2:25. ஆனால், நம்பிக்கை கொண்டு நற்செயல்களைச் செய்வோருக்கு நற்செய்தி கூறுவீராக! சதா ஓடிக் கொண்டிருக்கும் ஆறுகளைக் கொண்ட சுவனச் சோலைகள் அவர்களுக்காக உண்டு; அவர்களுக்கு அங்கிருந்து ஏதாவது கனி உணவாகக் கொடுக்கப்படும்போதெல்லாம், "இதுவே முன்னரும் நமக்கு (உலகில்) கொடுக்கப்பட்டிருக்கிறது" என்று கூறுவார்கள்; ஆனால், இதே தோற்றமுடையதுதான் அவர்களுக்கு (உலகத்தில்) கொடுக்கப்பட்டிருந்தன; இன்னும், அவர்களுக்கு அங்கு தூய துணைவியரும் உண்டு; மேலும், அவர்கள் அங்கே நிரந்தரமாக இருப்பார்கள்.

2:35. மேலும் நாம், "ஆதமே! நீரும் உம் மனைவியும் இச்சுவனபதியில் குடியிருங்கள்; மேலும், நீங்கள் இருவரும் விரும்பியவாறு அதிலிருந்து தாராளமாகப் புசியுங்கள்; ஆனால், நீங்கள் இருவரும் இம்மரத்தை நெருங்கவேண்டாம்; (அப்படிச் செய்தீர்களானால்,) நீங்கள் இருவரும் அக்கிரமக்காரர்களில் ஆகிவிடுவீர்கள்" என்று சொன்னோம்.

2:82. எவர்கள் நம்பிக்கை கொண்டு நற்செயல்களைச் செய்கிறார்களோ, அவர்கள் சுவர்க்கவாசிகள்; அவர்கள் அங்கு என்றென்றும் இருப்பார்கள்.

2:111. "யூதர்கள், கிறிஸ்தவர்களைத் தவிர வேறு யாரும் சுவர்க்கத்தில் நுழையவே மாட்டார்கள்" என்று அவர்கள் கூறுகிறார்கள்; இது அவர்களின் வீணாசையேயாகும்: "நீங்கள் உண்மையுடையோராக இருந்தால், உங்களுடைய சான்றைச் சமர்ப்பியுங்கள்" என்று (நபியே!) நீர் கூறுவீராக!

2:124. (இன்னும், இதையும் எண்ணிப் பாருங்கள்;) இப்ராஹீமை அவருடைய இறைவன் சில கட்டளைகள் கொண்டு சோதித்தான்; அவற்றை அவர் முழுமையாக நிறைவேற்றினார்; "நிச்சயமாக நான் உம்மை மக்களுக்குத் தலைவராக ஆக்குகிறேன்" என்று அவன் கூறினான்; அதற்கு இப்ராஹீம், "என் சந்ததியினரிலும் (தலைவர்களை ஆக்குவாயா?)" எனக் கேட்டார்; "என் வாக்குறுதி (உம் சந்ததியிலுள்ள) அநியாயக்காரர்களுக்குச் சேராது" என்று கூறினான்.

2:221. (அல்லாஹ்வுக்கு) இணைவைக்கும் பெண்களை - அவர்கள் நம்பிக்கை கொள்ளும் வரை - நீங்கள் திருமணம் செய்துகொள்ளாதீர்கள்; இணைவைக்கும் ஒரு பெண், உங்களைக் கவரக் கூடியவளாக இருந்தபோதிலும், அவளைவிட நம்பிக்கையுள்ள ஓர் அடிமைப் பெண் நிச்சயமாக மேலானவள் ஆவாள்; இணைவைக்கும் ஆண்களுக்கு – அவர்கள் நம்பிக்கை கொள்ளும் வரை (நம்பிக்கையுள்ள பெண்களை) நீங்கள் திருமணம் செய்துவைக்காதீர்கள்; இணைவைக்கும் ஆண் அவன் உங்களைக் கவருபவனாக இருந்தபோதிலும், நம்பிக்கையுள்ள ஓர் அடிமை அவனைவிட மேலானவன்; (நிராகரிப்போராகிய) இவர்கள், உங்களை (நரக) நெருப்பின் பக்கம் அழைக்கிறார்கள்; ஆனால், அல்லாஹ்வோ தன் கட்டளையைக்கொண்டு சுவர்க்கத்தின் பக்கமும், மன்னிப்பின் பக்கமும் அழைக்கிறான்; மனிதர்கள் படிப்பினை பெறுவதற்காக தன் வசனங்களை அவன் விளக்குகிறான்.

3:15. (நபியே!) நீர் கூறும்: "அவற்றைவிட சிறந்ததை நான் உங்களுக்கு அறிவிக்கட்டுமா?" இறையச்சமுடையவர்களுக்கு, அவர்களுடைய இறைவனிடத்தில் சுவனபதிகள் உண்டு; அவற்றின் கீழ் ஆறுகள் ஓடிக்கொண்டிருக்கின்றன; அதில் (அவர்கள்) நிரந்தரமாக இருப்பார்கள்; (அங்கு அவர்களுக்குத்) தூய துணைகளும் அல்லாஹ்வின் பொருத்தமும் உண்டு; அல்லாஹ் தன் அடியார்களைப் பார்க்கிறவன்.

3:133. இன்னும், நீங்கள் உங்கள் இறைவனின் மன்னிப்பைப் பெறுவதற்கும், சுவர்க்கத்தின் பக்கமும் விரைந்து செல்லுங்கள்; அதன் (சுவர்க்கத்தின்) அகலம் வானங்கள், பூமியைப் போலுள்ளது. அது இறையச்சமுடையோருக்காகவே தயார் செய்யப்பட்டுள்ளது.

3:136. அத்தகையோருக்குரிய (நற்)கூலி, அவர்களுடைய இறைவனிடமிருந்து மன்னிப்பும், சுவர்க்கபதிகளும் ஆகும்; அவற்றின் கீழே ஆறுகள் ஓடிக்கொண்டே இருக்கும்; அவர்கள் அதில் நிரந்தரமாக இருப்பர்; (இத்தகைய) காரியங்கள் செய்வோரின் கூலி நல்லதாக இருக்கிறது.

3:142. உங்களில் (அல்லாஹ்வின் பாதையில் உறுதியாகப்) போர்புரிபவர்கள் யார் என்றும், (அக்காலை) பொறுமையைக் கடைப்பிடிப்பவர்கள் யார் என்றும் அல்லாஹ் (பரிசோதித்து) அறியாமல், நீங்கள் சுவர்க்கத்தில் நுழைந்துவிடலாம் என்று எண்ணிக்கொண்டு இருக்கின்றீர்களா?

3:185. ஒவ்வோர் ஆத்மாவும் மரணத்தைச் சுவைத்தேதீரும்! அன்றியும், உங்கள் செய்கைகளுக்குரிய பிரதிபலன்கள் முழுமையாகக் கொடுக்கப்படுவதெல்லாம் மறுமைநாளில்தான்; எனவே, எவர் (நரக) நெருப்பிலிருந்து தூரமாக்கப்பட்டுச் சுவர்க்கத்தில் புகுத்தப்பெறுகிறாரோ, அவர் நிச்சயமாக வெற்றியடைந்துவிட்டார்; இவ்வுலக வாழ்க்கை ஏமாற்றும் (அற்ப இன்பப்) பொருளேயன்றி வேறில்லை.

