2:7. அல்லாஹ் அவர்களின் இதயங்களிலும், அவர்களின் செவிப்புலன்களிலும் முத்திரை வைத்துவிட்டான்; இன்னும், அவர்களின் பார்வை மீது திரை இருக்கிறது; மேலும், அவர்களுக்குக் கடுமையான வேதனையுமுண்டு.

2:20. அம்மின்னல் அவர்களின் பார்வைகளைப் பறித்துவிடப் பார்க்கிறது; அது அவர்களுக்கு ஒளி தரும் போதெல்லாம் அவர்கள் அதில் நடக்கிறார்கள்; அவர்களை இருள் சூழ்ந்து கொள்ளும்போது (வழியறியாது) நின்று விடுகிறார்கள்; மேலும், அல்லாஹ் நாடினால் அவர்களுடைய கேள்விப்புலனையும் பார்வைகளையும் போக்கிவிடுவான்; நிச்சயமாக அல்லாஹ் எல்லாவற்றின் மீதும் ஆற்றல் உடையவன்.

6:46. 'அல்லாஹ் உங்களுடைய செவிப்புலன்களையும், பார்வைகளையும் எடுத்துவிட்டு, உங்கள் இதயங்களின் மீது முத்திரையிட்டு விட்டால்-அதை உங்களுக்கு அல்லாஹ்வையன்றி வேறு எந்த இறைவன் கொண்டுவருவான்? என்று நீங்கள் (சிந்தித்துப்) பார்த்தீர்களா?" என்று (நபியே!) நீர் கேட்பீராக! (நம்) அத்தாட்சிகளை நாம் எவ்வாறு விவரிக்கின்றோம் என்பதை (நபியே!) நீர் கவனிப்பீராக! (இவ்வாறு இருந்தும்) பின்னர் அவர்கள் புறக்கணிக்கின்றனர்.

6:103. பார்வைகள் அவனை அடையமுடியா; (ஆனால்) அவனோ (எல்லோருடைய) பார்வைகளையும் அடைகிறான்; அவன் நுட்பமானவன்; நன்கறிகின்றவன்.

6:110. மேலும், நாம் அவர்களுடைய உள்ளங்களையும், அவர்களுடைய பார்வைகளையும் திருப்பிவிடுவோம் - அவர்கள் முதலில் இதை நம்பாமல் இருந்தது போலவே; இன்னும், அவர்கள் தங்களுடைய வழிகேட்டிலேயே தட்டழிந்து திரியுமாறு அவர்களை நாம் விட்டுவிடுவோம்.

7:47. அவர்களுடைய பார்வைகள் நரகவாசிகளின் பக்கம் திருப்பப்பட்டால் அவர்கள், "எங்கள் இறைவனே! எங்களை (இந்த) அக்கிரமக்கார சமுதாயத்தினருடன் ஆக்கிவிடாதே" என்று கூறுவார்கள்.

10:31. உங்களுக்கு வானத்திலிருந்தும், பூமியிலிருந்தும் உணவளிப்பவன் யார்? (உங்கள்) செவிப்புலன் மீதும், (உங்கள்) பார்வைகளின் மீதும் சக்தியுடையவன் யார்? இறந்ததிலிருந்து உயிருள்ளதை வெளிப்படுத்துகிறவனும், உயிருள்ளதிலிருந்து இறந்ததை வெளிப்படுத்துகிறவனும் யார்? (அகிலங்களின் அனைத்துக்) காரியங்களையும் திட்டமிட்டுச் செயல்படுத்துபவன் யார்?" என்று (நபியே!) நீர் கேளும்; உடனே அவர்கள், "அல்லாஹ்" என பதிலளிப்பார்கள்; "அவ்வாறாயின், (அவனுக்கு) நீங்கள் பயப்படமாட்டீர்களா?" என்று நீர் கேட்பீராக!

14:42. மேலும், அக்கிரமக்காரர்கள் செய்து கொண்டிருப்பதைப்பற்றி அல்லாஹ் பராமுகமாக இருக்கின்றான் என்று (நபியே!) நீர் நிச்சயமாக எண்ண வேண்டாம்; அவர்களுக்கு (தண்டனையை) தாமதப்படுத்துவதெல்லாம், எதில் கண்கள் விரைத்துப் பார்த்துக்கொண்டேயிருக்குமோ அந்த (மறுமை) நாளுக்காகத்தான்.

