2:85. (இவ்வாறு உறுதிப்படுத்திய) நீங்களே, உங்களிடையே கொலை செய்கின்றீர்கள்; உங்களிலேயே ஒரு சாராரை அவர்களுடைய வீடுகளிலிருந்து வெளியேற்றுகிறீர்கள்; அவர்கள்மீது அக்கிரமம் புரியவும், பகைமை கொள்ளவும் (அவர்களின் விரோதிகளுக்கு) உதவிசெய்கிறீர்கள்; அவர்கள் சிறைப்பிடிக்கப்பட்டவர்களாக உங்களிடம் (உதவி தேடி) வந்தால், அவர்களுக்கு நஷ்டஈடு கொடுத்து (அவர்களை) விடுவிக்கிறீர்கள்; ஆனால், அவர்களை (வீடுகளை விட்டு) வெளியேற்றுவது உங்கள்மீது தடுக்கப்பட்டதாகும்; (அப்படியென்றால்) நீங்கள் வேதத்தில் சிலதை நம்பி சிலதை மறுக்கிறீர்களா? எனவே, உங்களில் இவ்வகையில் செயல்படுகிறவர்களுக்கு இவ்வுலக வாழ்வில் இழிவைத் தவிர வேறு கூலி கிடையாது; மறுமை நாளிலோ, அவர்கள் மிகக் கடுமையான வேதனையின்பால் மீட்டப்படுவார்கள்; இன்னும், நீங்கள் செய்வதை அல்லாஹ் கவனிக்காமல் இல்லை.

2:184. (இவ்வாறு விதிக்கப்பெற்ற நோன்பு) சில குறிப்பிட்ட நாட்களில் (கடமையாகும்); ஆனால், (அந்நாட்களில்) உங்களில் எவரேனும் நோயாளியாகவோ, அல்லது பயணத்திலோ இருந்தால், (அவர்) அக்குறிப்பிட்ட நாட்களின் நோன்பை மற்ற நாட்களில் கணக்கி(ட்டு நோற்றுவி)டவும்; எனினும், அதற்கு சக்தி பெற்றிருப்போர் (அதற்குப்) பரிகாரமாக, ஓர் ஏழைக்கு உணவளிக்கவேண்டும்; எனினும், எவரேனும் உபரியாக நன்மைசெய்தால் அது அவருக்கு நல்லது – ஆயினும், நீங்கள் (நோன்பின் பலனை) அறிவீர்களானால் நீங்கள் நோன்பு நோற்பதே உங்களுக்கு நன்மையாகும்.

2:283. இன்னும், நீங்கள் பயணத்திலிருந்து, (அச்சமயம்) எழுதுபவனை நீங்கள் பெற்றுக் கொள்ளாவிட்டால், (கடன் பத்திரத்திற்குப் பதிலாக கடன் கொடுத்தவன்) அடமானப் பொருளைப் பெற்றுக்கொள்ள வேண்டும்; உங்களில் ஒருவர் மற்றவரை நம்பினால் (இவ்வாறு ஒரு பொருளைக் காப்பாக வைத்தால்,) நம்பப்பட்டவன் தன்னிடமுள்ள அமானிதத்தை (ஒழுங்காக) நிறைவேற்றட்டும்; அவன் தன் இறைவனாகிய அல்லாஹ்வை அஞ்சிக்கொள்ளட்டும்; அன்றியும், நீங்கள் சாட்சியத்தை மறைக்க வேண்டாம் - எவன் ஒருவன் அதை மறைக்கின்றானோ நிச்சயமாக அவனுடைய இதயம் பாவத்திற்குள்ளாகிறது - இன்னும், நீங்கள் செய்வதையெல்லாம் அல்லாஹ் நன்கறிவான்.

3:137. உங்களுக்கு முன்னரும் பல நிகழ்ச்சிகள் திட்டமாகச் சென்றுவிட்டன; ஆகவே, நீங்கள் பூமியில் சுற்றித்திரிந்து (வசனங்களைப்) பொய்யாக்கியோரின் முடிவு எவ்வாறாயிற்று என்பதைப் பாருங்கள்.