3:195. ஆதலால், அவர்களுடைய இறைவன் அவர்களுடைய (இப்)பிரார்த்தனையை ஏற்றுக் கொண்டான்; "உங்களில் ஆணோ, பெண்ணோ எவரது செயலையும் நிச்சயமாக நான் வீணாக்கமாட்டேன்; (ஏனெனில் ஆணாகவோ, பெண்ணாகவோ இருப்பினும்) உங்களில் சிலர் சிலரில் உள்ளவர்தாம்; எனவே, எவர்கள் ஹிஜ்ரத் செய்தார்களோ - மேலும், தங்கள் வீடுகளிலிருந்து வெளியேற்றப்பட்டார்களோ - மேலும், என் பாதையில் துன்புறுத்தப்பட்டார்களோ - மேலும், போரிட்டார்களோ - மேலும், (போரில்) கொல்லப்பட்டார்களோ, அவர்களுடைய தீமைகளை அவர்களை விட்டும் நிச்சயமாக அகற்றிவிடுவேன்; இன்னும், எவற்றின் கீழே ஆறுகள் ஓடிக் கொண்டிருக்கின்றனவோ, அந்தச் சுவனபதிகளில் நிச்சயமாக நான் அவர்களைப் புகுத்துவேன்" (என்று கூறுவான்); (இது) அல்லாஹ்விடமிருந்துள்ள கூலியாக (அவர்களுக்குக் கிடைக்கும்); இன்னும், அல்லாஹ்வாகிய அவனிடத்தில் அழகிய கூலியுண்டு.

3:198. ஆனால், தங்கள் இறைவனை அஞ்சியோர் - அவர்களுக்கு சுவனபதிகள் உள்ளன; அவற்றின் கீழ் ஆறுகள் ஓடிக்கொண்டிருக்கும்; அவற்றில் அவர்கள் நிரந்தரமாக இருப்பர்; (இது) அல்லாஹ்விடமிருந்து (நல்லோருக்குக் கிடைக்கும்) விருந்தாகும்; மேலும், அல்லாஹ்விடம் இருப்பது நல்லோருக்கு மிகச் சிறந்ததாகும்.

4:13. இவை அல்லாஹ்வின் வரம்புகளாகும்; எவர் அல்லாஹ்வுக்கும், அவன் தூதருக்கும் கீழ்ப்படிகிறாரோ அவரை சுவனபதிகளில் அவன் பிரவேசிக்கச் செய்வான்; அதன் கீழே ஆறுகள் ஓடிக்கொண்டிருக்கும்; அவர்கள் அதில் நிரந்தரமாக இருப்பார்கள்; இது மகத்தான வெற்றியாகும்.

4:124. ஆகவே, ஆணாயினும் அல்லது பெண்ணாயினும் யார் நம்பிக்கை கொண்டவராக இருக்கும் நிலையில் நற்செயல்கள் செய்கிறாரோ - அத்தகையோர் சுவனபதியில் நுழைவார்கள்; இன்னும், அவர்கள் இம்மியேனும் அநியாயம் செய்யப்படமாட்டார்கள்.

5:65. வேதமுடையவர்கள் மெய்யாகவே நம்பிக்கை கொண்டு (அல்லாஹ்வுக்கு) அஞ்சினால், நிச்சயமாக நாம் அவர்களுடைய பாவங்களை அவர்களைவிட்டும் போக்கி, அவர்களை (நிலையான) இன்பங்கள் மிகுந்த சுவனபதிகளில் நுழையவைப்போம்.

5:72. "நிச்சயமாக மர்யமுடைய மகனாகிய மஸீஹ் (ஈஸா)தான் அல்லாஹ்" என்று கூறுகிறவர்கள் திட்டமாக நிராகரித்துவிட்டனர்; ஆனால், மஸீஹ் கூறினார்: "இஸ்ராயீலின் சந்ததியினரே! என்னுடைய இறைவனும், உங்களுடைய இறைவனுமாகிய அல்லாஹ்வை வணங்குங்கள்!" என்று; எனவே, எவனொருவன் அல்லாஹ்வுக்கு இணைகற்பிப்பானோ, அவனுக்கு அல்லாஹ் சுவனபதியை நிச்சயமாகத் தடுத்துவிட்டான்; மேலும், அவன் ஒதுங்குமிடம் நரகமேயாகும்; அக்கிரமக்காரர்களுக்கு உதவிபுரிபவர் எவருமில்லை.

5:84. மேலும், "அல்லாஹ்வின் மீதும், எங்களிடம் வந்துள்ள சத்திய (வேத)த்தின் மீதும், நாங்கள் நம்பிக்கை கொள்ளாதிருக்க எங்களுக்கு என்ன (தடை) இருக்கின்றது? எங்களுடைய இறைவன் எங்களை நல்லோர் கூட்டத்துடன் சேர்த்து வைக்கவே நாங்கள் ஆசை வைக்கிறோம்" (என்றும் அவர்கள் கூறுவர்).

5:85. அவர்கள் இவ்வாறு கூறுவதன் காரணமாக, சுவனபதிகளை அல்லாஹ் அவர்களுக்குப் பரிசாகக் கொடுப்பான்; அவற்றின் கீழ் ஆறுகள் ஓடிக்கொண்டிருக்கும்; அவர்கள் அவற்றில் நிரந்தரமாக இருப்பார்கள் - இன்னும், இதுவே நன்மை செய்பவர்களுக்குரிய (நற்)கூலியாகும்.

5:119. அப்போது அல்லாஹ், "இது உண்மை பேசுபவர்களுக்கு அவர்களுடைய உண்மை பலனளிக்கும் நாளாகும்; அவர்களுக்கு சுவனபதிகள் உண்டு - அவற்றின் கீழ் ஆறுகள் ஓடிக் கொண்டிருக்கும்; அவற்றில் அவர்கள் என்றென்றும் நிரந்தரமாக இருப்பார்கள்" என்று கூறுவான்; அல்லாஹ் அவர்களைப் பொருந்திக் கொண்டான்; அல்லாஹ்வை அவர்களும் பொருந்திக்கொண்டார்கள் - இது மகத்தான (பெரும்) வெற்றியாகும்.

7:19. பின்பு, இறைவன் ஆதமை நோக்கி: "ஆதமே! நீரும், உம் மனைவியும் சுவர்க்கத்தில் குடியிருங்கள்; நீங்கள் இருவரும் நாடிய இடத்திலெல்லாம் புசியுங்கள்; ஆனால், இந்த மரத்தை (மட்டும்) நெருங்காதீர்கள்; (அப்படிச் செய்தால்) நீங்கள் இருவரும் அநியாயம் செய்தவர்களில் ஆகிவிடுவீர்கள்" (என்று அல்லாஹ் கூறினான்).

7:22. இவ்வாறு, அவன் அவ்விருவரையும் ஏமாற்றி, (தங்கள் நிலையிலிருந்து) அவர்கள் கீழே இறங்கும்படிச் செய்தான்; அவர்களிருவரும் அம்மரத்தினை (அம்மரத்தின் கனியை)ச் சுவைத்தபோது, அவர்களுடைய வெட்கத்தலங்கள் அவர்களுக்கு வெளியாயிற்று; அவர்கள் சுவனபதியின் இலைகளால் தங்களை மூடிக் கொள்ளலாயினர்; (அப்போது) அவ்விருவரின் இறைவன் அவ்விருவரையும் அழைத்து, "உங்களிருவரையும் அம்மரத்தைவிட்டும் நான் தடுக்கவில்லையா? 'நிச்சயமாக ஷைத்தான் உங்களிருவருக்கும் பகிரங்கமான பகைவன்' என்று நான் உங்களுக்குச் சொல்லவில்லையா?" (என்று கேட்டான்).

