1072. அபூ உஸைத் அஸ்ஸாயிதீ வாயிலாக ஸஹீஹில் இதன் முழுச் சம்பவம் உள்ளது.
குறிப்பு: ஹதீஸ் முழுவதையும் அறிந்திடக் காண்க: புகாரீ 5637

1074. ``உங்களில் ஒருவர் வலீமா விருந்திற்கு அழைக்கப்பட்டால், அதற்கு அவர் (மறுக்காமல்) செல்லட்டும்'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்
முஸ்லிமின் மற்றோர் அறிவிப்பில், ``உங்கள் சகோதரன் உங்களை விருந்திற்கு அழைத்தால் நீங்கள் பதிலளியுங்கள் (செல்லுங்கள்) அது வலீமா விருந்தாகவோ அல்லது அது போன்ற மற்ற விருந்தாகவோ இருந்தாலும் (சரி)'' என்று இறைத்தூதர்(ஸல்) கூறினார்கள் என உள்ளது.

1076. ``உங்களில் ஒருவர் விருந்திற்கு அழைக்கப்பட்டால், அவர் அதனை ஏற்கட்டும்! (செல்லட்டும்). அவர் நோன்பாளியாய் இருந்தால், (அழைத்தவருக்காக) பிரார்த்திக்கட்டும். அவர் நோன்பில்லாதவராய் இருந்தால், (சென்று) உணவு உண்ணட்டும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்

1078. ``வலீமா உணவு முதல் நாளில் கடமையாகும், இரண்டாவது நாள் உணவு சுன்னத்தாகும் மூன்றாவது நாள் உணவு பகட்டாகும். பகட்டுக் காட்டுகிறவனின் குறைகளை அல்லாஹ் பகிரங்கப்படுத்துகிறான்'' என்று இறைத்தூதர்(ஸல்) கூறினார்கள் என இப்னு மஸ்வூத்(ரலி) அறிவித்தார்.
நூல்: திர்மிதீ
இதனை கரீப் என இமாம் திர்மிதீ(ரஹ்) குறிப்பிட்டுள்ளார். இதன் அறிவிப்பாளர்கள் சரியானவர்கள்.

1080. இறைத்தூதர்(ஸல்) திருமணம் செய்தபோது) தங்கள் மனைவியருக்காக இரண்டு `முத்' கோதுமையை `வலீமா' விருந்தாக கொடுத்தார்கள் என ஸஃபிய்யா பின்த்து ஷைபா(ரலி) அறிவித்தார்.
நூல்: புகாரீ

1082. ``இரண்டு பேர் ஒன்றாக (ஒரே நேரத்தில்) விருந்திற்கு அழைத்தால் உன் வீட்டிற்கு நெருக்கமானவரின் அழைப்பை நீ ஏற்றுக்கொள்! (இருப்பினும்) அவ்விருவரில், முந்திக் கொள்பவரின் அழைப்பை ஏற்றுக்கொள்!'' என்று இறைத்தூதர்(ஸல்) கூறினார்கள் என நபித்தோழர்களில் ஒருவர் அறிவித்தார்.
நூல்: அபூ தாவூத்
இதன் அறிவிப்புத் தொடர் `ளயீஃப்' எனும் பலவீனமானது.

1084. ``சிறுவனே! நீ அல்லாஹ்வின் பெயர் கூறி உன் வலக்கையால் சாப்பிடு! மேலும், உனக்கு முன்பாக உள்ளதிலிருந்து சாப்பிடு!'' என்று இறைத்தூதர்(ஸல்) என்னிடம் கூறினார்கள் என உமா இப்னு அபீ ஸலமா(ரலி) அறிவித்தார்.
நூல்கள்: புகாரீ, முஸ்லிம்

1086. இறைத்தூதர்(ஸல்) எப்போதும் உணவைக் குறை கூறியதில்லை. அவர்கள் ஒன்றை விரும்பினால், அதைப் சாப்பிடுவார்கள். அவர்கள் அதனை வெறுத்தால், அதனை விட்டுவிடுவார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்

1088. ``உங்களில் ஒருவர் பருகினால் அவர் அந்தப் பாத்திரத்தினுள் மூச்சை விடதிருக்கட்டும்'' என்று இறைத்தூதர்(ஸல்) கூறினார்கள் என அபூ கதாதா(ரலி) அறிவித்தார்.
நூல்கள்: புகாரீ, முஸ்லிம்

1090. . இறைத்தூதர்(ஸல்) தங்கள் மனைவியருக்கு மத்தியில் (தம்மிடம் உள்ளதைப்) பங்கிடுபவர்களாகவும், நீதியுடன் நடப்பவர்களாகவும் இருந்தார்கள். இன்னும், ``இரட்சகனே! இது நான் கட்டுப்பாடாக இருப்பதால் செய்யப்படும் பங்கீடாகும். என் கட்டுப்பாட்டில் இல்லாத, உன் கட்டுப்பாட்டில் உள்ளதைக் கொண்டு என்னை இழிவுபடுத்திவிடாதே!'' என்று கூறுபவர்களாகவும் இருந்தார்கள் என ஆயிஷா(ரலி) அறிவித்தார்.
நூல்கள்: அபூ தாவூத், நஸயீ, திர்மிதீ மற்றும் இப்னு மாஜா
இமாம் இப்னு ஹிப்பான் மற்றும் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள். ஆனால், `முர்ஸல்' தரம் என்பதே சரி என இமாம் திர்மிதீ(ரஹ்) குறிப்பிட்டுள்ளார்.