4:43. நம்பிக்கை கொண்டவர்களே! நீங்கள் போதையில் இருக்கும்போது, நீங்கள் கூறுவது இன்னது என்று நீங்கள் அறிந்துகொள்ளும் வரை தொழுகைக்கு நெருங்காதீர்கள்; அன்றியும், குளிப்பு கடமையாக இருக்கும்போது குளிக்கும் வரை (பள்ளிக்குச் செல்லாதீர்கள்; பள்ளிவாசல் வழியாக) பாதையைக் கடந்து சென்றால் தவிர; இன்னும், நீங்கள் நோயாளிகளாகவோ பயணத்திலோ இருந்தால், அல்லது மலஜலம் கழிக்குமிடத்திலிருந்து வந்தால் அல்லது பெண்களைத் தீண்டியோ இருந்து (சுத்தம் செய்துகொள்ள) தண்ணீரைப் பெறாவிடின் சுத்தமான மண்ணைத் தொட்டு உங்களுடைய முகங்களையும், உங்களுடைய கைகளையும் தடவி (தயம்மும் செய்து) கொள்ளுங்கள்; (இதன் பின் தொழலாம்;) நிச்சயமாக அல்லாஹ் பிழை பொறுப்பவனாகவும், மன்னிப்பவனாகவும் இருக்கின்றான்.

5:1. நம்பிக்கையாளர்களே! (நீங்கள் செய்துகொண்ட) உடன்படிக்கைகளை (முழுமையாக) நிறைவேற்றுங்கள்; உங்கள்மீது ஓதிக்காட்டப்படுகின்றவற்றைத் தவிர (மற்ற ஆடு, மாடு, ஒட்டகம் முதலிய) கால்நடைகள் உங்களுக்கு (உணவிற்காக) ஆகுமாக்கப்பட்டுள்ளன; ஆனால், நீங்கள் இஹ்ராம் அணிந்திருக்கும் சமயத்தில் (அவற்றை) வேட்டையாடுவதை ஆகுமாக்கிக் கொள்ளாதவர்களாக (இருக்கவேண்டும்); நிச்சயமாக அல்லாஹ் தான் நாடியதைக் கட்டளையிடுகிறான்.

5:4. (நபியே!) அவர்கள் (உண்பதற்குத்) தங்களுக்கு அனுமதிக்கப்பட்டவை எவை? என்று உம்மிடம் கேட்கிறார்கள்; நீர் கூறும்: நல்லவைகள் - அல்லாஹ் உங்களுக்குக் கற்றுக்கொடுத்தவற்றிலிருந்து (வேட்டைப் பிராணிகளாகிய) அவற்றிற்கு நீங்கள் கற்றுக்கொடுத்துப் பயிற்றுவித்தவர்களாக இருக்கும் நிலையில், வேட்டைப்பிராணிகளில் நீங்கள் பழக்கப்படுத்தியவை (வேட்டையாடியவை)யும் உங்களுக்கு அனுமதியளிக்கப்பட்டுள்ளன; அவை (தாம் தின்னாமல்) தடுத்துக்கொண்டவற்றிலிருந்து நீங்கள் உண்ணுங்கள்; எனினும், நீங்கள் (வேட்டைக்கு விடும்போது) அதன்மீது அல்லாஹ்வின் பெயரைக் கூறிவிடுங்கள்; அல்லாஹ்வுக்கு அஞ்சுங்கள்; நிச்சயமாக அல்லாஹ் கணக்கெடுப்பதில் மிகவும் விரைவானவன்.

5:6. நம்பிக்கை கொண்டோரே! நீங்கள் தொழுகைக்குத் தயாராகும்போது, (முன்னதாக) உங்கள் முகங்களையும், முழங்கைகள்வரை உங்கள் கைகளையும் கழுவிக்கொள்ளுங்கள்; உங்களுடைய தலைகளை (ஈரக்கையால்) தடவி (மஸ்ஹு செய்து) கொள்ளுங்கள்; உங்கள் கால்களை கணுக்கால் வரை(க் கழுவிக் கொள்ளுங்கள்); நீங்கள் பெருந்தொடக்குடையோராக (குளிக்க கடமைப்பட்டோராக) இருந்தால் (குளித்து) தூய்மையாக்கிக்கொள்ளுங்கள்; தவிர, நீங்கள் நோயாளிகளாகவோ, அல்லது பயணத்திலோ இருந்தால், அல்லது உங்களில் எவரும் மல ஜலம் கழித்துவந்தாலும், அல்லது நீங்கள் பெண்களைத் தீண்டி (உடல் உறவுகொண்டு) இருந்தாலும், (உங்களைச் சுத்தப்படுத்திக்கொள்ள) நீங்கள் தண்ணீரைப் பெறாவிட்டால், சுத்தமான மண்ணை நீங்கள் நாடி (இரு கைகளால் அடித்து) அதிலிருந்து உங்கள் முகங்களையும், உங்களுடைய கைகளையும் தடவி (தயம்மும் செய்து) கொள்ளுங்கள்; அல்லாஹ் உங்களுக்கு எந்தச் சிரமத்தையும் கொடுக்க விரும்பவில்லை; ஆனால், அவன் உங்களைத் தூய்மைப்படுத்தவும்; இன்னும், நீங்கள் அவனுக்கு நன்றி செலுத்தும் பொருட்டு, தனது அருட்கொடையை உங்கள்மீது முழுமையாக்கவும் விரும்புகிறான்.