7:27. ஆதமுடைய மக்களே! ஷைத்தான் உங்கள் பெற்றோர் இருவரையும், அவர்களிருவருடைய வெட்கத்தலங்களை அவ்விருவருக்கும் காண்பிப்பதற்காக அவ்விருவரின் ஆடையை அவ்விருவரை விட்டும் களைந்து, சுவனபதியை விட்டு வெளியேற்றியதுபோல் அவன் உங்களை (ஏமாற்றிச்) சோதனைக்குள்ளாக்க வேண்டாம்; நிச்சயமாக அவனும், அவன் கூட்டத்தாரும் - நீங்கள் அவர்களைப் பார்க்க முடியாதவாறு உங்களைப் பார்த்துக்கொண்டிருக்கிறார்கள்; நிச்சயமாக நம்பிக்கை கொள்ளாதவர்களுக்கு ஷைத்தான்களை நண்பர்களாக நாம் ஆக்கியுள்ளோம்.

7:40. எவர்கள் நம் வசனங்களைப் பொய்ப்பித்து, இன்னும் அவற்றை (ஏற்பதை) விட்டும் பெருமையடித்தார்களோ நிச்சயமாக அவர்களுக்கு வானத்தின் (அருள்) வாயில்கள் திறக்கப்படமாட்டா; மேலும், ஊசியின் காதில் ஒட்டகம் நுழையும் வரையில், அவர்கள் சுவர்க்கத்தில் நுழைய மாட்டார்கள்; இவ்வாறே குற்றம் செய்பவர்களுக்குக் கூலி கொடுப்போம்.

7:42. ஆனால், எவர்கள் நம்பிக்கை கொண்டு நற்செயல்கள் செய்கின்றார்களோ - எந்த ஓர் ஆத்மாவையும் அதன் சக்திக்கு மீறி நாம் சிரமப்படுத்த மாட்டோம் - அவர்கள்தான் சுவர்க்கவாசிகள்; அவர்கள் அதிலேயே நிரந்தரமாக (தங்கி) இருப்பார்கள்.

7:43. மேலும், (உலகில் அவர்களுக்கு மத்தியில்) அவர்களுடைய நெஞ்சங்களிலிருந்த குரோதத்தையும் நாம் நீக்கிவிடுவோம்; அவர்களுக்குக் கீழ் ஆறுகள் ஓடிக்கொண்டிருக்கும்: இன்னும், அவர்கள் கூறுவார்கள்: "இ(ந்தப் பாக்கியத்தைப் பெறுவ)தற்குரிய நேர்வழியை எங்களுக்குக் காட்டிய அல்லாஹ்வுக்கே எல்லாப் புகழும் உரியதாகும்; அல்லாஹ் எங்களுக்கு நேர்வழி காட்டியிராவிட்டால், ஒருக்காலும் நாங்கள் நேர்வழி அடைந்திருக்கமாட்டோம்; எங்கள் இறைவனுடைய தூதர்கள் சத்தியத்தையே நிச்சயமாகக் கொண்டுவந்தார்கள்:" (அப்பொழுது) "இந்தச் சொர்க்கம் - (உலகில்) நீங்கள் செய்துகொண்டிருந்த (நன்மையான)வற்றின் காரணமாக, இதன் வாரிசுகளாக நீங்கள் ஆக்கப்பட்டிருக்கிறீர்கள்" என்று அழைக்கப்படுவார்கள்.

7:44. சுவர்க்கவாசிகள், நரகவாசிகளை அழைத்து, "எங்கள் இறைவன் எங்களுக்கு வாக்களித்ததை உண்மையானதாக நாங்கள் பெற்றுக்கொண்டோம்; நீங்களும் உங்களுடைய இறைவன் வாக்களித்ததை உண்மையானதாகப் பெற்றுக் கொண்டீர்களா?" என்று கேட்பார்கள்; அதற்கு அவர்கள், "ஆம் (பெற்றுக்கொண்டோம்)" என்பார்கள்; அப்போது அவர்களுக்கிடையே அறிவிப்பவர் ஒருவர், "அக்கிரமக்காரர்களின் மீது அல்லாஹ்வின் சாபம் உண்டாவதாக!" என்று அறிவிப்பார்.

7:46. (நரகவாசிகள், சுவர்க்கவாசிகள் ஆகிய) இவர்களுக்கிடையே ஒரு திரை(யான மதில்) இருக்கும்; (அதன்) சிகரங்களில் சில மனிதர்கள் இருப்பார்கள்; (நரகவாசிகள், சுவர்க்கவாசிகள்) ஒவ்வொருவரையும் அவர்களுடைய அடையாளத்தைக்கொண்டு அவர்கள் அறிந்துகொள்வார்கள்; அவர்கள் சுவர்க்கவாசிகளை அழைத்து "உங்கள் மீது சாந்தி உண்டாகுக!" என்று கூறுவார்கள்; அவர்கள் இன்னும் அதில் நுழையவில்லை - அவர்கள் (அதில் நுழைய) ஆவலுடன் இருக்கின்றார்கள்.

7:49. "அல்லாஹ் இவர்களுக்கு அருள்புரியமாட்டான் என்று நீங்கள் சத்தியம் செய்தீர்களே அவர்கள் இவர்கள் தானே? (என்று சுவனவாசிகளைச் சுட்டிக் காண்பித்துக் கூறுவார்கள்); "நீங்கள் சுவனபதியில் நுழையுங்கள்; உங்களுக்கு எவ்வித பயமுமில்லை; நீங்கள் துக்கப்படவும் மாட்டீர்கள்" (என்று இறைவன் கூறுவான்)."

7:50. நரகவாசிகள், சுவர்க்கவாசிகளை அழைத்து, "தண்ணீரில் கொஞ்சமேனும் அல்லது அல்லாஹ் உங்களுக்கு அளித்துள்ள உணவில் சிறிதேனும் எங்கள் மீது ஊற்றுங்கள்" எனக் கேட்பார்கள்; அதற்கு அவர்கள்: "நிச்சயமாக அல்லாஹ் இவ்விரண்டையும் நிராகரிப்பவர்கள் மீது தடுத்து விட்டான்" என்று கூறுவார்கள்.

9:20. எவர்கள் நம்பிக்கை கொண்டு ஹிஜ்ரத் செய்து, தங்களுடைய செல்வங்களாலும், தங்களுடைய உயிர்களாலும் அல்லாஹ்வின் பாதையில் அறப்போர் செய்தார்களோ, அவர்கள் அல்லாஹ்விடம் பதவியால் மகத்தானவர்கள்; மேலும், அவர்கள்தாம் வெற்றியாளர்கள்.

9:21. அவர்களுக்கு அவர்களுடைய இறைவன் தன்னுடைய கிருபையையும், பொருத்தத்தையும் (அளித்து) சுவர்க்கபதிகளையும் கொண்டு நன்மாராயம் கூறுகிறான்; அவற்றில் அவர்களுக்கு நிரந்தரமான பாக்கியமுண்டு.

