்களுக்குத் தெளிவான அத்தாட்சியைக் கொண்டுவந்திருக்கிறேன்: ஆகவே, இஸ்ராயீலின் சந்ததியினரை என்னுடன் அனுப்பிவை!" (என்றும் அவர் கூறினார்.)

7:134. தங்கள் மீது வேதனை ஏற்பட்ட போதெல்லாம் அவர்கள், "மூஸாவே! உம் இறைவன் உமக்கு அளித்திருக்கும் வாக்குறுதிப்படி எங்களுக்காக பிரார்த்தனை செய்வீராக! எங்களை விட்டும் இவ்வேதனையை நீர் நீக்கிவிட்டால், நிச்சயமாக நாங்கள் உம்மது நம்பிக்கை கொண்டு, இஸ்ராயீலின் சந்ததியினரை உம்முடன் நிச்சயமாக அனுப்பிவிடுவோம்" என்று கூறினார்கள்.

7:138. நாம் இஸ்ராயீலின் சந்ததியினரைக் கடல் கடந்துசெல்ல வைத்தோம்; தங்களுக்குரிய விக்கிரகங்களை ஆராதனை செய்துகொண்டிருந்த ஒரு கூட்டத்தார் அருகே அவர்கள் வந்தார்கள்; அப்போது அவர்கள், "மூஸாவே! அவர்களிடமிருக்கும் கடவுள்களைப்போல் நமக்கும் நீங்கள் ஒரு கடவுளை ஆக்கித்தருவீர்களாக!" என்று வேண்டினர்; "நிச்சயமாக நீங்கள் ஓர் அறிவில்லாத கூட்டத்தாராக இருக்கின்றீர்கள்" என்று அவர் (மூஸா அவர்களிடம்) கூறினார்.

10:90. மேலும், இஸ்ராயீலின் சந்ததியினரை நாம் கடலைக் கடக்கவைத்தோம்; அப்போது ஃபிர்அவ்னும், அவனுடைய படைகளும் (அளவு கடந்து) அநியாயமும், பகைமையும் கொண்டு அவர்களைப் பின்தொடர்ந்தார்கள்; (அவனை மூழ்கடிக்க வேண்டிய நேரம் நெருங்கி) இறுதியாக அவனை மூழ்குதல் வந்தடைந்தபோது, "அவன், இஸ்ராயீலின் சந்ததியினர் யார் மீது நம்பிக்கை கொண்டுள்ளார்களோ, அவனைத் தவிர வேறு கடவுள் இல்லையென்று நானும் நம்பிக்கை கொள்கிறேன்; இன்னும், நான் முஸ்லிம்களில் ஒருவனாக இருக்கிறேன்" என்று கூறினான்.

10:93. நிச்சயமாக நாம் இஸ்ராயீலின் சந்ததியினரை, தகுந்த இருப்பிடத்தில் இருத்தி, நல்லவற்றிலிருந்து அவர்களுக்கு நாம் உணவளித்தோம்; எனினும், (வேதத்தினுடைய உண்மையான) ஞானம் அவர்களிடம் வரும்வரையில் அவர்கள் மாறுபடவில்லை; நிச்சயமாக உம் இறைவன், அவர்கள் எதுபற்றி மாறுபட்டிருந்தார்களோ, அ(து விஷயத்)தில் மறுமைநாளில் அவர்களிடையே தீர்ப்பளிப்பான்.

17:2. இன்னும், நாம் மூஸாவுக்கு வேதத்தைக் கொடுத்தோம்; நாம் அதை இஸ்ராயீலின் சந்ததிகளுக்கு வழிகாட்டியாக ஆக்கி, 'என்னையன்றி வேறு எவரையும் நீங்கள் பாதுகாவலனாக ஆக்கிக்கொள்ளாதீர்கள்' (என்றும் கட்டளையிட்டோம்).

17:4. நாம் இஸ்ராயீலின் சந்ததியினருக்கு (முன்னறிவிப்பாக தவ்ராத்) வேதத்தில்: "நிச்சயமாக நீங்கள் பூமியில் இருமுறை குழப்பம் உண்டாக்குவீர்கள்; (அல்லாஹ்வுக்கு வழிப்படாது) ஆணவத்துடன் பெரும் அழிச்சாட்டியங்கள் செய்பவர்களாக நடந்துகொள்வீர்கள்" என்று அறிவித்தோம்.