5:95. நம்பிக்கை கொண்டவர்களே! நீங்கள் இஹ்ராமிலிருக்கும் நிலையில் வேட்டை(யாடி)ப் பிராணிகளைக் கொல்லாதீர்கள்; உங்களில் யாராவது ஒருவர் வேண்டுமென்றே அதைக் கொன்றால், (ஆடு, மாடு, ஒட்டகம் போன்ற) கால்நடைகளிலிருந்து அவர் கொன்றதற்குச் சமமான ஒன்றை ஈடாகக் கொடுக்கவேண்டியது (அதற்கான) தண்டனையாகும்; அதற்கு உங்களில் நீதமுடைய இருவர் தீர்ப்பளிக்க வேண்டும்; அது கஃபாவை அடைய வேண்டிய பலிப்பிராணியாகும்; அல்லது பரிகாரமாக ஏழைகளுக்கு உணவளிக்க வேண்டும்; அல்லது (பரிகாரம் அளிக்க ஏதும் இல்லையாயின்) தனது வினையின் பலனை அனுபவிப்பதற்காக அதற்குச் சமமான நோன்புகள் நோற்கவேண்டும்; முன்னர் நடந்ததை அல்லாஹ் மன்னித்து விட்டான்; எவர் மீண்டும் (இதைச்) செய்வாரோ அல்லாஹ் அவரைத் தண்டிப்பான்; அல்லாஹ் (யாவரையும்) மிகைத்தோனாகவும், (குற்றம் செய்வோருக்குத் தக்க) தண்டனை கொடுக்க உரியோனாகவும் இருக்கின்றான்.

5:96. உங்களுக்கும் (இதர) பயணிகளுக்கும் பலன் கிடைக்கும் பொருட்டு (நீங்கள் இஹ்ராம் கட்டியிருந்தாலும்) கடலில் வேட்டையாடுவதும், அதைப் புசிப்பதும் உங்களுக்கு ஆகுமானதாக ஆக்கப்பட்டுள்ளது. ஆனால், நீங்கள் இஹ்ராமுடன் இருக்கும் போதெல்லாம் தரையில் வேட்டையாடுவது உங்கள் மீது தடுக்கப்பட்டுள்ளது; எனவே, நீங்கள் அல்லாஹ்வுக்கு அஞ்சிக்கொள்ளுங்கள், அவனிடத்திலேயே நீங்கள் ஒன்று சேர்க்கப்படுவீர்கள்.

5:97. புனித ஆலயமாகிய கஃபாவையும், சங்கையான மாதத்தையும், பலிப்பிராணிகளையும், அடையாளமிடப்பட்ட (பலிப்)பிராணிகளையும் மனிதர்களுக்கு (மார்க்க நெறிகளுக்கு) நிலைப்பாடானவையாக அல்லாஹ் ஆக்கிவைத்துள்ளான்; அ(ல்லாஹ் இவ்வாறு செய்த)து, நிச்சயமாக அல்லாஹ் வானங்களிலும், பூமியிலும் இருப்பவற்றையெல்லாம் நன்கறிவான் என்பதை நீங்கள் அறிந்து கொள்வதற்காகவேதான்; நிச்சயமாக அல்லாஹ் அனைத்துப் பொருட்களையும் நன்கறிபவன்.

6:11. "பூமியில் நீங்கள் சுற்றிவந்து பின்னர், (அல்லாஹ்வின் வசனங்களைப்) பொய்ப்பித்தவர்களின் முடிவு என்ன ஆயிற்று என்பதை நீங்கள் கவனித்துப் பாருங்கள்!" என்று (நபியே!) நீர் கூறுவீராக!

6:38. பூமியிலுள்ள எந்த உயிரினமும், தன் இரு சிறகுகளால் பறக்கின்ற எந்தப் பறவையும் உங்களைப்போன்ற இனங்களேயன்றி வேறில்லை; (இவற்றில்) எதையும் (நம் பதிவுப்) புத்தகத்தில் நாம் குறிப்பிடாமல் விட்டுவிடவில்லை; பிறகு, தம் இறைவனின்பால் அவை ஒன்று சேர்க்கப்படும்.