9:72. நம்பிக்கை கொண்ட ஆண்களுக்கும், நம்பிக்கை கொண்ட பெண்களுக்கும் அல்லாஹ் சுவனபதிகளை வாக்களித்துள்ளான்: அவற்றின் கீழே ஆறுகள் ஓடிக்கொண்டிருக்கின்றன; அவற்றில் அவர்கள் நிரந்தரமாக இருப்பார்கள்; (அந்த) நித்திய சுவனபதிகளில் தூய்மையான குடியிருப்புகளையும் (அவன் வாக்களித்துள்ளான்); அல்லாஹ்வின் திருப்திதான் மிகப்பெரியது; அதுதான் மகத்தான வெற்றி.

9:89. அவர்களுக்காக அல்லாஹ் சுவர்க்கபதிகளைச் சித்தம் செய்து வைத்திருக்கின்றான்; அவற்றின் கீழ் ஆறுகள் ஓடிக்கொண்டிருக்கின்றன. அவற்றில் அவர்கள் நிரந்தரமாக இருப்பார்கள்; இதுவே மகத்தான வெற்றியாகும்.

9:100. இன்னும், முஹாஜிர்களிலும், அன்ஸார்களிலும், முதலாவதாக (நம்பிக்கை கொள்வதில்) முந்திக் கொண்டவர்களும், அவர்களை நற்செயலில் பின்தொடர்ந்தவர்களும் இருக்கின்றார்களே - அவர்களை, அல்லாஹ் பொருந்திக்கொண்டான்; அவர்களும் அவனைப் பொருந்திக்கொண்டனர்; அன்றியும், அவர்களுக்காக சுவனபதிகளைச் சித்தப்படுத்தியிருக்கின்றான்; அவற்றின் கீழே ஆறுகள் ஓடிக்கொண்டிருக்கும்; அவர்கள் அதில் என்றென்றும் நிரந்தரமாகத் தங்கியிருப்பார்கள்; இதுவே, மகத்தான வெற்றியாகும்.

9:111. நிச்சயமாக அல்லாஹ் நம்பிக்கையாளர்களிடமிருந்து அவர்களுடைய உயிர்களையும், அவர்களுடைய பொருட்களையும் - நிச்சயமாக அவர்களுக்கு 'சுவனம்' இருக்கிறது என்பதற்குப் பகரமாக விலைக்கு வாங்கிக்கொண்டான்; அவர்கள் அல்லாஹ்வின் பாதையில் போரிடுவார்கள்; அப்போது, அவர்கள் (எதிரிகளை) வெட்டுகிறார்கள்; (எதிரிகளால்) அவர்களும் வெட்டப்படுகிறார்கள்; (இது) தவ்ராத்திலும், இன்ஜீலிலும், குர்ஆனிலும் அவன் தன் மீது கடமையாக்கிக் கொண்ட வாக்குறுதி; அல்லாஹ்வைவிட வாக்குறுதியைப் பூரணமாக நிறைவேற்றுபவர் யார்? ஆகவே, நீங்கள் அவனுடன் செய்துகொண்ட உங்களுடைய இவ்வாணிபத்தைப்பற்றி மகிழ்ச்சி அடையுங்கள்; இதுவே, மகத்தான வெற்றியாகும்.

10:9. நிச்சயமாக எவர்கள் நம்பிக்கை கொண்டு, நற்செயல்கள் செய்கிறார்களோ, அவர்களுக்கு அவர்களுடைய இறைவன் அவர்கள் நம்பிக்கை கொண்ட காரணத்தினால் நேர்வழி காட்டுவான்; இன்பமயமான சுவர்க்கபதிகளில் அவர்களுக்குக் கீழ் நதிகள் ஓடிக்கொண்டிருக்கும்.

10:26. நன்மை புரிந்தோருக்கு (உரிய கூலி) நன்மையும் மேலும் அதைவிட அதிகமும் கிடைக்கும்; அவர்களின் முகங்களை இருளோ, இழிவோ சூழ்ந்துகொள்ளாது; அவர்கள்தாம் சுவர்க்கபதிக்கு உரியவர்கள்; அதிலேயே அவர்கள் நிரந்தரமாகத் தங்கியிருப்பார்கள்.

11:23. நிச்சயமாக எவர்கள் நம்பிக்கை கொண்டு, நற்செயல்கள் செய்து, இன்னும் தங்கள் இறைவனுக்கு (முற்றிலும்) அடிபணிந்தார்களோ அவர்களே சுவர்க்கபதிக்குரியவர்கள்; அவர்கள் அதில் நிரந்தரமாக இருப்பார்கள்.

11:108. நற்பாக்கியமடைந்தவர்கள் சுவர்க்கபதியில் இருப்பார்கள்; உம் இறைவன் நாடினாலன்றி, வானங்களும் பூமியும் நிலைத்திருக்கும் காலமெல்லாம் அவர்கள் அச்சுவர்க்கத்திலேயே நிரந்தரமாக இருப்பார்கள்: (இது) முடிவுறாத அருட்கொடையாக (அவர்களுக்கு வழங்கப்படும்).

13:23. நிலையான (அந்த) சுவர்க்கப் பதிகளாகும்; அதில் இவர்களும், இவர்களுடைய பெற்றோரில், இவர்களுடைய மனைவிமார்களில், இவர்களுடைய சந்ததியினரில், யார் நல்லவர்களாக இருந்தார்களோ அவர்களும் நுழைவார்கள்; வானவர்கள் ஒவ்வொரு வாயில் வழியாகவும் இவர்களிடம் நுழைவார்கள்.

13:35. இறையச்சமுடையவர்களுக்கு வாக்களிக்கப்பட்ட சுவர்க்கபதியின் தன்மையானது, அதன் கீழே நீர் அருவிகள் (என்றென்றும்) ஓடிக் கொண்டிருக்கும்; அதன் ஆகாரமும், அதன் நிழலும் நிலையானவை; இதுதான் (அல்லாஹ்வை) அஞ்சியோரின் முடிவாகும்: நிராகரிப்பாளர்களின் முடிவோ (நரக) நெருப்பேயாகும்.

14:23. இன்னும், எவர்கள் நம்பிக்கை கொண்டு, நற்செயல்கள் செய்கிறார்களோ அவர்கள் சுவனபதிகளில் புகுத்தப்படுவார்கள்; அவற்றின் கீழே ஆறுகள் ஓடிக்கொண்டிருக்கும்; தங்கள் இறைவனுடைய அனுமதியைக் கொண்டு அவர்கள் நிரந்தரமாக அவற்றில் தங்கியிருப்பார்கள்; அதில் அவர்களுடைய காணிக்கையாவது "(உங்கள் மீது) சாந்தி உண்டாகுக!" என்பதாகும்.

15:45. நிச்சயமாக இறையச்சமுடையவர்கள் சுவர்க்கபதிகளிலும், நீரூற்றுகளிலும் (சுகம் பெற்று) இருப்பார்கள்.

16:31. என்றென்றும் நிலைத்திருக்கக்கூடிய சுவனபதிகளில் அவர்கள் நுழைவார்கள்; அவற்றின் கீழே ஆறுகள் ஓடிக்கொண்டிருக்கும்; அவர்களுக்கு அங்கே அவர்கள் விரும்புவதெல்லாம் கிடைக்கும்; இவ்வாறே (தன்னை) அஞ்சுவோருக்கு அல்லாஹ் (நற்)கூலியளிக்கின்றான்.

16:32. (நிராகரிப்பை விட்டும்) தூயவர்களாக இருக்கும் நிலையில் வானவர்கள் அவர்(களுடைய உயிர்)களைக் கைப்பற்றுவார்கள்; அவர்களிடம்: "ஸலாமுன் அலைக்கும் (உங்கள் மீது சாந்தி உண்டாவதாக!); நீங்கள் செய்துகொண்டிருந்த (நற்) செயல்களுக்காக சுவனபதியில் நுழையுங்கள்" என்று அவர்கள் (அம்மலக்குகள்) சொல்வார்கள்.

