1145. சுபைஆ அல் அஸ்லமிய்யா(ரலி) தம் கணவரின் மரணத்திற்குப் பின்பு (குழந்தை பெற்றெடுத்து) சில இரவுகள் `நிஃபாஸ்' உதிரப் போக்குள்ளவராய் இருந்த நிலையிலேயே, அவர் நபி(ஸல்) அவர்களிடம் சென்று திருமணத்திற்கு அனுமதி கோரினார். இறைத்தூதர்(ஸல்) அவருக்கு அனுமதி அளித்தார்கள். பின்னர் அவர் திருமணம் செய்து கொண்டார் என மிஸ்வர் இப்னு மக்ரமா(ரலி) அறிவித்தார்.
நூல்: புகாரீ
இதன் மூலம் முஸ்லிமிலும் உள்ளது. மற்றோர் அறிவிப்பில், ``அவர் தம் கணவன் இறந்து நாற்பது இரவுகளுக்குப் பின்பு குழந்தை பெற்றார்'' என உள்ளது. பெண் உதிரப் போக்கு உள்ளவளாய் இருக்கும் நிலையில் திருமணம் செய்வது குற்றமில்லை. ஆனால், ``அவள் தூய்மை அடையும் வரை கணவன் அவளை நெருங்கக் கூடாது'' என்று ஜுஹ்ரி கூறினார் என முஸ்லிமின் மற்றோர் அறிவிப்பில் உள்ளது.
குறிப்பு: நறுமனம் பூசாமல், அலங்கரிக்காமல் (மிக அவசியத் தேவையன்றி) வெளியில் செல்லாமல் கணவனுக்காக துக்கத்தைக் கடைபிடிப்பது இத்தா எனப்படும்.
தலாக் விடப்பட்ட பெண் மூன்று மாதவிடாய்க் காலங்கள் கழிந்து தூய்மை அடையும் வரையும், கணவனை இழந்த பெண் நான்கு மாதங்கள் மற்றும் பத்து நாள்கள் வரை நறுமனம் பூசிக் கொள்ளாமலும், அலங்கரிக்காமலும், வீட்டை விட்டு அவசியமின்றி வெளியேராமலும் இருப்பதோடு கருவறைச் சோதனையும் செய்து கொள்ள வேண்டும்.

1147. மூன்றாம் முறை `தலாக்' செய்யப்பட்ட பெண்ணைப் பற்றிக் குறிப்பிடுகையில், ``அவளுக்குத் தங்குமிடமோ செலவுத் தொகையோ இல்லை'' என்று இறைத்தூதர்(ஸல்) கூறினார்கள் என ஃபாத்திமா பின்த் கைஸ்(ரலி) வாயிலாக அஷ்ஷுஅபிய்யீ அறிவித்தார்.
நூல்கள்: புகாரீ, முஸ்லிம்

1149. அபூ ஸலமா இறந்தப் பிறகு இத்தா காலத்தில், கண் நோய்க்காக நான் என் கண்களில் சோற்றுக் கற்றாலைச் சாற்றை இட்டுக் கெண்டேன். அப்போது நபி(ஸல்), ``அது முகத்தை வண்ணத்தால் அழகாக்கிவிடும். எனவே, அதனை இரவில் மட்டும் இட்டுக் கொள்; பகலில் அகற்றிவிடும். நறுமணம் பூசித் தலை வாராதே! ஏனெனில், அது சாயமாகும்'' எனக் கூறினார்கள்.
``எதனால் நான் தலைவாரிக் கொள்வது?'' என வினவினேன்.
``இலந்தை இலைச் சாற்றினால் தலையை வாரிக் கொள்'' என்று கூறினார்கள் என உம்மு ஸலமா(ரலி) அறிவித்தார்.
நூல்கள்: அபூ தாவூத், நஸயீ
இதன் அறிவிப்புத் தொடர் `ஹஸன்' எனும் தரத்தில் உள்ளது.

1151. என் சின்னம்மா `தலாக்' செய்யப்பட்டு (இத்தாவில்) இருந்தபோது, பேரீச்சம் பழத்தைப் பறிக்க விரும்பினார். அப்போது, அவர் வெளியில் செல்லுதல் குறித்து ஒருவர் கடிந்து கொண்டார். அதனால், (அது குறித்து சட்டம் கேட்க) அவர் நபி(ஸல்) அவர்களிடம் வந்தார். அப்போது, ``நீ உன்னுடைய பேரீச்சம் பழத்தை பறித்துக்கொள். ஏனெனில், அதனை நீ தர்மம் செய்யலாம்; அல்லது அதன் மூலம் ஏதேனும் ஒரு நல்ல காரியம் செய்யலாம்'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்: முஸ்லிம்