17:101. நிச்சயமாக நாம் மூஸாவுக்குத் தெளிவான ஒன்பது அத்தாட்சிகளைக் கொடுத்திருந்தோம்; அவர் அவர்களிடம் (அவற்றைக் கொண்டு) வந்தபோது (என்ன நடந்தது என்று) இஸ்ராயீலின் சந்ததிகளிடம் (நபியே!) நீர் கேளும்! ஃபிர்அவ்ன் அவரை நோக்கி, "மூஸாவே! நிச்சயமாக நான் உம்மைச் சூனியம் செய்யப்பட்டவராகவே எண்ணுகிறேன்" என்று கூறினான்.

17:104. இதன் பின்னர், நாம் இஸ்ராயீலின் சந்ததியினருக்குச் சொன்னோம்: "நீங்கள் இந்தப் பூமியில் குடியிருங்கள், மறுமையின் வாக்குறுதி வந்தால், நாம் உங்கள் யாவரையும் ஒரு சேரக் கொண்டுவருவோம்."

19:58. இவர்கள் ஆதமுடைய சந்ததியிலும், நூஹ்வுடன் (கப்பலில்) நாம் ஏற்றிக்கொண்டவர்களி(ன் சந்ததியி)லும், இப்ராஹீமுடையவும், இஸ்ராயீல் (யஃகூபின்) சந்ததியிலும், இன்னும் நாம் தேர்ந்தெடுத்து நேர்வழியில் செலுத்தியவர்களிலுமுள்ள நபிமார்களாவார்கள்; இவர்கள் மீது அல்லாஹ் அருளைப் பொழிந்தான்; அளவற்ற அருளாளனின் வசனங்கள் அவர்களின் மீது ஓதப்பட்டால், அவர்கள் அழுதவர்களாகவும், ஸுஜூது செய்தவர்களாகவும் விழுவார்கள்.

20:47. ஆகவே, நீங்கள் இருவரும் அவனிடம் சென்று "நாங்கள் இருவரும் உன்னுடைய இறைவனின் தூதர்கள்: இஸ்ராயீலின் சந்ததிகளை எங்களுடன் அனுப்பிவிடு! மேலும், அவர்களை வேதனைப்படுத்தாதே! திட்டமாக நாங்கள் உன் இறைவனிடமிருந்து ஓர் அத்தாட்சியை உனக்குக் கொண்டு வந்திருக்கிறோம்; இன்னும், எவர் நேர்வழியைப் பின்பற்றுகிறாரோ அவர் மீது (சாந்தி) 'ஸலாம் உண்டாவதாக' என்று சொல்லுங்கள்" (என்று அல்லாஹ் கட்டளையிட்டான்).

20:80. இஸ்ராயீலின் சந்ததியினரே! நாம் திட்டமாக உங்களை உங்கள் பகைவனிடமிருந்து இரட்சித்தோம்; மேலும், தூர் (ஸினாய்) மலையின் வலப்பக்கத்தில் நாம் (தவ்ராத் வேதத்தை அருள்வதாக) உங்களுக்கு வாக்குறுதியளித்தோம்; இன்னும், 'மன்னு சல்வா'வை (உணவாக) உங்கள் மீது நாம் இறக்கிவைத்தோம்.

20:94. (இதற்கு ஹாரூன்) "என் தாயின் மகனே! என் தாடியையோ, என் தலை(முடி)யையோ பிடி(த்திழுக்காதீர்); 'நீர் இஸ்ராயீலின் சந்ததியிலே பிரிவினையை உண்டாக்கிவிட்டீர்! என் வார்த்தைக்காக நீர் காத்திருக்கவில்லை!' என்று நீர் கூறுவீரோ என நிச்சயமாக நான் அஞ்சினேன்" என்று கூறினார்.

26:17. "எங்களுடன் இஸ்ராயீலின் சந்ததியினரை அனுப்பிவிடு" (எனவும் கூறுங்கள்).

26:22. "இஸ்ராயீலின் சந்ததிகளை அடிமையாக வைத்துக்கொண்டிருக்கும் நிலையில், இது நீ எனக்குச் சொல்லிக் காண்பிக்கக்கூடிய பாக்கியமாகுமா?"

26:59. இவ்வாறு, (அவர்களை வெளியேற்றி) இஸ்ராயீலின் சந்ததியினரை அவற்றுக்கு வாரிசுகளாகவும் நாம் ஆக்கினோம்.

26:197. இஸ்ராயீலின் சந்ததியினரில் உள்ள அறிஞர்கள் இதைப் பற்றி நன்கு அறிந்திருப்பதே அவர்களுக்கு அத்தாட்சியல்லவா?