15:15. (பார்க்க முடியாது, தடுக்கப்பட்டு) "மயக்கப்பட்டதெல்லாம் எங்களுடைய பார்வைகள்தான்; (அது மட்டும்) அல்ல, நாங்கள் சூனியம் செய்யப்பட்ட ஒரு கூட்டமாகிவிட்டோம்" என்று நிச்சயமாகக் கூறுவார்கள்.

16:77. மேலும், வானங்களிலும், பூமியிலும் உள்ள இரகசியம் அல்லாஹ்வுக்கே உரியது; ஆகவே, (இறுதித் தீர்ப்புக்குரிய) மறுமையின் விஷயம் இமை கொட்டி விழிப்பதுபோல் அல்லது (அதைவிட) சமீபத்தில் இல்லாமலில்லை; நிச்சயமாக அல்லாஹ் எல்லாப் பொருட்களின் மீதும் பேராற்றலுடையவனாக இருக்கின்றான்.

16:78. உங்கள் அன்னையரின் வயிறுகளிலிருந்து நீங்கள் ஒன்றுமே அறியாதவர்களாக இருந்த நிலையில், உங்களை அல்லாஹ்தான் வெளிப்படுத்தினான்; அன்றியும், உங்களுக்குச் செவிப் புலனையும் பார்வைகளையும், இதயங்களையும் - நீங்கள் நன்றி செலுத்தும் பொருட்டு - அவனே அமைத்தான்.

16:108. அத்தகையோருடைய இதயங்கள், செவிப்புலன், பார்வைகள் (ஆகியவற்றின்) மீது அல்லாஹ் முத்திரையிட்டுவிட்டான்; இவர்கள்தாம் (தம் இறுதி பற்றி) அலட்சியமாக இருப்பவர்கள்.

17:36. எதைப்பற்றி உமக்கு(த் தீர்க்க) ஞானமில்லையோ அதை நீர் பின்தொடராதீர்; நிச்சயமாக (மறுமையில்) செவிப்புலனும், பார்வையும், இதயமும் - இவை ஒவ்வொன்றுமே (அதனதன் செயல் பற்றி) கேள்வி கேட்கப்படும்.

21:97. (இறுதி நாளைப் பற்றிய) உண்மையான வாக்குறுதி நெருங்கினால், (அதனைக் காணும்) நிராகரிப்பாளர்களின் கண்கள் திறந்தபடியே நிலைகுத்தி நின்றுவிடும்; (அன்றியும் அவர்கள்,) "எங்களுக்குக் கேடுதான்! நிச்சயமாக நாங்கள் இதை உதாசீனப்படுத்தியவர்களாகவே இருந்துவிட்டோம்; அதுமட்டுமில்லை, நாம் அநியாயம் செய்தவர்களாவும் இருந்துவிட்டோம்" (என்று கூறுவார்கள்).

22:46. அவர்கள் பூமியில் பயணம் செய்து (இவற்றைப்) பார்க்கவில்லையா? (அவ்வாறு பார்த்திருந்தால்) அவர்களுக்கு விளங்கிக்கொள்ளக்கூடிய உள்ளங்களும், (நல்லவற்றைச்) செவியேற்கும் காதுகளும் உண்டாகியிருக்கும்; நிச்சயமாக (புறக்) கண்கள் குருடாகவில்லை; எனினும், நெஞ்சுக்குள்ளே இருக்கும் இதயங்கள் (அகக் கண்கள்)தாம் குருடாகின்றன.

23:78. இன்னும், அவனே உங்களுக்குச் செவிப்புலனையும், பார்வைகளையும், இதயங்களையும் படைத்தான்; மிகக் குறைவாகவே (அவனுக்கு) நீங்கள் நன்றி செலுத்துகிறீர்கள்.

24:30. (நபியே!) நம்பிக்கையாளர் ஆடவர்களுக்கு நீர் கூறுவீராக! அவர்கள் தங்கள் பார்வைகளைத் தாழ்த்திக் கொள்ளவேண்டும்; தங்கள் வெட்கத்தலங்களைப் பேணிக்காத்துக் கொள்ளவேண்டும்; அது அவர்களுக்கு மிகப் பரிசுத்தமானதாகும்; நிச்சயமாக அல்லாஹ், அவர்கள் செய்பவற்றை நன்கு தெரிந்தவன்.

