சொல்லிக் காட்டுவது தர்மத்தை அழித்துவிடும்

அல்லாஹ் தனது வழியில் தங்களது செல்வத்தைச் செலவிட்டு, பின்னர் அதனைப் பெற்றவர்களுக்குச் சொல்லிக்காட்டாமலும் அல்லது அவர்களைத் துன்புறுத்தாமலும் இருப்பவர்களைப் புகழ்கிறான். அந்தச் சொல்லிக்காட்டுதல் பேச்சாகவோ அல்லது செயலாகவோ இருந்தாலும் அது தவிர்க்கப்பட வேண்டும்.

அல்லாஹ்வின் கூற்றான,

وَلَا أَذًى

(அதாவது, நோவினை செய்தல்), என்பது தாங்கள் தர்மம் செய்தவர்களுக்கு எவ்விதத் தீங்கும் இழைக்க மாட்டார்கள் என்பதைக் குறிக்கிறது. ஏனெனில், இத்தகைய நோவினை அந்தத் தர்மத்தையே அழித்துவிடும். பின்னர் இத்தகைய நற்செயலுக்காக அல்லாஹ் சிறந்த நற்கூலிகளை அவர்களுக்கு வாக்களிக்கிறான்:

لَهُمْ أَجْرُهُمْ عِندَ رَبِّهِمْ

(அவர்களுக்கான கூலி அவர்களது இறைவனிடம் உண்டு). அவர்களின் இத்தகைய நற்செயல்களுக்கு அல்லாஹ்வே கூலி வழங்குவான் என்பதை இது காட்டுகிறது. மேலும்,

وَلاَ خَوْفٌ عَلَيْهِمْ

(அவர்களுக்கு எவ்வித அச்சமும் இல்லை) என்பது மறுமை நாளின் அச்சங்களைப் பற்றியதாகும்.

وَلاَ هُمْ يَحْزَنُونَ

(அவர்கள் துக்கப்படவும் மாட்டார்கள்) என்பது தாங்கள் விட்டுச் செல்லும் சந்ததியினர் குறித்தோ அல்லது இம்மையின் அலங்காரங்கள் மற்றும் இன்பங்கள் குறித்தோ அவர்கள் கவலைப்பட மாட்டார்கள் என்பதாகும். தங்களுக்குக் கிடைக்கவிருக்கும் மிகச் சிறந்த வெகுமதிகளால் அவர்கள் வருத்தமடைய மாட்டார்கள்.

பின்னர் அல்லாஹ் கூறுகிறான்:

قَوْلٌ مَّعْرُوفٌ

(இனிய சொல்) என்பது கனிவான பேச்சையும் முஸ்லிம்களுக்காகச் செய்யப்படும் பிரார்த்தனையையும் குறிக்கிறது.

وَمَغْفِرَةٌ

(மன்னிப்பு) என்பது சொல் அல்லது செயல் மூலம் தங்களுக்கு இழைக்கப்பட்ட அநீதியை மன்னிப்பதாகும்.

خَيْرٌ مِّن صَدَقَةٍ يَتْبَعُهَا أَذًى

(நோவினைத் தொடரும் தர்மத்தை (ஸதக்காவை) விட இவை சிறந்தவை.)

وَاللَّهُ غَنِىٌّ

(அல்லாஹ் எவர் தேவையும் அற்றவன்); அவன் தனது படைப்புகளிடம் எத்தேவையுமற்றவனாக இருக்கிறான்.

حَلِيمٌ

(சாந்தகுணமுடையவன்); அவன் அவர்களை மன்னித்து, சகித்துக் கொள்கிறான்.

தர்மத்தைச் சொல்லிக்காட்டுவதைத் தடை செய்யும் பல ஹதீஸ்கள் உள்ளன. உதாரணமாக, அபூ தர் (ரழி) அவர்கள் அறிவித்ததாக முஸ்லிம் (நூல்) பதிவு செய்துள்ளதாவது: அல்லாஹ்வின் தூதர் (ஸல்) அவர்கள் கூறினார்கள்:

«ثَلَاثَةٌ لَا يُكَلِّمُهُمُ اللهُ يَوْمَ الْقِيَامَةِ، وَلَا يَنْظُرُ إِلَيْهِم، وَلَا يُزَكِّيهِمْ، وَلَهُمْ عَذَابٌ أَلِيمٌ: الْمَنَّانُ بِمَا أَعْطَى، وَالْمُسْبِلُ إِزَارَهُ، وَالْمُنَفِّقُ سِلْعَتَهُ بِالْحَلِفِ الْكَاذِب»

(மறுமை நாளில் மூன்று நபர்களிடம் அல்லாஹ் பேசமாட்டான்; அவர்களைப் பார்க்கவும் மாட்டான்; அவர்களைத் தூய்மைப்படுத்தவும் மாட்டான். மேலும் அவர்களுக்கு நோவினை தரும் வேதனையுண்டு: தான் கொடுத்ததைச் சொல்லிக்காட்டுபவன், தனது ஆடையைக் கணுக்காலுக்குக் கீழே தொங்க விடுபவன், மற்றும் பொய் சத்தியம் செய்து தனது வியாபாரப் பொருளை விற்பவன்.)