27:76. நிச்சயமாக இந்தக் குர்ஆன் இஸ்ராயீலின் சந்ததியினருக்கு அவர்கள் கருத்து வேறுபாடு கொண்டிருந்ததில் பெரும்பாலானதை விவரித்துக் கூறுகிறது.

32:23. நிச்சயமாக நாம் மூஸாவுக்கு (அவ்) வேதத்தைக் கொடுத்தோம்; எனவே, (நபியே!) அவர் அதைப் பெற்றதைப் பற்றி நீர் சந்தேகப்படாதீர்; நாம் அதனை இஸ்ராயீலின் சந்ததிக்கு வழிகாட்டியாகவும் ஆக்கினோம்.

40:53. நிச்சயமாக மூஸாவுக்கு நாம் நேர்வழியைக் கொடுத்தோம்; அன்றியும், இஸ்ராயீலின் சந்ததியினரை வேதத்திற்கு வாரிசாக்கினோம்.

43:59. அவர் (ஈஸா, நம்முடைய) அடியாரே அன்றி வேறில்லை; அவருக்கு நாம் அருள்புரிந்து இஸ்ராயீலின் சந்ததியருக்கு அவரை ஓர் உதாரணமாக்கினோம்.

44:30. நாம் இஸ்ராயீலின் சந்ததியை இழிவுதரும் வேதனையிலிருந்தும் திட்டமாகக் காப்பாற்றினோம்.

45:16. நிச்சயமாக நாம், இஸ்ராயீலின் சந்ததியினருக்கு வேதத்தையும், அதிகாரத்தையும், நபித்துவத்தையும் கொடுத்தோம்; அவர்களுக்கு நல்லவற்றிலிருந்து உணவுமளித்தோம்; அன்றியும், அகிலத்தாரில் அவர்களை மேன்மையாக்கினோம்.

46:10. (நபியே!) நீர் கூறுவீராக! "நீங்கள் பார்த்தீர்களா? இது அல்லாஹ்விடமிருந்து வந்திருந்து, இதை நீங்கள் நிராகரித்துவிட்ட நிலையில் - இஸ்ராயீலின் மக்களில் ஒரு சாட்சியாளர் இது போன்றது (வர வேண்டியிருந்தது) என்பதில் சாட்சியங் கூறி நம்பிக்கை கொண்டுள்ளார்; (ஆனால், இதை ஏற்காது) நீங்கள் பெருமையடித்தீர்கள்; நிச்சயமாக அல்லாஹ் அநியாயக்கார சமூகத்திற்கு நேர்வழி காட்டமாட்டான்."

61:6. மேலும், மர்யமின் குமாரர் ஈஸா: "இஸ்ராயீல் மக்களே! எனக்கு முன்னுள்ள தவ்ராத்தை மெய்ப்பிப்பவனாகவும்; எனக்குப் பின்னர் வரவிருக்கும் 'அஹ்மது' என்னும் பெயருடைய தூதரைப்பற்றி நன்மாராயம் கூறுபவனாகவும் இருக்கும் நிலையில், நிச்சயமாக நான் அல்லாஹ்வின் தூதனாக உங்களிடம் வந்துள்ளேன்" என்று கூறியவேளையை (நபியே! நீர் நினைவுகூர்வீராக!); எனினும், அவர்களிடம் தெளிவான அத்தாட்சிகளை அவர் கொண்டுவந்தபோது அவர்கள், "இது தெளிவான சூனியமாகும்" என்று கூறினார்கள்.

61:14. நம்பிக்கை கொண்டவர்களே! மர்யமின் குமாரர் ஈஸா (அலை) சீடர்களை நோக்கி, "அல்லாஹ்வுக்காக எனக்கு உதவி செய்வோர் யார்?" எனக் கேட்க, சீடர்கள் "நாங்கள் அல்லாஹ்வின் உதவியாளர்களாக இருக்கின்றோம்" என்று கூறியது போல், நீங்களும் அல்லாஹ்வின் உதவியாளர்களாக ஆகிவிடுங்கள். எனினும், இஸ்ராயீலின் மக்களில் ஒரு கூட்டம் நம்பிக்கை கொண்டது; பிறிதொரு கூட்டமோ நிராகரித்தது. ஆகவே, நம்பிக்கை கொண்டவர்களுக்கு, அவர்களுடைய பகைவர்களுக்கு எதிராக உதவியளித்தோம்; அதனால், அவர்கள் வெற்றியாளர்களாய் ஆகிவிட்டார்கள்.