2:31. இன்னும், (இறைவன்) எல்லாப் (பொருட்களின்) பெயர்களையும் ஆதமுக்குக் கற்றுக்கொடுத்தான்; பின், அவற்றை வானவர்கள் முன் எடுத்துக்காட்டி, "நீங்கள் (உங்கள் கூற்றில்) உண்மையாளர்களாக இருப்பின் இவற்றின் பெயர்களை எனக்கு அறிவியுங்கள்" என்றான்.

2:33. "ஆதமே! அப்பொருட்களின் பெயர்களை அவர்களுக்கு அறிவிப்பீராக!" என்று (இறைவன்) சொன்னான்; அவர் அப்பெயர்களை அவர்களுக்கு அறிவித்தபோது, "நிச்சயமாக நான் வானங்களிலும் பூமியிலும் மறைந்திருப்பவற்றை அறிவேன்; நீங்கள் வெளிப்படுத்துவதையும் நீங்கள் மறைத்துக் கொண்டு இருப்பதையும் நான் அறிவேன் என்றும் உங்களிடம் நான் சொல்லவில்லையா?" என்று (இறைவன்) கூறினான்.

2:34. பின்னர், நாம் வானவர்களை நோக்கி, "ஆதமுக்குப் பணி(ந்து ஸுஜூது செய்)யுங்கள்" என்று சொன்னபோது இப்லீஸைத் தவிர மற்ற அனைவரும் பணிந்தனர்; அவன் மறுத்தான்; ஆணவமும் கொண்டான்; இன்னும், அவன் நிராகரிப்போரைச் சார்ந்தவனாகிவிட்டான்.

2:35. மேலும் நாம், "ஆதமே! நீரும் உம் மனைவியும் இச்சுவனபதியில் குடியிருங்கள்; மேலும், நீங்கள் இருவரும் விரும்பியவாறு அதிலிருந்து தாராளமாகப் புசியுங்கள்; ஆனால், நீங்கள் இருவரும் இம்மரத்தை நெருங்கவேண்டாம்; (அப்படிச் செய்தீர்களானால்,) நீங்கள் இருவரும் அக்கிரமக்காரர்களில் ஆகிவிடுவீர்கள்" என்று சொன்னோம்.

2:37. பின்னர், ஆதம் தம் இறைவனிடமிருந்து சில வார்த்தைகளைப் பெற்றுக்கொண்டார்; (இன்னும், அவற்றின் மூலமாக இறைவனிடம் மன்னிப்புக் கோரினார்;) எனவே, இறைவன் அவரை மன்னித்தான்; நிச்சயமாக அவன் மிக மன்னிப்போனும், கருணையாளனும் ஆவான்.

3:33. ஆதமையும், நூஹையும், இப்ராஹீமின் சந்ததியரையும், இம்ரானின் சந்ததியரையும் நிச்சயமாக அல்லாஹ் அகிலத்தாரைவிட மேலாகத் தேர்ந்தெடுத்தான்.

3:59. அல்லாஹ்விடத்தில் நிச்சயமாக ஈஸாவின் உதாரணம், ஆதமின் உதாரணத்தைப் போன்றதே; அவன் அவரை மண்ணிலிருந்து படைத்துப் பின் "ஆகுக" எனக் கூறினான்; அவர் ஆகிவிட்டார்.

5:27. (நபியே!) ஆதமுடைய இரு குமாரர்களின் செய்தியை உண்மையைக் கொண்டு நீர் அவர்களுக்கு ஓதிக்காண்பியும்; அவ்விருவரும் ஒரு பலியை நெருக்கமாக்கி வைத்தபோது, ஒருவரிடமிருந்து அது ஏற்றுக்கொள்ளப்பட்டது; மற்றவரிடமிருந்து அது ஏற்றுக்கொள்ளப்படவில்லை. (பின்னவர்) "நான் நிச்சயமாக உன்னைக் கொலை செய்துவிடுவேன்" என்று கூறினார்; அதற்கு (முன்னவர்) "மெய்யாகவே அல்லாஹ் ஏற்றுக்கொள்வதெல்லாம் (தன்னை) அஞ்சுபவர்களிடமிருந்துதான்" என்று கூறினார்.

7:11. நிச்சயமாக நாம் உங்களைப் படைத்தோம்; பின்பு உங்களை வடிவமைத்தோம்; அதன்பின் "ஆதமுக்குப் பணியுங்கள்" என்று வானவர்களிடம் கூறினோம்; இப்லீஸைத் தவிர (மற்ற வானவர்கள்) யாவரும் பணிந்தனர்; அவன் பணிந்தவர்களில் ஒருவனாக இருக்கவில்லை.

