1408. நபி(ஸல்) அவர்களிடம் ஒரு கிராமவாசி வந்து, ``இறைத்தூதர் அவர்களே! பெரும் பாவங்கள் எவை?'' எனக் கேட்டார். (அறிவிப்பாளர் முழு ஹதீஸையும் கூறினார்) அதில், `பொய் சத்தியம் (பெரும் பாவங்களில் ஒன்று)'' என்றும் உள்ளது.
``இறைத்தூதர் அவர்களே! பொய் சத்தியம் என்றால் என்ன?'' என நான் வினவினேன்.
``ஒரு முஸ்லிமின் செல்வத்தைப் பொய் சொல்லியபடி சத்தியமிட்டுப் பறித்துக் கொள்கிறானே, அந்த மோசடியான சத்தியம்தான் அது'' எனக் கூறினார்கள் என்றும் அதில் உள்ளது. இதனை அப்துல்லாஹ் இப்னு அம்ர்(ரலி) அறிவித்தார்.
நூல்: புகாரீ

1410. ``அல்லாஹ்வுக்கு மொத்தம் 99 பெயர்கள் உள்ளன. அவற்றை மனனம் செய்தவர் சுவர்க்கம் புகுவார்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
திர்மிதீ மற்றும் இப்னு ஹிப்பானில் அந்த 99 பெயர்களும் குறிப்பிடப்பட்டுள்ளன. ஆனால், சில அறிவிப்பாளர்கள், அவற்றைச் சேர்த்துள்ளனர் என்பதே சரியான கருத்தாகும்.

1412. இறைத்தூதர்(ஸல்) நேர்ச்சை செய்வதைத் தடுத்து, ``அதன் மூலம் கஞ்சனிடமிருந்து (ஏழை எளியவர்களுக்காக) சிறிது பொருளை வெளியே கொண்டு வரலாம் என்பதைத் தவிர, வேறு எந்த நன்மையையும் அது தராது'' என்று கூறினார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்

1414. `இது அல்லாஹ்வுக்காகச் செய்யும் நேர்ச்சை எனக் குறிப்பிடாமல் நேர்ச்சை செய்பவன் அதை முறிக்க விரும்பினால், அதற்குரிய பரிகாரம் சத்தியத்திற்குரிய பரிகாரமேயாகும். மேலும், ஒருவர் பாவமான காரியங்களில் நேர்ச்சை செய்தால் அதற்குரிய பரிகாரமும் சத்தியத்திற்குரிய பரிகாரமேயாகும். மேலும், தன்னால் இயலாதவற்றில் நேர்ச்சை செய்பவர் (அதை முறிக்கும்போது) அதற்குரிய பரிகாரமும் சத்தியத்திற்குரிய பரிகாரமேயாகும்'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) வாயிலாக அபூ தாவூதில் ஆதாரப்பூர்வமான அறிவிப்பாளர் தொடரில் பதிவிடப்பட்டுள்ளது.
நூல்கள்: அஹ்மத், அபூதாவூத், நஸயீ இப்னு மாஜா மற்றும் திர்மிதீ
இதில் மவ்கூஃப் எனும் தரம் மேலோங்கியுள்ளது என ஹதீஸ் கலை வல்லுனர்கள் கூறியுள்ளனர்.

1416. ``பாவகாரியத்தில் செய்யப்பட்ட நேர்ச்சையை நிறைவேற்றக் கூடாது என இம்ரான்(ரலி) வாயிலாக முஸ்லிமில் உள்ளது.

1418. உன் சகோதரி (இதனால்) கஷ்டப்படுவதை வைத்து அல்லாஹ் ஏதும் செய்யப் போவதில்லை. பர்தா அணிந்து கொண்டு வாகனத்தில் செல்லச் சொல்! மேலும், மூன்று நோன்புகள் நோற்கும்படி கட்டளையிடு! என அஹ்மத், அபூ தாவூத், திர்மிரீ, நஸயீ மற்றும் இப்னு மாஜாவில் உள்ளது.
குறிப்பு: பர்தா அணியாமல் செல்வேன் என அப்பெண் நோர்ச்கை செய்திருந்ததாக மற்றோர் அறிவிப்பில் உள்ளது. எனவேதான், நபி(ஸல்) இவ்வாறு கூறினார்கள் என்பதை அறிக!