8:22. நிச்சயமாக அல்லாஹ்விடத்தில் உயிரினங்களில் மிகக் கேவலமானவர்கள் (உண்மையை) அறிந்து கொள்ளாச் செவிடர்களும், ஊமைகளும்தான்.

9:42. (நபியே! நீர் எதன்பால் அவர்களை அழைத்தீரோ) அது சமீபமான (உடனே கிடைக்கக்கூடியதான) பொருளாகவும், நடுநிலையான பயணமாகவும் இருந்தால் அவர்கள் உம்மைப் பின்பற்றியிருப்பார்கள்; எனினும், மிகத் தூரமான பயணம் அவர்களுக்குப் பெரும் சிரமத்தைத் தந்தது; 'நாங்கள் சக்தி பெற்றிருந்தால் நிச்சயமாக உங்களுடன் புறப்பட்டிருப்போம்' என்று அல்லாஹ்வின் மீது சத்தியம் செய்(து கூறு)வார்கள்; அவர்கள் தங்களையே அழித்துக்கொள்கின்றனர்; நிச்சயமாக அவர்கள் பொய்யர்கள் என்பதை அல்லாஹ் அறிவான்.

10:22. அவனே உங்களைத் தரையிலும், கடலிலும் பயணம் செய்யவைக்கிறான்; (சில சமயம்) நீங்கள் கப்பலில் இருக்கும்போது நல்ல காற்றினால் (கப்பலிலுள்ள) அவர்களை அவை (சுமந்து) செல்கின்றன; அதனைக்கொண்டு அவர்கள் மகிழ்ச்சியடைந்திருக்கும் பொழுது, புயல் காற்று வீசி எல்லாப்பக்கங்களிலிருந்தும் அவர்கள் மீது அலைகள் மோதும்போது "நிச்சயமாக அலைகளால் சூழப்பட்டோம் (தப்ப வழியில்லையே!)" என்று அவர்கள் எண்ணுகிறார்கள், அச்சமயத்தில், "நீ எங்களை இதிலிருந்து காப்பாற்றிவிட்டால், மெய்யாகவே நாங்கள் நன்றி செலுத்துபவர்களாக இருப்போம்" என்று அல்லாஹ்வை - அவனுக்கே வணக்கத்தைக் கலப்பற்றவர்களாக ஆக்கிப் பிரார்த்திக்கின்றார்கள்.

11:40. இறுதியாக, நம் உத்தரவு வந்து அடுப்புப் பொங்கவே, (நாம் நூஹை நோக்கி, 'உயிரினங்களில்) ஒவ்வொன்றிலிருந்தும் (ஆண், பெண் கொண்ட) இரண்டு ஜோடியையும், (மூழ்கடிக்கப்படுவார்கள் என்று) எவர்களைக் குறித்து (முன்பே நம்) வாக்கு ஏற்பட்டுவிட்டதோ அவர்களைத் தவிர உம் குடும்பத்தாரையும், நம்பிக்கை கொண்டவர்களையும் ஏற்றிக்கொள்ளும்'' என்று நாம் கூறினோம்; வெகு சொற்பமானவர்களைத் தவிர (மற்றவர்கள்) அவருடன் நம்பிக்கை கொள்ளவில்லை.

11:56. "நிச்சயமாக நான், என்னுடைய இறைவனும், உங்களுடைய இறைவனுமாகிய அல்லாஹ்வையே சார்ந்துள்ளேன்; எந்த உயிரினமாயினும் அதன் முன்நெற்றி ரோமத்தை அவன் பிடித்தவனாகவே இருக்கிறான்; நிச்சயமாக என் இறைவன் நேரான வழியிலிருக்கின்றான்" (என்றும்),

12:10. அவர்களில் ஒருவர்: "நீங்கள் யூஸுஃபைக் கொலை செய்யாதீர்கள்; நீங்கள் (ஏதாவது) செய்தே ஆகவேண்டுமென்றால் - அவரை ஓர் ஆழமான பாழ்க்கிணற்றில் போட்டுவிடுங்கள்; (அப்போது அவ்வழி செல்லும்) பயணிகளில் சிலர் அவரை எடுத்துக்கொள்ளக்கூடும்" என்று கூறினார்.