7:19. பின்பு, இறைவன் ஆதமை நோக்கி: "ஆதமே! நீரும், உம் மனைவியும் சுவர்க்கத்தில் குடியிருங்கள்; நீங்கள் இருவரும் நாடிய இடத்திலெல்லாம் புசியுங்கள்; ஆனால், இந்த மரத்தை (மட்டும்) நெருங்காதீர்கள்; (அப்படிச் செய்தால்) நீங்கள் இருவரும் அநியாயம் செய்தவர்களில் ஆகிவிடுவீர்கள்" (என்று அல்லாஹ் கூறினான்).

7:26. ஆதமுடைய மக்களே! மெய்யாகவே, உங்களுக்கு உங்களுடைய மானத்தை மறைக்கக்கூடிய ஆடையையும், அலங்காரத்தையும் திட்டமாக நாம் இறக்கியுள்ளோம்; இன்னும், 'இறையச்சம்' எனும் ஆடை - அதுவே மிக மேலானது; இது அல்லாஹ்வுடைய அடையாளங்களில் உள்ளதாகும்; (இதைக் கொண்டு) அவர்கள் நல்லுணர்வு பெறுவார்களாக!

7:27. ஆதமுடைய மக்களே! ஷைத்தான் உங்கள் பெற்றோர் இருவரையும், அவர்களிருவருடைய வெட்கத்தலங்களை அவ்விருவருக்கும் காண்பிப்பதற்காக அவ்விருவரின் ஆடையை அவ்விருவரை விட்டும் களைந்து, சுவனபதியை விட்டு வெளியேற்றியதுபோல் அவன் உங்களை (ஏமாற்றிச்) சோதனைக்குள்ளாக்க வேண்டாம்; நிச்சயமாக அவனும், அவன் கூட்டத்தாரும் - நீங்கள் அவர்களைப் பார்க்க முடியாதவாறு உங்களைப் பார்த்துக்கொண்டிருக்கிறார்கள்; நிச்சயமாக நம்பிக்கை கொள்ளாதவர்களுக்கு ஷைத்தான்களை நண்பர்களாக நாம் ஆக்கியுள்ளோம்.

7:31. ஆதமுடைய மக்களே! ஒவ்வொரு தொழுமிடத்திலும் (தொழும்காலம் - ஆடை முதலியவற்றைக் கொண்டு) உங்களை அலங்கரித்துக்கொள்ளுங்கள்; உண்ணுங்கள், பருகுங்கள்; எனினும், வீண்விரயம் செய்யாதீர்கள்; ஏனெனில், (அல்லாஹ்வாகிய) அவன் வீண்விரயம் செய்பவர்களை நேசிப்பதில்லை.

7:35. ஆதமுடைய மக்களே! உங்களிடம் உங்களிலிருந்தே தூதர்கள் வந்து என் வசனங்களை உங்களுக்கு விளக்கினால், அப்போது எவர்கள் (என்னை) அஞ்சி, (தம்மை) சீர்திருத்திக் கொண்டார்களோ அவர்களுக்கு அச்சமுமில்லை; அவர்கள் துக்கப்படவும் மாட்டார்கள்.

7:172. உம் இறைவன் ஆதமுடைய மக்களில் அவர்களுடைய முதுகுகளிலிருந்து அவர்களுடைய சந்ததிகளை வெளியாக்கி, அவர்களைத் தங்களுக்கே சாட்சியாக வைத்து: "நான் உங்களுடைய இறைவன் அல்லவா?" என்று கேட்டதற்கு, அவர்கள், "மெய்தான்; நாங்கள் சாட்சி கூறுகிறோம்" என்று கூறியதை நினைவூட்டுவீராக! "(ஏனெனில், நினைவூட்டப்படாததனால்) நிச்சயமாக இதனை (மறந்து)விட்டுப் பராமுகமாக இருந்து விட்டோம்" என்று மறுமைநாளில் நீங்கள் (யாருமே) சொல்லாதிருப்பதற்காக-

17:61. இன்னும், (நினைவுகூர்வீராக!) நாம் மலக்குகளிடம், "ஆதமுக்கு நீங்கள் ஸுஜூது செய்யுங்கள்" என்று கூறியபோது, இப்லீஸைத் தவிர அவர்கள் ஸுஜூது செய்தார்கள்; அவனோ, "களிமண்ணால் நீ படைத்தவருக்கா நான் ஸுஜூது செய்ய வேண்டும்?" என்று கூறினான்.

