1355. இறைத்தூதர்(ஸல்) குதிரைகளுக்கு மத்தியில் போட்டி வைத்தார்கள். அதிகத் தூரம் ஓடிய குதிரையைத் தேர்ந்தெடுத்தார்கள் என இப்னு உமர்(ரலி) அறிவித்தார்.
நூல்கள்: அஹ்மத், அபூ தாவூத்
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1357. இரண்டு குதிரைகளுக்கு இடையில் ஒருவர் தன்னுடைய குதிரையை நுழைத்து, அது தோற்கவும் கூடும் என்ற அச்சத்துடன் இருப்பதில் குற்றமில்லை. அது தோற்றுவிடும் என்ற அச்சமற்று இருப்பதே சூதாட்டம்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: அஹ்மத், அபூ தாவூத்
இது `ளயீஃப்' எனும் தரத்தில் பதிவிடப்பட்டுள்ளது.

1359. ``விலங்குகளில் (கோரைப் பல்லுடைய) கீறிக் கிழிக்கும் ஒவ்வொன்றையும் உண்பது விலக்கப்பட்டதாகும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்

1361. கைபரில் நாட்டுக் கழுதையின் கறியை உண்ணக் கூடாது என இறைத்தூதர்(ஸல்) தடைசெய்தார்கள். மேலும், குதிரைக் கறியை (உண்ண) அனுமதி அளித்தார்கள் என ஜாபிர்(ரலி) அறிவித்தார்.
நூல்கள்: புகாரீ, முஸ்லிம்
புகாரீயில், ``குதிரைகளுக்கு அனுமதி அளித்தார்கள்'' என உள்ளது.

1363. முயல் சம்பவத்தைப் பற்றிக் குறிப்பிடுகையில், ``அவர் (அபூ தல்ஹா) அதனை அறுத்து இறைத்தூதர்(ஸல்) அவர்களுக்கு அதன் பிட்டத்தைக் கொடுத்தார். அவர்கள் அதைப் பெற்றுக் கொண்டார்கள்'' என அனஸ்(ரலி) அறிவித்தார்.
நூல்கள்: புகாரீ, முஸ்லிம்

1365. நான் ஜாபிர்(ரலி) அவர்களிடம், ``கழுதைப்புலி வேட்டைப் பிராணியா? (ஹலாலா?)'' எனக் கேட்டேன்.
`ஆம்' என அவர் கூறினார்.
``இறைத்தூதர்(ஸல்) இதனைக் கூறியுள்ளார்களா?'' என நான் கேட்டேன்.
``ஆம்'' என்று அவர் பதிலுரைத்தார் என இப்னு அபீ அம்மார்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா
இமாம் புகாரீ மற்றும் இப்னு ஹிப்பா(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.

1367. ``அசுத்தங்களை உண்ணும் கால்நடைகளையும் அவற்றின் பாலையும் உண்ணக் கூடாது என்று இறைத்தூதர்(ஸல்) தடைசெய்தார்கள்'' என இப்னு உமர்(ரலி) அறிவித்தார்.
நூல்கள்: அபூ தாவூத், திர்மிதீ மற்றும் இப்னு மாஜா
இமாம் திர்மிதீ(ரஹ்) இதனை `ஹஸன்' எனக் குறிப்பிட்டுள்ளார்.

1369. இறைத்தூதர்(ஸல்) அவர்களின் காலத்தில் நாங்கள் ஒரு குதிரையை அறுத்து அதனை (சமைத்து) உண்டோம் என அஸ்மா பின்த் அபீ பக்கர்(ரலி) அறிவித்தார்.
நூல்கள்: புகாரீ, முஸ்லிம்

1371. இறைத்தூதர்(ஸல்) அவர்களிடம், ஒரு மருத்துவர் தவளை குறித்து, ``அதை மருந்துக்காக உபயோகிக்கலாமா?'' எனக் கேட்டார்.
உடனே, அதைக் கொல்ல வேண்டாம் என இறைத்தூதர்(ஸல்) தடைசெய்தார்கள் என அப்துர் ரஹ்மான் இப்னு உஸ்மான் அல் குரஷிய்யா(ரலி) அறிவித்தார்.
நூல்கள்: அஹ்மத், அபூ தாவூத் மற்றும் நஸயீ
இமாம் ஹாகி(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1373. ``நீ உன்னுடைய நாயை (வேட்டைக்காக) அனுப்பினால் (அதை அனுப்பும் போது), `பிஸ்மில்லாஹ்' கூறி அனுப்பு! அது உன்னிடம் (எதையேனும் வேட்டையாடிக்) கொண்டுவந்து அதனை நீ உயிருடன் கண்டால் அதனை (உண்பதற்கு முன்பு) அறுத்துக் கொள்! அப்பிராணியை அது கொன்றிருந்து, அதிலிருந்து அது (நாய்) எதையும் உண்ணாதிருந்தால் அதைச் சாப்பிட்டுக் கொள்! உன்னுடைய நாயுடன் வேறு நாயைக் கண்டு அது (வேட்டைப் பிராணி) கொல்லப்பட்டிருந்தால், அதனை உண்ணாதே! ஏனெனில், அந்த இரண்டில் எது அதைக் கொன்றது என்பது உனக்குத் தெரியாது. இன்னும், நீ உன்னுடைய அம்மை எய்யும்போது அல்லாஹ்வின் பெயரைக் கூறிக் கொள். (நீ வேட்டையாடிய அப்பிராணி) உன்னைவிட்டு ஒடி உன்னுடைய அம்பின் காயத்தைத் தவிர வேறு காயம் ஏதும் இல்லாமல் அதனை நீ (மறுநாள்) கண்டால் நீ விரும்பினால், அதனைச் சாப்பிட்டுக் கொள்! அது தண்ணீரில் மூழ்கி இருக்க நீ கண்டால் அதனை நீ உண்ணாதே!'' என்று இறைத்தூதர்(ஸல்) கூறினார்கள் என அதீ இப்னு ஹாதிம்(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசனம் இடம் பெற்றுள்ளது.