18:31. இத்தகையோர் - அவர்களுக்கு நிலையான தங்கியிருக்கக்கூடிய சுவனபதிகள் உண்டு; அவர்களுக்குக் கீழே ஆறுகள் ஓடிக்கொண்டிருக்கும்; அவர்களுக்கு அங்கு பொன்னாலாகிய கடகங்கள் அணிவிக்கப்படும்; ஸுன்துஸு, இஸ்தப்ரக் போன்ற பச்சைநிற பூம்பட்டாடைகளை அவர்கள் அணிந்திருப்பார்கள்; அங்குள்ள உயர்ந்த ஆசனங்களின்மீது சாய்(ந்து மகிழ்)ந்து இருப்பார்கள்; (அவர்களுடைய) நற்கூலி மிகவும் பாக்கியமிக்கதாயிற்று; (அவர்கள்) இளைப்பாறுமிடமும் மிக அழகியதாயிற்று.

18:107. நிச்சயமாக எவர்கள் நம்பிக்கை கொண்டு நற்செயல்களைச் செய்கிறார்களோ அவர்கள் (விருந்துக்கு) இறங்கும் இடமாக ஃபிர்தவ்ஸ் என்னும் சுவர்க்கபதிகள் இருக்கும்.

19:60. (எனினும்) எவர் பாவமன்னிப்புக் கோரி, நம்பிக்கை கொண்டு, நற்செயலைச் செய்தாரோ அவரைத் தவிர - அத்தகையவர்கள் சுவர்க்கத்தில் பிரவேசிப்பார்கள்; (அவர்கள் அடைய வேண்டிய நற்பயன்) எதிலும் அவர்கள் சிறிதும் அநீதி இழைக்கப்பட மாட்டார்கள்.

19:61. நிலையான சொர்க்கங்களில் (அவர்கள் பிரவேசிப்பார்கள்); அது எத்தகையதென்றால், அளவற்ற அருளாளன், தன் அடியார்களுக்கு (அவை) மறைவாக இருக்கும் நிலையில் வாக்களித்துள்ளான்; நிச்சயமாக அவனுடைய வாக்குறுதி நிறைவேற்றப்படக்கூடியதாகும்.

19:63. இத்தகைய சுவர்க்கத்திற்கு நம் அடியார்களில் (நம்மை) அஞ்சுவோரை நாம் வாரிசாக்கி விடுவோம்.

20:76. (அத்தகையவர்களுக்கு) என்றென்றும் நிலைத்திருக்கும் சுவனபதிகள் உண்டு; அவற்றின் கீழே ஆறுகள் ஓடிக் கொண்டிருக்கும்; அவற்றில் அவர்கள் நிரந்தரமாக இருப்பார்கள்; இதுவே, (பாவங்கள் நீங்கித்) தூய்மையானவரின் (நற்) கூலியாகும்.

20:117. அப்பொழுது, "ஆதமே! நிச்சயமாக இவன் உமக்கும், உம்முடைய மனைவிக்கும் பகைவனாவான்; ஆதலால், உங்களிருவரையும் இச்சுவர்க்கத்திலிருந்து திட்டமாக அவன் வெளியேற்றிவிட (இடமளிக்க) வேண்டாம்; இல்லையேல், நீர் பெரும் இன்னலுக்குள்ளாவீர்" என்று நாம் கூறினோம்.

20:121. பின்னர், (இப்லீஸின் ஆசை வார்த்தைப்படி) அவ்விருவரும் அம் மரத்தினின்று புசித்தனர்; உடனே, அவ்விருவரின் வெட்கத்தலங்களும் வெளியாயின; ஆகவே, அவ்விருவரும் சுவர்க்கத்துச் சோலையின் இலையைக் கொண்டு அவற்றை மறைத்துக் கொள்ளலானார்கள்; இவ்வாறு ஆதம் தம்முடைய இறைவனுக்கு மாறுசெய்து, அதனால் வழிபிசகிவிட்டார்.

22:14. நிச்சயமாக அல்லாஹ் நம்பிக்கை கொண்டு நற்செயல்கள் செய்பவர்களைச் சுவனபதிகளில் பிரவேசிக்கச் செய்கிறான்; அவற்றின் கீழே ஆறுகள் ஓடிக்கொண்டிருக்கும்; நிச்சயமாக அல்லாஹ், தான் நாடுவதைச் செய்கிறான்.

22:19. (நம்பிக்கையாளர்களும் நிராகரிப்பாளர்களுமான) இருதரப்பாரும் தம் இறைவனைப் பற்றித் தர்க்கிக்கின்றனர்; ஆனால், எவர்கள் (அல்லாஹ்வை) நிராகரிக்கிறார்களோ அவர்களுக்கு நெருப்பிலிருந்து ஆடைகள் தயாரிக்கப்பட்டுள்ளன; கொதிக்கும் நீர் அவர்களுடைய தலைகளின் மேல் ஊற்றப்படும்.

22:23. நம்பிக்கை கொண்டு நற்செயல்கள் செய்கிறார்களோ, அவர்களை நிச்சயமாக அல்லாஹ் சுவனபதிகளிலே புகுத்துவான்; அவற்றின் கீழே ஆறுகள் ஓடிக்கொண்டேயிருக்கும்; அங்கே பொன்னாலான கடகங்களும், முத்து (ஆபரணமும்) கொண்டு அவர்கள் அணிவிக்கப்படுவார்கள்; அங்கு அவர்களுடைய ஆடைகளும் பட்டாக இருக்கும்.

22:56. அந்நாளில், ஆட்சி (அனைத்தும்) அல்லாஹ்வுக்கே உரியது; அவன் அவர்களுக்கிடையில் தீர்ப்பு வழங்குவான்; ஆகவே, நம்பிக்கை கொண்டு நற்செயல்களைச் செய்தவர்கள் பாக்கியம் மிக்க சுவனபதிகளில் இருப்பார்கள்.

25:10. (நபியே! இந்நிராகரிப்போர் சொல்வதைவிட) மேலான சுவர்க்க(த் தோட்ட)ங்களை அவன் நாடினால் உமக்காக உண்டாக்குவானே. அவன் பாக்கியம்மிக்கவன்; அவற்றின் கீழே ஆறுகள் சதா ஓடிக்கொண்டிருக்கும்; இன்னும், உமக்காக (அங்கு) மாளிகைகளையும் அவன் உண்டாக்குவான்.

25:15. "அத்தகைய நரகமானது நல்லதா? அல்லது இறையச்சமுடையவர்கள் வாக்களிக்கப்பட்டுள்ளார்களே அந்த நிலையான சுவர்க்கம் நல்லதா?" என்று (நபியே) நீர் கேட்பீராக! அது அவர்களுக்கு நற்கூலியாகவும் (அவர்கள்) போய்ச் சேருமிடமாகவும் இருக்கிறது.

25:24. அந்நாளில், சுவர்க்கவாசிகள் தங்குமிடத்தால் மேலானவர்களாகவும், சுகமனுபவிக்கும் இடத்தால் அழகானவர்களாகவும் இருப்பார்கள்.

26:85. "இன்னும், பாக்கியம் நிறைந்த சுவர்க்கபதியின் வாரிசுக்காரர்களில் (ஒருவனாக) என்னை நீ ஆக்கி வைப்பாயாக!"