17:70. நிச்சயமாக, நாம் ஆதமுடைய சந்ததியைக் கண்ணியப்படுத்தினோம்; இன்னும், கடலிலும், கரையிலும் அவர்களைச் சுமந்து, அவர்களுக்காக நல்ல உணவும் மற்றும் பொருட்களையும் அளித்து, நாம் படைத்துள்ள படைப்புகள் பலவற்றையும்விட அவர்களை (தகுதியால்) மேன்மைப்படுத்தினோம்.

18:50. அன்றியும், 'ஆதமுக்கு ஸுஜூது செய்யுங்கள்' என்று நாம் வானவர்களிடத்தில் கூறியதை (நபியே!) நினைவுகூர்வீராக! அப்போது இப்லீஸைத் தவிர, அவர்கள் ஸுஜூது செய்தார்கள்: அவன் (இப்லீஸ்) ஜின் வர்க்கத்தைச் சேர்ந்தவனாக இருந்தான்: அவன் தன் இறைவனுடைய கட்டளையை மீறிவிட்டான்: ஆகவே, நீங்கள் என்னையன்றி அவனையும் அவன் சந்ததியரையும் (உங்களைப்) பாதுகாப்பவர்களாக எடுத்துக்கொள்கிறீர்களா? அவர்களோ உங்களுக்குப் பகைவர்களாக இருக்கிறார்கள்; அக்கிரமக்காரர்கள் (இவ்வாறு) மாற்றிக்கொண்டது மிகவும் கெட்டதாகும்.

19:58. இவர்கள் ஆதமுடைய சந்ததியிலும், நூஹ்வுடன் (கப்பலில்) நாம் ஏற்றிக்கொண்டவர்களி(ன் சந்ததியி)லும், இப்ராஹீமுடையவும், இஸ்ராயீல் (யஃகூபின்) சந்ததியிலும், இன்னும் நாம் தேர்ந்தெடுத்து நேர்வழியில் செலுத்தியவர்களிலுமுள்ள நபிமார்களாவார்கள்; இவர்கள் மீது அல்லாஹ் அருளைப் பொழிந்தான்; அளவற்ற அருளாளனின் வசனங்கள் அவர்களின் மீது ஓதப்பட்டால், அவர்கள் அழுதவர்களாகவும், ஸுஜூது செய்தவர்களாகவும் விழுவார்கள்.

20:115. முன்னர், நாம் ஆதமிடம் நிச்சயமாக வாக்குறுதி வாங்கியிருந்தோம்; ஆனால், (அதனை) அவர் மறந்துவிட்டார்; (அக்கட்டளைப்படி நடக்கும்) உறுதியை நாம் அவரிடம் காணவில்லை.

20:116. "நீங்கள் ஆதமுக்கு ஸுஜூது செய்யுங்கள்" என்று நாம் வானவர்களிடம் கூறியபோது, இப்லீஸைத் தவிர, அவர்கள் ஸுஜூது செய்தார்கள்; அவன் (அவ்வாறு செய்யாது) விலகிக் கொண்டான்.

20:120. ஆனால், ஷைத்தான் அவருக்கு ஊசலாட்டத்தை உண்டாக்கி, "ஆதமே! நித்திய வாழ்வளிக்கும் மரத்தையும், அழிவில்லாத அரசாங்கத்தையும் உமக்கு நான் அறிவித்துத் தரவா?" என்று கேட்டான்.

20:121. பின்னர், (இப்லீஸின் ஆசை வார்த்தைப்படி) அவ்விருவரும் அம் மரத்தினின்று புசித்தனர்; உடனே, அவ்விருவரின் வெட்கத்தலங்களும் வெளியாயின; ஆகவே, அவ்விருவரும் சுவர்க்கத்துச் சோலையின் இலையைக் கொண்டு அவற்றை மறைத்துக் கொள்ளலானார்கள்; இவ்வாறு ஆதம் தம்முடைய இறைவனுக்கு மாறுசெய்து, அதனால் வழிபிசகிவிட்டார்.

36:60. "ஆதமுடைய மக்களே! நீங்கள் ஷைத்தானை வணங்காதீர்கள்; நிச்சயமாக அவன் உங்களுக்குப் பகிரங்கமான பகைவன்" என்று நான் உங்களிடம் உறுதிமொழி வாங்கவில்லையா?