1153. ``இறைத்தூதர் அவர்களே! என் கணவர் என்னை மூன்று `தலாக்' செய்துவிட்டார். எனவே, இந்தக்கால கட்டத்தில் (அந்நியர்களால்) எனக்கேதும் நேர்ந்துவிடும் என நான் அஞ்சுகிறேன்'' என இறைத்தூதர்(ஸல்) அவர்களிடம் நான் கூறினேன். அதற்கு, என் வீட்டை மாற்றிக் கொள்ளுமாறு இறைத்தூதர்(ஸல்) கட்டளையிட்டார்கள்; நானும் மாற்றிக் கொண்டேன் என ஃபாத்திமா பின்த் கைஸ்(ரலி) அறிவித்தார்.
நூல்: முஸ்லிம்

1155. ``அடிமைப் பெண்ணின் தலாக் இரண்டாகும். அவளின் இத்தா காலம் இரண்டு மாதவிடாயாகும்'' என இப்னு உமர்(ரலி) கூறினார்.
இது `மர்ஃபூஃ' மற்றும் `ளயீஃப்' எனும் தரத்தில் தாரகுத்னீயில் பதிவிடப்பட்டுள்ளது.

1157. ``தன் தண்ணீரை அந்நியனின் பயிரில் பாய்ச்சுவது (கர்ப்பமுற்றிருக்கும் பெண் போர்க் கைதியுடன் அல்லது அடிமைப் பெண்ணுடன் பாலுறவு கொள்வது) அல்லாஹ்வையும் இறுதிநாளையும் நம்புகிற எந்த ஆணுக்கும் அனுமதிக்கப்பட்டதல்ல'' என்று இறைத்தூதர்(ஸல்) கூறினார்கள் என ருவைஃபி இப்னு ஸாபித்(ரலி) அறிவித்தார்.
நூல்கள்: அபூ தாவூத், திர்மிதீ
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார். இமாம் பஸ்ஸார்(ரஹ்) இதனை `ஹஸன்' எனக் குறிப்பிட்டுள்ளார்.
``ஒரு பெண்ணின் கணவன் காணாமல் போனால், அப்பெண் நான்கு ஆண்டுகள் காத்திருக்க வேண்டும். அதற்குப் பின் நான்கு மாதம் பத்து நாள் இத்தா இருக்க வேண்டும் என உமர்(ரலி) கூறினார்கள்.
நூல்கள்: மாலிக், ஷாஃபியீ

1160. ஒரு பெண்ணுடன் அவளை மணந்தவரோ, அவளை மணக்கத் தடைவிதிக்கப்பட்டுள்ள (நெருங்கிய) உறவினரோ, அன்றி, வேறு யாரும் இரவு நேரத்தில் (தனியாகத்) தங்க வேண்டாம்'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்: முஸ்லிம்

1162. ``(போர்க் கைதியாக அல்லது விலைக்கு வாங்கப்பட்ட அடிமையாக வரும்) கர்ப்பிணியாய் இருப்பவள், தன் குழந்தையைப் பெற்றெடுக்கும் வரை உறவு கொள்ள வேண்டாம். இன்னும், கர்ப்பிணியாக இல்லாதவள் ஒரு முறை மாதவிலக்காகி தூய்மை அடையாதவரை உறவு கொள்ள வேண்டாம்'' என்று இறைத்தூதர்(ஸல்) அவ்தாஸ் யுத்தக் கைதிகள் பற்றிக் குறிப்பிடுகையில் கூறினார்கள் என அபூ ஸயீத்(ரலி) அறிவித்தார்.
நூல்: அபூ தாவூத்
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்..

1164. ``(பெண்ணின்) படுக்கைக்குச் சொந்தக்காரருக்கே (அவளின்) குழந்தை உரியதாகும். (அப்பெண்ணுடன்) விபச்சாரம் செய்தவருக்கு இழப்பு (தண்டனை)தான் உரியதாகும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
குறிப்பு: அடிமைப் பெண் ஒருத்தி விபச்சாரம் செய்து அதன் மூலம் குழந்தை உண்டானால் அந்தக் குழந்தை அவளின் எஜமானனுக்கே உரியதாகும். ஒருவனின் மனைவி விபச்சாரம் செய்து அதன் மூலம் குழந்தை பிறந்தால் அந்தக் குழந்தை அவளின் கணவனுக்கே உரியதாகும். விபச்சாரம் செய்தவனுக்கு அல்லாஹ் விதித்த தண்டனைதான் கதியாகும். இதற்கு மாற்றமாக எந்த முடிவு எடுத்தாலும் இவ்வாறு பிறக்கும் குழந்தைகள் ஆதரவற்றுப் போனால் சமூகத்தில் குற்றவாளிகள் பெறுகுவதற்குக் காரணமாகும்.