24:31. இன்னும், நம்பிக்கையாளர்களான பெண்களுக்கும் நீர் கூறுவீராக! அவர்கள் தங்கள் பார்வைகளைத் தாழ்த்திக் கொள்ள வேண்டும்; தங்கள் வெட்கத்தலங்களைப் பேணிக்காத்துக் கொள்ளவேண்டும்; தங்கள் அலங்காரத்தை - அதினின்று (சாதாரணமாக வெளியில்) தெரியக் கூடியதைத் தவிர (வேறு எதையும்) வெளிக்காட்டலாகாது; இன்னும், தங்கள் முன்றானைகளால் அவர்கள் தங்கள் மார்புகளை மறைத்துக்கொள்ள வேண்டும்; மேலும் (நம்பிக்கையாளர்களான பெண்கள்) தம் கணவர்கள், அல்லது தம் தந்தையர்கள், அல்லது தம் கணவர்களின் தந்தையர்கள் அல்லது தம் புதல்வர்கள், அல்லது தம் கணவர்களின் புதல்வர்கள், அல்லது தம் சகோதரர்கள், அல்லது தம் சகோதரர்களின் புதல்வர்கள் அல்லது தம் சகோதரிகளின் புதல்வர்கள், அல்லது தங்கள் பெண்கள், அல்லது தம் வலக்கரங்கள் சொந்தமாக்கிக் கொண்டவர்கள், அல்லது ஆடவர்களில் (வயோதிகத்தின் காரணமாக பெண்கள் மீது) நாட்டமில்லாத பணியாளர்கள், பெண்களின் மறைவான அங்கங்களைப் பற்றி அறிந்துகொள்ளாத சிறுவர்கள் ஆகிய இவர்களைத் தவிர (வேறு ஆண்களுக்குத்) தங்களுடைய அலங்காரத்தை வெளிப்படுத்தக் கூடாது. மேலும், தம் அலங்காரத்திலிருந்து தாம் மறைத்து வைத்திருப்பது அறியப்படுவதற்காக தங்கள் கால்களை (பூமியில்) தட்டி நடக்க வேண்டாம்; மேலும், நம்பிக்கையாளர்களே! நீங்கள் வெற்றிபெறும் பொருட்டு, நீங்கள் அனைவரும் பாவமன்னிப்புக்கோரி அல்லாஹ்வின் பக்கம் மீளுங்கள்.

24:37. (அவ்வாறு துதி செய்யும்) மனிதர்களை அல்லாஹ்வை தியானிப்பதை விட்டும், தொழுகையை (முறையாக) நிறைவேற்றுவதை விட்டும், ஜகாத் கொடுப்பதை விட்டும் அவர்களுடைய வாணிபமோ, கொடுக்கல் வாங்கலோ பராமுகமாக்க மாட்டா; இதயங்களும், பார்வைகளும் கலங்கித் தடுமாற்றமடையுமே அந்த (இறுதி) நாளை அவர்கள் அஞ்சுவார்கள்.

24:43. (நபியே!) நீர் பார்க்கவில்லையா? நிச்சயமாக அல்லாஹ் மேகத்தை மெதுவாக இழுத்து, பின்னர் அவற்றை ஒன்றாக இணையச் செய்து, அதன் பின் அதை (ஒன்றின் மீது ஒன்று சேர்த்து) அடர்த்தியாக்குகிறான்; அப்பால், அதன் நடுவேயிருந்து மழை வெளியாவதைப் பார்க்கிறீர்; இன்னும், அவன் வானத்திலிருந்து மலைகளைப் போன்ற மேகக் கூட்டங்களிலிருந்து பனிக்கட்டியையும் இறக்கி வைக்கின்றான்; அதைத் தான் நாடியவர்கள் மீது விழும்படிச் செய்கிறான்; தான் நாடியவர்களை விட்டும் அதை விலக்கியும் விடுகிறான்; அதன் மின்னொளி பார்வைகளைப் பறிக்க நெருங்குகிறது.

32:9. பிறகு, அதைச் சரி செய்து அதில் தன் ரூஹிலிருந்தும் (ஆன்மாவிலிருந்தும்) ஊதினான்; இன்னும், உங்களுக்கு அவன் செவிப்புலனையும், பார்வைப் புலன்களையும், இதயங்களையும் அமைத்தான்; (இருப்பினும்) நீங்கள் நன்றி செலுத்துவது மிகச் சொற்பமேயாகும்.

