6:25. அவர்களில் சிலர் உம் பேச்சைக் கேட்பது போல் பாவனை செய்கின்றனர்; நாம் அவர்களுடைய உள்ளங்களில் அதை விளங்கிக் கொள்ளாது இருக்குமாறு திரைகளையும், இன்னும் அவர்கள் காதுகளில் செவிட்டுத் தன்மையையும் ஏற்படுத்தினோம்; இன்னும், அவர்கள் எல்லா அத்தாட்சிகளைப் பார்த்தாலும் அவற்றை நம்பமாட்டார்கள்; இன்னும், இவர்கள் உம்மிடம் வந்தால் உம்மோடு வாதாடுவார்கள்; "இவையெல்லாம் முன்னோர்களின் கட்டுக் கதைகளேயன்றி வேறில்லை" என்று இந்த நிராகரிப்போர் கூறுவார்கள்.

17:46. இன்னும், அவர்கள் அதனை விளங்கிக்கொள்வதைவிட்டும் அவர்களுடைய இதயங்களின் மீது மூடிகளையும், அவர்களுடைய காதுகளின் மீது செவிட்டுத்தனத்தையும் நாம் அமைத்துவிடுகிறோம்; இன்னும், குர்ஆனில் உம்முடைய இறைவன் ஒருவனைமட்டும் நீர் குறிப்பிடும்போது, அவர்கள் வெறுப்படைந்து தம் பின்புறங்களில் (திரும்பி வெருண்டவர்களாகப்) பின்வாங்கிவிடுகிறார்கள்.

18:57. எவன் தன் இறைவனுடைய வசனங்களைக் கொண்டு உபதேசிக்கப்பட்டும், அவற்றைப் புறக்கணித்துத் தன்னிரு கரங்களும் முற்படுத்திய (தீமையான)வற்றை மறந்துவிடுகிறானோ, அவனைவிடப் பெரிய அக்கிரமக்காரன் எவன் இருக்கிறான்? நிச்சயமாக நாம் அவர்களுடைய இதயங்களின் மீது, இதை விளங்கிக்கொள்ளாதவாறு திரைகளையும், அவர்களுடைய செவிகளில் செவிட்டுத்தனத்தையும் ஏற்படுத்தியிருக்கிறோம்; ஆதலால், நீர் அவர்களை நேர்வழியின்பால் அழைத்தாலும், அவர்கள் ஒருபோதும் நேர்வழி அடையமாட்டார்கள்.

31:7. அத்தகையவனுக்கு நம்முடைய வசனங்கள் ஓதிக் காண்பிக்கப்பட்டால், அவன் அவற்றைக் கேட்காதவனைப்போல் - அவன் தன் இரு காதுகளிலும் செவிட்டுத்தனம் இருப்பதுபோல் பெருமைகொண்டவனாகத் திரும்பிவிடுகிறான்; ஆகவே, அவனுக்கு நோவினை செய்யும் வேதனையுண்டென்று (நபியே!) நீர் நற்செய்தி கூறுவீராக!

41:44. நாம் இதை (குர்ஆனை) அரபியல்லாத வேறு மொழியில் ஆக்கியிருந்தால்: "இதன் வசனங்கள் தெளிவாக விளக்கப்பட்டிருக்கக் கூடாதா? (வேதம்) அரபியல்லாத (மொழியுடைய)தும், (தூதர்) அரபியருமா?" என்று அவர்கள் கூறியிருப்பார்கள். "இது நம்பிக்கை கொண்டவர்களுக்கு ஒரு வழிகாட்டியும், (அரு) மருந்துமாகும்" என்று கூறுவீராக! ஆனால், நம்பிக்கை கொள்ளாதவர்களுக்கு, அவர்களுடைய காதுகளில் செவிட்டுத்தன்மை இருக்கிறது; இன்னும், இது அவர்கள் மீது (-அவர்கள் விஷயத்தில்) குருட்டுத்தனமாகவும் இருக்கிறது. எனவே, அவர்கள் வெகு தொலைவான இடத்திலிருந்து அழைக்கப்படுபவர்கள் (போல் இருக்கின்றனர்).