12:19. பின்னர், (அக்கிணற்றருகே) ஒரு பயணக் கூட்டம் வந்தது; அவர்களில் தண்ணீர் கொண்டு வருபவரை (த் தண்ணீருக்காக அக்கூட்டத்தினர்) அனுப்பினார்கள்; அவர் தம் வாளியை (க் கிணற்றில்) விட்டார்: "நற்செய்தி! இதோ ஓர் (அழகிய) சிறுவன்" என்று கூறினார்; (யூஸுஃபை தூக்கியெடுத்து) அவரை ஒரு வியாபாரப் பொருளாக (க் கருதி) மறைத்து வைத்துக் கொண்டார்கள்: அவர்கள் செய்வதையெல்லாம் அல்லாஹ் நன்கறிந்தவனாகவே இருக்கிறான்.

12:109. (நபியே!) உமக்கு முன்னர், பல ஊர்வாசிகளிலிருந்தும் மனிதர்களைத்தவிர (வேறு எவரையும்) தூதர்களாக நாம் அனுப்பவில்லை; அவர்களுக்கு நாம் 'வஹீ' மூலம் (நம் கட்டளைகளை) அறிவித்தோம்; இவர்கள் பூமியில் பயணம் செய்து இவர்களுக்கு முன் இருந்தவர்களின் முடிவு எப்படியிருந்தது என்பதைப் பார்க்கவில்லையா? மறுமை வீடுதான் (அல்லாஹ்வை) அஞ்சுபவர்களுக்கு மிகவும் மேலானதாகும்; (இதனை) நீங்கள் (சிந்தித்து) விளங்கிக்கொள்ள வேண்டாமா?

16:36. மெய்யாக நாம் ஒவ்வொரு சமூகத்தாரிடத்திலும், "அல்லாஹ்வையே நீங்கள் வணங்குங்கள்; ஷைத்தான்களைவிட்டும் நீங்கள் விலகிச்செல்லுங்கள்" என்று (போதிக்குமாறு) நம் தூதரை அனுப்பிவைத்தோம்; எனவே, அ(ந்த சமூகத்த)வர்களில் அல்லாஹ் நேர்வழிகாட்டியோரும் இருக்கிறார்கள்; வழிகேடே விதிக்கப்பெற்றோரும் அவர்களில் இருக்கிறார்கள்; ஆகவே, நீங்கள் பூமியில் சுற்றுப்பயணம் செய்து, பொய்யர்களின் முடிவு என்ன ஆயிற்று? என்பதைக் கவனியுங்கள்.

16:61. மனிதர்கள் செய்யும் அக்கிரமங்களுக்காக அல்லாஹ் அவர்களை உடனுக்குடன் பிடி(த்துத் தண்டி)ப்பதாக இருந்தால் உயிரினங்களில் ஒன்றையுமே (பூமியாகிய) இதில் விட்டுவைக்க மாட்டான்; ஆனால், ஒரு குறிப்பிட்ட தவணை வரை அவர்களைப் (பிடிக்காது) பிற்படுத்துகிறான்; அவர்களுடைய தவணை வந்துவிட்டாலோ ஒரு கணமேனும் (தண்டனை பெறுவதில்) அவர்கள் பிந்தவும் மாட்டார்கள்; முந்தவும் மாட்டார்கள்.

18:62. அவ்விருவரும் அப்புறம் அந்த இடத்தைக் கடந்தபோது, தம் பணியாளை நோக்கி, "நம்முடைய காலை ஆகாரத்தைக் கொண்டுவா! இந்த நம் பயணத்தில் நிச்சயமாக நாம் களைப்பைச் சந்திக்கிறோம்" என்று (மூஸா) கூறினார்.

22:18. வானங்களிலுள்ளவர்களும், பூமியிலுள்ளவர்களும், சூரியனும், சந்திரனும், நட்சத்திரங்களும், மலைகளும், மரங்களும், உயிரினங்களும், மனிதர்களில் பெரும்பாலானவர்களும் நிச்சயமாக அல்லாஹ்வுக்கு ஸுஜூது செய்(து வணங்கு)கின்றனர் என்பதை நீர் பார்க்கவில்லையா? இன்னும், அநேகர் மீது வேதனை விதியாகிவிட்டது. அன்றியும், எவனை அல்லாஹ் இழிவுப்படுத்துகிறானோ அவனைக் கண்ணியப்படுத்துபவன் எவனுமில்லை; நிச்சயமாக அல்லாஹ் தான் நாடியதைச் செய்கிறான்.