1420. இறைத்தூதர்(ஸல்) அவர்களின் காலத்தில், சில ஒட்டகங்களை `புவானா' எனும் இடத்தில் அறுப்பபதாக ஒருவர் நேர்ச்சை செய்தார். பின்னர், அவர் இறைத்தூதர்(ஸல்) அவர்களிடம் வந்து அதைப் பற்றிக் கேட்டார்.
``அங்கு ஏதேனும் சிலை வணங்கப்பட்டு வந்ததா?'' என இறைத்தூதர்(ஸல்) கேட்டார்கள்.
``இல்லை'' என அவர் கூறினார்.
``அறியாமைக்கால விழாக்களில் ஏதேனும் ஒரு திருவிழா அங்கு நடத்தப்பட்டு வந்ததா?'' என இறைத்தூதர்(ஸல்) கேட்டார்கள்.
``இல்லை'' என அவர் கூறினார். ``(அப்படியானால்) நீ உன் நேர்ச்சையை நிறைவேற்றிக் கொள்! அல்லாஹ்விற்குமாறு செய்வதாக உள்ள நேர்ச்சையைத்தான் நிறைவேற்றக் கூடாது. மேலும், உறவை முறிக்கும் நேர்ச்சையை நிறைவேற்றக் கூடாது. மேலும். ஆதமின் மகனால் இயலாதவற்றில் நேர்ச்சை இல்லை'' என்று இறைத்தூதர்(ஸல்) கூறினார்கள் என ஸாபித் இப்னு ளஹ்ஹாக்(ரலி) அறிவித்தார்.
நூல்கள்: அபூ தாவூத், தபரானீ
இங்கு தப்ரானீயின் வாசகம் இடம் பெற்றுள்ளது.
இதன் அறிவிப்புத் தொடர் ஆதாரப்பூர்வமானது.

1422. மக்கா வெற்றி நாளன்று ஒருவர் எழுந்து நின்று ``இறைத்தூதர் அவர்களே! தங்களுக்கு அல்லாஹ் மக்காவின் வெற்றியை அளித்தால் பைத்துல் மக்தஸில் இரண்டு ரக்அத்துக்கள் தொழுவதாக நான் நேர்ச்சை செய்திருந்தேன்'' எனக் கூறினார்.
``இங்கேயே தொழுது கொள்!'' என இறைத்தூதர்(ஸல்) கூறினார்கள்.
அவர் மறுபடியும் கேட்டதற்கு, ``இங்கு தொழுது கொள்!'' என்றே இறைத்தூதர்(ஸல்) கூறினார்கள்.
அவர் மூன்றாம் முறை கேட்டதும், ``அப்படியானால் நீ உன் விருப்பப்படி செய்து கொள்! என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்கள்: அஹ்மத், அபூ தாவூத்
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1424. ``இறைத்தூதர் அவர்களே! மஸ்ஜிதுல் ஹராமில் ஓர் இரவு (தங்கி) இஃதிகாஃப் இருப்பதாக நான் அறியாமைக் காலத்தில் நேர்ச்சை செய்திருந்தேன்'' என தாம் கூறினேன் என்றும், அதற்கு, ``உன் நேர்ச்சை நிறைவேற்றிக் கொள்!'' என்று இறைத்தூதர்(ஸல்) கூறினார்கள் என்றும் உமர்(ரலி) அறிவித்தார்.
நூல்கள்: புகாரீ, முஸ்லிம்
``அவ்வாறே உமர்(ரலி) ஓர் இரவு மஸ்ஜிதுல் ஹராமில் இஃதிகாஃப் இருந்தார்'' என்னும் வாசகம் புகாரீயில் அதிகப்படியாக உள்ளது.

1426. ``யாரிடம் தீர்ப்பளிக்கும் பொறுப்பு தரப்பட்டதோ அவர் கத்தி இல்லாமல் அறுக்கப்பட்டவர் போல் ஆகிறார்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னுமாஜா
இமாம் இப்னு குஸைமா மற்றும் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.
குறிப்பு: தீர்ப்பு வழங்குவதில் மிகவும் எச்சரிக்கையாக இருந்து நியாயத்தை மட்டுமே நிலைநிறுத்த வேண்டும் என்பதை அறிக!