33:10. உங்களுக்கு மேலிருந்தும், உங்களுக்குக் கீழிருந்தும் அவர்கள் உங்களிடம் (படையெடுத்து) வந்தபோது, (உங்களுடைய) பார்வைகள் சாய்ந்து, (உங்களுடைய) இதயங்கள் தொண்டைக் குழி (முடிச்சு)களை அடைந்து (நீங்கள் திணறி) அல்லாஹ்வைப் பற்றி நீங்கள் பலவாறான எண்ணங்களை எண்ணிக்கொண்டிருந்த சமயம் (அல்லாஹ் உங்களுக்குச் செய்த அருட்கொடையை) நினைவு கூருங்கள்.

38:45. (நபியே!) ஆற்றல் கொண்டவர்களும் அகப்பார்வையும் உடையவர்களாகவும் இருந்த நம் அடியார்களான இப்ராஹீம், இஸ்ஹாக், யஃகூப் ஆகியோரையும் நினைவுகூர்வீராக!

38:63. "நாம் அவர்களைப் பரிகாசமாக எடுத்துக் கொண்டிருந்தோமா? அல்லது (அவர்களைக் காணமுடியாதவாறு) அவர்களை விட்டும் நம் பார்வைகள் சறுகிவிட்டனவா?" (என்றும் கூறுவர்.)

41:20. இறுதியில், அவர்கள் அதை (அத்தீயை) அடையும்போது, அவர்களுக்கு எதிராக அவர்களுடைய காதுகளும், அவர்களுடைய கண்களும், அவர்களுடைய தோல்களும் அவர்கள் செய்து கொண்டிருந்தவை பற்றிச் சாட்சி கூறும்.

41:22. "உங்கள் காதுகளும், உங்கள் கண்களும், உங்கள் தோல்களும் உங்களுக்கு எதிராகச் சாட்சி சொல்லாமலிருக்கும் பொருட்டு, உங்கள் பாவங்களை நீங்கள் மறைத்துக்கொள்ளக் கூடியவர்களாக இருக்கவில்லை; அன்றியும், நீங்கள் செய்துகொண்டிருந்தவற்றில் பெரும்பாலானவற்றை நிச்சயமாக அல்லாஹ் அறியமாட்டான் என்று நீங்கள் எண்ணிக்கொண்டீர்கள்."

45:10. அவர்களுக்கு முன்னால் நரகம் இருக்கிறது: அவர்கள் சம்பாதித்துக்கொண்டதில் எப்பொருளும் அவர்களுக்குப் பயன்தராது; அல்லாஹ்வையன்றி, எவற்றை அவர்கள் பாதுகாவலர்களாக எடுத்துக் கொண்டார்களோ அவைகளும் (அவர்களுக்குப் பயன்தருபவை) அல்ல; மேலும், அவர்களுக்கு மாபெரும் வேதனையுமுண்டு.

45:23. (நபியே!) எவன் தன்னுடைய மனோ இச்சையைத் தன்னுடைய தெய்வமாக ஆக்கிக்கொண்டானோ, அவனை நீர் பார்த்தீரா? மேலும், அறிந்தே அல்லாஹ் அவனை வழிகேட்டில் விட்டு அவனுடைய காதுகள் மீதும், இதயத்தின் மீதும் முத்திரையிட்டு - இன்னும், அவனுடைய பார்வை மீதும் திரையை அமைத்துவிட்டான்; எனவே, அல்லாஹ்வுக்குப் பிறகு அவனுக்கு நேர்வழி காண்பிப்பவர் யார்? நீங்கள் சிந்திக்க வேண்டாமா?

46:26. உங்களுக்கு (மக்காவாசிகளுக்கு) இங்கு எதில் வசதிகள் செய்து கொடுக்காதிருந்தோமோ, அவ்வசதிகளையெல்லாம் நாம் அவர்களுக்குத் திடமாகச் செய்துகொடுத்திருந்தோம்; மேலும், அவர்களுக்குச் செவிப்புலனையும் பார்வைகளையும் இதயங்களையும் நாம் கொடுத்திருந்தோம்: ஆயினும், அவர்கள் அல்லாஹ்வின் வசனங்களை மறுத்துக் கொண்டிருந்தபோது, அவர்களுடைய செவிப்புலனும், பார்வைகளும், இதயங்களும் அவர்களுக்கு யாதோர் பயனுமளிக்கவில்லை; எதனைப் பற்றி அவர்கள் பரிகாசம் செய்து கொண்டிருந்தார்களோ, அதுவே அவர்களைச் சூழ்ந்துகொண்டது.