22:30. இதுவே (முறையாகும்); மேலும், அல்லாஹ்வின் புனிதமான கட்டளைகளை யார் மேன்மைப்படுத்துகிறாரோ, அது அவருக்கு அவருடைய இறைவனிடத்தில் சிறந்ததாகும்; இன்னும், நாற்கால் பிராணிகளில் உங்களுக்கு (ஆகாதவையென) ஒதுக்கப்பட்டதைத் தவிர (மற்றவை) உங்களுக்கு அனுமதிக்கப்பட்டுள்ளன; ஆகவே, விக்கிரகங்களின் அசுத்தத்திலிருந்து நீங்கள் விலகிக் கொள்ளுங்கள்; அன்றியும், பொய்யான சொல்லிலிருந்து நீங்கள் விலகிக்கொள்ளுங்கள்.

22:33. (பலிப் பிராணிகளாகிய) அவற்றில் ஒரு குறிப்பிட்ட தவணை வரையில் உங்களுக்குப் பயனடையுதல் உண்டு; அதன் பின்னர், (உரிய காலம் வந்ததும்) அவற்றின் (குர்பானிக்கான) இடம் அந்தப் பூர்வீகமான ஆலயத்தின்பால் இருக்கிறது.

22:46. அவர்கள் பூமியில் பயணம் செய்து (இவற்றைப்) பார்க்கவில்லையா? (அவ்வாறு பார்த்திருந்தால்) அவர்களுக்கு விளங்கிக்கொள்ளக்கூடிய உள்ளங்களும், (நல்லவற்றைச்) செவியேற்கும் காதுகளும் உண்டாகியிருக்கும்; நிச்சயமாக (புறக்) கண்கள் குருடாகவில்லை; எனினும், நெஞ்சுக்குள்ளே இருக்கும் இதயங்கள் (அகக் கண்கள்)தாம் குருடாகின்றன.

23:21. நிச்சயமாக உங்களுக்கு (ஆடு, மாடு, ஒட்டகம் முதலிய) கால்நடைகளில் ஒரு படிப்பினை இருக்கிறது; அவற்றின் வயிறுகளில் உள்ளவற்றிலிருந்து (சுரக்கும் பாலை) நாம் உங்களுக்குப் புகட்டுகிறோம்; இன்னும், அவற்றில் உங்களுக்கு அநேக பயன்கள் இருக்கின்றன; அவற்றி(ன் மாமிசத்தி)லிருந்து நீங்கள் புசிக்கிறீர்கள்.

24:45. மேலும், எல்லா உயிரினங்களையும் அல்லாஹ் நீரிலிருந்து படைத்துள்ளான்; அவற்றில் தன் வயிற்றின் மீது நடப்பவையும் உண்டு; அவற்றில் இருகால்களால் நடப்பவையும் உண்டு; அவற்றில் நான்கு (கால்)களைக் கொண்டு நடப்பவையும் உண்டு; தான் நாடியதை அல்லாஹ் படைக்கிறான்; நிச்சயமாக அல்லாஹ் எல்லாவற்றின் மீதும் பேராற்றலுடையவனாக இருக்கின்றான்.

27:69. "பூமியில் பயணம் செய்து, குற்றவாளிகளின் முடிவு என்னாயிற்று என்று பாருங்கள்" என்று (அவர்களிடம் நபியே!) நீர் கூறுவீராக!

27:82. அவர்கள் மீது (வேதனையுடைய) வாக்கு ஏற்பட்டுவிட்டால், அவர்களுக்காக ஒரு மிருகத்தை பூமியிலிருந்து நாம் வெளியாக்குவோம்; அது, நிச்சயமாக மனிதர்கள் நம் வசனங்களின் மீது உறுதிகொள்ளவில்லை என்று அவர்களிடம் பேசும்.

29:20. "பூமியில் நீங்கள் பயணம் செய்து, அவன் எவ்வாறு படைப்பைத் துவங்கிப் பின்னர், அல்லாஹ் பிந்திய படைப்பை எவ்வாறு உண்டுபண்ணுகிறான் என்பதைப் பாருங்கள்: நிச்சயமாக அல்லாஹ் எல்லாப் பொருட்கள் மீதும் பேராற்றலுள்ளவன்" என்று (நபியே) நீர் கூறுவீராக!