26:90. "இறையச்சமுடையவர்களுக்கு சுவர்க்கபதி அருகில் கொண்டுவரப்படும்."

29:58. எவர்கள் நம்பிக்கை கொண்டு, நற்செயல்களைச் செய்கிறார்களோ அவர்களை, கீழே ஆறுகள் ஓடிக்கொண்டிருக்கும் சுவர்க்கபதியிலுள்ள உயர்ந்த மாளிகைகளில் நிச்சயமாக நாம் அமர்த்துவோம்; அவற்றில் அவர்கள் நிரந்தரமாக (நிலைத்து) இருப்பார்கள்; (இவ்வாறாக, நற்)செயல் புரிவோரின் கூலியும் பாக்கியம் மிக்கதாகவே உள்ளது.

30:15. ஆகவே, எவர்கள் நம்பிக்கை கொண்டு நற்செயல்களைச் செய்தார்களோ அவர்கள், (சுவர்க்கப்) பூங்காவில் மகிழ்விக்கப்படுவார்கள்.

31:8. நிச்சயமாக நம்பிக்கை கொண்டு நற்செயல்கள் செய்பவர்களுக்கு பாக்கியமுள்ள சுவர்க்கபதிகள் உண்டு.

35:33. அத்தகையவர்கள் நிலையான சுவனபதிகளில் புகுவார்கள்; அங்கே அவர்கள் பொன்னாலும் முத்தாலுமான கடகங்கள் அணிவிக்கப்படுவார்கள்; இன்னும், அங்கு அவர்களுடைய ஆடைகள் பட்டாலானவையாக இருக்கும்.

36:26. (ஆனால், செவிசாய்க்காது அவரைக் கொன்று விட்டனர்): "நீர் சுவர்க்கத்தில் பிரவேசிப்பீராக!" என்று (அவரிடம்) கூறப்பட்டது. "என்னுடைய சமூகத்தார் அறிந்துகொள்ள வேண்டுமே!" என்று அவர் கூறினார்.

36:55. அந்நாளில், நிச்சயமாக சுவர்க்கவாசிகள் (தங்கள்) அலுவலில் மகிழ்ச்சியுடையோராக இருப்பார்கள்.

37:43. இன்பம் அளிக்கும் சுவர்க்கங்களில்

38:50. 'அதன்' என்னும் சுவர்க்கத்தின் வாயில்கள் அவர்களுக்காகத் திறந்துவைக்கப்பட்டவையாக இருக்கும்.

39:73. தம் இறைவனுக்கு அஞ்சியவர்கள் கூட்டங்கூட்டமாக சுவர்க்கத்தின்பால் கொண்டு வரப்படுவார்கள்; அங்கு அவர்கள் வந்ததும், அதன் வாசல்கள் திறக்கப்படும்; அதன் காவலர்கள் அவர்களை நோக்கி: "உங்கள் மீது சாந்தி உண்டாகட்டும்; நீங்கள் மணம் பெற்றவர்கள்; எனவே, நிரந்தரமானவர்களாகத் தங்கியிருக்கும் நிலையில் அதில் பிரவேசியுங்கள்" என்று கூறுவார்கள்.

39:74. அதற்கு (சுவர்க்கவாசிகள்): "தன் வாக்குறுதியை எங்களுக்கு உண்மையாக்கிவைத்து, சுவர்க்கத்தில் நாம் விரும்பும் இடமெல்லாம் சென்றிருக்க (அப்)பூமியை எங்களுக்கு உரிமையாக்கி வைத்தானே அத்தகைய அல்லாஹ்வுக்கே எல்லாப் புகழும்" என்று அவர்கள் கூறுவார்கள்; எனவே, நன்மை செய்தோரின் கூலி (இவ்வாறு) நன்மையாகவே இருக்கிறது.

40:8. "எங்கள் இறைவனே! நீ அவர்களுக்கு வாக்களித்திருக்கும் நிலையான சுவர்க்கங்களில் அவர்களையும், அவர்கள் மூதாதையர்களிலும், அவர்கள் மனைவியர்களிலும், அவர்கள் சந்ததியர்களிலும் யார் நல்லோராகிவிட்டனரோ அவர்களையும் பிரவேசிக்கச் செய்வாயாக! நிச்சயமாக நீதான் (யாவரையும்) மிகைத்தவன்; ஞானம் மிக்கவன்."

41:30. நிச்சயமாக எவர்கள்: "எங்கள் இறைவன் அல்லாஹ்தான்" என்று கூறி, (அதன் மீது) உறுதியாக (நிலைத்து) நின்றார்களோ, அவர்கள் மீது வானவர்கள் இறங்கி "நீங்கள் பயப்படாதீர்கள்; கவலையும் படாதீர்கள்: நீங்கள் வாக்களிக்கப்பட்டுக் கொண்டிருந்த சுவர்க்கத்தைக் கொண்டு மகிழ்ச்சி பெறுங்கள்" (எனக் கூறுவார்கள்).

42:7. அவ்வாறே, நகரங்களின் தாய்க்கும் (மக்காவுக்கும்) அதனைச் சுற்றியுள்ளவர்களுக்கும்; நீர் அச்சமூட்டி எச்சரிப்பதற்காகவும், எவ்வித சந்தேகமுமின்றி (யாவரும்) ஒன்றுசேர்க்கப்படும் நாளைப்பற்றி எச்சரிப்பதற்காகவும், அரபிமொழியிலான இந்தக் குர்ஆனை நாம் உமக்கு வஹீ அறிவித்தோம்; ஒரு கூட்டம் சுவர்க்கத்திலும் ஒரு கூட்டம் நரகத்திலும் இருக்கும்.

42:22. (அந்நாளில்) அநியாயக்காரர்கள் தாங்கள் சம்பாதித்த (தீய)தைப் பற்றி பயந்து கொண்டிருப்பதை நீர் பார்ப்பீர்; ஆனால், அது அவர்கள் மீது நிகழவே செய்யும்; ஆனால், எவர்கள் நம்பிக்கை கொண்டு நற்செயல்களைச் செய்கிறார்களோ அவர்கள் சுவர்க்கப் பூங்காவனங்களில் இருப்பார்கள்; அவர்கள் விரும்பியது அவர்களுக்குத் தம் இறைவனிடம் கிடைக்கும்; அதுவே பேரருளாகும்.

43:70. "நீங்களும், உங்கள் மனைவியரும் மகிழ்விக்கப்படுபவர்களாகச் சுவர்க்கத்தில் நுழையுங்கள்" (என்று மறுமையில் அவர்களுக்குக் கூறப்படும்).

44:52. சுவனச்சோலைகளிலும், நீரூற்றுகளிலும் (இருப்பார்கள்).

46:16. இவர்கள் எத்தகையோரென்றால் சுவர்க்கவாசிகளில் உள்ளவர்களாக இருக்க, இவர்கள் செய்தவற்றில் அழகானவற்றை நாம் அங்கீகரித்துக் கொண்டு, இவர்களின் தீமைகளை மன்னித்து விடுவோம்; இவர்களுக்கு அளிக்கப்பட்டிருந்த வாக்குறுதி உண்மையான வாக்குறுதியாகும்.

47:6. மேலும், அவன் அவர்களுக்கு அறிவித்திருந்த சுவர்க்கத்தில் அவர்களைப் பிரவேசிக்கச் செய்வான்.