47:23. இத்தகையோரைத் தாம் அல்லாஹ் சபித்து, இவர்களைச் செவிடாக்கி, இவர்கள் பார்வைகளையும் குருடாக்கிவிட்டான்.

50:22. "நீ இதைப் பற்றி அலட்சியத்தில் இருந்தாய்; (இப்பொழுது) உன்னைவிட்டு உனது திரையை நாம் அகற்றிவிட்டோம்; எனவே, இன்று உன் பார்வை கூர்மையாக இருக்கிறது" (என்று கூறப்படும்).

53:17. (அவருடைய) பார்வை விலகவுமில்லை; அதைக் கடந்து (மாறி)விடவுமில்லை.

54:7. அவர்களின் பார்வைகள் கீழ்நோக்கிய நிலையில், பரவிக்கிடக்கும் வெட்டுக்கிளிகளைப் போல் அவர்கள் புதைகுழிகளிலிருந்து வெளியேறுவார்கள்.

54:50. நம்முடைய கட்டளை (நிறைவேறுவது) கண்மூடி விழிப்பதுபோன்ற ஒரு கணமே அன்றி வேறில்லை.

59:2. வேதத்தை உடையோரில் எவர்கள் நிராகரித்துக் கொண்டிருந்தனரோ, அவர்களை அவர்களுடைய வீடுகளிலிருந்து (மதீனாவிலிருந்து சிரியா தேசத்தின்பால்) முதல் வெளியேற்றத்தில் வெளியேற்றியவன் அவனே; எனினும், அவர்கள் வெளியேறுவார்கள் என்று நீங்கள் நினைக்கவில்லை; அவர்களும் தங்களுடைய கோட்டைகள் நிச்சயமாக அல்லாஹ்வை விட்டும் தங்களைத் தடுத்துக்கொள்பவை என்று நினைத்தார்கள்; ஆனால், அவர்கள் எண்ணியிராத புறத்திலிருந்து அவர்கள்பால் அல்லாஹ் (வேதனையைக் கொண்டு) வந்து அவர்களுடைய இதயங்களில் பீதியையும் போட்டான்; அன்றியும், அவர்கள் தம் கைகளாலும் நம்பிக்கையாளர்களின் கைகளாலும் தம் வீடுகளை பாழ்படுத்திக் கொண்டனர்; எனவே, அகப் பார்வையுடையோரே! நீங்கள் (இதிலிருந்து) படிப்பினை பெறுவீர்களாக!

67:3. அவனே ஏழு வானங்களையும் அடுக்கடுக்காகப் படைத்தான்; (மனிதனே!) அளவற்ற அருளாளனின் படைப்பில் எந்தக் குறையையும் நீ காணமாட்டாய்; பின்னும், (ஒரு முறை) பார்வையை மீட்டிப்பார்! (அவ்வானங்களில்) ஏதாவது ஒரு பிளவை நீ காண்கிறாயா?

67:4. பின்னர், இருமுறை உன் பார்வையை மீட்டிப் பார்! உன் பார்வை களைத்து, சிறுமையடைந்து உன்னிடம் திரும்பும்.

67:23. (நபியே!) நீர் கூறுவீராக!: "அவனே உங்களைப் படைத்து, உங்களுக்குச் செவிப்புலனையும், பார்வைகளையும், இதயங்களையும் அமைத்தான். (எனினும்,) மிகவும் சொற்பமாகவே நீங்கள் நன்றி செலுத்துகிறீர்கள்."

68:43. அவர்களுடைய பார்வைகள் கீழ் நோக்கியவையாக இருக்கும் நிலையில் இழிவு அவர்களை மூடிக்கொள்ளும்; அவர்களோ (உலகில்) திடமாக இருந்தபோது, ஸுஜூது செய்யுமாறு அழைக்கப்பட்டுக் கொண்டுதான் இருந்தனர். (ஆனால், அப்போது அலட்சியமாக இருந்தனர்.)

70:44. அவர்களுடைய பார்வைகள் கீழ்நோக்கியிருக்கும்; இழிவு அவர்களைச் சூழ்ந்து கொண்டிருக்கும்; அவர்கள் வாக்களிக்கப்பட்டுக் கொண்டிருந்தார்களே, அது அந்நாள்தான்.

75:7. ஆகவே, பார்வையும் மழுங்கி...

79:9. அவர்களின் பார்வைகள் (அச்சத்தால்) கீழ் நோக்கியிருக்கும்.