29:60. அன்றியும், (பூமியிலுள்ள) எத்தனையோ உயிரினங்கள் தங்கள் உணவைச் சுமந்து செல்வதில்லை; அவற்றுக்கும் உங்களுக்கும் அல்லாஹ்தான் உணவளிக்கிறான்; இன்னும், அவன் (யாவற்றையும்) செவிமடுப்பவனாகவும், (நன்கு) அறிபவனாகவும் இருக்கின்றான்.

30:9. அவர்கள் பூமியில் சுற்றுப்பயணம் செய்து, அவர்களுக்கு முன்னால் இருந்தவர்களின் முடிவு என்னவாயிற்று என்பதைப் பார்க்கவில்லையா? அவர்கள் இவர்களைவிட வலிமை மிக்கவர்களாக இருந்தார்கள்; அவர்களும் பூமியில் விவசாயம் செய்தார்கள்; இன்னும், இவர்கள் அதை (உழுது) பண்படுத்தியதைவிட அவர்கள் அதை அதிகமாகவே (உழுது) பண்படுத்தியிருந்தார்கள்: அவர்களிடமும் அவர்களுக்கான (இறைத்) தூதர்கள் தெளிவான அத்தாட்சிகளைக் கொண்டு வந்தார்கள்; அல்லாஹ் அவர்களுக்கு ஒருபோதும் அநியாயம் செய்கிறவனாக இருக்கவில்லை; ஆனால், அவர்கள் தங்களுக்குத் தாங்களே அநியாயம் செய்துகொண்டார்கள்.

30:42. "பூமியில் நீங்கள் சுற்றித் திரிந்து (உங்களுக்கு) முன்னிருந்தவர்களின் முடிவு என்ன ஆயிற்று என்பதை நீங்கள் கவனித்துப் பாருங்கள்: அவர்களில் பெரும்பாலோர் இணைவைப்பவர்களாகவே இருந்தனர்" என்று (நபியே!) நீர் கூறும்.

31:10. அவன் வானங்களைத் தூண்களின்றியே படைத்துள்ளான்; அதனை நீங்களும் பார்க்கிறீர்கள்; பூமியில் உங்களைக்கொண்டு அது அசையாதிருப்பதற்காக, அவன் மலைகளை உறுதியாக நிறுத்தினான்; மேலும், அதன்மீது எல்லா விதமான உயிரினங்களையும் அவன் பரவ விட்டிருக்கின்றான்; இன்னும், நாமே வானத்திலிருந்து மழையைப் பொழியச் செய்து, பின் (புற்பூண்டுகளில்) அழகான ஒவ்வொரு வகையையும் அதில் நாம் முளைப்பித்திருக்கின்றோம்.

34:18. இன்னும், அவர்களுக்கிடையிலும், எவற்றில் நாம் பாக்கியம் செய்திருக்கின்றோமோ அந்த ஊர்களுக்கிடையிலும் வெளிப்படையாகத் தெரியும்படியான பல ஊர்களையும் நாம் உண்டாக்கி, அவற்றில் போக்குவரத்து(ப் பாதைகளையு)ம் அமைத்தோம்; "அவற்றில் இரவுகளிலும், பகல்களிலும் அச்சமற்றவர்களாகப் பயணம் செய்யுங்கள்" (என்று கூறினோம்).

34:19. ஆனால் அவர்கள், "எங்கள் இறைவா! எங்களுடைய பயண(ம் செய்யும் இட)ங்களுக்கு இடையேயுள்ள தூரத்தை அதிகமாக்குவாயாக!" என்று கூறி தமக்குத்தாமே அநியாயம் செய்து கொண்டார்கள்; ஆகவே, அவர்களை (பழங்) கதைகளாக ஆக்கிவிட்டோம்; இன்னும், அவர்களை(ப் பல இடங்களில் சிதறிப்போகும்படியாய்) சிதறவைத்தோம்; நிச்சயமாக இதில் பொறுமையாளர், நன்றி செலுத்துவோர் ஒவ்வொருவருக்கும் அத்தாட்சிகள் இருக்கின்றன.

35:44. இவர்கள் பூமியில் பிரயாணம் செய்து தங்களுக்குமுன் இருந்தவர்களின் முடிவு என்னவாயிற்று என்பதைப் பார்க்கவில்லையா? மேலும், அவர்கள் வலிமையில் இவர்களைவிட வலிமை மிக்கவர்களாக இருந்தனர்; வானங்களிலோ, பூமியிலோ உள்ள எதுவும் அல்லாஹ்வை இயலாமலாக்க முடியாது. நிச்சயமாக அவன் யாவற்றையும் நன்கறிந்தவன்; பேராற்றலுடையவன்.