47:12. நிச்சயமாக அல்லாஹ் எவர்கள் நம்பிக்கை கொண்டு, நற்செயல்கள் செய்தார்களோ அவர்களைச் சுவர்க்கங்களில் பிரவேசிக்கச் செய்கிறான்; அவற்றின் கீழே ஆறுகள் ஓடிக் கொண்டிருக்கும்; ஆனால், நிராகரிப்பவர்களோ (இவ்வுலக சுகங்களை) அனுபவித்துக்கொண்டும், கால்நடைகள் (தீனி) தின்பதைப்போல் தின்று கொண்டும் இருக்கிறார்கள்; (நரக) நெருப்பே அவர்கள் தங்குமிடமாக இருக்கும்.

47:15. இறையச்சமுடையவர்களுக்கு வாக்களிக்கப்பட்டுள்ள சுவர்க்கத்தின் உதாரணமாவது: அதில் மாறுபடாத (தெளிந்த) நீரைக்கொண்ட ஆறுகளும், தன் சுவை மாறாத பாலாறுகளும், அருந்துவோருக்கு இன்பமளிக்கும் மதுரச ஆறுகளும், தெளிவான தேன் ஆறுகளும் இருக்கின்றன; இன்னும், அதில் அவர்களுக்கு எல்லாவிதமான கனிவகைகளும், தங்கள் இறைவனின் மன்னிப்பும் உண்டு. (இத்தகையோர்) நரகத்தில் எவன் நிரந்தரமாகத் தங்கியிருந்து, அவர்கள் கொதிக்கும் நீர் புகட்டப்பட்டு (அதனால்) அவர்களுடைய குடல்களெல்லாம் துண்டு துண்டாகிவிடுமோ அவனுக்கு ஒப்பாவாரா?

48:17. (ஆயினும், போருக்குச் செல்லாதது பற்றி) குருடர் மீதும் குற்றம் இல்லை; முடவர் மீதும் குற்றம் இல்லை; நோயாளி மீதும் குற்றம் இல்லை. அன்றியும், எவர் அல்லாஹ்வுக்கும், அவனுடைய தூதருக்கும் கட்டுப்படுகிறாரோ, அவரை (அல்லாஹ்) சுவர்க்கங்களில் பிரவேசிக்கச் செய்வான்; அவற்றின் கீழே ஆறுகள் ஓடிக்கொண்டிருக்கும். ஆனால், எவன் பின்வாங்குகின்றானோ, அவனை (அல்லாஹ்) நோவினைதரும் வேதனையாக வேதனை செய்வான்.

50:31. (அன்றியும், அந்நாளில்) இறையச்சமுடையவர்களுக்குச் சுவர்க்கம் தொலைவில்லாத நிலையில் மிகவும் சமீபமாக்கப்படும்.

51:15. நிச்சயமாக இறையச்சமுடையவர்கள் (சுவர்க்கத்தின்) சோலைகளிலும், நீரூற்றுகளிலும் இருப்பார்கள்.

53:15. அதன் சமீபத்தில்தான் 'ஜன்னத்துல் மஃவா' (எனும் சுவர்க்கம்) இருக்கிறது.

54:54. நிச்சயமாக இறையச்சமுடையவர்கள் சுவர்க்கச் சோலைகளிலும், (அவற்றிலுள்ள) ஆறுகளிலும் இருப்பார்கள்.

55:46. "தன் இறைவனின் முன் (விசாரணைக்காக மறுமையில்) நிற்க வேண்டும் என்பதைப் பயந்தவனுக்கு இரு சுவர்க்கச் சோலைகள் இருக்கின்றன."

55:54. அவர்கள் விரிப்புகளின் மீது சாய்ந்தவர்களாக இருப்பார்கள்; அவற்றின் உள்பாகங்கள் 'இஸ்தப்ரக்' என்னும் பட்டினாலுள்ளவை; மேலும், இரு சுவனச் சோலைகளில் பழங்கள் (கொய்வதற்கு) நெருங்கியிருக்கும்.

56:12. இவர்கள் பாக்கியங்களுள்ள (சுவர்க்கச்) சோலைகளில் இருப்பர்.

56:89. அவருக்குச் சுகமும், நல்லுணவும், இன்னும் பாக்கியமுள்ள சுவர்க்கமும் உண்டு.

57:12. நம்பிக்கையாளர்களான ஆண்களையும் நம்பிக்கையாளர்களான பெண்களையும் நீர் பார்க்கும் நாளில் அவர்களுடைய பிரகாசம் அவர்களுக்கு முன்னாலும், அவர்களுக்கு வலப்புறத்திலும் விரைந்து கொண்டிருக்கும். (அப்போது அவர்களை நோக்கி:) "இன்று உங்களுக்கு நன்மாராயமாவது சுவர்க்கத்துச் சோலைகளாகும்; அவற்றின் கீழே ஆறுகள் ஓடிக் கொண்டிருக்கும்; அவற்றில் நீங்கள் நிரந்தரமாக இருப்பவர்கள்; இதுதான் மகத்தான வெற்றியாகும்" (என்று கூறப்படும்).

57:21. உங்கள் இறைவனின் மன்னிப்பிற்கும் சுவர்க்கத்திற்கும் நீங்கள் முந்துங்கள்; அ(ச்சுவர்க்கத்)தின் பரப்பு வானம் மற்றும் பூமியின் பரப்பைப் போன்றதாகும்; எவர்கள் அல்லாஹ்வின் மீதும், அவன் தூதர்கள் மீதும் நம்பிக்கை கொண்டார்களோ, அவர்களுக்கு அது சித்தம் செய்துவைக்கப்பட்டிருக்கிறது; அது அல்லாஹ்வுடைய அருளாகும்; அதனை அவன் நாடியவருக்கு அளிக்கின்றான்; இன்னும், அல்லாஹ் மகத்தான கிருபையுடையவன்.

58:22. அல்லாஹ்வையும் இறுதிநாளையும் நம்பும் சமூகத்தினர், அல்லாஹ்வையும் அவனது தூதரையும் பகைத்துக்கொண்டவர்களை நேசிப்பவர்களாக (நபியே!) நீர் காணமாட்டீர்; அவர்கள் தங்கள் பெற்றோராயினும் தங்கள் புதல்வர்களாயினும் தங்கள் சகோதரர்களாயினும் தங்கள் குடும்பத்தினராயினும் சரியே; (ஏனெனில்,) அத்தகையவர்களின் இதயங்களில், (அல்லாஹ்) நம்பிக்கையை எழுதி(ப் பதித்து) விட்டான்; மேலும், அவன் தன்னிடமிருந்து (அருள் என்னும்) ஆன்மாவைக்கொண்டு பலப்படுத்தியிருக்கிறான்; சுவர்க்கச் சோலைகளில் அவர்களைப் பிரவேசிக்கச் செய்வான்; அவற்றின் கீழே ஆறுகள் ஓடிக் கொண்டு இருக்கும்: அவற்றில் அவர்கள் நிரந்தரமாக(த் தங்கி) இருப்பவர்கள்; அல்லாஹ் அவர்களைப் பொருந்திக்கொண்டான்; அவர்களும் அவனைப் பொருந்திக்கொண்டார்கள்; அவர்கள்தாம் அல்லாஹ்வின் கூட்டத்தினர்; அறிந்து கொள்க! நிச்சயமாக அல்லாஹ்வின் கூட்டத்தினர்தாம் வெற்றி பெறுபவர்கள்.

59:20. நரகவாசிகளும், சுவர்க்கவாசிகளும் சமமாக மாட்டார்கள்; சுவர்க்கவாசிகளே வெற்றியாளர்கள் ஆவார்கள்.

