2:48. இன்னும், ஓர் ஆத்மா மற்றொரு ஆத்மாவிற்குச் சிறிதும் பயன்பட முடியாத (அந்த) ஒரு நாளை நீங்கள் அஞ்சுவீர்களாக! (அந்த நாளில்) எந்தப் பரிந்துரையும் அதற்காக ஏற்றுக்கொள்ளப்படமாட்டாது; அதற்காக எந்த ஈடும் பெற்றுக்கொள்ளப்படமாட்டாது; அன்றியும், அவர்கள் உதவி செய்யப்படவும் மாட்டார்கள்.

2:123. இன்னும், (வரப்போகும்) அந்நாளிலிருந்து உங்களைக் காப்பாற்றிக்கொள்ளுங்கள்; அன்று, ஓர் ஆத்மா பிறிதோர் ஆத்மாவுக்கு எவ்விதப் பலனுமளிக்காது; அதனிடமிருந்து (அதன் பாவங்களுக்குப் பரிகாரமாக) எந்த நஷ்டஈடும் ஒப்புக்கொள்ளப்படமாட்டாது; எந்தப் பரிந்துரையும் அதற்குப் பலனளிக்காது; அவர்கள் (எவர் மூலமாகவும் எந்த) உதவியும் செய்யப்பட மாட்டார்கள்.

2:254. நம்பிக்கை கொண்டோரே! பேரமும், நட்பும், பரிந்துரையும் இல்லாத அந்த (இறுதித் தீர்ப்பு) நாள் வருவதற்கு முன்னர், நாம் உங்களுக்கு அளித்தவற்றிலிருந்து (நல்வழிகளில்) செலவு செய்யுங்கள்; இன்னும், நிராகரிப்பாளர்கள் - அவர்கள்தாம் அநியாயக்காரர்கள்.

4:85. எவரேனும் ஒரு நன்மைக்குப் பரிந்துரை செய்தால், அதில் ஒரு பாகம் அவருக்கும் உண்டு; (அவ்வாறே) எவரேனும் ஒரு தீமைக்குப் பரிந்துரை செய்தால், அதிலிருந்து அவருக்கும் ஒரு பாகமுண்டு; அல்லாஹ் எல்லாப் பொருட்களையும் கண்காணிப்பவனாக இருக்கின்றான்.

6:70. (நபியே!) யார் தங்கள் மார்க்கத்தை விளையாட்டாகவும், வெறும் வேடிக்கையாகவும் எடுத்துக்கொண்டார்களோ; இன்னும், யாரை இவ்வுலக வாழ்க்கை ஏமாற்றிவிட்டதோ அவர்களை விட்டுவிடும்; எனினும், ஒவ்வொரு ஆத்மாவும் அது சம்பாதித்துக்கொண்ட (தீய)தின் காரணமாக (வேதனையினால்) பிடிக்கப்படாமல் இருப்பதற்காக, நீர் (குர்ஆனாகிய) இதன் மூலம் அறிவுரை கூறுவீராக! (அந்நாளில்) அதற்கு அல்லாஹ்வைத் தவிர வேறு பாதுகாவலரோ, பரிந்து பேசுபவரோ இல்லை; இன்னும், (தான் செய்த பாவத்திற்கு) ஈடாக அது (தன்னால் இயன்ற) அத்தனையும் கொடுத்தாலும், அதனிடமிருந்து பெற்றுக்கொள்ளப்பட மாட்டாது. அத்தகையோர் - அவர்கள் தாங்கள் சம்பாதித்தவைகளின் காரணமாக தண்டனையில் பிடிக்கப்பட்டுவிட்டனர். அவர்கள் நிராகரித்துக்கொண்டிருந்த காரணத்தால் அவர்களுக்குக் கொதிக்கும் பானமும், துன்புறுத்தும் வேதனையுமுண்டு.

6:94. அன்றியும், (மறுமையில் அல்லாஹ் இவர்களை நோக்கி), "நாம் உங்களை முதல் முறையாகப் படைத்தோமே அதுபோன்று, நீங்கள் (எதுவும் இல்லாமல்) தனியே எம்மிடம் வந்துவிட்டீர்கள்; இன்னும், நாம் உங்களுக்கு அளித்தவற்றையெல்லாம் உங்கள் முதுகுகளுக்குப் பின்னால் விட்டுவிட்டீர்கள்; நிச்சயமாக எவர்கள் உங்களில் கூட்டாளிகள் என்று எண்ணிக் கொண்டிருந்தீர்களோ, அத்தகைய உங்களுடைய பரிந்துரையாளர்களை உங்களுடன் நாம் காணவில்லையே? உங்களுக்கிடையே (உறவுகள்) முறிந்துவிட்டன; இன்னும், நீங்கள் கற்பனை செய்துகொண்டிருந்தவை உங்களைவிட்டும் மறைந்துவிட்டன" (என்று கூறுவான்).