35:45. மனிதர்களை அவர்கள் சம்பாதித்த (தீ) வினைக்காக அல்லாஹ் அவர்களை (உடனுக்குடன்) பிடி(த்துத் தண்டி)ப்பதாக இருந்தால், அதன் (- பூமியின்) முதுகின் மீது எந்த உயிரினத்தையும் அவன் விட்டுவைக்கமாட்டான்; ஆயினும், ஒரு குறிப்பிட்ட தவணைவரை அவர்களைப் (பிடிக்காது) பிற்படுத்துகிறான்; அவர்களுடைய தவணை வந்துவிட்டால், நிச்சயமாக அல்லாஹ் தன் அடியார்களை உற்று நோக்குபவனாகவே இருக்கின்றான்.

40:21. இவர்கள் பூமியில் பயணம் செய்து, இவர்களுக்கு முன் இருந்தவர்களின் முடிவு எப்படியிருந்தது என்பதைப் பார்க்கவில்லையா? அவர்கள், பலத்தாலும், பூமியில் (விட்டுச்சென்ற பூர்வ) சின்னங்களாலும் இவர்களைவிட வலிமையுடையவர்களாகவே இருந்தார்கள்; ஆனால், அவர்களின் பாவங்களின் காரணமாக அவர்களை அல்லாஹ் பிடித்துக்கொண்டான்; இன்னும், அல்லாஹ்விடம் இருந்து அவர்களைக் காப்பாற்றுபவர் எவரும் இல்லை.

40:82. இவர்கள் பூமியில் பயணம் செய்து தங்களுக்கு முன்னர் இருந்தவர்களின் முடிவு எப்படியிருந்தது என்பதைப் பார்க்கவில்லையா? அவர்கள் இவர்களைவிட (எண்ணிக்கையில்) அதிகமானவர்களாகவும், பலத்தாலும், பூமியில் (விட்டுச்சென்ற) அடையாளச் சின்னங்களாலும் மிகக் கடினமானவர்களாகவும் இருந்தார்கள்; எனினும், அவர்கள் சம்பாதித்தது (எதுவும்) அவர்களுக்குப் பயனளிக்கவில்லை.

45:4. இன்னும், உங்களைப் படைத்திருப்பதிலும், உயிரினத்திலிருந்து அவன் பரப்பியிருப்பதிலும் (நம்பிக்கையில்) உறுதியுள்ள சமூகத்தாருக்கு அத்தாட்சிகள் இருக்கின்றன.

47:10. அவர்கள் பூமியில் பயணம் செய்து அவர்களுக்கு முன்னர் இருந்தவர்களின் முடிவு எப்படியிருந்தது என்பதைப் பார்க்கவில்லையா? அல்லாஹ் அவர்களை அடியோடு அழித்துவிட்டான்; நிராகரிப்பாளர்களுக்கும் இவை போன்றவைதாம் (முடிவுகள்) உண்டு.

48:25. அவர்கள் எத்தகையோரென்றால் (அல்லாஹ்வையும், அவனது தூதரையும்) நிராகரித்து, (கஃபா எனும்) மஸ்ஜிதுல் ஹராமை விட்டு உங்களையும், பலிப் பிராணிகளையும் - அது செல்லவேண்டிய இடத்திற்குச் செல்லாது, நிறுத்திவைக்கப்பட்டதாக இருக்கும் நிலையில் தடுத்தார்கள்; (மக்காவில் ஈமானை மறைத்துக்கொண்ட) நம்பிக்கைகொண்ட ஆண்களும் நம்பிக்கைகொண்ட பெண்களும் இல்லாதிருந்தால், அவர்களை நீங்கள் அறிந்து கொள்ளாமலேயே (உங்கள் கால்களால்) அவர்களை மிதித்திருப்பீர்கள்; (அவ்வாறே) அவர்கள் அறியாத நிலையில் அவர்கள் மூலம் உங்களுக்குத் தீங்கு ஏற்பட்டிருக்கும்; தான் நாடியவர்களைத் தனது அருளில் அல்லாஹ் நுழையச் செய்வதற்காகவே (அவன் மக்காவில் பிரவேசிக்க உங்களை அனுமதிக்கவில்லை; அங்கு இருக்கும் நம்பிக்கையாளர்களான) அவர்கள் (நிராகரிப்போரை விட்டும்) விலகியிருந்திருப்பார்களானால், அவர்களில் நிராகரித்தோரைக் கடும் வேதனையாக வேதனைகொடுத்திருப்போம்.