61:12. அவன் உங்களுக்கு உங்கள் பாவங்களை மன்னிப்பான்; சுவர்க்கப் பதிகளில் உங்களைப் பிரவேசிக்கச் செய்வான்: அவற்றின் கீழே ஆறுகள் ஓடிக்கொண்டிருக்கும்; அன்றியும், நிலையான சுவர்க்கச் சோலைகளில் (உள்ள) நல்ல இருப்பிடங்களிலும் (உங்களைப் பிரவேசிக்கச் செய்வான்) அதுவே மகத்தான வெற்றியாகும்.

64:9. ஒன்று திரட்டும் (மறுமை) நாளுக்காக அவன் உங்களை ஒன்றுதிரட்டும் நாள் அதுவே, (தீயோரை) நஷ்டப்படுத்தும் நாளாகும்; ஆனால், எவர் அல்லாஹ்வின் மீது நம்பிக்கை கொண்டு நற்செயலைச் செய்கிறாரோ, அவருடைய பாவங்களை அவரைவிட்டும் நீக்கி, ஆறுகள் அவற்றின் கீழே ஓடிக்கொண்டிருக்கும் சுவர்க்கச் சோலைகளிலும் அவன் அவரை பிரவேசிக்கச் செய்வான்; அவற்றில் என்றென்றும் நிரந்தரமாக இருப்பார்கள்; இது மகத்தான வெற்றியாகும்.

65:11. அன்றியும், ஒரு தூதரையும் (அவன் அனுப்பி வைத்தான்); அவர் அல்லாஹ்வுடைய தெளிவான வசனங்களை உங்களுக்கு ஓதிக்காண்பிக்கிறார்; நம்பிக்கை கொண்டு நற்செயல்கள் செய்பவர்களை இருள்களிலிருந்து, ஒளியின் பக்கம் கொண்டு வருவதற்காக; மேலும், எவர் அல்லாஹ்வின் மீது நம்பிக்கை கொண்டு நற்செயல் செய்கின்றாரோ அவரை அல்லாஹ் சுவனச் சோலைகளில் பிரவேசிக்கச் செய்கிறான்; அவற்றின் கீழே ஆறுகள் ஓடிக்கொண்டிருக்கின்றன; அவற்றில் அவர்கள் என்றென்றும் நிரந்தரமாக இருப்பார்கள்; அல்லாஹ் அவருக்காக திடமாக உணவை அழகாக்கினான்.

66:8. நம்பிக்கை கொண்டவர்களே! கலப்பற்ற முறையில் நீங்கள் அல்லாஹ்விடம் (தவ்பா செய்து) பாவமன்னிப்புப் பெறுங்கள்; உங்கள் இறைவன் உங்கள் பாவங்களை உங்களை விட்டுப் போக்கி, உங்களைச் சுவனச் சோலைகளில் பிரவேசிக்கச் செய்வான்; அவற்றின் கீழே ஆறுகள் (சதா) ஓடிக் கொண்டே இருக்கும்; (தன்) நபியையும் அவருடன் நம்பிக்கை கொண்டார்களே அவர்களையும் அந்நாளில் அல்லாஹ் இழிவுபடுத்தமாட்டான்; (அன்று ஈடேற்றம் பெற்ற) அவர்களுடைய பிரகாசம் அவர்களுக்கு முன்னும், அவர்களுடைய வலப்புறத்திலும் விரைந்துகொண்டிருக்கும்; அவர்கள் "எங்கள் இறைவா! எங்களுக்கு, எங்களுடைய பிரகாசத்தை நீ முழுமையாக்கி வைப்பாயாக! எங்களுக்கு மன்னிப்பும் அருள்வாயாக! நிச்சயமாக நீ எல்லாப் பொருட்கள் மீதும் பேராற்றலுடையவன்" என்று கூறி(ப் பிரார்த்தனை செய்து)கொண்டு இருப்பார்கள்.

66:11. மேலும், நம்பிக்கை கொண்டவர்களுக்கு ஃபிர்அவ்னின் மனைவியை அல்லாஹ் உதாரணமாகக் கூறுகிறான்; அவர் "இறைவா! எனக்காக உன்னிடத்தில், சுவர்க்கத்தில் ஒரு வீட்டைக் கட்டித்தருவாயாக! இன்னும், ஃபிர்அவ்னை விட்டும் அவன் செயலைவிட்டும் என்னைக் காப்பாற்றுவாயாக! இன்னும், அநியாயக்கார சமூகத்தாரிடமிருந்தும் என்னைக் காப்பாற்றுவாயாக!" என்று (பிரார்த்தித்துக்) கூறினார்.

68:43. அவர்களுடைய பார்வைகள் கீழ் நோக்கியவையாக இருக்கும் நிலையில் இழிவு அவர்களை மூடிக்கொள்ளும்; அவர்களோ (உலகில்) திடமாக இருந்தபோது, ஸுஜூது செய்யுமாறு அழைக்கப்பட்டுக் கொண்டுதான் இருந்தனர். (ஆனால், அப்போது அலட்சியமாக இருந்தனர்.)

69:22. உயர்ந்த சுவர்க்கத்தில் இருப்பார்.

70:35. (ஆக) இத்தகையோர் தாம் சுவர்க்கங்களில் கண்ணியப்படுத்தப்பட்டவர்களாக இருப்பார்கள்.

70:38. அவர்களில் ஒவ்வொரு மனிதனும் பாக்கியமுள்ள சுவர்க்கத்தில் புகுத்தப்பட வேண்டுமென ஆசைப்படுகிறானா?

74:40. (அவர்கள்) சுவர்க்கச் சோலைகளில் (இருப்பார்கள்; எனினும்) விசாரித்தும் கொள்வார்கள்.

76:12. மேலும், அவர்கள் பொறுமையுடன் இருந்ததற்காக அவர்களுக்குச் சுவர்க்கத்தையும், பட்டாடையையும் அவன் (நற்)கூலியாகக் கொடுத்தான்.

79:41. நிச்சயமாக (அவனுக்குச்) சுவர்க்கம் அதுதான் தங்குமிடமாகும்.

81:13. சுவர்க்கம் சமீபமாகக் கொண்டுவரப்படும் போது,

85:11. ஆனால், எவர்கள் நம்பிக்கை கொண்டு, நற்செயல்களைச் செய்தார்களோ, அவர்களுக்குச் சுவர்க்கச் சோலைகள் உண்டு; அவற்றின் கீழ் நதிகள் ஓடிக்கொண்டிருக்கும்; அதுவே மாபெரும் வெற்றியாகும்.

88:10. உன்னதமான சுவர்க்கச் சோலையில்

89:30. மேலும், "நீ என் சுவர்க்கத்தில் பிரவேசிப்பாயாக!" (என்று இறைவன் கூறுவான்).

98:8. அவர்களுடைய (நற்)கூலி அவர்களுடைய இறைவனிடத்திலுள்ள நிலையான சுவர்க்கச் சோலைகளாகும்; அவற்றின் கீழே ஆறுகள் ஓடிக்கொண்டிருக்கும்; அவற்றில் அவர்கள் என்றென்றும் நிரந்தரமாகத் தங்கியிருப்பார்கள்; அல்லாஹ்வும் அவர்களைப் பற்றித் திருப்தி அடைந்தான்; அவர்களும் அவனைப் பற்றித் திருப்தி அடைவார்கள்; அது, எவர் தம் இறைவனுக்குப் பயப்படுகிறாரோ அவருக்கு உரியதாகும்.