இதனால்தான் அல்லாஹ் கூறுகிறான்:

يَا أَيُّهَا الَّذِينَ آمَنُوا لَا تُبْطِلُوا صَدَقَاتِكُم بِالْمَنِّ وَالْأَذَىٰ

(நம்பிக்கையாளர்களே! சொல்லிக்காட்டியும், நோவினை செய்தும் உங்கள் தர்மங்களை பாழாக்கி விடாதீர்கள்.) தர்மத்தைத் தொடர்ந்து நோவினையோ அல்லது சொல்லிக்காட்டுதலோ அமைந்தால் அந்தத் தர்மம் வீணாகிவிடும் என்று அல்லாஹ் கூறுகிறான். இச்சூழ்நிலையில், தர்மம் செய்த நற்கூலியானது, அந்த நோவினை மற்றும் சொல்லிக்காட்டுதலால் ஏற்படும் தீமையை ஈடுகட்ட போதுமானதாக இருப்பதில்லை. பின்னர் அல்லாஹ் கூறுகிறான்:

كَالَّذِي يُنفِقُ مَالَهُ رِئَاءَ النَّاسِ

(மக்களுக்குக் காட்டுவதற்காகத் தனது செல்வத்தைச் செலவிடுபவனைப் போல.) அதாவது, "மக்களுக்குக் காட்டுவதற்காக (முகஸ்துதிக்காக) தர்மம் செய்பவர்களின் தர்மம் வீணாவதைப் போல, நீங்களும் உங்கள் தர்மங்களைச் சொல்லிக்காட்டியும் நோவினை செய்தும் வீணாக்கி விடாதீர்கள்." இவ்வாறு முகஸ்துதி செய்பவன் அல்லாஹ்வுக்காகத் தர்மம் செய்வது போலப் பாசாங்கு செய்தாலும், உண்மையில் அவன் மக்களின் புகழையும், வள்ளல் அல்லது கொடையாளி என்ற பெயரையும் அல்லது உலக ஆதாயங்களையுமே நாடுகிறான். அதே நேரத்தில், அவன் அல்லாஹ்வின் திருப்பதியை நாடுவதில்லை. இதனால்தான் அல்லாஹ் கூறுகிறான்:

وَلَا يُؤْمِنُ بِاللَّهِ وَالْيَوْمِ الْآخِرِ

(அவன் அல்லாஹ்வையும் இறுதி நாளையும் நம்பமாட்டான்.)

அடுத்து, முகஸ்துதிக்காகத் தர்மம் செய்பவருக்கு அல்லாஹ் ஓர் உதாரணத்தைக் கூறுகிறான். அத்-தஹ்ஹாக் அவர்கள் கூறுகையில்: இந்த உதாரணம், தர்மம் செய்த பின் சொல்லிக்காட்டுபவனுக்கும் அல்லது நோவினை செய்பவனுக்கும் பொருந்தும் என்கிறார். அல்லாஹ் கூறுகிறான்:

فَمَثَلُهُ كَمَثَلِ صَفْوَانٍ

(அவனது உதாரணம் வழுக்கைப் பாறையைப் போன்றதாகும்.) (ஸஃப்வான் என்பது வழுக்கைப் பாறையாகும்.)

عَلَيْهِ تُرَابٌ فَأَصَابَهُ وَابِلٌ

(அதன் மீது மண் படிந்திருந்தது. அதன் மீது பெருமழை பொழிந்தது.) 'வாபில்' என்பது பெருமழையாகும்.

فَتَرَكَهُ صَلْدًا

(அப்பாறையை வழுக்கையாக விட்டுச் சென்று விட்டது.) பலத்த மழையானது அந்த 'ஸஃப்வான்' பாறையின் மீதிருந்த மண்ணை அகற்றி, அதனை வெறும் பாறையாக ஆக்கிவிட்டது என்பது இந்த வசனத்தின் பொருளாகும். முகஸ்துதிக்காகச் செயல்படுபவர்களின் செயல்களும் இவ்வாறே அழிந்து மறைந்துவிடும். அவர்களின் செயல்கள் புழுதித் துகளைப் போல ஏராளமாக இருப்பதாக மக்கள் கருதினாலும், அவை அல்லாஹ்விடம் பலனளிக்காது. எனவேதான் அல்லாஹ் கூறுகிறான்:

لَا يَقْدِرُونَ عَلَىٰ شَيْءٍ مِّمَّا كَسَبُوا ۗ وَاللَّهُ لَا يَهْدِي الْقَوْمَ الْكَافِرِينَ

(தாங்கள் சம்பாதித்த எதன் மீதும் அவர்கள் சக்தி பெறமாட்டார்கள். காஃபிரான மக்களுக்கு அல்லாஹ் நேர்வழி காட்டமாட்டான்.)