7:53. இவர்கள் (தங்களுக்கு எச்சரிக்கை செய்யப்பட்டு வந்த) அதன் முடிவைத் தவிர (வேறு எதையும்) எதிர்பார்க்கிறார்களா? அதன் முடிவு (வெளிப்பட்டு) வரும் நாளில், இதற்கு முன் அதனை (முற்றிலும்) மறந்திருந்தவர்கள், "நிச்சயமாக எங்கள் இறைவனின் தூதர்கள் சத்தியத்தையே கொண்டு வந்தனர்: எங்களுக்குப் பரிந்து பேசக்கூடியவர்கள் எவரும் இருக்கின்றனரா? அவ்வாறாயின், அவர்கள் எங்களுக்காகப் பரிந்து பேசட்டும்; அல்லது நாங்கள் (உலகத்திற்குத்) திருப்பி அனுப்பப்படுவோமா? அப்படியாயின், நாங்கள் (முன்) செய்து கொண்டிருந்தோமே அது அல்லாத (நன்மையான)தைச் செய்வோம்!" என்று கூறுவார்கள். நிச்சயமாக அவர்கள் தமக்குத் தாமே நஷ்டத்தை ஏற்படுத்திக் கொண்டார்கள்: அவர்கள் (பொய்யாகக்) கற்பனை செய்து கொண்டிருந்தவையும் அவர்களை விட்டும் மறைந்துவிடும்.

10:3. நிச்சயமாக உங்கள் இறைவன் அல்லாஹ்வே: அவன் வானங்களையும், பூமியையும் ஆறு நாட்களில் படைத்தான்; பின்னர், (தன் கண்ணியத்திற்குத் தக்கவாறும், மகத்துவத்திற்குரியவாறும் அர்ஷின் மீதிருப்பது அவனுக்கு எவ்வாறு தகுமோ அவ்வாறே) அவன் அர்ஷின் (அரியாசனத்தின்) மீது நிலையானான்; (இவை சம்பந்தப்பட்ட) அனைத்துக் காரியங்களையும் அவனே ஒழுங்குபடுத்துகின்றான்; அவனுடைய அனுமதிக்குப் பின்னரேயன்றி, (அவனிடம்) பரிந்து பேசுபவர் எவருமில்லை; அவன்தான் (உங்களைப் படைத்துப் பரிபக்குவப்படுத்தும்) உங்களுடைய இறைவனாகிய அல்லாஹ்; ஆகவே, அவனையே வணங்குங்கள்: நீங்கள் சிந்திக்கவேண்டாமா?

19:87. அளவற்ற அருளாளனிடம் உடன்படிக்கை செய்துகொண்டோரைத் தவிர, எவரும் பரிந்துரை செய்ய அதிகாரம் பெறமாட்டார்கள்.

21:28. அவர்களுக்கு முன்னால் இருப்பவற்றையும் அவர்களுக்குப் பின்னால் இருப்பவற்றையும் அவன் நன்கறிவான்; இன்னும், எவரை அவன் பொருந்திக்கொள்கிறானோ அ(த்தகைய)வருக்கன்றி, (வேறு எவருக்கும்) அவர்கள் பரிந்து பேசமாட்டார்கள்; இன்னும், அவர்கள் அவன்பால் உள்ள அச்சத்தால் நடுங்குபவர்களாகவும் இருக்கின்றார்கள்.

26:100. "ஆகவே, எங்களுக்காகப் பரிந்து பேசுவோர் (இன்று) எவருமில்லை."

30:13. இன்னும், அவர்களுடைய இணையாளர்களிலிருந்து பரிந்துரைப்பவர்கள் எவரும் (மறுமையில்) அவர்களுக்கு இருக்கமாட்டார்கள்; மேலும், அவர்கள் தாங்கள் இணையாக்கியவர்களை நிராகரிப்போராகிவிடுவார்கள்.

32:4. அல்லாஹ்தான் வானங்களையும், பூமியையும், இவ்விரண்டிற்கும் இடையிலிருப்பவற்றையும் ஆறு நாட்களில் படைத்தான்; பின்னர், (தன் கண்ணியத்திற்குத் தக்கவாறும், மகத்துவத்திற்குரியவாறும் அர்ஷின் மீதிருப்பது எவ்வாறு தகுமோ அவ்வாறே) அர்ஷின் (அரியாசனத்தின்) மீது அவன் நிலையானான்; அவனையன்றி உங்களுக்கு உதவியாளரோ, பரிந்துபேசுபவரோ இல்லை; எனவே, (இவற்றையெல்லாம்) நீங்கள் (நினைத்து) சிந்திக்க வேண்டாமா?

34:23. அன்றியும், அவன் எவருக்கு அனுமதி கொடுக்கிறானோ அவருக்குத் தவிர, அவனிடத்தில் எந்தப் பரிந்துரையும் பயனளிக்காது; எனவே, (நியாய விசாரணைக்கு நிற்கும்) அவர்களின் இதயங்களிலிருந்து திடுக்கம் நீக்கப்படுமானால், "உங்கள் இறைவன் என்ன கூறினான்?" என்று கேட்பார்கள்; "உண்மையானதையே! மேலும், அவனே மிக உயர்ந்தவன்; மிகப் பெரியவன்" என்று கூறுவார்கள்.

36:23. "அவனையன்றி வேறு கடவுள்களை நான் எடுத்துக் கொள்வேனோ? அளவற்ற அருளாளன் எனக்கு ஏதேனும் கெடுதியைக் கொண்டு நாடினால் இவற்றின் சிபாரிசு ஒரு பயனும் எனக்கு அளிக்காது; இவை என்னை விடுவிக்கவும் முடியாது."

39:43. அவர்கள் அல்லாஹ் அல்லாதவற்றை(த் தங்களுக்குப்) பரிந்துபேசுபவர்களாக எடுத்துக் கொண்டார்களா? (நபியே!) நீர் கூறுவீராக! "அவை எப்பொருளுக்கும் அதிகாரம் இல்லாதவையாகவும், (எதனையும்) விளங்காதவையாகவும் இருந்தாலுமா?" (என்று.)

39:44. "பரிந்துபேசுதல் எல்லாம் அல்லாஹ்வுக்கே உரியது; வானங்கள், பூமியின் ஆட்சி அவனுக்கே உரியது; பின்னர், அவனிடமே நீங்கள் மீட்டப்படுவீர்கள்" என்று (நபியே!) நீர் கூறுவீராக!

40:18. (நபியே!) அண்மையில் வரும் (கியாம) நாளைப் பற்றி அவர்களுக்கு அச்சமூட்டி எச்சரிக்கை செய்வீராக! இதயங்கள் விசனத்தால் நிரம்பி தொண்டைக்குழிகளுக்கு வரும் (அவ்) வேளையில், அநியாயக்காரர்களுக்கு (இரக்கப்படும்) உற்ற நண்பனோ, ஏற்றுக்கொள்ளப்படும் சிபாரிசு செய்பவனோ இருக்கமாட்டான்.

43:86. அன்றியும், (அல்லாஹ்வாகிய) அவனையன்றி அவர்கள் எவர்களை (தெய்வங்களாக) அழைக்கிறார்களோ, அவர்கள் (அவனிடம் அவர்களுக்குப்) பரிந்துபேச அதிகாரமுள்ளவர்கள் அல்லர்; ஆனால், எவர்கள் அறிந்தவர்களாக இருக்கும் நிலையில் சத்தியத்தைக்கொண்டு சாட்சியம் கூறுகிறார்களோ அவர்களைத் தவிர.

53:26. அன்றியும், வானங்களில் எத்தனை வானவர்கள் இருக்கின்றனர்? எனினும், அல்லாஹ் விரும்பி, எவரைப் பற்றித் திருப்தியடைந்து, அவன் அனுமதி கொடுக்கிறானோ அவரைத் தவிர வேறெவரின் பரிந்துரையும் எந்தப் பயனும் அளிக்காது.

74:48. ஆகவே, சிபாரிசு செய்வோரின் எந்தச் சிபாரிசும் அவர்களுக்குப் பயனளிக்காது.

78:38. (ஜிப்ரீலாகிய) ரூஹும், வானவர்களும் அணிவகுத்து நிற்கும் நாளில், அளவற்ற அருளாளன் எவருக்கு அனுமதி கொடுக்கிறானோ அவரைத் தவிர வேறெவரும் பேசமாட்டார்கள்; அ(த்தகைய)வரும் நேர்மையானதையே கூறுவார்.